उत्पत्ती 3
3
मुरुम परमप्रभु आ देंशो मटिशो
1मिनु परमप्रभु यावे आ सेल्शो जन्तु आन दातेमी नेल्ल क्येङा निप्स पाइश्शो बुस्स दुम्माक्त। मिनु बुस्सुमी मीश मुर कली “परमप्रभुमी इस कली ‘एको रू ङा रवा आन फल मारेइ मब्वसे’ देंमे?” दे हिल्लो पवा बाक्त। प्रकाश १२:९; प्रकाश २०:२ 2मिनु मीश मुरुमी बुस्स कली “गो एको रू ङा रवा आन फल ब्वचा दुम्नस्कु। उत्पत्ती २:१६ 3तन्न रू आ दातेमी बाक्शो रवा आ फल आ पर्बम परमप्रभुमी ‘मब्वचा, मथिचा यो। ब्वाइतीसी हना, गे बेक्नीसी’ देंत” देंमाक्त। उत्पत्ती २:१७ 4तन्न बुस्सुमी “गे बेक्सीन मबेक्नीसी। यूहन्ना ८:४४ 5ब्वाइतीसी हना, इस कली रिम्शो नु मरिम्शो मार बाक्बा तुइक्पाइक्ब। मिनु गे परमप्रभु खोदेंशो दुम्नीसी। मेकोन परमप्रभुमी तुइक्ताक्व” देंमाक्त। 6मिनु मीश मुरुम मेको रवा तशा ब्वशोनु, ब्रोव़चा ङा कोव़शोनु, दारशो, रुप्तीक थुं गेचा ङा तवा बाक्त। मोपतीके फल सेक्शा, ब्ववा बाक्त। मेको आ नेक्था बाक्ब आ वोंइश कली यो गेवा बाक्त। मेकोमी यो ब्ववा बाक्त। याकूब १:१४-१५; १तिमोथी २:१४ 7मिनु नोले निम्फा शिश्रा बाक्शो तुइक्तसे बाक्त। मिनु फोव़शी रवा आ सफा सेक्शा फेक्तीक सेल्से बाक्त। उत्पत्ती २:२५
8मिनु नाक्नाक्दो मेको निक्शीमी परमप्रभु यावे रूमी हिरशो नेन्से बाक्त। मिनु “परमप्रभु यावेम मतचा ङा पा ख्रुइक्चा” दे रवा आन दातेमी लशा, ख्रुइक्ससा बाक्त। भजन संग्रह १३९:७-१०; येरमीया २३:२४ 9मिनु परमप्रभु यावेमी आदम कली “ते बाक्ङे?” दे ब्रेत्ता बाक्त। 10मेकोमी “गो इन गाक्शो नेंता। मिनु गो शिश्रा बाक्तीके, हिंशा ख्रुइक्साक्यी” देंमाक्त। 11मिनु “गे शिश्रा बाक्नेवे, दे दोपा तुइक्नेवे? मब्वचा देंशो रवा आ फल ब्ववी?” दे हिल्लो पवा बाक्त। 12मिनु मुरुमी “इन गेशो मीश मुरुमी आं कली मेको रवा आ फल गेती। मिनु गो ब्वाता” देंमाक्त। २कोरिन्थी ११:३
13मिनु परमप्रभु यावेमी मेको मीश मुर कली “मार पवी?” दे हिल्लो पवा बाक्त। मीश मुरुमी “बुस्सुमी आं कली जोल पा ब्वपाइक्ती। मिनु गो ब्वाता” देंमाक्त। २कोरिन्थी ११:३
14मिनु परमप्रभु यावेमी बुस्स कली “बी ब्यफ नु ब्वाकी ङा जन्तु नेल्ल आन दातेम गे सराप राइनेवे। मारदे हना मोदेंशो मरिम्शो पाप्तीवी। इ रांमी ग्रेशा गाक्चा माल्नेवे। इ ब्रोंइतीक नाक्त सम्म खप जशा, बाक्चा माल्नेवे। 15गे नु मेको मीश मुर जिशा, बाक्चा मलीसे। मेको आ युइ नु इ युइ जिशा बाक्नीमी। मीश मुर आ युइ कामी इ पिया दिम्शा प्रोल्ब। गे चहिं मेको आ गेंग्रेम कोक्नेवे” दे सराप पदा बाक्त। प्रकाश १२:४-५,१५-१७
16मिनु मेकोमी मेको मीश मुर कली “कोव़ज कुरशा, आल थिवेनु, इ कली ठेयब श्येत गेनुङ। आल थिचा रोइ पाइनेवे। मो हना यो इ वोंइश कली माल्नेवे। मिनु मेकोमी इ कली हुकुम पाइब” देंमाक्त। एफिसी ५:२२-२३; १तिमोथी २:१२
17मिनु आदम कली “मारदे हना गे इ मीश आ लोव़ नेंशा, मब्वचा देंशो रवा आ फल ब्वाप्तीवी, इ पतीके आ पर्बम इ रू नेल्लेमी सराप ताइनीम। इ जचा थोव़क श्येत पा ख्रुम्चा माल्नेवे। उत्पत्ती ८:२१-२२; अय्युब ३१:३८-३९ 18इ रूमी चू नु चोंक वानीम। मिनु गे गिगी खाइ ब्वचा माल्नेवे। 19इ कुप्फी रे गाल यिपाइश्शा शोब्ले जचा माल्नेवे। गे खप मदुमे सम्म मोदेंशो पचा माल्नेवे। मारदे हना गो इ कली खप रे सेल्शो नङ” दे परमप्रभु यावेमी आदम कली देंमाक्त। उत्पत्ती २:७; भजन संग्रह ९०:१०; भजन संग्रह १०४:२९; उपदेसक १२:७; २थिस्सलोनिकी ३:१०
20मिनु आदममी आ मीश कली हव्वा नें वोदा बाक्त। मारदे हना मेको ब्रोंइब मुर नेल्ल आन ममा दुम्माक्त। 21मिनु परमप्रभु यावेमी आदम नु आ मीश आस कली कुशुल के फेक्तीक सेल्शा, फेक्तीम्सी बाक्त।
22मिनु परमप्रभु यावेमी “मुर इं खोदेंशो दुम्त। रिम्शो नु मरिम्शो तुइक्ब दुम्त। मेको ब्रोंइपाइक्ब रवा आ फल यो सेक्शा, ब्वाप्तु हना, गेना हना यो ब्रोंइब, गेनायो मबेक्ब दुम्ब” देंमाक्त।
23मोपतीके परमप्रभु यावेमी खप रे सेल्शो मुर कली एदेन माइश्शो रू रे ग्रुंइशा, अरु रूम गेय पथ सोइक्ता बाक्त। उत्पत्ती २:१५ 24परमप्रभुमी मेको आस कली खेरसी बाक्त। मेको आस कली खेरशा, एदेन रू ङा पूर्बमी आ स्वर्ग ङा करूब माइश्शो गेय पाइब वोदा बाक्त। मेकेर मी ब्रशो एर ओंथ हिरब तरवार का यो वोदा बाक्त। मेको ब्रोंइपाइक्ब रवा आ फल ब्वचा मताम्सेक्ल, दे कोव़ब वोदा बाक्त।
Tans Gekies:
उत्पत्ती 3: susz
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2011, Wycliffe Bible Translators, Inc. All rights reserved.
