PONGWANG LAIPEX 37
37
Jusep hia Hotüi-Honao Hwom
1Jakop chuwüi hopa hwom ngole toxkya Kanan haxtok ma wüi ngole hüi. 2Ilaxle ija a Jakop hwom kako-homkha pukax changle.
Jusep a zangbün-anüt naosünsa tuita, hopa dacha Bilhah hia Zilpah nyi sasün hwom füi tomtomle chix chuwüi chun hia zwonbu nyet ma süt. Chix hotüi-honao hwome chichang-chizang mwot mokkya kaxhobu chixe hopa hato apüi.
3Chix azule changkya füima pux-paikya chang koxle Jakop-e, sasün hwom pangnu khama Jusep to ataxle mongkün. Chixe Jusep ang nyipong ponglonu#37.3: nyipong ponglonu; chichangba oza-onyox füikya nyipong. tuita single kox. 4Chemtue hotüi-honao hwome, hopa Jakop-e hwom pangnu to nüile Jusep to mongkünkya ngünle laxpuix, chix füi zangwünse ngax chitsule hwom ang mongma.
5Jata Jusep-e wünmang tuita ngün. Chixe ija wünmang hotüi-honao hwom hama wünle kox. Ija füima sisile hwome chix to miktsak. 6Chixe thüi: “Kue wünmang mo wünfang apahüi. 7Kem pangnu wüi zang to tsaxthopbu khakle tüikya. Ku tsaxthop zo ilaxle tangthole ajong. Ipongma ija akhople hünzom tsaxthopbu hüilaxle ija to shwom.”
8Hotüi-Honao hwome thüi: “Nang wanghom ang achang laxle kwom thakma apün angkya lükya kax hia”? Ijaningle chix wünmang bobo ma chu hwom bama hopa hama khualople ngokya khoma sisile hwome chix to miktsak.
9Anaole chu Jusep-e wünmang mama mo hotüi-honao hwom hama wün. Chixe thüi: “Lyetnu, zanghan hia lyettsibu 11-e ku tong shwomle ngünle.”
10Chixe ija wünmang hopa hama chuwüi wünle kox. Hopae chix to sale thüi: “Ija a chemningkya wünmang? Hünnu hia hüntüi-hünnao hwom kwom pangnusa ngui üntoxle nang tong shwom angkya le hia?” 11#Mwt 7.9.Jusep to hotüi-honao hwome miktsak ikoxlechu hopae ibu zangwün komle chix mongkha to thom ilaxle mongzangwünle ngo.
Jusep Hangle Ijip Nok Akat
12Hanpak tuita ma Jusep hotüi-honao hwom pangwüi hopa müibu nye ang Shekem to kale tüikya. 13Jakop-e Jusep ang thüi: “Nangpi Shekem to. Hüntüi-hünnao hwome chunbu nyele ngokya khato tamkakox.”
Jusep-e lan: “Kaüia.”
14Hopae akax: “Hüntüi-hünnao hwom tamchu müibu haxmüi-zangmale tüilaxma hex, le ka üntoxle hutoxthün. Ifüima nang a wanghüi ilaxle hwom chemle tüipuix, ija ku hama wünhüi.” Ile Hebron haxnucha angkya chix hopae Shekem to tsanle akat. Jusep Shekem to ngui. 15Ikhato chix chaxwan faole aham ngopongma khünak tuitae ngünle lax. Ija mixsüne atüi: “Nange chem lompu?”
16Chixe lan: “Kue ikhato chun nyele ngokya kutüi-kunao hwom to hupu. Hwom ochichi ma tüipuix, nange awan ang cha?”
17Ija mixsüne thüi: “Ikhatokya hwom paoün koxlax, chemthüikoxle hwome Dathan chito kahax le zangwünkya kue atatdaoa.” Ikhoma hotüi-honao hwom mantole Jusep Dothan to kale ikhato hwom atak.
18Hwome chix ochu towüi ngünle lax, ilaxle chixe ikha alople machangba wüi, chix mik amüt angkya zangwün tsuak. 19Hwome tata füi akaxle thüi: “Chuja, wünmang ngünmix kem hato hüile ngole. 20Hai, kemepi chix langhax, ilaxle chix mang tuita tswomzan khato shohax, ilaxle chix a faozan chak to maxdaoa le thüihax. Ifüima chix wünmang chem ang achangchang keme huüi.”
21Ija zangwün atatlaxle Reuben-e Jusep khosün ang azong. Chixe thüi: “Keme chix mik amütle tomtata taxchanghax. 22Chix to chakmokle chichang homtoxle, keme chix tuita tswomzan to adüt-hax.” Chixe ija a Jusep khosün laxle hopa hato chatle chat ang tom angkya hanpakmale atsingle akax. 23Chemtue Jusep-e hwom ha alople changpuix, chix hotüi-honao hwome Jusep tsangtsa angkya nyipong ponglo sikle lax. 24Hwome chix kop üntoxle zuazoxkya tswomkha to adüt.
25Hwome fongsaxle ngoponge, Gilid tokhange Ijip nok to ka angkya Ishmael nokbu ngünle lax. Hwom utbu a hum-hing hia grep zanbue awangle hünzing laxle tüikya. 26Judah-e hotüi-honao hwom ang thüi: “Keme kem nao Jusep langle akhün toxkoxle kem ang olüi chemtüi? 27Kemepi chix a ibu Ishmael khünakbu ang hanghax. Ile jangchang thüiningle keme chix to chakmok angkya müntüiüi. Tamthüt koxle chix chuwüi kem zong pasa-tüinao, kem müi, kem aji changpu.” Hwom pangnu mongtsu, 28#Mwt 7.9.ilaxle Midi nok thalex mixbu hüikya zuma, hotüi-honao hwome#37.28: hotüi-honao hwom; Ibri ma hwom. Jusep dokle alailaxle Ishmael khünakbu ang khop ngunkhix khaotsa ang hangle apao. Hwome chix Ijip nok to jo.
29Reuben chatlaxle tswomkha to hukoxle ikhama Jusep chibangkya zuma chix ang mongma ilaxle chix nyi-za akyet. 30Chixe hotüi-honao hwom hato chatlaxle thüi: “Jusep a tswomkha khama müntüi. Athaxpi kue chemle hwonüi?”
31Ifüima hwome chun tuita lang ilaxle Jusep nyipong a ija aji khato som. 32Hwome ija nyipong hopa hato wünlaxle thüi: “Kwome ija lomba to atakle. Ija hünsa kux changchahex”?
33Chixe ija nyipong tsingle lax, ilaxle lan: “Changlea! Ija a chix nyipong jaojao changpu. Chix a faozan-e saxdaokya changa. Ku sasün Jusep a shaole akhixdaoa!” 34Mongma laxle Jakop-e nyipong akyet ilaxle nyikhwon awun. Chixe sasün hanpakma okuilole mang sople ngo. 35Chix sasün hia sacha hwom pangwüi chix mong asom ang hüi, ikoxlechu chix ang mongsom chikop. Chixe thüi: “Ku a lumting tochu kusa mangsopnga lüwüi ka angkya changle.” Ile chix sasün Jusep mangsopkya tamchizaktox.
36Ipongma Ijip nok to Midi nokbue Jusep a Potifar ang hang. Chix a wanghom pa ma alixachong tamchu chongwang homkha nyetmixbu khama lompa tuita changkya.
Currently Selected:
PONGWANG LAIPEX 37: WANCBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.