PSALMS 109:1-31

Deel

PSALMS 109:1-31 Bybel vir almal (ABA)

Vir die leier van die koor: Van Dawid. 'n Psalm. O God, ek prys U, U moet iets doen, want mense wat self skuldig is, sê dinge oor my, maar dit is nie waar nie, hulle lieg oor my. Hulle sê dit omdat hulle my haat. Ek het niks verkeerd gedoen nie, maar hulle baklei met my. Ek was lief vir hulle en ek het vir hulle gebid, maar hulle beskuldig my. Ek het goeie dinge aan hulle gedoen, maar hulle doen slegte dinge aan my. Ek was lief vir hulle, maar hulle haat my. Hulle sê: “Jy moet iemand kies en aanstel, iemand wat self verkeerd doen. Daardie persoon moet langs hom kom staan en hom beskuldig. 'n Regter moet sê dat hy skuldig is, die regter moet sê dat sy gebed ook sonde is. Sy lewe moet kort wees, 'n ander mens moet sy werk doen. Sy kinders moet weeskinders word, en sy vrou moet 'n weduwee word. Sy kinders moet rondswerf en bedel om kos te kry in die plekke waar hulle woon, die plekke wat verwoes is. Hy skuld geld vir mense, daardie mense moet alles vat wat hy het. Vreemde mense moet die goed vat waarvoor hy gewerk het. Niemand moet goed wees vir hom nie, niemand moet jammer wees vir sy weeskinders nie. Sy nageslag moet almal sterf, niemand moet hulle name ná een geslag onthou nie. Die Here moet onthou dat hierdie man se voorvaders verkeerde dinge gedoen het en die Here moenie sy ma se sonde vergewe nie. Die Here moet dit altyd onthou, en niemand moet nog dink aan hierdie man se voorouers nie. Want hierdie man het nie onthou om te doen wat hy belowe het nie. Hy het mense gevolg en gejaag totdat hulle dood is, mense wat hulleself nie kan help nie, mense wat niks het nie en wat moedeloos is. Hy het gehou daarvan om mense te vervloek, maar daardie slegte dinge moet nou met homself gebeur. Hy het nie daarvan gehou om mense te seën nie, en nou moet niemand hóm seën nie. Hy het elke dag mense vervloek, dit was vir hom dieselfde soos om elke dag klere aan te trek. Nou moet dit alles met homself gebeur, alles wat hy gesê het. Die slegte dinge moet in hom ingaan soos die water wat hy drink, dit moet tot in sy bene ingaan soos die olie wat hy aan sy vel smeer. Die slegte dinge moet by hom bly soos die klere wat hy aantrek, soos die belt wat hy elke dag dra.” Die Here moet dit alles laat gebeur met die mense wat my beskuldig en wat vra dat dit sleg moet gaan met my. Maar Here, my Here, ek behoort aan U, en daarom moet U my help. U moet my red, want U doen altyd wat U belowe het, en dit is goed. U moet dit doen, want ek kan myself nie help nie, ek het niks, en ek het baie pyn. Ek is besig om te verdwyn soos 'n skaduwee wat lank word, soos 'n sprinkaan wat afval wanneer iemand dit afskud van sy klere. Ek het nie kos om te eet nie, my knieë is swak en ek is maer. Die mense wat my beskuldig, spot my, hulle is bly wanneer hulle sien wat met my gebeur. Here, my Here, U moet my help, U moet my red, U het belowe om dit te doen. Die mense wat my beskuldig, moet weet dat dit U is wat dit sleg laat gaan met my, Ú het hierdie dinge aan my gedoen. Ménse vervloek my, maar Ú sal my seën. Hulle het my aangeval, maar hulle sal verloor, en ek, u dienaar, sal bly wees. U moet hierdie mense verneder, die mense wat my beskuldig, hulle moet aanhou verloor. Ek wil aanhou om vir die Here dankie te sê, ek wil Hom prys waar baie mense dit kan hoor, want Hy help die mens wat niks het nie. Die Here red hom wanneer mense hom oordeel en sê dat hy skuldig is.

PSALMS 109:1-31 Afrikaans 1933/1953 (AFR53)

VIR die musiekleier. Van Dawid. 'n Psalm. O God van my lof, moenie swyg nie! Want hulle het die mond van die goddelose en die mond van bedrog teen my oopgemaak; hulle het met my gespreek met 'n leuenagtige tong, en my met woorde van haat omring; ja, hulle het my sonder oorsaak beveg. Vir my liefde behandel hulle my vyandig, terwyl ek tog gedurig bid. En hulle het my kwaad vir goed opgelê en haat vir my liefde. Stel 'n goddelose oor hom en laat 'n teëstander staan aan sy regterhand. As hy geoordeel word, laat hom as skuldige uitgaan, en laat sy gebed sonde word. Laat sy dae min wees; laat 'n ander sy amp neem. Laat sy kinders wese word en sy vrou 'n weduwee; en laat sy kinders oral rondswerwe en bedel en brood soek, weg van hulle puinhope af. Laat die skuldeiser alles neem wat hy het, en laat vreemdes sy goed buitmaak. Laat hom niemand hê wie se guns bestendig is, en laat niemand hom oor sy wese ontferm nie. Laat sy nakomelinge uitgeroei word; laat hulle naam uitgedelg word in die volgende geslag. Laat die HERE gedagtig wees aan die ongeregtigheid van sy vaders, en laat die sonde van sy moeder nie uitgedelg word nie. Laat dié altyddeur voor die HERE wees, dat Hy hulle gedagtenis van die aarde af kan uitroei; omdat hy nie daaraan gedink het om guns te bewys nie, maar die ellendige en behoeftige man vervolg het en die moedelose van hart, om hom dood te maak. Ja, hy het die vloek liefgehad en — dit het oor hom gekom; en hy het geen welbehae gehad in die seën nie en — dit het ver van hom af gebly. Hy het die vloek aangetrek soos 'n kleed en — dit het soos water in sy binneste gekom en soos olie in sy gebeente. Laat dit vir hom wees soos 'n kleed waarin hy hom toedraai, en 'n gordel wat hy altyddeur ombind. Laat dit die loon van my teëstanders wees vanweë die HERE, en van hulle wat kwaad spreek teen my. Maar U, o HERE Here, maak dit goed met my om u Naam ontwil; omdat u goedertierenheid goed is, red my. Want ek is ellendig en behoeftig, en my hart is deurwond in my binneste. Ek gaan heen soos 'n skaduwee as dit lank word; ek is afgeskud soos 'n sprinkaan. My knieë knik van vas, en my vlees het maer geword, sonder vet. En ék het vir hulle 'n smaad geword; as hulle my sien, skud hulle hul hoof. Help my, HERE my God! Verlos my na u goedertierenheid, sodat hulle kan weet dat dit u hand is: U, o HERE, het dit gedoen. Laat húlle vloek, maar U, seën U. Hulle het opgestaan en beskaamd geword, maar u kneg is bly. Laat my teëstanders beklee word met smaad en hulle toedraai in hul skande soos in 'n mantel. Ek sal die HERE hardop loof met my mond, en onder baie sal ek Hom prys; want Hy staan aan die regterhand van die behoeftige om hom te verlos van die wat hom veroordeel.

PSALMS 109:1-31 Afrikaans 1983 (AFR83)

Vir die koorleier. Van Dawid. 'n Psalm. U is die God wat ek altyd loof, moet tog nie my gebede onverhoord laat nie! Dit is goddelose mense en leuenaars wat my aankla. Hulle getuig vals teen my, met woorde vol haat tref hulle my van alle kante, sonder enige rede val hulle my aan. My liefde beantwoord hulle met vyandskap, en dit terwyl ek nog altyd vir hulle gebid het. So vergeld hulle my met kwaad vir goed en haat vir liefde, en hulle sê: “Stel 'n misdadiger aan as sy regter, laat een wat vyandig is, hom aankla; sorg dat hy skuldig bevind word, laat selfs sy gebed teen hom tel as 'n misdaad. Laat sy lewe kort wees en laat 'n ander sy amp oorneem! Mag sy kinders wees word, sy vrou 'n weduwee! Laat sy kinders as bedelaars rondswerf en tussen die puinhope van hulle huise kos soek. Laat die skuldeiser beslag lê op al sy besittings, laat vreemdes plunder wat hy met moeite bymekaargemaak het! Laat niemand aan hom liefde bewys nie, laat niemand hom die lot van sy kinders aantrek nie. Laat sy nageslag uitgeroei word, laat hulle naam binne een geslag uitgewis wees! Mag die Here die ongeregtigheid van sy voorvaders nie vergeet nie, mag die sonde van sy moeder nooit uitgewis word nie! Laat dit voortdurend vir die Here bly bestaan, maar laat hulle naam van die aarde af gevee word omdat hy nie daaraan gedink het om liefde te bewys nie: hy het die mens in nood en die arme, dié wat plat geslaan is, tot die dood toe vervolg. Hy het graag vervloek, laat die vloek hóm tref! Hy het nie graag geseën nie, laat seën ver van hóm af wees! Om mense te vervloek, is vir hom soos klere dra, soos water drink, soos lyfolie aansmeer. Laat sy vloek hom aankleef soos sy klere, soos 'n gordel wat hy deurentyd dra!” Mag die Here dit alles oor my teëstanders laat kom, oor dié wat my sulke vreeslike dinge toewens. U is die Here my God, handel met my só dat u Naam geëer sal word. U is goed en getrou, red my tog. Ek is hulpeloos en arm, my hart is inmekaargekrimp in my. Soos 'n skaduwee wat lank word, is my einde naby, en ek word weggevee soos 'n sprinkaan. My knieë knak al soos ek gevas het, my liggaam is uitgeteer en maer. Ek het die spot van die mense geword; hulle kyk met veragting na my en knik met voldoening die kop. Help my, Here my God, red my in u troue liefde, dat mense kan weet dat dit u hand is, U, Here, wat dit gedoen het. Húlle vloek my, maar U sal my seën. Hulle kla my aan, maar hulle sal verloor, en ek, u dienaar, sal bly wees. Laat my teëstanders met skande oordek word, laat vernedering hulle aankleef soos hulle klere. Dan sal ek my lof aan die Here laat weerklink en Hom voor 'n groot skare prys, want Hy staan by die arme en red hom van dié wat hom ter dood wil veroordeel.

PSALMS 109:1-31 Die Bybel 2020-vertaling (AFR20)

Vir die •musiekleier. Van Dawid. 'n Psalm. O God, aan wie my lof toekom, moet tog nie stilbly nie; want die monde van goddeloses, ja, monde vol bedrog, is wyd oop teen my – hulle beskuldig my met tonge wat lieg. Met woorde van haat omsingel hulle my; hulle val my sonder rede aan. In antwoord op my liefde is hulle vyandig teenoor my, en dit terwyl ek in gebed is. Hulle vergeld my met kwaad vir goed, met haat vir my liefde. Hulle sê: “Stel 'n goddelose teen hom aan, laat 'n aanklaer aan sy regterkant staan. Wanneer die beslissing oor hom gegee word, moet hy as 'n skuldige na vore tree; sy gebed moet hom as sonde toegereken word. Mag sy lewensdae min wees; mag iemand anders sy amp oorneem. Mag sy kinders vaderloos word en sy vrou 'n weduwee. Mag sy kinders bly rondswerf en bedel, en kos soek op hulle puinhope. Mag die skuldeiser beslag lê op alles wat aan hom behoort, en mag vreemdes die vrug van sy arbeid plunder. Mag daar vir hom niemand wees wat in troue liefde uitreik nie; mag daar niemand wees wat hom ontferm oor sy vaderlose kinders nie. Mag sy nageslag uitgeroei word – in die volgende geslag moet hulle name uitgewis word. Mag die sondeskuld van sy voorouers die HERE bybly, en mag die sonde van sy moeder nie uitgewis word nie. Mag dit altyd voor die HERE wees, sodat Hy die herinnering aan hulle van die aarde af verdelg; omdat hierdie man nie daaraan gedink het om troue liefde te bewys nie, maar magtelose mense en behoeftiges, dié met vreesbevange harte, vervolg het om hulle dood te maak. Hy was lief vir vervloeking – dit het hom getref. Hy het niks gehou van seën nie – dit het ver van hom gebly. Hy het vervloeking aangetrek soos sy bokleed – dit het sy binneste ingedring soos water, en sy gebeente soos olie. Mag dit vir hom word soos 'n kledingstuk waarin hy homself hul, en 'n lyfband wat hy altyd dra.” Mag dít van die HERE se kant die straf wees vir hulle wat my vyandiggesind is, en wat onheil oor my lewe uitspreek! Maar, U, HERE, my Heer, handel met my ter wille van u Naam; omdat u troue liefde goed is, red my! Want ek is magteloos en behoeftig, en my hart is deurboor in my binneste. Soos 'n skaduwee wat lank word, gaan ek heen; ek word afgeskud soos 'n treksprinkaan. My knieë gee mee sonder dat ek vas; my liggaam is uitgeteer, sonder olie. En ek, ek het vir hulle 'n bespotting geword; wanneer hulle my sien, skud hulle die kop. Help my, HERE my God; verlos my in u troue liefde, sodat hulle kan weet dat dit u hand is, dat U, HERE, dit gedoen het. Hulle kan maar vervloek, maar U, U sal seën. Sou hulle teen my opstaan, sal hulle beskaam word; u dienskneg sal bly wees. Mag hulle wat my vyandiggesind is, geklee wees in vernedering; mag hulle in hulle skande gehul wees soos in 'n mantel. Met my mond sal ek die HERE met oorgawe prys, tussen baie mense sal ek Hom loof; want Hy staan aan die regterkant van die behoeftige om hom te verlos van hulle wat oor sy lewe wil beslis.

PSALMS 109:1-31 Contemporary Afrikaans Bible 2023 (CAB23)

Swyg nie, o God van my lof! Want die mond van die goddelose en die mond van die bedrieërs gaan teen my oop; hulle het teen my gespreek met 'n leuenagtige tong. Hulle het my ook omsingel met woorde van haat; en sonder oorsaak teen my geveg het. Vir my liefde is hulle my teëstanders, maar ek gee myself oor aan gebed. En hulle het my kwaad vir goed vergeld, en haat vir my liefde. Stel 'n goddelose oor hom aan, en laat die Satan aan sy regterhand staan. Wanneer hy geoordeel word, laat hom veroordeel word, en laat sy gebed sonde word. Laat sy dae min wees; en laat 'n ander sy amp beklee. Laat sy kinders wese wees en sy vrou 'n weduwee. Laat sy kinders gedurig rondswerwe en smeek; laat hulle ook hul brood soek uit hul verlate plekke. Laat die afperser alles vang wat hy het; en laat die vreemdes sy arbeid buit. Laat daar niemand wees wat barmhartigheid teenoor hom bewys nie; Laat sy nageslag uitgeroei word; en laat hulle naam in die volgende geslag uitgedelg word. Laat die ongeregtigheid van sy vaders by die HERE gedink word; en laat die sonde van sy moeder nie uitgewis word nie. Laat hulle gedurigdeur voor die aangesig van die HERE wees, dat Hy hulle gedagtenis van die aarde af kan uitroei. Omdat hy daaraan gedink het om nie barmhartigheid te bewys nie, maar die arme en behoeftige man vervolg het, om selfs die wat gebroke van hart is, dood te maak. Soos hy liefgehad het om te vloek, so laat dit oor hom kom; soos hy nie behae gehad het in seën nie, so laat dit ver van hom wees. Soos hy hom beklee het met vloek soos met sy kleed, so laat dit in sy ingewande kom soos water en soos olie in sy gebeente. Laat dit vir hom wees soos die kleed wat hom bedek, en as 'n gordel waarmee hy gedurigdeur omgord is. Laat dit die beloning wees van my teëstanders van die HERE en van die wat kwaad spreek teen my siel. Maar doen vir my, o HERE, HERE, ter wille van u Naam; want u goedertierenheid is goed, verlos my. Want ek is arm en behoeftig, en my hart is verwond in my binneste. Ek is weg soos 'n skaduwee as dit daal; ek word op en af geslinger soos 'n sprinkaan. My knieë is swak van vas; en my vlees vergaan van vet. Ek het ook vir hulle 'n smaad geword; toe hulle na my kyk, het hulle hul hoofde geskud. Help my, HERE my God, red my na U goedertierenheid! sodat hulle kan weet dat dit U hand is; dat U, HERE, dit gedoen het. Laat hulle vloek, maar seën U; as hulle opstaan, laat hulle beskaamd staan; maar laat U kneg bly wees. Laat my teëstanders met skande beklee word, en laat hulle hulleself bedek met hul eie wanorde soos met 'n mantel. Ek sal die HERE met my mond baie loof; ja, Ek sal Hom loof onder die skare. Want hy sal staan aan die regterhand van die arme, om hom te red van die wat sy siel veroordeel.

PSALMS 109:1-31 Die Boodskap (DB)

God, ek prys U altyd. Moet my asseblief nie ignoreer nie! Moenie stilbly as ek praat nie. Mense wat U nie wil dien nie, praat lelik van my. Party mense is oneerlik. Hulle lieg oor my. Uit wat hulle sê, kan ’n mens sien dat hulle niks van my dink nie. Hulle baklei sommer vir niks met my. Ek is hulle vriend, maar hulle is onbeskof met my. Hulle gooi my liefde in my gesig terug. Tog hou ek aan om vir hulle te bid. As ek iets goeds vir hulle doen, behandel hulle my net slegter. Hulle doen net mooi die teenoorgestelde as ek. As ek wys dat ek hulle liefhet, raak hulle al hoe leliker met my. Hulle sê: “Laat hy in die hof voor ’n regter beland wat self ’n misdadiger is. Laat sy vyand sy aanklaer wees. Sy lewe moet vir hom ’n nagmerrie wees. Wanneer hy voor die hof kom, moet hy geen kans hê nie. Die regter moet hom dadelik skuldig bevind. As hy bid, laat dit selfs as ’n misdaad gereken word. Laat hom baie jonk doodgaan. Iemand anders moet sy werk kry. Sy kinders moet weeshuis toe gaan. Daar moet niks wees wat sy weduwee kan erf nie. Sy moet stoksielalleen agterbly. Laat sy kinders loop en bedel. Hulle moet kos in asblikke gaan soek. Mense moet hulle van die een ashoop na die ander wegjaag. Mense vir wie hy geld skuld, moet alles kom vat wat hy het. Hy moet elke liewe sent betaal. Die res van sy goed moet mense wat hy nie eens ken nie, kom steel. Niemand moet daardie slegte mens kan vertrou nie. Almal moet hom in die steek laat. Niemand moet hom eens jammer kry nie. Niemand moet hom liefhê nie. Ook sy weeskinders moet sonder liefde grootword. Hy moenie ’n nageslag hê nie. Mense moenie eens van hom weet nie. Sy kinders en kleinkinders, ja, sy hele familie moet doodgaan. Niemand mag oorbly nie. Die Here moet sy ouers se sonde straf. Die Here moet nie een van die slegte dinge wat sy ma gedoen het, vergewe nie. Hy moet vir altyd die slegte vrugte pluk van daardie dade. Die Here moet sorg dat niemand ooit weer aan daardie mense dink nie. Laat hierdie dinge gebeur omdat daardie skurk nooit iets goeds vir iemand anders gedoen het nie. Hy het nooit mense gehelp wat arm en behoeftig is nie. Mense wat in die moeilikheid was, het hy nog swaarder laat kry. Diegene wat moedeloos was, het hy heeltemal gebreek. Hy het dit geniet om mense slegte dinge toe te wens. Al daardie dinge moet hom nou tref. Hy het nooit ’n goeie woord vir ander gehad nie. Laat dieselfde met hom gebeur. Hy is baie lief om ander te vloek. Van binne en buite is hy sleg. Dit is soos die bloed in sy are; soos die murg in sy pype. Hy kan nie daarvan ontslae raak nie. Mag die Here al hierdie dinge laat kom oor hulle wat niks van my hou nie. Hulle sê altyd lelike dinge van my. Daarom verdien hulle hierdie dinge. Here, wees asseblief goed vir my. U Naam is op die spel. U is tog die Here, my God! Help my uit die moeilikheid uit. U het u kinders baie lief. Ek is in die moeilikheid. Ek het u hulp nodig. My binneste is stukkend. Ek is besig om stadig dood te gaan. Daar is niks waaraan ek kan vashou nie. My bene vou onder my in. Ek kan nie meer eet nie. Ek is maer. Daar is geen vet meer aan my nie. Slegte mense het op my getrap en my beledig. As hulle my sien, maak hulle ’n gek van my. Hulle haat my, en hulle is bly as dit sleg met my gaan. Here, my God, help my tog! Help my asseblief uit die moeilikheid uit. U het u kinders baie lief. Mense moet sien dat U hulle uit die moeilikheid gehelp het. Slegte mense kan my maar vloek, Here. Gee U vir my goeie dinge. Hulle wou my lelik behandel en seermaak, maar hulle kon nie. Ek dien U. Dit maak my sommer baie bly. Verneder daardie mense wat teen my is. Laat hulle met hulle kop in skaamte wegstap. Dan sal ek die Here prys. Almal moet dit hoor. Ek sal Hom voor baie mense loof. Hy help almal wat sy hulp nodig het! Hy help mense teen skurke wat ander seermaak.

PSALMS 109:1-31 Nuwe Lewende Vertaling (NLV)

O God, vir wie ek prys, moenie stilbly nie, want bose en vals mense kla my aan en vertel leuens oor my. Hulle omring my met woorde van wraak en sonder rede val hulle my aan. As antwoord op my liefde is hulle my aanklaers, en dit terwyl ek vir hulle bid! Hulle vergeld my kwaad vir goed en haat vir die liefde wat ek gee. Stel ’n bose persoon aan teen hom en ’n aanklaer aan sy regterkant. Wanneer hy geoordeel word, laat hy skuldig bevind word, en sy gebede as sonde gereken word. Laat sy dae min wees; laat iemand anders sy plek inneem. Mag sy kinders wese word en sy vrou ’n weduwee; mag sy kinders as bedelaars rondswerf, en kos soek tussen die bouvalle van hulle wonings. Laat skuldeisers beslag lê op al sy besittings, en vreemdelinge alles vat waarvoor hy hard gewerk het. Mag niemand vir hom goed wees of sy weeskinders bejammer nie. Mag al sy afstammelinge sterf, en hulle naam in een geslag uitgewis word. Mag die HERE nooit sy voorouers se sondes vergeet nie; mag sy moeder se sondes nooit uitgevee word nie. Laat hierdie sondes voortdurend voor die HERE wees, maar laat sy kinders se nagedagtenis uitgewis word uit die geheue van mense. Hy was nie goed vir ander mense nie, maar het die arm en behoeftige, ook dié wat moedeloos is, tot die dood toe vervolg. Hy het daarvan gehou om te vervloek; laat hy dit nou self ervaar. Ander het hy nooit geseën nie; laat seën vir hom ook veraf wees. Vervloeking was vir hom soos klere, soos water vir sy liggaam, soos olie vir sy beendere. Mag sy vervloeking wees soos klere wat hy dra, soos ’n gordel wat hy altyd aanhet. Mag dit die HERE se beloning vir my aanklaers wees, vir hulle wat slegte dinge van my sê. Maar mag U, oppermagtige HERE, met my handel tot eer van u Naam! Red my, want u getrouheid is so goed. Ek is arm en in nood, en my hart is hewig ontsteld binne-in my. Soos ’n skadu wat lank word, so kwyn ek weg. Ek is soos ’n sprinkaan wat afgeskud word. My knieë is swak omdat ek vas; ek is net vel en been. Mense spot met my; as hulle my sien, skud hulle die kop. Help my, HERE my God! Red my op grond van u troue liefde. Laat hulle sien dat dit u werke is, dat U dit self gedoen het, HERE. Hulle vervloek my, maar U sal my seën! My aanvallers sal beskaam word, maar u dienaar sal bly wees! Laat my aanklaers met skande bekleed wees, toegewikkel in oneer soos met klere. Ek sal aanhou om die HERE te dank, Hom prys te midde van ’n menigte. Want Hy staan langs die behoeftige, gereed om hom te red van hulle wat veroordeel.