LAIPAO 1
1
Ijip Noke Israel Nok to Zothup
1 #
Pon 46.8-27. Jakop sasün hwom chix füi tomle Ijip nok to, ma kakoko koplaxle kakyabu a, 2Reuben, Simeon, Liwi, Judah, 3Isakar, Zebulun, Benjamin, 4Dan, Neptali, Gad, üntoxle Ashar hwom bibi changkya. 5Ibu khünak Jakop makhange küithole hüikyabu a mixhuak puzombün#1.5: Hozang Laitai Tuita ma puzombün-aga (Mwt 7.14 to hulax). changkya. Sasün Jusep a Ijip nok to tüingoünkya. 6Namngo-ngokya füima, Jusep, chixtui-chixnao hwom, ilaxle hwom sixli komkaile zile pao. 7#Mwt 7.17.Ikoxlechu hwomsix-hwomli, Israel khünaknu müimamale pu-tsale hüi. Ijip haxtok hwom-hwome wüi awangle tüle tsak-zongle hüi.
8 #
Mwt 7.18. Ofüima, wanghom hozün, Jusep owahex ija jaojao chitikkya tuitae Ijip haxtok apün. 9Chixe chix khünaknu ang thüi: “Ibu Israel khünaknu a huanuma pu-tsale tamchu zaxzangle hüile. Ija bama kem ang khünzai angkya olom tuita tüile. 10#Mwt 7.19.Achax-azanle changpongma hwom kem zan to ka ang zan-nok füito sele chang ang tsuak, ilaxle kem chaxwan angkya paole#1.10: paole azangle; chichangba apün-awangle. chang ang tsuak. Keme hwom othüt chitüile pu-tsale hüikya azak angkya olom atak angkya wüi changle.”
11Idaile Ijip noke hwom thakma, atsangle hwom ang mwot amokle zoshun ang tom angkya hanpakma, hwom mwot akhi angkya khünakbu kamle dan. Wanghompa hanpakma thalex-juatai otong ang lax angkya hanpakma Israel khünakbue Pithom hia Rameses tingnubu zingle alai. 12Ikoxlechu chemtukux Ijip noke hwom to sikangünpuix itukuxle Israel khünakbu sisile tsale chaxwan khao jaojao awangle hüi. Ijip nok ang Israel nok thuaza angkya hato ahüi. 13-14Ikhoma hwome Israel khünakbu ang mwot atsangle amok laxle chingcha ashukle da chifün ma ngo ang tom. Hwome Israel khünakbu ang haxzai-homzai hia haxtok manzai to lünle atsangle amok.
15Ofüima Ijip nok wanghompa-e, Ibri khünak naotswonnu, Shifrah hia Puah nyi füi akax. 16Chixe thüi: “Chemtue hünkhie Ibri khünakbu sapux-naopai to asunle changpuix, lüka naosa jangchangba, ija nao langle awütdao; ikoxle ija a shekosa jangchang, taxlang.”
17Ikoxlechu ija naotswonnu nyi a Zang thua zakya mixcha nyi changkya, idaile hokhie wanghompa kax ma chilax, ikoxle lüka naosom azün. 18Ikhoma wanghompa-e ija naotswonnu nyi sele apüilaxle atüi: “Hünkhie ija chem hwonpu? Lüka naosom chilangle büthüikoxle ozün ma toxpu?”
19Okhie lan: “Ibri shekobu a Ijip shekobu ningle münchang; hwome naosom ochwon ma ngünle, ikhoma hwom naosombu a kukhi opupuchu manguiba wüi puxdaole bangle.” 20-21Naotswonnu nyi a Zang thuazakya mixcha nyi daile hokhi füi Zang mongzom müi ikhoma hwom pu-tsa ang tom. Israel khünakbu chizakle pu-tsale tüle zaxzangle hüi. 22#Mwt 7.19.Oshukma wanghompa-e chix khünakbu pangnu hato ija kax kox: “Lüka naosa apuxpux koplaxle Nail shuanu to tswonle awütle lang kox, ikoxle shekosasa dantoxkox.”
Currently Selected:
LAIPAO 1: WANCBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
