NAHUM 3:1-7
NAHUM 3:1-7 Bybel vir almal (ABA)
Die Here sê: “Dit sal sleg gaan met Nineve. Die mense van die stad het baie mense vermoor. Hulle is skelm, die stad is vol goed wat hulle van ander mense gevat het. “Die vyande slaan die perde met swepe. Die oorlogkarre se wiele raas. Die perde hardloop vinnig, die oorlogkarre skud. “Die vyande kom vinnig nader op hulle perde. Hulle swaarde en hulle spiese blink in die son. Hulle maak baie mense dood. Die lyke lê oral, die mense val oor die lyke. “Nineve, dit sal alles gebeur omdat jy soos 'n prostituut is, 'n mooi vrou wat getoor het. Jy het ander mense gevat, en hulle het jou slawe geword. Jy het alles gevat wat hulle het. “Nou is Ek teen jou,” sê die Here wat oor alles regeer. “Ek sal met jou doen soos 'n mens met 'n slegte vrou doen: Ek sal jou rok optel sodat die ander volke jou kaal liggaam kan sien. Hulle sal sien jy is 'n slegte vrou. “Ek sal vuilgoed op jou gooi, en die mense sal sleg dink van jou. Hulle sal jou spot. Almal wat jou sien, sal weggaan van jou en sê: ‘Nineve is verwoes!’ Niemand sal daaroor jammer wees nie. Ek kry niemand wat jou kan troos nie.
NAHUM 3:1-7 Afrikaans 1933/1953 (AFR53)
WEE die bloedstad wat louter bedrog, vol geweld is, terwyl rowery nie ophou nie! Hoor, die sweep! En hoor, die gedreun van wiele! En perde wat jaag, en waens wat stamp! Ruiters op 'n galop en geglinster van swaarde en geblits van spiese! En 'n menigte wat verslaan is, en hope dooies en geen einde aan die lyke nie — 'n mens struikel oor hulle lyke! Weens die veelheid van die hoererye van die hoer vol bevalligheid, 'n meesteres in towerkunste, wat nasies met haar hoererye verkoop het en volkstamme met haar towerkunste. Kyk, Ek het dit teen jou, spreek die HERE van die leërskare, en Ek sal jou slippe optel oor jou aangesig en nasies jou naaktheid laat sien en koninkryke jou skande. En Ek sal vuilgoed op jou gooi en jou aan minagting prysgee en van jou 'n skouspel maak, sodat elkeen wat jou sien, van jou af sal wegvlug en sê: Verwoes is Ninevé! Wie sal met haar medelyde hê? Waar sal ek troosters vir jou gaan soek?
NAHUM 3:1-7 Afrikaans 1983 (AFR83)
Ellende wag vir jou, bloedbevlekte stad; jy is vol bedrog, gevul met buit, jy hou nie op met roof nie! Swepe klap, wiele dreun, perde jaag, strydwaens vat net hier en daar grond; ruiters galop, swaarde blink, spiese blits. Daar is baie gewondes, hope dooies, ontelbare lyke: mense struikel oor hulle! Dit kom van die hoer Nineve se onsedelikheid, die mooi vrou met haar toorkunste, wat volke verwoes het met haar hoerery, nasies met haar toorkunste. Ek tree teen jou op, sê die Here die Almagtige: Ek sal al jou klere uittrek, Ek sal volke jou kaal liggaam laat sien, koninkryke die skande van jou naaktheid. Ek sal jou aan minagting prysgee, Ek sal mis op jou gooi, en van jou so 'n spektakel maak dat elkeen wat jou sien, van jou af sal padgee en sê: “Nineve is verwoes! Wie is daar wat hom jammer kry? Waar sal ek gaan soek na mense wat jou kan troos?”
NAHUM 3:1-7 Die Bybel 2020-vertaling (AFR20)
Wee die stad van bloed! Sy is geheel en al net leuens; van wat geroof is, is sy vol, en die rooftogte hou nie op nie! Die klank van swepe! Die klank van wiele wat dreun! Perde wat voortstorm, strydwaens wat bokspring. Ruiters is op die voorpunt – flitsende swaarde, blitsende spiese! 'n Menigte gewondes, 'n magdom lyke, tallose liggame – hulle struikel oor hulle dooies! Alles as gevolg van die hoerery van die prostituut, die aanvallige meesteres van heksery, wat nasies verkwansel het deur haar hoerery, volksgroepe deur haar heksery. “Dis Ek teen jou, Nineve!” is die uitspraak van die HERE, Heerser oor alle magte. “Ek sal jou some oor jou gesig oplig; Ek sal die nasies jou naaktheid laat sien, koninkryke jou skaamte. Ek gaan vullis op jou uitgooi en jou met minagting behandel. Ek gaan van jou 'n toonbeeld van vernedering maak. Dan sal elkeen wat jou sien, van jou af wegvlug en sê, ‘Nineve is verwoes! Wie sal meegevoel met haar hê? Waar sal ek iemand kry wat jou kan troos? ’ ”
NAHUM 3:1-7 Contemporary Afrikaans Bible 2023 (CAB23)
Wee die bloedige stad! dit is alles vol leuens en roof; die buit gaan nie weg nie; Die geraas van 'n sweep en die geraas van die wiele en van die perde wat ronddraf en van die waens wat spring. Die perderuiter hef die blink swaard sowel as die blink spies op, en daar is 'n menigte gesneuweldes en 'n groot aantal lyke; en daar is geen einde aan hulle lyke nie; hulle struikel op hul lyke: Vanweë die menigte van die hoererye van die bevoorregte hoer, die meesteres van die towery, wat nasies verkoop deur haar hoererye en families deur haar towerye. Kyk, Ek het dit teen jou, spreek die HERE van die leërskare; en Ek sal jou slips op jou aangesig ontdek en jou skaamte aan die nasies toon en aan die koninkryke jou skande. En Ek sal afskuwelike vuilheid op jou werp en jou belaglik maak en jou as 'n skouer stel. En dit sal gebeur dat almal wat na jou kyk, van jou af sal vlug en sê: Nineve is verwoes; wie sal haar betreur? waar sal ek vir jou troosters soek?
NAHUM 3:1-7 Die Boodskap (DB)
Daar lê swaarkry vir jou voor, Nineve! Mense dink aan jou as ’n stad waar mense mekaar vermoor en bedrieg asof dit iets is wat sommer elke dag gebeur. Kyk maar net, jy is altyd vol gesteelde goed en jou mense hou net aan om te steel. So lyk dit waar die geveg aan die gang is: Swepe klap! Wiele rammel! ’n Mens hoor perde wat galop en oorlogswaens wat bokspring op die paaie. Verder sien ’n mens perderuiters wat aangejaag kom, swaarde wat blink en spiese wat blits in die son. Daar is baie slagoffers van die geveg. Die dooies lê opgehoop, die lyke is te veel om te tel. Mense val oor al die lyke wat rondlê. Hoekom gebeur dit? ’n Mens hoef nie te ver te soek vir ’n rede hoekom hierdie straf gegee is nie: Nineve het haar dikwels soos ’n los vrou gedra. Sy was ’n baie mooi vrou. Sy het jou maklik betower. Maar sy het dit gebruik om volke te verlei. Sy het hulle geleer om haar gode te aanbid. Só het sy hulle in haar mag gekry. Die Here wat groot en magtig is, sê: Ek is jou vyand, Nineve! ’n Mens verneder iemand as jy sy klere uittrek en hom kaal voor mense laat staan. Ek sal dit ook met jou doen. Ek sal jou in die oë van die wêreld verneder deur jou swak te laat lyk. As jy so ’n mens ook nog verder met mis gooi, maak jy hom nog net meer walglik. Ek sal sorg dat mense oral oor die wêreld hulle vir jou walg en met jou spot. Hulle sal die rug vir jou draai en sê: “Nineve is verwoes, maar wie gee enigsins om?” Dit sal in die toekoms moeilik wees om iemand te kry wat saam met Nineve sal wil werk. Nineve sal nie vriende hê nie.
NAHUM 3:1-7 Nuwe Lewende Vertaling (NLV)
Dit sal sleg gaan met Nineve, stad van moord en leuens. Vol met buit, maar roof sonder ophou. Swepe klap, wiele dreun! Perde jaag, strydwaens bokspring! Ruiters kom aangejaag, swaarde blink en spiese blits. Daar is baie dooies, hope liggame, en mense struikel oor tallose lyke. Nineve, die mooi en sedelose vrou, is die oorsaak hiervan, sy wat guns wen met haar betowering, wat volke verslaaf met haar onsedelikheid en families met haar toorkuns. Die HERE, die Almagtige, sê: “Ek is jou vyand! Ek sal jou rokke bo-oor jou gesig oplig sodat die hele wêreld jou naaktheid en skande kan aanskou. Ek sal jou met mis besmeer en jou verneder. Ek sal ’n bespotting van jou maak. Almal wat jou sien, sal met afgryse wegdraai en sê: ‘Nineve lê heeltemal verwoes, maar wie gee om?’ Waar kry Ek iemand om jou te troos?”