JEREMIA 3:13-14
JEREMIA 3:13-14 Bybel vir almal (ABA)
Maar een ding moet julle weet: Julle het sonde gedoen, julle was opstandig teen julle God die Here, julle het gode van ander volke gedien, oral onder elke groen boom, julle was nie gehoorsaam aan My nie.” Dit het die Here gesê. Die Here sê: “Kinders wat My verraai het, julle moet terugkom, julle behoort aan My. Ek sal uit elke stad een van julle neem, en uit elke familie twee, en Ek sal julle na Sion bring.
JEREMIA 3:13-14 Afrikaans 1933/1953 (AFR53)
Alleenlik, ken jou ongeregtigheid, dat jy teen die HERE jou God oortree het en jou weë gerig het na die vreemdes, onder elke groen boom; maar na my stem het julle nie geluister nie, spreek die HERE. Keer terug, o afkerige kinders, spreek die HERE, want Ek is heer oor julle; en Ek sal julle neem, een uit 'n stad en twee uit 'n geslag en sal julle in Sion bring.
JEREMIA 3:13-14 Afrikaans 1983 (AFR83)
Erken net jou skuld, dat jy teen die Here jou God in opstand gekom het deur onder elke groen boom vreemde gode te gaan dien en so aan My ongehoorsaam te wees, sê die Here. Kom terug, kinders wat afgedwaal het, sê die Here. Ek maak julle my eiendom. Ek sal julle vat, een uit 'n stad en twee uit 'n familie, en julle na Sion toe bring.
JEREMIA 3:13-14 Die Bybel 2020-vertaling (AFR20)
Erken net jou sondeskuld, want teen die HERE jou God het jy oortree. Jy het jou paaie in alle rigtings laat loop na vreemdes onder elke skaduryke boom. Na my stem het julle nie geluister nie,” is die uitspraak van die HERE. “Keer terug, afvallige kinders!” is die uitspraak van die HERE, “want dit is Ek wat heer is oor julle. Ek sal julle terugneem, een uit 'n stad en twee uit 'n familiegroep; en Ek sal julle na Sion bring.
JEREMIA 3:13-14 Contemporary Afrikaans Bible 2023 (CAB23)
Beken net jou ongeregtigheid, dat jy teen die HERE jou God oortree het en jou weë na die vreemdes verstrooi het onder elke groen boom, en julle het na my stem nie geluister nie, spreek die HERE. Draai om, o afkerige kinders, spreek die HERE; want Ek is met jou getroud, en Ek sal vir jou een uit 'n stad neem en twee uit 'n familie, en Ek sal jou na Sion bring.
JEREMIA 3:13-14 Die Boodskap (DB)
Al wat Ek van jou verwag, is om te erken dat jy verkeerd gedoen het. Jy het teen My, wat die Here jou God is, gerebelleer. Jy het jou onder elke liewe koelteboom voor die gode neergebuig. Jy sal moet erken dat jy nie na My wou luister nie. Dit is wat Ek, die Here, wil hê julle moet hoor. Julle het koers verloor,” sê die Here, “maar kom terug na My toe. Julle behoort aan My. Wat Ek sal doen, is om hier een mens uit ’n stad en daar twee uit ’n familie te vat en julle na Jerusalem toe terug te bring.
JEREMIA 3:13-14 Nuwe Lewende Vertaling (NLV)
Erken net dat julle skuldig is. Erken dat julle teen die HERE julle God in opstand gekom het. Julle was ontrou aan Hom deur onder elke groen boom afgode te aanbid. Bely dat julle My nie gehoorsaam het nie, sê die HERE! “Kom terug na My toe, ontroue kinders, want Ek is julle man. Ek sal hier een uit ’n stad en daar twee uit ’n familie vat en na Sion toe terugbring.