SHURAI 2
2
1Sübüa tei ae deiphao alia sühi buyu ha teitei nou souchere. 2Alia teithe anai zhousü Puhnou soure souchewua soupu moa asore. 3Alia Ramai nou teithe anai nasü shiha peie alia soushee peie daiolouzü süzhou teithe hai teideiphao souchewure. 4Raki ae deiphao soushurai ko sü haitaoe.
Eden Kipei
Ramai Mapao nou teideiphao souyu kisü, 5deiphao hi süübe hrümo hie ae vupou paopa mohie- daiolouzü Ramai Mapao nou deiphao hi panou teirü koumo hie ae dei nasü mailinoua tahpeire hahie; 6ana deikhe hinou dzü paloua teirü kouhpeie.
7Süthaisü Ramai Mapao nou dei hinou nai poloua maiye#2.7 nai...mai: Hebrew mai la hai “nai” ae “mai” touyu hai raibüa baie. soupeie, alia puh nghou qulu hisü ahri ssü houthou peie ae sübüa maisü hrikhaona ali souloue. 8Alia Ramai Mapao nou teinghi palo Eden hi kipei ali soukhai peie; ae puhnou soukhai touyu mai nasü sühi pove khaipeie. 9Ramai Mapao nou ngaovei shoyu ae touvei shoyu rashibe tya tyali hai dei hinou panou paopa loue. Ahri süübe ae aveih ashi sükulouyu süübe hai kipei toutsü hisü bue.#2.9; 2.17 aveih ashi sükulouyu; moa ha veishi sükulouyu tsü.
10Rei ali Eden kipei hinou kipei dzü züloure donou küpa peie, alia sühinou rei adai soua küratae. 11Rei araina zhih hai Pishon toue; alia sünanou Havilah dei teitei hi kütawe; 12ae dei süna hisü sana, mutei chuh, dellium ae onyx haitya-a bue. 13Rei ahai chena zhihsü Gihon toue; hainanou Kush teidei teitei kühaowe.#2.13 Kush (Mesopotamia); moa Ethiopia. 14Rei asü chena zhih hai Tigris touwe; haina hai Assiria teinghi palo kütawe. Alia adai chenasü Euphrat touwe.
15Ramai Mapao nou mai naye sü Eden kipei hi panou tah tahtoua ae khopeire donou sühi poa khai peie. 16Süthaisü Ramai Mapao nou mai hisü kharochi peia paoe, “Kipei hi süübe buyu tarali hinoua nenou rashi tounü nasü toua bailai; 17ana aveih ashi sükuloure#2.9; 2.17 aveih ashi sükuloure; moa ha veishi süloure. süübe nahisü nenou rashi haitou laimoe, süna toulouyu teithe nou ne thai bailai.”
18Süthaisü Ramai Mapao nou “Maina hai puh likhu buyu veimore, südonou puhye donou thaobüyu soukha peire mai ali Enou soupeilai” tea paore. 19Sükua dei hinou nai poloua soukhaona ae teihi raohou khemai souloua sütaoye panou zhih sapeire donou maina hi pove khaipeie, alia hrikhaona taoye mai nanou zhih sapeiyu nasü süna zhih soure. 20Sükua mai nanou kikhaorü, teihi raohou ae resou khaona hrülai zhih hai sapeie; ana sütao hinou puhye donou thaobüa soukha peiloure ngaolou moe.
21Süthaisü Ramai Mapao nou mai nasü panou zhai shishoa zhiloure ae puhnou zhia buyu kinou puhvei turao ali phaloua süna thaosü vasou nou pothou hopeire. 22Alia mai nahinou popa louyu turao nou Ramai Mapao nou naotumai ali souloua sünapai sü mai nahi pove khaipeie. 23Süthaisü mai nanou paoe,
“Haisü rao-a araoe ae vasou-a ava soue;
Puhsü naotumai tea kulai daiolouzü puhsü maina hinou popaloua baie.”#2.23 naotumai...mai: Hebrew mai la hi “naotumai” ae “mai” tea kuyu lakho hai raibüa baie.
24Südonou maina nou lah puh pfüpuoye thaowua puh chapfü hi ve hrütawe ae sübüa puhaisü vahsou ali soutae. 25Alia poutuna ae naotupai haisü baitoua bubaie, ana puh haisü hao moe.
Currently Selected:
SHURAI 2: POUMBSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
