PSALMS 116:1-19
PSALMS 116:1-19 Bybel vir almal (ABA)
Ek is lief vir die Here, want Hy luister wanneer ek tot Hom bid, wanneer ek vra dat Hy my moet help. Want Hy luister wanneer ek bid, daarom sal ek tot Hom bid so lank soos ek lewe. Bande van die dood was rondom my, ek was bang om na die doderyk te gaan, dit het sleg gegaan met my, ek het baie swaar gekry. Toe het ek tot die Here gebid en geroep: “Here, asseblief, red my lewe!” Die Here is genadig, Hy doen reg, ons God is goed vir mense wat swaarkry. Hy beskerm jongmense wat baie min weet, Hy het my gered toe ek moedeloos was. Ek moet nou ophou om bekommerd te wees, want die Here het goeie dinge gedoen aan my. Ja, U het gekeer sodat ek nie sterf nie, U het my gehelp, en ek het opgehou huil, U het gekeer sodat ek nie val nie. Nou lewe ek naby die Here tussen mense wat lewe. Ek het aangehou om te glo dat die Here my sal help, ook toe ek gedink het dat dit baie sleg gaan met my. Ek was baie bang, en ek het gedink daar is niemand wat ek kan vertrou nie. Die Here het baie goeie dinge vir my gedoen. Wat kan ek vir Hom doen? Ek sal 'n drank-offer bring en ek sal roep en sê: “Here!” Ek sal my geloftes aan die Here betaal waar die hele volk dit sien. Die lewens van die mense wat in die Here glo, is vir Hom kosbaar. Here, ek bid tot U, want ek behoort aan U, my ma het aan U behoort, en ek behoort aan U. U het die bande losgemaak wat my vasgehou het. Ek sal vir U 'n dank-offer bring, ek sal roep en sê: “Here!” Ek sal my geloftes aan die Here betaal waar sy volk dit kan sien, ek sal al die geloftes betaal. Ek sal dit doen op die oop stuk grond by die tempel, binne-in jou, Jerusalem.
PSALMS 116:1-19 Afrikaans 1933/1953 (AFR53)
EK het lief, want die HERE hoor my stem, my smekinge, want Hy het sy oor tot my geneig; daarom sal ek Hom in my dae aanroep. Bande van die dood het my omring, en angste van die doderyk het my getref; ek het benoudheid en kommer gevind. Maar ek het die Naam van die HERE aangeroep: Ag, HERE, red my siel. Die HERE is genadig en regverdig, en onse God is 'n ontfermer. Die HERE bewaar die eenvoudiges; ek het swak geword, maar Hy het my gehelp. My siel, keer terug tot jou rus; want die HERE het goed aan jou gedoen. Want U het my siel gered van die dood, my oog van trane, my voet van struikeling. Ek sal wandel voor die aangesig van die HERE in die lande van die lewendes. Ek het geglo toe ek gespreek het: Ék is diep neergebuig. Ék het in my angs gesê: Alle mense is leuenaars. Wat sal ek die HERE vergeld vir al sy weldade aan my? Ek sal die beker van verlossinge opneem en die Naam van die HERE aanroep. My geloftes sal ek aan die HERE betaal in die teenwoordigheid van sy ganse volk. Kosbaar is in die oë van die HERE die dood van sy gunsgenote. Ag, HERE, sekerlik, ek is u kneg, ek is u kneg, die seun van u diensmaagd; U het my bande losgemaak. Ek sal U 'n offer van danksegging bring en die Naam van die HERE aanroep. Ek sal my geloftes aan die HERE betaal in die teenwoordigheid van sy ganse volk, in die voorhowe van die huis van die HERE, binne-in jou, o Jerusalem! Halleluja!
PSALMS 116:1-19 Afrikaans 1983 (AFR83)
Ek het die Here lief, want Hy verhoor my smeekgebede. Hy het na my geluister toe ek Hom aangeroep het. Bande van die dood het my omsluit, doodsangs het my aangegryp, ek het benoud en bekommerd geword. Toe het ek die Naam van die Here aangeroep: “Here, red my tog!” Die Here is genadig en regverdig, ons God ontferm Hom oor ons. Die Here beskerm die hulpeloses: ek was magteloos, maar Hy het my gered. Ek moet nou tot rus kom, die Here het goed aan my gedoen: U het my van die dood gered, U het 'n einde gemaak aan my trane, U het gesorg dat ek nie weer struikel nie. Ek kon voor die Here bly wandel in die land van die lewendes. Ek het in U bly glo, selfs toe ek gedink het dit is klaar met my en toe ek in my vertwyfeling besef het: ek kan op geen mens staatmaak nie. Hoe sal ek die Here vergoed vir al sy weldade aan my? Met 'n drankoffer sal ek van sy redding getuig en die Naam van die Here aanroep. My geloftes aan die Here sal ek betaal in die teenwoordigheid van sy hele volk. Vir die Here is die dood van sy troue dienaars geen geringe saak nie. Ek is u dienaar, Here, van my geboorte af is ek al u dienaar: U het my vrygemaak. Ek wil U loof met 'n dankoffer, ek wil die Naam van die Here aanroep. My geloftes aan die Here sal ek betaal in die teenwoordigheid van sy hele volk, in die voorhowe van die huis van die Here, binne-in jou, Jerusalem! Prys die Here!
PSALMS 116:1-19 Die Bybel 2020-vertaling (AFR20)
Ek het die HERE lief, want Hy luister na my stem, my smeekgebed; ja, Hy draai sy oor na my, en solank ek leef, sal ek Hom aanroep. Bande van die dood het my omsluit; angste van die •doderyk het my oorval; benoudheid en bekommernis het ek ervaar. Toe het ek die Naam van die HERE bly aanroep: “Ag, HERE, red tog my lewe!” Genadig is die HERE en regverdig; ons God is barmhartig. Die HERE beskerm onkundiges; ek is nietig, maar Hy het my verlos. Kom weer tot rus, my •siel, want die HERE het goed gedoen aan jou. Ja, U het my lewe van die dood gered, my oë van trane, my voete van struikeling. Ek mag leef in die teenwoordigheid van die HERE, in die land van die lewendes. Ek het bly glo, selfs toe ek gesê het: “Ek is swaar beproef.” Ek is een wat in my angstigheid gesê het: “Alle mense is leuenaars.” Hoe kan ek die HERE vergoed vir al sy goeie dade aan my? Die beker van verlossing sal ek oplig en die Naam van die HERE aanroep. My geloftes aan die HERE sal ek betaal, daar voor sy hele volk. In die oë van die HERE is die dood van sy troue volgelinge 'n duur verlies. Ag, HERE, omdat ek u dienskneg is – ja, ek is u dienskneg, die seun van u diensmeisie – het U my boeie losgemaak. Aan U sal ek •dankoffers bring en die Naam van die HERE aanroep. My geloftes aan die HERE sal ek betaal, daar voor sy hele volk, in die voorhowe van die huis van die HERE, in jou midde, Jerusalem.
PSALMS 116:1-19 Contemporary Afrikaans Bible 2023 (CAB23)
Ek het die HERE lief, want Hy het my stem en my smekinge gehoor. Omdat hy sy oor tot My geneig het, daarom sal ek hom aanroep so lank as wat ek lewe. Die smarte van die dood het my omsingel, en die smarte van die doderyk het my aangegryp; ek het benoudheid en droefheid gevind. Toe het ek die Naam van die HERE aangeroep; O HERE, red tog my siel. Genadig is die HERE en regverdig; ja, ons God is genadig. Die HERE bewaar die eenvoudiges: ek is verneder, en Hy het my gehelp. Keer terug na jou rus, o my siel! want die HERE het goed aan jou gedoen. Want U het my siel gered van die dood, my oë van trane en my voete van val. Ek sal voor die aangesig van die HERE wandel in die land van die lewendes. Ek het geglo, daarom het ek gespreek: Ek was baie verdruk; Ek het in my haas gesê: Alle mense is leuenaars. Wat moet ek die HERE vergeld vir al sy weldade aan my? Ek sal die beker van verlossing neem en die Naam van die HERE aanroep. Ek sal nou my geloftes aan die HERE betaal in die teenwoordigheid van sy hele volk. Kosbaar in die oë van die HERE is die dood van sy heiliges. O HERE, waarlik, ek is U kneg; Ek is U dienaar en die seun van U slavin; U het my boeie losgemaak. Ek sal aan jou 'n dankoffer bring en die Naam van die HERE aanroep. Ek sal nou my geloftes aan die HERE betaal in die teenwoordigheid van sy hele volk, In die voorhowe van die huis van die HERE, in jou midde, o Jerusalem! Prys die HERE.
PSALMS 116:1-19 Die Boodskap (DB)
Ek het die Here baie lief. Hy help my as ek Hom baie mooi vra. Hy het mooi na my geluister. Daarom sal ek tot Hom bid so lank as wat ek lewe. Ek het so amper doodgegaan. Ek het al paniekerig daaroor begin word. Ek was doodsbenoud en bekommerd. Maar toe het ek ernstig tot die Here gebid. Ek het by Hom gepleit: “Ag, Here, spaar tog my lewe.” Die Here was baie goed vir my. Hy sorg dat reg aan my gedoen word. Ons God het my soos ’n ma in sy liefde toegevou. Die Here beskerm mense wat aan die einde van hulle kragte gekom het. Ek was in so ’n situasie. Toe ek op my swakste was, het Hy my gehelp. Ek het toe vir myself gesê: “Jy kan ontspan. Wees rustig. Die Here was baie goed vir jou.” Ja, U het my lewe gespaar. U het my getroos. U het gekeer dat ek ondergaan. Daarom sal ek saam met die Here lewe tussen almal wat nog leef. Ek het die Here vertrou toe ek gedink het ek kry baie swaar. Ek het gedink dis klaar met my. Toe ek bang was, het ek gesê: “Jy kan geen mens vertrou nie.” Hoe kan ek die Here ooit vergoed vir al die goeie dinge wat Hy vir my gedoen het? Maar ek sal vir Hom iets terugdoen: ek sal vir Hom dankie sê. Ek sal na Hom toe gaan. Ek het beloftes aan die Here gemaak. Ek sal dit hou sodat al sy kinders dit kan sien. Sy kinders is vir Hom baie werd. Daarom laat Hy nie maklik toe dat een van hulle doodgaan nie. Ek het gesê: “Regtig, Here, ek dien U. Ook my ouers het U gedien. U het my lewe gespaar. Ek sal vir U iets doen om dankie te sê: ek sal U eer en aanbid.” My beloftes aan die Here sal ek nakom waar al sy kinders dit kan sien. Binne en buite die kerk sal ek dit nakom. Kom prys die Here!
PSALMS 116:1-19 Nuwe Lewende Vertaling (NLV)
Ek het die HERE lief, want Hy antwoord my smeekgebed. Omdat Hy na my geluister het, sal ek Hom aanroep solank ek lewe. Bande van die dood het my omring, angs van die doderyk het my oorval. Vrees en verdriet het my oorweldig. Toe roep ek die HERE se Naam aan: “HERE, red my tog!” Die HERE is genadig en regverdig. Ons God bewys barmhartigheid. Die HERE beskerm die eenvoudiges. Ek was in nood, maar Hy het my gered. Nou kan ek weer gerus wees, want die HERE was goed vir my. U het my van die dood gered, my oë van trane bevry, my voete van struikeling weerhou. Daarom wandel ek voor die HERE in die land van die lewendes. Ek het geglo toe ek gesê het: “Ek is in groot ellende.” In my angs het ek uitgeroep: “Alle mense is leuenaars!” Hoe kan ek die HERE vergeld vir al sy goeie dade aan my? Ek sal die beker van redding optel en die Naam van die HERE aanroep. My geloftes aan die HERE sal ek betaal in die teenwoordigheid van sy hele volk. Die dood van sy getroue dienaars is kosbaar vir die HERE. HERE, ek is u dienaar. Ja, ek is u dienaar, seun van u dienares. U het my bevry van my bande! Ek sal ’n dankoffer aan U bring en die Naam van die HERE aanroep. My geloftes aan die HERE sal ek betaal in die teenwoordigheid van sy hele volk in die voorhowe van die huis van die HERE, in die hart van Jerusalem. Prys die HERE!
