2 TIMOTEUS 2:11-13
2 TIMOTEUS 2:11-13 Bybel vir almal (ABA)
Wat ek nou wil sê, is waar: Christus het gesterf, en ons het saam met Hom gesterf. God het vir Christus weer laat lewe, daarom sal ons ook saam met Christus lewe. As ons aanhou om in Christus te glo, dan sal ons ook saam met Hom regeer soos konings. As ons nie vir mense wil sê dat ons aan Christus behoort nie, dan sal Christus sê dat ons nie aan Hom behoort nie. As ons ontrou is, dan sal Christus nog altyd doen wat Hy belowe het, want Hy kan nie anders wees as wat Hy is nie.
2 TIMOTEUS 2:11-13 Afrikaans 1933/1953 (AFR53)
Dit is 'n betroubare woord; want as ons met Hom gesterf het, sal ons ook met Hom lewe. As ons verdra, sal ons met Hom regeer. As ons Hom verloën, sal Hy ons ook verloën. As ons ontrou is, Hy bly getrou; Hy kan Homself nie verloën nie.
2 TIMOTEUS 2:11-13 Afrikaans 1983 (AFR83)
Dit is 'n betroubare woord: As ons saam met Hom gesterf het, sal ons ook saam met Hom lewe; as ons in die geloof volhard, sal ons saam met Hom regeer; as ons Hom verloën, sal Hy ons ook verloën; as ons ontrou is – Hy bly getrou: Hy kan Homself nie verloën nie.
2 TIMOTEUS 2:11-13 Die Bybel 2020-vertaling (AFR20)
Dié uitspraak is betroubaar: As ons saam met Hom gesterf het, sal ons ook saam met Hom leef; as ons aanhou volhard, sal ons ook saam met Hom regeer; as ons Hom verloën, sal Hy ons ook verloën; as ons ontrou is, Hy bly getrou, want Hy kan Homself nie verloën nie.
2 TIMOTEUS 2:11-13 Contemporary Afrikaans Bible 2023 (CAB23)
Dit is 'n betroubare woord: Want as ons saam met Hom dood is, sal ons ook saam met Hom lewe. As ons ly, sal ons ook saam met Hom regeer; as ons Hom verloën, sal Hy ons ook verloën. As ons nie glo nie, bly hy tog getrou; hy kan homself nie verloën nie.
2 TIMOTEUS 2:11-13 Die Boodskap (DB)
Ek praat die waarheid: as ons saam met Jesus gesterf het, sal ons ook saam met Hom leef. As ons nie moed verloor nie, maar vasbyt, sal ons ook eendag saam met Hom heers. As ons egter sê dat ons Hom nie wil ken nie, sal Hy dieselfde van ons sê. As ons Hom egter in die steek laat en nie so getrou is soos ons moet wees nie ... sal Hy ons sowaar nooit in die steek laat nie, want dit is net nie hoe Hy is nie.
2 TIMOTEUS 2:11-13 Nuwe Lewende Vertaling (NLV)
Hierdie woord is absoluut waar: As ons saam met Hom sterf, sal ons ook saam met Hom lewe. As ons verdrukking ly, sal ons saam met Hom regeer. As ons Hom ontken, sal Hy ons ook ontken. Maar as ons ontrou is – Hy bly getrou, want Hy kan Homself nie ontken nie.