HOSEA 12:2-9
HOSEA 12:2-9 Bybel vir almal (ABA)
Die mense van Efraim vra die Assiriërs om hulle te help, maar dit help niks. Dit is soos iemand wat die wind probeer vang. Hulle lieg oral waar hulle gaan. Hulle soek moeilikheid, want hulle belowe om die Assiriërs te dien, maar hulle stuur olyf-olie na die Egiptenaars toe. Hulle vra die Egiptenaars moet hulle help teen die Assiriërs.” Die Here sê die mense van Juda het ook verkeerd gedoen, maar Hy wil nou die nageslag van Jakob straf. Hy wil hulle straf omdat hulle verkeerd gedoen het. Jakob was skelm voordat hy gebore is, hy het aan sy broer se voet vasgehou. Toe hy groot was, het hy met God gestoei. Hy het met die Engel gestoei en gewen. Jakob het gehuil, en God was jammer vir hom. God het Jakob by Bet-El gekry en God het daar met Jakob gepraat. Die Here het dit gedoen. Hy is die God wat oor alles regeer, sy Naam is: Die Here. Nageslag van Jakob, nou moet julle terugkom na julle God toe. Julle moet lief wees vir mekaar en doen wat reg is, julle moet altyd glo dat Hy julle sal help. Maar die handelaars meet nie reg wanneer hulle iets verkoop nie, hulle laat die mense swaarkry. Die mense van Efraim sê: “Ons het ryk geword, ons het baie goed bymekaargemaak, maar ons het niks verkeerd gedoen nie, niks.”
HOSEA 12:2-9 Afrikaans 1933/1953 (AFR53)
Efraim hou hom besig met wind, en hy agtervolg die oostewind; die hele dag vermeerder hy leuens en geweld, en hulle sluit 'n verbond met Assur, terwyl olie na Egipte gevoer word. Die HERE het ook 'n twis met Juda, en Hy sal oor Jakob besoeking doen volgens sy weë, hom vergelde na sy dade. In die moederskoot het hy sy broer by die hakskeen gehou, en in sy manlike krag het hy met God geworstel. Ja, hy het met die Engel geworstel en die oorhand gekry, hy het geween en Hom gesmeek. By Bet-el het hy Hom gevind, en daar het Hy met ons gespreek. En HERE God van die leërskare, HERE is sy gedenknaam. En jy, tot jou God moet jy terugkeer, beoefen liefde en reg, en hoop gedurigdeur op jou God. Kanaän — in sy hand is daar 'n valse weegskaal, hy hou daarvan om af te pers. Maar Efraim sê: Tog het ek ryk geword, ek het vir my 'n vermoë verwerf. Alles wat ek verwerf het, is nie genoeg om op my enige sondeskuld te lê nie.
HOSEA 12:2-9 Afrikaans 1983 (AFR83)
Efraim hou hom op met wind, hy is aldag agter die oostewind aan. Hy hou aan met lieg en om sy eie ondergang te bewerk. Hy sluit 'n verbond met Assirië, maar stuur olie na Egipte toe. Die Here het 'n saak teen Juda, Hy gaan Jakob straf vir sy dade, hom laat boet vir wat hy gedoen het. Nog voor sy geboorte het hy al sy broer onderkruip en as volwasse man het hy met God gestoei. Jakob het met 'n Engel gestoei en gewen. Jakob het gehuil en van God hulp verwag: “By Bet-El sal Hy ons ontmoet, daar sal Hy met ons praat. Die Here is die almagtige God, die Here sal onthou.” Wat jy moet doen, is om na jou God toe terug te keer: jy moet Hom liefhê en sy bevele gehoorsaam, jy moet jou hoop altyd op jou God vestig. Efraim is 'n skelm handelaar: hy buit graag mense uit. En dan sê hy: “Ek is ryk, ek het myself ryk gemaak. Terwyl ek my besittings bymekaargemaak het, het ek niks gedoen wat verkeerd is nie.”
HOSEA 12:2-9 Die Bybel 2020-vertaling (AFR20)
Efraim pas die wind op, hy loop heeldag agter die oostewind aan. Al wat hy vermeerder, is leuens en verwoesting. Met Assirië sluit hulle 'n verdrag, maar olie word na Egipte gestuur.” Die HERE het 'n regsaak teen Juda, en Hy gaan Jakob tot verantwoording roep oor sy optrede; Hy gaan hom vergeld volgens sy dade. In die moederskoot het hy al sy broer aan die hakskeen vasgehou, en in sy manlike krag het hy met God geworstel. Hy het met die Engel geworstel en het oorwin; want hy het gehuil en Hom om genade gesmeek: “By Bet-El sal Hy hom ontmoet, daar sal Hy met ons praat. Die HERE, die God van alle magte, HERE is sy gedenknaam.” Maar jy, na jou God moet jy terugkeer. Lê jou toe op troue liefde en wat reg is, en wag altyddeur op jou God. “ Kanaän – in sy hand is daar 'n vals weegskaal; hy hou daarvan om uit te buit. Efraim sê, ‘Ja, ek het ryk geword; ek het self welvarend geword. Alles wat ek met moeite verkry het – niks kan gevind word wat as sondeskuld teen my gehou word, wat as 'n oortreding geld nie.’
HOSEA 12:2-9 Contemporary Afrikaans Bible 2023 (CAB23)
Die HERE het ook 'n twis met Juda, en Hy sal oor Jakob besoeking doen volgens sy weë; volgens sy handelinge sal hy hom vergelde. Hy het sy broer in die moederskoot aan die hakskeen geneem, en deur sy krag het hy krag by God gehad. Ja, hy het mag gehad oor die engel en het oorwin; hy het geween en hom gesmeek; hy het hom in Bet-el gevind, en daar het hy met ons gespreek; Selfs die HERE, die God van die leërskare; die HERE is sy gedenkteken. Daarom bekeer jy jou tot jou God; bewaar barmhartigheid en oordeel, en wag gedurigdeur op jou God. Hy is 'n handelaar, die weegskaal van bedrog is in sy hand; hy hou daarvan om te verdruk. Toe sê Efraim: Tog het ek ryk geword, ek het vir my goed gevind; in al my moeitevolle arbeid sal hulle geen ongeregtigheid in my vind wat sonde was nie. En Ek, wat die HERE jou God is uit Egipteland, sal jou nog in hutte laat woon soos in die dae van die fees.
HOSEA 12:2-9 Die Boodskap (DB)
Efraim mors sy tyd met dinge wat niks beteken nie. Hulle hou hulle heeldag besig met leuens en geweld. Hy sluit ’n ooreenkoms met Assirië. Tegelyk onderhandel hy ook met Assirië se vyand. Hy stuur olie na Egipte om in hulle goeie boekies te kom.” “Die Here maak ’n hofsaak teen Juda. Hy gaan Jakob straf vir die manier waarop hy leef. Hy gaan die dinge wat hy doen, teen hom gebruik. Nog voor hy gebore is, het hy sy tweelingbroer probeer bedrieg. Toe hy ’n groot man was, het hy met God geveg. Hy het met die Man uit die hemel gestoei en Hom begin wen. Hy het gehuil en die Man het hom jammer gekry. Die Here het hom by Bet-El gekry en daar met hom gepraat. Dit was die Here, die God van groot krag. Sy Naam is ‘Die Here’. Kom terug na jou God toe. Bly getrou aan die Here. Doen wat Hy vir jou sê. Hou Hom altyd in gedagte.” “Israel is soos Kanaän. Hy is skelm as hy dinge verkoop. Hy probeer altyd mense verkul wat by hom koop. Dan spog Efraim nog en sê: ‘Ek het ryk geword. Ek het ’n miljoenêr geword. Niemand kan ’n vinger na my wys nie. Niemand kan my beskuldig dat ek oneerlik was nie.’”
HOSEA 12:2-9 Nuwe Lewende Vertaling (NLV)
Israel hou hom op met die wind. Hy is die hele dag agter die oostewind aan. Hy vermeerder leuens en geweld. Hulle sluit verdrae met Assirië, maar as teken van hulle verbintenis stuur hulle olie na Egipte toe. Die HERE gaan nou ’n saak maak teen Juda. Hy staan op die punt om Israel te straf vir sy dade en hom te vergeld oor sy valse weë. Voor Jakob se geboorte het hy sy broer se hakskeen vasgehou; as volwassene het hy met God kragte gemeet. Hy het selfs met ’n Engel geworstel en gewen. Hy het gehuil en by Hom gepleit vir ’n seën. By Bet-El het hy God van aangesig tot aangesig ontmoet en daar het God met hom gepraat, die HERE, die almagtige God. Die HERE is sy Naam! Kom nou terug na jou God toe! Tree op met liefde en regverdigheid, en lewe voortdurend met ’n vaste vertroue op jou God. Maar nee, die volk is soos ’n geslepe handelaar met valse weegskale – hy hou daarvan om te bedrieg. Israel spog: “Ek is ryk, en ek het dit alles self verwerf! Niemand kan sê dat ek dit op ’n oneerlike manier gekry het nie! Ek is onskuldig aan enige oortreding!”