PSALMS 150:1-5
PSALMS 150:1-5 Bybel vir almal (ABA)
Julle moet die Here prys! Julle moet God prys in sy tempel, julle moet Hom prys onder sy sterk hemeldak. Julle moet Hom prys omdat Hy groot dinge gedoen het, julle moet Hom prys, want Hy is baie groot. Julle moet die ramshorings blaas, julle moet die Here prys. Julle moet op die harpe en die liere speel, julle moet die Here prys. Julle moet op die tamboeryne slaan en julle moet dans, julle moet die Here prys. Julle moet snaarmusiek maak en julle moet die fluite blaas, julle moet die Here prys. Julle moet die simbale teen mekaar slaan, almal moet dit hoor, dit moet raas.
PSALMS 150:1-5 Afrikaans 1933/1953 (AFR53)
HALLELUJA! Loof God in sy heiligdom, loof Hom in sy sterk uitspansel! Loof Hom oor sy magtige dade, loof Hom na die volheid van sy grootheid! Loof Hom met basuingeklank, loof Hom met harp en siter; loof Hom met tamboeryn en koordans, loof Hom met snarespel en fluit; loof Hom met helder simbale, loof Hom met klinkende simbale!
PSALMS 150:1-5 Afrikaans 1983 (AFR83)
Prys die Here! Prys God in sy heiligdom, prys Hom hier onder sy magtige hemelgewelf! Prys Hom oor sy kragtige dade, prys Hom in sy magtige grootheid! Prys Hom met die ramshoring, prys Hom met harp en lier! Prys Hom met tamboeryn en koordanse, prys Hom met snaarinstrumente en fluite! Prys Hom met simbale, prys Hom met galmende simbale!
PSALMS 150:1-5 Die Bybel 2020-vertaling (AFR20)
Halleluja! Loof God in sy heiligdom, loof Hom in sy magtige hemelkoepel; loof Hom oor sy kragtige dade, loof Hom na die omvang van sy grootheid! Loof Hom met die geskal van •ramshorings, loof Hom met harp en lier; loof Hom met tamboeryn en koordans, loof Hom met snaarinstrument en fluit; loof Hom met die klank van simbale, loof Hom met die slag van simbale!
PSALMS 150:1-5 Contemporary Afrikaans Bible 2023 (CAB23)
Prys die HERE. Loof God in sy heiligdom, loof Hom in die uitspansel van sy krag. Prys Hom vir sy magtige dade, loof Hom na sy voortreflike grootheid. Loof Hom met die geluid van die basuin, loof Hom met die harp en die siter. Loof Hom met die tamboeryn en dans, loof Hom met snaarinstrumente en orrels. Loof Hom met die simbale wat lui, loof Hom met die simbale wat hoog klink.
PSALMS 150:1-5 Die Boodskap (DB)
Kom prys die Here. Prys God. Aanbid Hom in sy woonplek op aarde, want Hy is heilig. Loof Hom. Hy is so groot, die wye hemelruim is net ’n stukkie van sy blyplek. Prys Hom omdat Hy so sterk is. Loof Hom, want sy grootheid kan jy op geen manier meet nie. Prys Hom met alle musiekinstrumente. Loof Hom met trompette, kitare en viole. Prys Hom met ’n instrument of deur te sing en te dans. Loof Hom deur snare te tokkel en ’n fluit te blaas. Simbale se klanke roep lof aan die Here uit. Loof Hom deur die suiwer klanke.
PSALMS 150:1-5 Nuwe Lewende Vertaling (NLV)
Loof die HERE! Loof God in sy heiligdom! Loof Hom onder sy magtige uitspansel! Loof Hom vir sy magtige dade. Loof Hom vir sy eindelose grootheid. Loof Hom met die ramshoring. Loof Hom met lier en harp! Loof Hom met tamboeryn en koordanse. Loof Hom met snaarinstrumente en fluite! Loof Hom met die klank van simbale. Loof Hom met galmende simbale.