PSALMS 46:9-12

PSALMS 46:9-12 Bybel vir almal (ABA)

Julle moet kom kyk wat die Here doen, kom kyk watter wonderlike dinge Hy op die aarde doen: Hy het oorloë laat ophou op die hele aarde, Hy het pyl en boog gebreek, spiese stukkend geslaan en skilde verbrand. Hy het gesê: “Julle moet ophou veg, julle moet weet dat Ek God is, Ek is hoog bo die volke, hoog bo die aarde.” Die Here wat oor alles regeer, is by ons, die God van Jakob beskerm ons. Sela

PSALMS 46:9-12 Afrikaans 1933/1953 (AFR53)

Kom, aanskou die dade van die HERE, wat verskriklike dinge oor die aarde bring, wat die oorloë laat ophou tot by die einde van die aarde, die boog verbreek en die spies stukkend slaan, die strydwaens met vuur verbrand. Laat staan en weet dat Ek God is; Ek sal hoog wees onder die nasies, hoog op die aarde. Die HERE van die leërskare is met ons; die God van Jakob is 'n rotsvesting vir ons. Sela.

PSALMS 46:9-12 Afrikaans 1983 (AFR83)

Kom kyk wat die Here gedoen het, watter ontsettende dinge Hy op die aarde tot stand bring: die oorloë oor die hele aarde laat Hy ophou, pyle en boë verbreek Hy, spiese slaan Hy stukkend, oorlogswaens verbrand Hy met vuur. Bedaar en erken dat Ek God is, hoog bo die nasies, hoog bo die aarde. Die Here, die Almagtige, is by ons, die God van Jakob is vir ons 'n beskutting. Sela

PSALMS 46:9-12 Die Bybel 2020-vertaling (AFR20)

Kom kyk na die dade van die HERE, Hy wat skrikwekkende dinge op aarde doen, wat oorloë laat ophou tot aan die einde van die aarde. Boë breek Hy stukkend en Hy verpletter spiese; waens verbrand Hy in die vuur. “Bedaar en erken dat Ek God is, Ek is verhewe bo die nasies, Ek is verhewe bo die aarde.” Die HERE, Heerser oor alle magte, is met ons, 'n toevlugsoord is die God van Jakob vir ons. Sela

PSALMS 46:9-12 Die Boodskap (DB)

Kom kyk wat die Here alles op die aarde doen. Dit is verstommend. Hy maak oral ’n einde aan die bakleiery tussen mense. Die wapens waarmee mense oorlog maak, vernietig Hy met vuur. Wees stil en weet Ek is God. Ek regeer oor nasies, oor die hele aarde. Elke mens sal erken dat Ek die belangrikste is. Niks en niemand is en kan so belangrik wees soos Ek nie. Die Here, vir wie niks onmoontlik is nie, is by ons. Hy is ons groot Bevelvoerder. Die God op wie Jakob ook vertrou het, sal ons beskerm.

PSALMS 46:9-12 Nuwe Lewende Vertaling (NLV)

Kom, aanskou die werke van die HERE, wat verwoesting bring op die aarde en oorloë beëindig oor die hele aarde. Hy verbreek die boog en vernietig die spies. Die skilde verbrand Hy met vuur. “Wees stil en weet Ek is God! Ek sal vereer word deur die nasies, verhewe wees oor die hele aarde.” Die HERE, die Almagtige, is by ons. Ons skuilplek is die God van Jakob. Sela