متّی 7
7
ٻنہیں لوکیں دی عدالت
(رَلدا مِلدا حوالہ: لُوقا 6:37-38؛ لُوقا 6:41-42)
1”کہیں دے بارے ایہ فیصلہ نہ کرو جو او قصُور وار ہے تاں جو تُہاݙا وی اِینجھا فیصلہ نہ کیتا وَنڄے۔ 2کیوں جو خُدا تُہاݙی عدالت وی اُونویں ای کریسی جیویں تُساں ٻنہیں دی عدالت کریندو اَتے او تُہاݙے کیتے وی اُوہو اصول رکھیسی جیرھے تُساں ٻنہیں کیتے رکھیندو۔ 3تَیکُوں کیوں اپݨے بِھرا دی اَکھ دا ککھ نظردے پَر او شتیر نَئیِں نظردا جیرھا تیݙی اپݨی اَکھ اِچ ہے؟ 4جݙّاں تَیکُوں اپݨی اَکھ اِچ شتیر نظر نَئیِں اَندا تاں تُوں کیویں اپݨے بِھرا کُوں آکھ سڳدیں جو کھڑ، مَیں تیݙی اَکھ اِچ پِیا ککھ کڈھ ݙیواں۔ 5اَے رِیاکار! تُوں پہلے اپݨی اَکھ دے شتیر کُوں تاں کڈھ اَتے وَلا تَیکُوں اپݨے بِھرا دی اَکھ دا ککھ صاف نظر اَؤسی اِیندے بعد تُوں اُونکُوں چَنڳی طرحاں ݙیکھ کرائیں کڈھ سڳسیں۔ 6کُتَئِیں اَڳوں مُقدّس شئیں اَتے ڄِتامئیں اَڳوں موتی نہ سَٹو، اِیں نہ تِھیوے جو او اِنہیں کُوں پیریں تَلے لتاڑن اَتے مُڑ کرائیں تُہاکُوں چیر پاڑ ݙیوَݨ۔“
منگو، ڳولو اَتے کھڑکاؤ
(رَلدا مِلدا حوالہ: لُوقا 11:9-13)
7”خُدا کنُوں منگدے رَہسو تاں او تُہاکُوں ݙِیندا رَہسی، اُونکُوں ڳولو تاں تُہاکُوں مِلسی، دَر کھڑکیسو تاں تُہاݙے کیتے کھولیا ویسی۔ 8کیوں جو جیرھا وی منگدے اُونکُوں مِل ویندے اَتے جیرھا ڳولیندے اُونکُوں لَبھ پوندے اَتے جیرھا دَر کھڑکیندے اُوندے کیتے کھولیا ویندے۔ 9تُہاݙے اِچوں اینجھا کیرھا بندہ ہے جیرھا اپݨے پُتر کُوں روٹی منگݨ تے پَتھر ݙیوے؟ 10یا او مَچھی منڳے تاں اُونکُوں نانگ ݙیوے؟ 11جے تُساں بُرے تھی کرائیں وی اپݨے ٻالیں کُوں چَنڳیاں شئیں ݙیندو تاں تُہاݙا اَسمانی باپ اُنہیں کُوں چَنڳیاں شئیں کیوں نہ ݙیسی جیرھے اُوں کنُوں منگدِن۔ 12اِیں کیتے جیویں تُساں چاہندو جو لوک تُہاݙے نال کرَݨ تُساں وی اُنہیں لوکیں نال اُونویں سلُوک کرو کیوں جو تورات اَتے نبیئیں دی تعلیم اِیہا ہے۔“
سوڑا دَر
(رَلدا مِلدا حوالہ: لُوقا 13:24)
13”تُوں خُدا دی بادشاہی اِچ سوڑے دَر کنُوں وَنڄ کیوں جو جیرھا رَستہ چوڑا ہے اُوندا دَر وی وَݙّا ہے او دوزخ دو گھِن ویندے اَتے اُوں رَستے اُتے ٹُرݨ آلے ٻَہُوں ہِن۔ 14پَر جیرھا دَر حیاتی دو گھِن ویندے او سوڑا ہے اَتے اُوں رَستے اِچ تکلیفاں ٻَہُوں ہِن اِیں کیتے تھوڑے لوک ای اِیں رَستے اُتے ٹُردِن۔“
وَݨ اَتے اُوندا پَھل
(رَلدا مِلدا حوالہ: لُوقا 6:43-44)
15”جیرھے کُوڑے نبی بݨ کرائیں اَندِن اُنہیں کنُوں ہُشیار رَواہے او تُہاݙے کولھ بِھیݙیں وانگوں بھولے بݨ کرائیں اَندِن پَر اندر کنُوں او چیر پاڑ کرَݨ آلے نَہریں وانگوں ہوندِن۔ 16اُنہیں دے عملیں کنُوں تُساں اُنہیں کُوں سُنڄاݨ گھِنسو، کیا کیکِر کنُوں اَنگور یا کرہئیں کنُوں ہنجیر دا پَھل پَٹیندو؟ 17اِیویں ای چَنڳاں وَݨ چَنڳاں پَھل ݙیندے اَتے خراب وَݨ خراب پَھل ݙیندے۔ 18نہ چَنڳاں وَݨ خراب پَھل ݙے سڳدے اَتے نہ خراب وَݨ چَنڳاں پَھل۔ 19جیرھا وَݨ چَنڳاں پَھل نَئیِں چیندا او کَپیا اَتے بھاہ اِچ سَٹیا ویندے۔ 20تاں اِیویں تُساں وی اُنہیں دے کَمیں کُوں ݙیکھ کرائیں اُنہیں کُوں سُنڄاݨ گھِنسو۔“
یِسُوع دا رِیاکاریں کُوں سُنڄاݨن کنُوں اِنکار
(رَلدا مِلدا حوالہ: لُوقا 13:25-27)
21”خُدا دی بادشاہی اِچ وَنڄن کیتے صرف مُونہہ کنُوں مَیکُوں اَے خُداوند! اَے خُداوند! آکھݨ کافی نَئیِں۔ اُتھاں اُوہے ویسِن جیرھے میݙے اَسمانی باپ دے حُکمیں اُتے عمل کریندِن۔ 22مَحشر دے ݙینہہ ٻَہُوں سارے لوک مَیکُوں آکھسِن، ’اَے خُداوند! اَے خُداوند! کیا اَساں تیݙا ناں گھِن کرائیں پیش گوئی نَئیِں کیتی اَتے تیݙا ناں گھِن کرائیں بَدرُوحیں کُوں نَئیِں کڈھیا اَتے تیݙا ای ناں گھِن کرائیں مُعجِزے نَئیِں ݙِکھائے؟‘ 23اَتے اُوں ویلے مَیں اُنہیں کُوں صاف آکھ ݙیساں جو مَیں تُہاکُوں نَئیِں ڄاݨدا، اَے بےدینو! مَیں کنُوں پَرے تھی وَنڄو۔“
ݙُو گھر بݨاوَݨ آلے بندئیں دی مثال
(رَلدا مِلدا حوالہ: لُوقا 6:47-49)
24”اَتے جیرھا میݙیاں ایہ ڳالھیں سُݨدے اَتے اِنہیں اُتے عمل کریندے او ہُوں سیاݨے بندے وانگوں ہے جَیں اپݨے گھر دا ایرا پکی جاہ اُتے رکھیا۔ 25مِینہ وَسیا، چَھل اَئی اَتے اَندھارِیاں گُھلیاں اَتے اُوں گھر کُوں ٹکراں لڳیاں پَر او نہ ڈھٹا کیوں جو اُوندا اَیرا پکی جاہ اُتے ہا۔ 26پَر جیرھا میݙیاں ایہ ڳالھیں سُݨ کرائیں اُنہیں اُتے عمل نَئیِں کریندا او اُوں بےوقوف بندے وانگوں ہے جَیں اپݨے گھر دا ایرا کچی جاہ اُتے بݨایا۔ 27جݙّاں مِینہ وَسیا، چَھل اَئی اَتے اَندھارِیاں گُھلیاں اَتے اُوں گھر کُوں ٹکراں لڳیاں تاں او گھر ڈھہہ پِیا اَتے برباد تھی ڳیا۔“
یِسُوع دا اِختیار
28جیویں ای یِسُوع ایہ ڳالھیں سِکھا ݙِتیاں تاں بھِیڑ اُوندی تعلیم کنُوں ٻَہُوں حیران تھئی۔ 29کیوں جو او اُنہیں کُوں شرع دے عالمیں وانگوں نَئیِں بلکہ پورے اِختیار نال تعلیم ݙیندا ہا۔
Tans Gekies:
متّی 7: سرائیکی
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
متّی دی راہِیں اِنجِیل
سرائیکی بولی اِچ
Gospel of Matthew in Common Saraiki (Test edition for limited distribution)
Copyright © 2023 The Pakistan Bible Society
All rights reserved Gospel of Matthew, in Common Saraiki (Test edition for limited distribution) Copyright © 2023 by The Pakistan Bible Society
Typesetting: CAP Department, Pakistan Bible Society
PUBLISHER: THE PAKISTAN BIBLE SOCIETY
