PONGWANG LAIPEX 12
12
Zang-e Abram Nyakkya
1 #
Mwt 7.2,3; Ibr 11.8. Jowanpae Abraham ang thüi: “Nang ting-nok, nang haxnu-homsa tamchu hünpa hwom homkha, ibu pangwüi dantox dao ilaxle kue nang ang fang angkya haxtok aho angkya khato paolax. 2Kue nang ang su-sabu huanuma koxüi ilaxle hwom a chongkya jat-li tuita ang achangüi. Kue nang to mohimanüi ilaxle nang fuale wünkya mix ang achangüi, ikoxle nang a mohiman tuita ang achangüi.
3 #
Gal 3.8. “Nang to mohimankyabu to kue mohimanüi;
nang to thuakzomkyabu to kue thuakzomüi.
Nang makhange pangnu jat-li to mohimanüi.”#12.3: Üntoxle…mohimanüi; chichangba Pangnu jat-lie kue nang to mohimankya ningle hwom to su-sa mohimanhüi le thüiüi.
4Chemtue Abram zanglao 75 nguile hüipuix, Jowanpae chix füi akaxkya ningle, chix a Haran angkya achexle pao; ilaxle Lot a chix füi tomle pao. 5Abram-e chix füi tomle chix kakonu Sarai, hotüi sasün Lot ilaxle Haran ma tüipongma chixe kopkya tuina hia dabu komkaile laxlaxle Kanan haxtok to achexle ka.
Chemtue hwome Kanan aloppuix, 6Shekem angkya otsao nui ma tüikya otsao pünnu Moreh ha alople Abram aham. (Ipongma ija haxtok ma Kanan nok ating-anok lüwüi tüikya.) 7#Mwt 7.5; Gal 3.16.Jowanpa a Abram hato ngaile lai ilaxle chix füi akaxle thüi: “Ija a kue nang su-sabu ang kox angkya haxtok changpu.” Ifüima Abram-e, chix hato ngaile ahokya Jowanpa ang tötsap tuita zingle kox. 8Ija füima chix haxhua angkya Bethel tingnu zongma handün chikao to pao ilaxle hannopchi ma Bethel üntoxle handünchi ma Ai, ija tingnu anyi zo ma chixe pom zai. Ikhato chixe Jowanpa to shwom ang tö-tsap tuita zing. 9Ifüima chix tuita makhange ata nuito le ahamle chix Kanan haxtok shuathong chikao to ju.
Ijip Nok to Abram
10Ipongma Kanan haxtok ma otui-onuak le le asu, ikhoma onox tuita ngole tox angkya hanpakma Abram a shuathongchi Ijip nok alople jao ju. 11Chixe Ijip nok longzi alople hwom chaxwan to nopüikhakha ma, chixe chix kakonu Sarai ang thüi: “Nang a osün müikya mixcha tuita changle. 12Chemtue Ijip noke nang ngünle laxüihex, hwome nang a ku kakonu changle le ajanglaxüi, ilaxle nang thom angkya kuxmale hwom ku langüi. 13#Pon 20.2; 26.7.Hwom hama nang a kunao changle le akaxlax; ile nang hanpakma hwome ku to müile humele thomüi.” 14Chemtue chixe Ijip nok longzi akaile nguipuix, Ijip noke chix kakonu a tüle osün müikya mixcha changle le ngünle lax. 15Züizüi wanghom khua angkya alixachongbue chemtue ngünle laxpuix, hwome ija mixcha osün müikya bama wanghompa hama wünle kox; ikhoma she a wanghompa khua to apüi. 16She khoma wanghompa-e Abram to müile hume ilaxle chix ang chun zyembu hia zwon, maihu, mantsak, dabu tamchu utbu pangwüi kox.
17Ikoxlechu wanghompa-e Sarai chix kako ang laxkya khoma, Jowanpae chix hato tamchu chix khua ma ngokya khünakbu hato khomtsikya kaklak ahüi. 18Ofüima wanghompa-e Abram se ang apaolaxle thüi: “Nange ku to ija chem hwonpu? Nange she a nang kakonu changpule büthüikoxle chiakax? 19Nange she a nang nao changpule büthüikoxle akax? Nange ku ang she lax ang tompu? Ija laxlax nang kakonu a; she koplax ilaxle laile paolax!” 20Wanghompa-e kaxtom koxkya khoma, chix khünakbue Abram kop ilaxle hwom chaxwan akaile pao ang tom. Chix füi tomle ma kakonu Sarai hia chix tuina komle laxle pao ang tom.
Currently Selected:
PONGWANG LAIPEX 12: WANCBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.