RIGTERS 7:5-6
RIGTERS 7:5-6 Bybel vir almal (ABA)
Gideon het toe die manne laat afgaan na die water, en die Here het vir hom gesê: “Party manne sal water skep met hulle hande soos 'n hond water oplek met sy tong. Jy moet hulle apart laat staan, nie by die ander manne wat kniel om water te drink nie.” Daar was 300 manne wat die water met hulle hande opgeskep het. Al die ander manne het gekniel om water te drink.
RIGTERS 7:5-6 Afrikaans 1933/1953 (AFR53)
Hy bring toe die manskappe af na die water; en die HERE sê vir Gídeon: Elkeen wat met sy tong die water oplek soos 'n hond lek, moet jy eenkant laat staan; en elkeen wat op sy knieë vooroor buig om te drink, anderkant. En die aantal van die wat gelek het met hul hand na hul mond toe, was driehonderd man; en al die ander manskappe het op hulle knieë vooroor gebuig om water te drink.
RIGTERS 7:5-6 Afrikaans 1983 (AFR83)
Toe het Gideon die manne afgevat water toe en daar het die Here vir hom gesê: “Elkeen wat water drink soos 'n hond dit met sy tong oplek, moet jy skei van dié wat kniel om te drink.” Drie honderd het die water met die hand opgeskep. Die res het gekniel om te drink.
RIGTERS 7:5-6 Die Bybel 2020-vertaling (AFR20)
Hy het die manskappe laat afgaan na die water. Die HERE sê toe vir Gideon: “Almal wat met hulle tong van die water oplek soos 'n hond dit oplek, moet jy apart hou van almal wat op hulle knieë afsak om te drink.” Die getal manne wat opgelek het, was driehonderd; al die ander manskappe het op hulle knieë afgesak om water te drink.
RIGTERS 7:5-6 Contemporary Afrikaans Bible 2023 (CAB23)
Toe het hy die volk na die water laat afsak, en die HERE het vir Gídeon gesê: Elkeen wat met sy tong van die water lek soos 'n hond lek, hom moet jy alleen sit; so ook elkeen wat op sy knieë buig om te drink. En die getal van die wat gelek het en hul hand op hul mond gelê het, was drie honderd man; maar al die res van die volk het op hul knieë gebuig om water te drink.
RIGTERS 7:5-6 Die Boodskap (DB)
Gideon is toe met sy soldate af fontein toe. Toe hulle daar kom, sê die Here vir hom: “Deel die soldate in twee groepe. Maak ’n eerste groep uit al die soldate wat soos ’n hond water drink deur dit met die tong uit hulle hande op lek. Maak ook ’n tweede groep van al die soldate wat op hulle knieë gaan staan en water drink.” Drie honderd soldate het die water met hulle hande uitgeskep en so gedrink. Die res van hulle het op hulle knieë gaan staan om te drink.
RIGTERS 7:5-6 Nuwe Lewende Vertaling (NLV)
Gideon is toe met die manskappe af na die water toe. Daar het die HERE vir hom gesê: “Sit dié wat die water uit hulle hand soos ’n hond met hulle tonge opslurp, eenkant. Skei hulle van dié wat op hulle knieë gaan om die water te drink.” Daar was 300 wat die water met hulle hand geskep het om te drink. Al die ander het afgebuk om te drink.