PSALMS 113:2-7
PSALMS 113:2-7 Afrikaans 1983 (AFR83)
Die Naam van die Here moet geloof word, nou en vir altyd. Van waar die son opkom tot waar dit ondergaan, moet die Naam van die Here geprys word! Hoog bo al die nasies heers die Here, sy mag strek selfs oor die hemele. Wie in die hemel of op die aarde is soos die Here ons God, wat hoog woon en hier onder alles sien? Die geringe help Hy op uit die stof, die arme laat Hy van die ashoop af opstaan
PSALMS 113:2-7 Die Boodskap (DB)
Julle moet sorg dat mense altyd die Here prys, nou en vir altyd. Van die môre tot die aand moet julle sy Naam loof. Daar is niemand wat soveel mag het soos die Here nie. Hy is groter as enigeen in die hemel. Geen mens of volk is so sterk soos Hy nie. In die hemel of op die aarde is daar niemand soos die Here ons God nie. Hy is baie belangrik. Tog sien Hy onbelangrike en nederige mensies dadelik raak. Iemand wat deur ander mense vertrap is, help Hy om weer op te staan. Hy tel arm mense van die ashoop af op.
PSALMS 113:2-7 Bybel vir almal (ABA)
Almal moet die Naam van die Here prys, nou en altyd. Almal moet die Naam van die Here prys, van waar die son opkom tot waar hy ondergaan. Die Here is hoog bo die volke, Hy is Koning van die hemel. Wie is soos ons God die Here? Hy sit hoog op sy troon, en Hy buig af om die hemel en die aarde te sien. Die Here tel die mens op uit die stof, die mens wat niks het nie. Hy laat die arm mens opstaan van die ashoop
PSALMS 113:2-7 Afrikaans 1933/1953 (AFR53)
Laat die Naam van die HERE geprys word, van nou af tot in ewigheid! Van die opgang van die son tot by sy ondergang moet die Naam van die HERE geloof word! Die HERE is hoog bo al die nasies; bo die hemele is sy heerlikheid. Wie is soos die HERE onse God, wat hoog woon, wat laag neersien, in die hemel en op die aarde? Wat die geringe uit die stof oprig, die behoeftige van die ashoop af verhef
PSALMS 113:2-7 Die Bybel 2020-vertaling (AFR20)
Mag die Naam van die HERE geprys word, van nou af tot in ewigheid. Mag, van waar die son opkom tot waar dit ondergaan, die Naam van die HERE geloof word. Hoog bo al die nasies is die HERE; bo die hemel is sy heerlikheid. Wie is soos die HERE, ons God, wat hoog woon, wat laag afkyk op die hemel en die aarde – Hy wat hulpeloses uit die stof laat opstaan, van die ashoop af behoeftiges verhef
PSALMS 113:2-7 Contemporary Afrikaans Bible 2023 (CAB23)
Geloofd sy die Naam van die HERE van nou af tot in ewigheid. Van die opgang van die son af tot die ondergang daarvan moet die Naam van die HERE geloof word. Die HERE is hoog bo al die nasies, en sy heerlikheid bo die hemel. Wie is soos die HERE onse God, wat in die hoogte woon, wat homself verneder om te aanskou wat in die hemel en op die aarde is! Hy laat die arme uit die stof oprig en die behoeftige uit die mishoop lig
PSALMS 113:2-7 Nuwe Lewende Vertaling (NLV)
Geseënd is die Naam van die HERE, nou en vir altyd. Van waar die son opkom tot waar dit ondergaan, moet die Naam van die HERE geprys word. Die HERE is verhewe bo al die nasies; sy heerlikheid is hoër as die hemele. Wie is soos die HERE ons God, Hy wat hoog woon? Hy verneder Homself om te kyk na die hemele en op die aarde. Hy verhef die armes uit die stof en die behoeftiges van die ashoop.
