PSALMS 90:12-17
PSALMS 90:12-17 Die Boodskap (DB)
Daarom vra ons: Help ons om U te dien en om gelukkig te lewe. Maak ons slim sodat ons elke dag sal gebruik om reg te doen. Here, hoe lank gaan U nog kwaad bly? Wanneer kom help U ons? Omvou almal wat U dien met u liefde! Gee ons elke dag arms vol van u groot liefde! Dan sal ons vir die res van ons lewe juig en bly wees. Gee vir ons net soveel blydskap as die swaarkry wat ons gehad het. Laat almal wat U dien, raaksien wat U doen. Wys vir ons wat ’n vol en gelukkige lewe U gee, ook vir ons kinders. Ons bid dat die Here ons God vir ons baie goed sal wees. Maak al ons planne voorspoedig. Gee sukses op alles wat ons begin doen het.
PSALMS 90:12-17 Bybel vir almal (ABA)
U moet vir ons leer om elke dag so te lewe dat ons wyse mense sal word. Here, wanneer sal U weer jammer wees vir die mense wat vir U dien? U moet ons elke oggend help om te verstaan dat U doen wat U belowe het, dan sal ons juig en bly wees, so lank soos ons lewe. U het ons lank laat swaarkry, dit het lank sleg gegaan met ons. U moet ons nou lank bly laat wees. U moet vir ons, u dienaars, wys wat U doen, U moet Koning wees, ook Koning van ons kinders. Here, ons God, U moet goed wees vir ons, U moet dit goed laat gaan met die dinge wat ons doen, ja, met al die dinge wat ons doen, U moet dit goed laat gaan met alles wat ons doen.
PSALMS 90:12-17 Afrikaans 1933/1953 (AFR53)
Leer ons om ons dae so te tel dat ons 'n wyse hart mag bekom! Keer terug, HERE! Tot hoe lank? En ontferm U oor u knegte. Versadig ons in die môre met u goedertierenheid, sodat ons kan jubel en bly wees in al ons dae. Maak ons bly na die dae waarin U ons verdruk het, na die jare waarin ons onheil gesien het. Laat u werk vir u knegte sigbaar word en u heerlikheid oor hulle kinders. En laat die lieflikheid van die HERE onse God oor ons wees, en bevestig die werk van ons hande oor ons, ja, die werk van ons hande, bevestig dit!
PSALMS 90:12-17 Afrikaans 1983 (AFR83)
Leer ons ons dae so gebruik dat ons wysheid bekom. Hoe lank nog, Here, voordat U ons te hulp kom? Ontferm U tog oor ons. Skenk ons elke dag u liefde in oorvloed, dat ons ons lewe lank mag juig en bly wees. Soveel dae as dié waarin U ons verdruk het, soveel jare as dié waarin ons gely het, gee ons soveel jare van blydskap. Laat u werk vir ons duidelik word en u grootheid vir ons kinders. Laat ons die goedheid van die Here ons God belewe: hou die werk van ons hande in stand, ja, die werk van ons hande, hou dit in stand.
PSALMS 90:12-17 Die Bybel 2020-vertaling (AFR20)
Om ons lewensdae na waarde te skat – dit moet U ons leer, sodat ons 'n hart vol wysheid kan verwerf. Keer terug, HERE! Hoe lank nog? Ontferm U oor u diensknegte. Versadig ons in die oggend met u troue liefde, sodat ons al die dae van ons lewe kan juig en bly wees. Maak ons bly vir net so lank as wat U ons verdruk het, as die jare waarin ons teenspoed beleef het. Mag u werk vir u diensknegte duidelik word, en u glansryke dade vir hulle kinders. Mag die goedheid van my Heer, ons God, oor ons wees. En ons handewerk, hou dit vir ons in stand, ja, ons handewerk, hou dit in stand.
PSALMS 90:12-17 Contemporary Afrikaans Bible 2023 (CAB23)
Leer ons dus om ons dae te tel, sodat ons ons harte op wysheid kan wend. Keer terug, o HERE, hoe lank? en laat dit jou berou oor U dienaars. O, maak ons vroeg versadig met U goedertierenheid; dat ons kan jubel en bly wees al ons dae. Maak ons bly volgens die dae waarin U ons verdruk het en die jare waarin ons onheil gesien het. Laat U werk aan U dienaars verskyn en U eer aan hulle kinders. En laat die skoonheid van die HERE onse God oor ons wees, en bevestig die werk van ons hande op ons; ja, die werk van ons hande bevestig dit.
PSALMS 90:12-17 Nuwe Lewende Vertaling (NLV)
Leer ons ons dae só gebruik dat ons wysheid kan bekom. Kom terug, HERE! Hoe lank gaan U nog uitstel? Ontferm U tog oor u dienaars! Vul ons met u genade in die oggend, dan sing ons van vreugde al ons dae. Gee ons vreugde na al ons lyding, na al die jare van onheil wat ons beleef het. Laat al u dienaars u werke sien, en hulle kinders u heerlikheid. En mag die Here ons God sy goedheid aan ons bewys, en die werk van ons hande bevestig. Ja, bevestig die werk van ons hande!
