PSALMS 111:1-10
PSALMS 111:1-10 Bybel vir almal (ABA)
Julle moet die Here prys. Ek wil vir die Here dankie sê in die gemeente, in die vergadering van mense wat eerlik lewe. Die Here het groot dinge gedoen. Almal wat bly is oor wat Hy gedoen het, onthou dit. Sy werk is soos die werk van 'n koning, Hy doen altyd reg aan mense. Hy laat ons dink aan sy wonderwerke. Die Here is goed vir mense wat swaarkry, Hy is genadig. Hy het kos gegee vir die mense wat Hom dien, Hy onthou altyd sy verbond. Hy het vir sy volk gewys hoe sterk Hy is toe Hy vir hulle die lande van die ander volke gegee het. Hy bly altyd dieselfde, en alles wat Hy doen, doen Hy reg. Sy wette verander nooit nie. Hulle is vir altyd en altyd daar. 'n Mens moet doen wat die wette sê, jy moet dit presies en eerlik doen. Toe die Here sy volk vrygemaak het, het Hy gesê dat sy verbond vir altyd daar sal wees. Hy is heilig, almal word bang wanneer hulle sy Naam hoor. As iemand wysheid wil kry, dan moet hy die Here eer en dien, as iemand regtig verstandig wil word, dan moet hy doen wat die Here wil hê.
PSALMS 111:1-10 Afrikaans 1933/1953 (AFR53)
HALLELUJA! Alef. Ek wil die HERE loof van ganser harte; Bet. in die kring van die opregtes en in die vergadering. Gimel. Die werke van die HERE is groot; Dalet. nagespeur word hulle deur almal wat daar 'n welbehae in het. He. Sy dade is majesteit en heerlikheid; Wau. en sy geregtigheid bestaan tot in ewigheid. Sajin. Hy het vir sy wonders 'n gedagtenis gestig; Get. die HERE is genadig en barmhartig. Tet. Aan die wat Hom vrees, het Hy spys gegee; Jod. Hy dink vir ewig aan sy verbond. Kaf. Hy het die krag van sy werke aan sy volk bekend gemaak, Lamed. deur hulle die erfdeel van die heidene te gee. Mem. Die werke van sy hande is trou en reg; Noen. al sy bevele is betroubaar. Samek. Vasgestel is hulle vir altyd, vir ewig; Ajin. uitgevoer in trou en opregtheid. Pe. Hy het aan sy volk verlossing gestuur; Sade. Hy het sy verbond vir ewig ingestel; Kof. sy Naam is heilig en vreeslik. Resj. Die vrees van die HERE is die beginsel van die wysheid; Sin. almal wat dit beoefen, het 'n goeie verstand. Tau. Sy lof bestaan tot in ewigheid.
PSALMS 111:1-10 Afrikaans 1983 (AFR83)
Prys die Here! Met my hele hart wil ek die Here loof in die samekoms van die opregtes, in die gemeente. Die werke van die Here is groot, almal wat daarin vreugde vind, dink daaroor na. Sy dade is vol majesteit en luister, sy trou staan vir altyd vas. Hy sorg dat sy magtige dade nie vergeet word nie. Genadig en barmhartig is die Here. Hy voed dié wat Hom dien, Hy hou sy verbond altyd in stand. Hy het sy volk die krag van sy dade laat ervaar, Hy het aan hulle die land van ander nasies gegee. Wat Hy doen, getuig van trou en reg, al sy voorskrifte staan vas, hulle is vir altyd geldig, hulle is gegee in trou en regverdigheid. Hy het vryheid vir sy volk bewerk, sy verbond vir altyd ingestel. Sy Naam is heilig, dit wek ontsag. Wysheid begin met die dien van die Here; almal wat dit doen, het ware insig. Die roem van die Here hou altyd stand.
PSALMS 111:1-10 Die Bybel 2020-vertaling (AFR20)
Halleluja! Ek wil die HERE prys met my hele hart, in die kring van opregtes en in die byeenkoms. Indrukwekkend is die werke van die HERE, 'n bron van nadenke vir almal wat vreugde daarin vind. Vol luister en glansrykheid is wat Hy doen, en sy geregtigheid hou stand vir altyd. Hy het bewerk dat sy wonders onthou word. Genadig en barmhartig is die HERE. Hy het kos gegee aan wie vir Hom ontsag het. Hy hou vir ewig sy verbond in gedagte. Die krag van sy dade het Hy aan sy volk bekend gemaak deur die erfdeel van nasies aan hulle te gee. Die werk van sy hande is betroubaar en reg. Betroubaar is al sy opdragte, bestendig vir altyd, vir ewig – dit word nagekom in trou en opregtheid. Verlossing het Hy vir sy volk gestuur. Hy het sy verbond vir ewig voorgeskryf. Heilig en ontsagwekkend is sy Naam. Die begin van wysheid is ontsag vir die HERE
PSALMS 111:1-10 Contemporary Afrikaans Bible 2023 (CAB23)
Prys die HERE. Ek wil die HERE loof met my hele hart, in die vergadering van die opregtes en in die vergadering. Die werke van die HERE is groot, gesoek onder almal wat daarin behae het. Sy werk is eerbaar en heerlik, en sy geregtigheid is tot in ewigheid. Hy het sy wonderwerke laat dink: genadig en barmhartig is die HERE. Hy het spys gegee aan die wat Hom vrees; Hy sal altyd aan sy verbond dink. Hy het aan sy volk die krag van sy werke bekend gemaak, om aan hulle die erfdeel van die heidene te gee. Die werke van sy hande is waarheid en oordeel; al sy gebooie is seker. Hulle staan vas vir ewig en altyd, en word gedoen in waarheid en opregtheid. Hy het verlossing aan sy volk gestuur; Hy het sy verbond tot in ewigheid beveel: heilig en eerbiedig is sy Naam. Die vrees van die HERE is die begin van wysheid; goeie verstand het almal wat sy gebooie doen; sy lof is tot in ewigheid.
PSALMS 111:1-10 Die Boodskap (DB)
Kom prys die Here! Ek wil vir die Here dankie sê met alles wat ek het. In die gemeente, by eredienste, in klein groepe, by bidure, ja, by enige byeenkoms van sy kinders wil ek Hom prys. Die Here doen baie groot dinge, dit laat jou so klein voel. Elkeen wat opgewonde is oor wat Hy doen, sal aanmekaar daarvan praat en dink. Wat die Here doen, is te groot om te verstaan; dit is te wonderlik om te beskryf. Hy doen altyd net die regte dinge. Die Here sorg dat mense die wonderlike dinge onthou wat Hy doen. Hy het ’n goeie hart. Hy gee graag vir ons goeie dinge. Hy voel gou jammer vir iemand. Hy sorg vir mense wat Hom dien deur vir hulle kos te gee. Hy doen altyd wat Hy beloof het in sy ooreenkoms met ons. Hy het vir sy volk Israel ’n land beloof waar vreemde volke gebly het. Toe laat Hy hulle die land met sy krag inneem. Israel het geleer dat God sy beloftes altyd nakom. Die Here is getrou. Hy tree reg op. Alles wat Hy doen, getuig daarvan. Alles wat Hy sê, kan ’n mens maar glo. Sy woorde staan vas. Jy weet waar jy met Hom staan. Hy is getrou en loop nie draaie met jou nie. Die Here help sy kinders as hulle hulp nodig het. Hy red hulle uit die moeilikheid. Hy het ’n belofte aan hulle gemaak wat altyd sal bly staan. Vir God moet jy groot respek hê. Jy kan nie sy Naam los en vas gebruik nie. Om gelukkig te wees moet jy die Here dien. Dit is die goue reël van die lewe. As jy dit doen, verstaan jy die geheim van die lewe. Die Here verdien al die dankies wat mense Hom kan gee.
PSALMS 111:1-10 Nuwe Lewende Vertaling (NLV)
Prys die HERE! Met my hele hart wil ek die HERE loof in die vergadering van die gemeente, in die byeenkoms van die opregtes. Die dade van die HERE is groot! Almal wat daaroor bly is, dink hieroor na. Heerlik en vol majesteit is sy werke. Sy geregtigheid hou vir altyd stand. Sy wonders sal altyd onthou word. Genadig en barmhartig is ons HERE! Hy voed hulle wat Hom dien; Hy onthou altyd sy verbond. Hy het sy kragtige dade aan sy volk getoon deur die land van ander nasies aan hulle te gee. Alles wat Hy doen, is waar en reg, en al sy voorskrifte is betroubaar. Hulle is vir altyd geldig, en met trou en opregtheid moet dit gehoorsaam word. Hy het ’n losprys vir sy volk betaal, en sy verbond vir altyd gewaarborg. Heilig en ontsagwekkend is sy Naam! Eerbied vir die HERE is die begin van wysheid. Dié wat sy voorskrifte navolg, het goeie insig. Hy sal vir altyd geprys word!