GENESIS 23:1-20

Deel

GENESIS 23:1-20 Bybel vir almal (ABA)

Sara het 127 jaar oud geword. Sy het gesterf in die stad Kirjat-Arba, dit is Hebron, in die land Kanaän. Abraham het oor Sara gehuil en gerou. Daarna het Abraham opgestaan en weggegaan van sy vrou se lyk. Hy het met die Hetiete gaan praat en vir hulle gesê: “Ek is 'n vreemdeling, ek woon nie altyd hier by julle nie. Ek wil asseblief by julle 'n stuk grond hê wat my eie kan wees, sodat ek my vrou daar kan begrawe.” Die Hetiete het vir Abraham gesê: “Luister na ons, Meneer. Jy is een van ons belangrike leiers. Begrawe jou vrou in die beste graf wat ons het. Nie een van ons sal weier as jy jou vrou in sy graf wil begrawe nie.” Toe kom Abraham en hy buig voor die land se mense, die Hetiete. Hy sê toe vir hulle: “As julle my sal toelaat om my vrou hier te begrawe, luister dan na my en praat met Efron, die seun van Sogar. Vra vir hom of hy die Makpela-grot aan my sal verkoop. Die grot behoort aan hom, dit is op sy grond naby die kant. Ek sal vir hom betaal wat hy wil hê, sodat die graf aan my kan behoort. Julle moet almal daar wees wanneer hy dit aan my verkoop.” Efron het tussen die Hetiete gesit. Hy het Abraham geantwoord, en almal wat by die stad se poort ingekom het, kon hoor wat hy sê. Hy het gesê: “Nee, Meneer, luister na my. Ek gee die grond vir jou en ook die grot wat daarop is. Ek gee dit vir jou hier waar my mense dit sien. Begrawe jou vrou daar.” Toe buig Abraham voor die land se mense, en hy sê vir Efron sodat almal dit kan hoor: “Luister asseblief na my. Ek sal betaal vir die grond. Neem my geld sodat ek my vrou daar kan begrawe.” Efron antwoord toe vir Abraham: “Meneer, luister na my. Die stuk grond kos 400 sikkels silwer. Maar wat maak dit saak tussen my en jou? Begrawe jou vrou daar.” Abraham het na Efron geluister. Hy het die silwer geweeg en vir Efron gegee. Dit was soveel silwer soos Efron voor die Hetiete gesê het, 400 sikkels, soos 'n handelaar dit weeg. So het Efron sy grond in Makpela verkoop. Dit was die grond oorkant Mamre, die grond en die grot en al die bome daarop. Dit het Abraham se grond geword. Al die Hetiete wat by die stad se poort was, het gesien dat Abraham daarvoor betaal het. Daarna het Abraham sy vrou Sara begrawe in die grot op die Makpela-grond oorkant Mamre, dit is die stad Hebron, in die land Kanaän. So het die grond en die grot wat voorheen aan die Hetiete behoort het, Abraham se grond geword. Abraham het dit gebruik om sy mense daar te begrawe.

GENESIS 23:1-20 Afrikaans 1933/1953 (AFR53)

EN die lewensdae van Sara was honderd-sewen-en-twintig jaar. Dit was die lewensjare van Sara. En Sara het gesterwe in Kirjat-Arba, dit is Hebron, in die land Kanaän; en Abraham het gekom om oor Sara te rouklaag en haar te beween. Daarna het Abraham opgestaan, van sy dode af weg, en met die seuns van Het gespreek en gesê: Ek is 'n vreemdeling en bywoner onder julle. Gee my 'n graf as besitting by julle, dat ek my dode van my af weg kan begrawe. Toe antwoord die seuns van Het vir Abraham en sê aan hom: Luister na ons, my heer! U is 'n vors van God onder ons. Begraaf u dode in die beste graf wat ons het; niemand van ons sal u sy graf weier om u dode te begrawe nie. Toe staan Abraham op en buig hom voor die volk van die land, voor die seuns van Het; en hy het met hulle gespreek en gesê: As julle dit goedvind dat ek my dode van my af weg begrawe, luister dan na my en doen vir my 'n goeie woord by Efron, die seun van Sohar, dat hy aan my gee die spelonk van Magpéla wat aan hom behoort, wat aan die end van sy stuk grond lê; laat hy dit vir die volle som aan my gee, dat ek 'n graf onder julle mag besit. En Efron het tussen die seuns van Het gesit. Toe antwoord Efron, die Hetiet, vir Abraham voor die ore van die seuns van Het, van almal wat in die poort van sy stad ingegaan het: Nee, my heer, luister na my. Die stuk grond gee ek aan u; ook die spelonk wat daarin is, dit gee ek aan u; voor die oë van die seuns van my volk gee ek dit aan u; begraaf u dode. Daarop het Abraham hom voor die volk van die land neergebuig en met Efron gespreek voor die ore van die volk van die land: Ja, as dit u is, ag, luister na my! Ek gee die geld vir die stuk grond; neem dit van my aan, dat ek my dode daar kan begrawe. En Efron het Abraham geantwoord en aan hom gesê: My heer, luister na my. 'n Stuk land van vierhonderd sikkels silwer — wat is dit tussen my en u? Begraaf maar u dode. Toe luister Abraham na Efron, en Abraham het aan Efron die geld afgeweeg waarvan hy gespreek het voor die ore van die seuns van Het — vierhonderd sikkels silwer gangbaar by die koopman. So het dan die stuk grond van Efron wat in Magpéla teenoor Mamre lê, die stuk grond en die spelonk wat daarin is, en al die bome op die stuk grond wat op die ganse gebied daarvan rondom staan, die eiendom van Abraham geword voor die oë van die seuns van Het, voor almal wat in die poort van sy stad ingegaan het. Daarna het Abraham toe sy vrou Sara begrawe in die spelonk van die stuk grond van Magpéla, oostelik van Mamre, dit is Hebron, in die land Kanaän. So is dan die stuk grond en die spelonk wat daarin was, deur die seuns van Het aan Abraham afgestaan om dit as graf in eiendom te besit.

GENESIS 23:1-20 Afrikaans 1983 (AFR83)

Sara het honderd sewe en twintig jaar oud geword. Sy is oorlede in Kirjat-Arba, dit is Hebron, in Kanaän. Abraham het oor haar gaan rou en huil. Daarna het hy die lyk daar gelaat en vir die Hetiete gaan sê: “Ek is 'n vreemdeling, 'n bywoner by julle. Gee vir my 'n vaste besitting as graf hier by julle sodat ek my vrou daarin kan begrawe.” Die Hetiete het hom geantwoord: “Luister na ons, Meneer! Ons beskou u as 'n baie belangrike man. Begrawe u vrou in die beste graf hier by ons. Niemand van ons sal weier dat u u vrou in sy graf begrawe nie.” Daarna het Abraham opgestaan en voor die Hetiete, die volksleiers, gebuig. Hy het vir hulle gesê: “As julle instem dat ek my vrou hier kan begrawe, luister dan na my en doen voorspraak by Efron seun van Sogar dat hy die Makpelagrot aan die kant van sy grond aan my afstaan. Hy moet dit in julle teenwoordigheid teen die volle markprys aan my verkoop dat ek dit as begraafplek kan besit.” Efron die Hetiet het tussen die Hetiete gesit en daar waar al die Hetiete wat die stadspoort binnekom, dit kon hoor, het hy vir Abraham gesê: “Nee, Meneer, luister na my. Ek gee die stuk grond vir u, ook die grot wat daarop is. Ek gee dit vir u in die teenwoordigheid van my volksgenote. Begrawe u vrou daar.” Toe het Abraham weer voor die volksleiers gebuig en waar hulle almal dit kon hoor, het hy vir Efron gesê: “Nee, luister tog maar na my! Ek betaal die volle prys vir die grond. Vat die geld by my, sodat ek my vrou daar kan begrawe.” Efron het toe vir Abraham gesê: “Meneer, luister na my! Moenie dat ons stry oor 'n stukkie grond wat vier en 'n half kilogram silwer werd is nie. En dit om u vrou te begrawe!” Toe het Abraham ingestem en die silwer vir Efron afgeweeg wat hy in die teenwoordigheid van die Hetiete genoem het: vier en 'n half kilogram silwer soos dit in die handel afgeweeg word. So het die stuk grond van Efron in Makpela waarop die grot is en wat oos van Mamre geleë is, Abraham se eiendom geword in die teenwoordigheid van die Hetiete en almal wat by die stadspoort inkom: die grond met die grot daarop en al die bome op die grond, sover as die grense daarvan gestrek het. Daarna het Abraham sy vrou Sara begrawe in die Makpelagrot op die stuk grond, oos van Mamre, dit is Hebron in Kanaän. So het die stuk grond met die grot daarop uit die hande van die Hetiete oorgegaan na Abraham as begraafplek wat aan hom behoort.

GENESIS 23:1-20 Die Bybel 2020-vertaling (AFR20)

Sara het honderd sewe-en-twintig jaar lank geleef – dit was die lewensjare van Sara. Sara het gesterf in die land Kanaän by Kirjat-Arba, dit is Hebron. Abraham het by die tent ingegaan om oor Sara te rou en oor haar te huil. Toe het Abraham opgestaan van die plek by sy oorlede vrou. Hy het met die Hetiete gaan onderhandel en gesê: “Ek is 'n •vreemdeling en bywoner by julle; gee vir my 'n begraafplek as eiendom by julle, sodat ek my oorlede vrou kan begrawe en haar kan weglê. ” Die Hetiete het Abraham geantwoord deur vir hom te sê: “Luister na ons, meneer! U is 'n magtige leier in ons midde. Begrawe u oorlede vrou in die keur van ons grafte. Niemand onder ons sal u sy graf weier, om daar u oorlede vrou te begrawe nie.” Abraham het opgestaan, diep gebuig voor die mense van die land, die Hetiete, met hulle onderhandel en gesê: “As u daartoe instem dat ek my oorlede vrou begrawe en haar weglê, luister dan na my en doen vir my voorspraak by Efron, seun van Sogar, sodat hy die grot van Magpela wat aan hom behoort, en wat aan die rand van sy grond lê, vir my sal gee. Teen die volle koopprys moet hy dit vir my gee, sodat ek tussen u 'n begraafplek as eiendom kan besit.” Efron het daar tussen die Hetiete gesit. Efron, die Hetiet, het Abraham toe ten aanhore van die Hetiete, naamlik almal wat deur die dorpspoort ingaan, geantwoord: “Nee, meneer, luister na my! Die stuk grond gee ek vir u; en die grot wat daarop is – vir u gee ek dit. Voor die oë van my volksgenote gee ek dit vir u. Begrawe u oorlede vrou.” Abraham het toe weer diep gebuig voor die mense van die land, en ten aanhore van die mense van die land met Efron gepraat: “As u maar net asseblief na my sal luister! Ek betaal vir die grond. Aanvaar dit van my, sodat ek my oorlede vrou daar kan begrawe.” Efron het Abraham toe geantwoord deur vir hom te sê: “Meneer, luister na my! 'n Stuk grond van vierhonderd sikkel silwer, wat is dit nou tussen my en u? Begrawe u oorlede vrou!” Abraham het na Efron geluister. Abraham het vir Efron die silwer afgeweeg wat hy ten aanhore van die Hetiete genoem het: vierhonderd sikkel silwer, wat aanvaarbaar is by handelaars. So het die stuk grond van Efron wat in Magpela, oos van Mamre, is – die grond en die grot wat daarop is, en al die bome wat op die grond is, binne die hele grens reg rondom – oorgegaan na Abraham as gekoopte eiendom, ten aanskoue van die Hetiete, almal wat by die dorpspoort ingaan. Daarna het Abraham sy vrou Sara begrawe in die grot op die grond in Magpela, oos van Mamre – dit is Hebron – in die land Kanaän. Die grond en die grot daarop is aan Abraham oorgedra – 'n begraafplek as eiendom vanaf die Hetiete.

GENESIS 23:1-20 Contemporary Afrikaans Bible 2023 (CAB23)

En Sara was honderd-sewe-en-twintig jaar oud; dit was die lewensjare van Sara. Sara het gesterwe in Kirjat-Arba; dit is Hebron in die land Kanaän, en Abraham het gekom om oor Sara te treur en oor haar te ween. Abraham het opgestaan voor sy dode en met die seuns van Het gespreek en gesê: Ek is 'n vreemdeling en 'n bywoner by jou; gee my 'n besitting van 'n graf by jou, dat ek my dooies voor my aangesig kan begrawe. En die kinders van Het het Abraham geantwoord en vir hom gesê: Luister na ons, my heer, U is 'n magtige vors onder ons; begrawe U dode in die uitverkorenes van ons grafte; niemand van ons sal sy graf van jou weerhou nie, maar dat jy jou dooies kan begrawe. En Abraham het opgestaan en hom neergebuig voor die volk van die land, voor die kinders van Het. En hy het met hulle gespreek en gesê: As dit julle plan is dat ek my dooies voor my aangesig moet begrawe; luister na my en doen 'n goeie woord vir my by Efron, die seun van Sohar, dat hy my die spelonk van Magpéla kan gee wat hy het, wat aan die einde van sy veld is; vir soveel geld as wat dit werd is, sal hy dit aan my gee as 'n besitting van 'n graf onder julle. En Efron het onder die kinders van Het gewoon; en Efron, die Hetiet, het Abraham geantwoord voor die gehoor van die kinders van Het, van almal wat by die poort van sy stad ingegaan het en gesê: Nee, my heer, luister na my; die stuk grond gee ek aan U, en die spelonk wat daarin is, gee ek aan U; in die teenwoordigheid van die seuns van my volk gee ek dit vir jou; begrawe jou dooies. En Abraham het hom voor die volk van die land neergebuig. En hy het met Efron gespreek voor die ore van die volk van die land en gesê: Maar as jy dit wil gee, luister tog na my. Ek sal jou geld gee vir die land; neem dit van my af, en ek sal my dooies daar begrawe. Efron het Abraham geantwoord en vir hom gesê: My heer, luister na my: die land is vierhonderd sikkels silwer werd; wat is dit tussen my en jou? begrawe dan jou dooies. En Abraham het na Efron geluister; Abraham het vir Efron die silwer afgeweeg wat hy voor die ore van die seuns van Het genoem het, vier honderd sikkels silwer, lopende geld by die handelaar. Die veld van Efron wat in Magpéla voor Mamre was, asook die spelonk, al die bome wat in al die grense rondom was, is bewaak. Aan Abraham as 'n besitting voor die kinders van Het, voor almal wat by die poort van sy stad ingegaan het. Hierna het Abraham sy vrou Sara begrawe in die spelonk van die veld van Magpela voor Mamre; dit is Hebron in die land Kanaän. Die stuk grond en die spelonk wat daarin is, is deur die seuns van Het aan Abraham as 'n besitting van 'n graf besorg.

GENESIS 23:1-20 Die Boodskap (DB)

Sara, Abraham se vrou, het gesterf. Sy was 127 jaar oud. Sy is in Kirjat-Arba dood. Dit was ’n plek in Kanaän wat tot vandag toe Hebron genoem word. Abraham was hartseer oor Sara se dood en het lank oor haar gehuil. Toe het hy met die begrafnisreëlings begin. Hy is na die Hetiete toe en het vir hulle gesê: “Menere, soos u weet, is ek maar ’n vreemdeling tussen u en besit ek geen grond nie. My vrou is dood en ek wil haar graag begrawe. Vandag vra ek u ’n stukkie grond vir ’n graf.” Die Hetiete het toe vir Abraham gesê: “Dit is goed so, Meneer. U is soos ’n prins van God tussen ons. U kan die beste grond kry. Ons wil almal hê dat u u vrou hier begrawe. Ons ken u en ons weet dat u naby aan God leef.” Abraham het toe laag voor die Hetiete, die mense wat in die land bly, gebuig en vir hulle gesê: “U is baie goed vir my, want u gee my grond sodat ek my vrou kan begrawe. Nou wil ek u versoek om tog met Efron, seun van Sohar, te praat, en vir hom te vra om die grot van Magpela aan my te verkoop. Hy besit dit en dit is aan die rand van sy grond geleë. Ek sal hom sy volle prys betaal. Ons kan die transaksie sommer hier voor u almal afhandel.” Efron was ’n gesiene man. Hy het in die stad se poort saam met al die ander belangrike Hetiete gesit en na Abraham se versoek geluister. Efron het geantwoord: “Nee, Meneer, dit is nie nodig nie. U hoef my niks te betaal nie. Voor al my mense gee ek u vandag die grond met grot en al. U kan sommer vandag nog u vrou daar gaan begrawe.” Abraham het weer voor almal gebuig. Hy het met Efron voor al die ander dorpsraadslede in die poort gepraat. “Meneer, baie dankie. U is werklik goed vir my, maar ek wil eerder die grond by u koop. As ek dit gekoop het, kan ek my vrou daar begrawe.” “Goed dan,” het Efron gesê. “Laat ons tog nie stry nie. Jy kan alles vir vier en ’n half kilogram silwer kry. Dan kan jy jou vrou gaan begrawe.” Abraham het Efron se aanbod aanvaar. Hy het toe die hele bedrag in silwer voor Efron en die Hetiete afgetel en dit vir hom gegee. Almal was oortuig dat die transaksie wettig was. So het Efron se landgoed in Magpela oos van Mamre Abraham se eiendom geword. Die land met die grot en al die bome in die gebied het nou aan Abraham behoort. Alles het gebeur in die teenwoordigheid van al die Hetiete wat in die dorpsraad gedien het. So het dit gebeur dat Abraham sy vrou Sara in die grot van Magpela digby Mamre in die land Kanaän kon begrawe het. Vandag nog word die plek Hebron genoem. Die land het met grot en al van die Hetiete na Abraham oorgegaan. Hy het daarvan ’n begraafplaas gemaak.

GENESIS 23:1-20 Nuwe Lewende Vertaling (NLV)

Toe Sara 127 jaar oud was, is sy by Kirjat-Arba dood. Dit is Hebron in die land Kanaän. Abraham het daar gerou en oor haar gehuil. Hy het haar lyk net so gelaat, na die leiers van die Hetiete toe gegaan en gesê: “Ek is maar ’n vreemdeling onder julle. Verkoop asseblief aan my ’n stuk grond waar ek my vrou kan begrawe.” Die Hetiete antwoord hom: “Sekerlik, want jy is ’n gerespekteerde persoon in ons omgewing. Kies vir jou die beste graf waarin jy haar kan begrawe. Nie een van ons sal daarteen beswaar maak nie.” Abraham buig toe laag voor die volksleiers van die Hetiete en sê: “Aangesien julle so dink, wees so vriendelik en vra Efron, seun van Soar, om die spelonk van Makpela op die punt van sy grond aan my af te staan. Wat ook al die prys is waarop besluit word, ek sal dit in julle teenwoordigheid ten volle betaal sodat ek ’n begraafplaas van my eie kan besit.” Efron het daar tussen die ander Hetiete gesit. Hy antwoord Abraham in die teenwoordigheid van die oudstes in die stadspoort: “Nee, Meneer! Luister tog asseblief vir my. Ek sal die grot en die stuk land vir jou skenk. Ek gee dit vir jou hier in die teenwoordigheid van my mense. Gaan begrawe gerus jou vrou daar.” Abraham het weer voor die leiers van die land gebuig. Terwyl almal luister, sê hy vir Efron: “Nee, luister vir mý. Ek sal dit van jou koop. Laat my die volle prys betaal sodat ek my vrou daar kan begrawe.” Efron antwoord vir Abraham: “Meneer, luister na my. Die land is 400 sikkels silwer werd, maar wat is dit nou tussen ons? Gaan voort en begrawe jou vrou.” Abraham betaal toe die prys wat Efron gevra het, soos voor almal ooreengekom. Dit was 400 sikkels silwer. So het hy wettiglik die stuk grond by Makpela naby Mamre van Efron gekoop. Dit het ingesluit die grond, die grot daarop, en al die bome tot by die grens van die grond. Dit het Abraham se vaste eiendom geword volgens die ooreenkoms wat voor almal in die poort van die stad gemaak is. Daarop het Abraham Sara daar begrawe, in die grot van Makpela, naby Mamre. Dit is Hebron in Kanaän. Abraham het op dié manier wettiglik die grond en die grot as ’n begraafplaas van die Hetiete gekoop.