JESAJA 64:8-12
JESAJA 64:8-12 Afrikaans 1983 (AFR83)
U is ons vader, Here, ons is klei en U het ons gevorm, ons is almal die werk van u hande. Moet tog nie aanhou kwaad wees vir ons nie, Here, moenie ons sonde vir altyd teen ons hou nie, onthou tog ons is almal u volk. U heilige stad het 'n woestyn geword: Sion het 'n woestyn geword, Jerusalem is onbewoonbaar. Ons heilige en pragtige tempel waar ons voorouers U geloof het, is deur vuur verwoes, alles wat vir ons dierbaar was, lê in puin. Raak hierdie dinge U dan nie, Here? Gaan U nie ingryp nie? Gaan U aanhou om ons te laat ly?
JESAJA 64:8-12 Die Bybel 2020-vertaling (AFR20)
Maar nou, HERE, U is ons Vader. Ons is die klei en U is ons pottebakker – ons almal is die werk van u hande. Moenie mateloos toornig wees nie, HERE; moenie vir altyd ons sondeskuld onthou nie! Ja, sien tog in: Ons almal is u volk. U heilige stede het woestyn geword: Sion is 'n woestyn, Jerusalem het 'n woesteny geword. Ons heilige en pragtige •tempel, waar ons voorouers U geloof het, het 'n prooi van vuur geword – alles wat vir ons kosbaar is, het 'n puinhoop geword. Sal U oor hierdie gebeure U bedwing, HERE? Sal U bly swyg, ons mateloos verneder?
JESAJA 64:8-12 Die Boodskap (DB)
U is tog ons Vader, Here. Ons is die klei waaraan U ’n vorm gegee het. U hande het ons almal gemaak. Moet tog nie so verskriklik kwaad bly vir ons nie, Here. Hou tog op om ons sonde vir altyd teen ons te hou. Hou tog in gedagte dat ons almal aan u volk behoort. U stad Sion het so verlate soos ’n woestyn geword. Daar bly nie meer mense in Jerusalem nie. U pragtige tempel waar ons ouers U kom vereer het, is nou afgebrand. Alles wat vir ons waardevol was, is nou daarmee heen. Gaan U hierdie dinge dan maar net so los, Here? Gaan U maar net stilbly en toelaat dat ons so vreeslik swaarkry?
JESAJA 64:8-12 Nuwe Lewende Vertaling (NLV)
Tog, HERE, is U ons Vader. Ons is soos klei en U is die Pottebakker. Deur u hand is ons almal gevorm. HERE, moet tog nie kwaad wees vir ons nie. Moenie ons sondes vir altyd teen ons hou nie. Ons bid tot U: Sien ons tog raak. Ons almal is tog u volk! U heilige stad het ’n woestyn geword. Sion is ’n woesteny, Jerusalem is soos ’n verlate woestyn. Ons heilige en glorieryke tempel waar ons voorouers U aanbid het, is afgebrand. Alles wat vir ons kosbaar was, is vernietig. Raak die dinge U dan nie, HERE? Gaan U doodstil bly? Sal U aanhou om ons te laat ly, ons te kasty bo ons vermoëns?
JESAJA 64:8-12 Bybel vir almal (ABA)
Maar, Here, U is ons Vader. Ons is die klei, en U is die Pottebakker. U het ons almal gemaak. Here, U moenie aanhou om vir ons kwaad te wees nie, U moenie altyd aan ons sondes dink nie. Kyk asseblief na ons, onthou ons almal is u mense. U gewyde stede het 'n woestyn geword, Sion het 'n woestyn geword, daar is nie mense in Jerusalem nie. Ons gewyde, pragtige tempel het verbrand, die plek waar ons voorvaders U geprys het. Al ons mooi huise het hope klippe geword. Here, U sien hierdie dinge, wil U niks doen om ons te help nie? Wil U altyd net stilbly en ons laat swaarkry?
JESAJA 64:8-12 Afrikaans 1933/1953 (AFR53)
Maar nou, HERE, U is ons Vader; ons is die klei, en U is ons Formeerder, en ons almal is die werk van u hand. HERE, wees nie uitermate toornig nie, en dink nie vir ewig aan die ongeregtigheid nie; aanskou dit tog dat ons almal u volk is. U heilige stede het 'n woestyn geword; Sion het 'n woestyn geword, Jerusalem 'n wildernis. Ons heilige en heerlike huis waar ons vaders U geloof het, is met vuur verbrand, en al wat vir ons dierbaar was, het 'n puinhoop geword. HERE, sal U by hierdie dinge U bedwing? Sal U swyg en ons uitermate verdruk?
JESAJA 64:8-12 Contemporary Afrikaans Bible 2023 (CAB23)
Maar nou, HERE, U is ons vader; ons is die klei, en jy ons pottebakker; en ons is almal die werk van u hand. Moenie baie pynlik wees nie, HERE, en dink nie vir ewig aan die ongeregtigheid nie; kyk, kyk, ons bid U, ons is almal u volk. U heilige stede is 'n woestyn, Sion is 'n woestyn, Jerusalem 'n wildernis. Ons heilige en ons pragtige huis waar ons vaders U geprys het, is met vuur verbrand, en al ons lieflike dinge is verwoes. Sal U Uself hieroor onthou, o HERE? wil U swyg en ons baie swaar verdruk?
