متّی 10
10
یِسُوع دے ٻارھاں خاص شاگِرد
(رَلدا مِلدا حوالہ: مرقس 3:13-19؛ لُوقا 6:12-16)
1اَتے یِسُوع اپݨے ٻارھاں خاص شاگِردئیں کُوں اپݨے کولھ سَݙ کرائیں اُنہیں کُوں اِختیار ݙِتا جو او لوکیں اِچوں بَدرُوحاں کڈِھن اَتے ہر طرحاں دی بیمارئیں اَتے کمزورئیں کنُوں شِفا ݙیوِن۔ 2اَتے ٻارھاں رسُولیں دے ناں ایہ ہِن، پہلا شمعُون جَینکُوں پطرس وی اَہدِن اَتے اُوندا بِھرا اندریاس، زبدی دے ݙُوہیں پُتر یعقُوب اَتے یُوحنّا۔ 3فِلپّس اَتے برتُلمائی، توما اَتے متّی جیرھا مصُول گھِنݨ آلا ہا۔ حلفئی دا پُتر یعقُوب، اَتے تّدی۔ 4شمعُون قنانی اَتے یہُوداہ اِسکریُوتی جَیں بعد اِچ یِسُوع کُوں پکڑوایا ہا۔
یِسُوع خاص شاگِردئیں کُوں اِختیار ݙیندِن
(رَلدا مِلدا حوالہ: مرقس 6:7-13؛ لُوقا 9:1-6)
5یِسُوع اِنہیں ٻارھاں رسُولیں کُوں ایہ حُکم ݙے کرائیں بھیڄیا،”نہ غیر قومیں دو وَنڄاہے اَتے نہ ای صوبہ سامریہ دے شہریں اِچ۔ 6بلکہ صرف اِسرائیلی قوم دو وَنڄاہے جیرھی رُلّی ہوئی بِھیݙیں وانگوں ہے۔ 7اَتے ایہ پرچار کریندے وَنڄو جو اَسمان دی بادشاہی ٻَہُوں نیڑے آ ڳئی ہے۔ 8بیماریں کُوں شِفا ݙیو، مُردئیں کُوں زندہ کرو، کوڑھیں کُوں پاک صاف کرو اَتے بَدرُوحاں کڈھو، تُہاکُوں مُفت مِلئے تُساں وی مُفت ݙیو۔ 9تُساں اپݨے نال کُوئی سونے، چاندی یا ترامَے دے سِکّے نہ چَواہے۔ 10اَتے تُہاݙے کولھ نہ کُوئی وادھوں چولا نہ جُتی نہ ہَتھ اِچ سوٹی ہووے اَتے نہ ای کُوئی سفری تھیلا ہووے۔ کیوں جو مَزدُور اپݨی روزی روٹی دا حق دار ہے۔ 11جݙّاں تُساں کہیں شہر یا وستی اِچ داخل تِھیوو اُتھاں کہیں مہمان نواز بندے کُوں ڳولاھے اَتے اُتھوں ٹُر وَنڄن تَئیِں اُوں گھر اِچ ٹِکئے رَواہے۔ 12جیرھے ویلے کئیں گھر اِچ داخل تِھیوو تاں اُوں گھر آلئیں دی خیر مَنگائے۔ 13جے اُوں گھر دے لوکیں دا رویہ تُہاݙے نال چَنڳاں ہویا تاں تُہاݙی دُعا اُنہیں کیتے سُݨی ویسی اَتے جے اُنہیں دا سلُوک چَنڳاں نہ ہویا تاں تُہاݙی دُعا تُہاݙے کَنے وَل اَؤسی۔ 14اَتے جے کہیں گھر یا شہر دے لوک تُہاکُوں اپݨے کولھ نہ ٹِکاوِن اَتے تُہاݙیاں ڳالھیں نہ سُنݨ تاں اُوں گھر یا شہر کنُوں ٻاہر ویندئیں ہوئیں اپݨے پیریں دی دُھوڑ اُتھائیں چَھنِڈک چھُڑائے۔
15مَیں تُہاکُوں سچّ اَہداں جو مَحشر دے ݙینہہ شہر سدُوم اَتے شہر عمُورہ دی نسبت اِیں علاقے دے لوکیں دا حال بَدتر ہوسی۔“
پرچار دے کَم اِچ تکلیفاں
(رَلدا مِلدا حوالہ: مرقس 13:9-16؛ لُوقا 21:12-17)
16یِسُوع آکھیا، ”ݙیکھو مَیں تُہاکُوں جیرھے بِھیݙیں وانگوں ہِوے نَہریں اِچ بھیڄینداں، اِیں کیتے نانگیں وانگوں ٻَہُوں ہُشیار اَتے کبوتر وانگوں بھولے بݨو۔ 17اُنہیں لوکیں کنُوں خبردار رَواہے جیرھے تُہاکُوں مذہبی اَتے مقامی عدالتیں دے اَڳوں پیش کریسِن اَتے کوڑے مَرویسِن۔ 18جݙّاں میݙی وجہ کنُوں تُہاکُوں حُکمرانیں اَتے بادشاہیں دے سامݨے پیش کیتا وَنڄے تاں تُہاکُوں اُنہیں اَتے غیر قومیں دے اَڳوں میݙی خُوشخبری دی گواہی ݙیوَݨ دا موقع مِلسی۔ 19اَتے جݙّاں او تُہاکُوں پکڑ وَنڄن تاں ایہ چِنتا نہ کراہے جو اَساں کیا ڳالھ کرَݨی ہے اَتے کیویں آکھݨے، ایہ ساریاں ڳالھیں تُہاکُوں اُوں ویلے ݙسائیاں ویسِن۔ 20کیوں جو ڳالھ کرَݨ آلے تُساں نہ ہوسو بلکہ تُہاݙے اَسمانی باپ دا رُوح تُہاݙے اِچوں ڳالھ کریسی۔ 21بِھرا، بِھرا کُوں مَراوݨ کیتے حُکمرانیں دے حوالے کریسی، اِیویں ای پیِوُ اپݨے ٻالیں کُوں اَتے ٻال اپݨے ماء پیِوُ دے خلاف اُٹھی کھڑسِن تاں جو اُنہیں کُوں مار ݙِتا وَنڄے۔ 22اَتے میݙی وجہ کنُوں سارے لوک تُہاݙے نال دُشمنی رکھیسِن پَر جیرھا مَردے دَم تَئیِں اِیمان تے قائم رَہسی اُونکُوں مُعافی مِلسی۔ 23جݙّاں ہِک شہر دے لوک تُہاکُوں ستاوِن تاں کہیں ٻئے شہر دو بھڄ وَنڄائے، مَیں تُہاکُوں سچّ اَہداں اَڄݨ تُساں بنی اِسرائیل دے سارے شہریں اِچ نہ پِھریے ہوسو جو اِبنِآدم یعنی مَیں آ ویساں۔ 24کُوئی شاگِرد اپݨے اُستاد کنُوں وَݙّا نَئیِں ہوندا اَتے نہ ای ٻاہنا اپݨے مالک کنُوں۔ 25شاگِرد کیتے اِتنا ٻَہُوں ہے جو او اپݨے اُستاد وانگوں تھی وَنڄے اَتے اِیویں ای ٻاہنا اپݨے مالک وانگوں۔ جݙّاں اُنہیں گھر دے مالک کُوں بَعلزبُول یعنی بَدرُوحیں دا سردار آکھ ݙِتے تاں کیا اُوندے گھر دے لوکیں کُوں اِیں کنُوں وَدھ بُرے ناویں نال نہ سݙیسِن؟“
بدن اَتے رُوح دے مالک خُدا کنُوں ݙَرو
(رَلدا مِلدا حوالہ: لُوقا 12:2-7)
26”اِیں کیتے اُنہیں لوکیں کنُوں نہ ݙَرو کیوں جو او ویلا اَندا پئے جݙّاں اوݙھر شئے ݙکھا ݙِتی ویسی اَتے ہر لُکی شئے کُوں ظاہر کر ݙِتا ویسی۔ 27مَیں جیرھیاں ڳالھیں اندھارے اِچ یعنی رازداری نال کیتن، ݙینہہ دے سوجھلے اِچ اُنہیں دا چھَتوں اُتے چڑھ کرائیں پرچار کرو۔ 28اَتے لوکیں کنُوں نہ ݙَراہے جیرھے تُہاکُوں جان کنُوں تاں مار سڳدِن پَر رُوح کُوں نَئیِں بلکہ خُدا کنُوں ݙَرو جیرھا رُوح اَتے جان ݙُوہیں کُوں مار کرائیں دوزخ اِچ سَٹ سڳدے۔ 29تُساں ڄاݨدو جو بھانویں چڑیاں ٻَہُوں سَستیاں وِکدِن وَل وی اُنہیں اِچوں ہِک وی تُہاݙے اَسمانی باپ دی مرضی دے بغیر زمین اُتے نَئیِں ڈھہہ سڳدی۔ 30اِیویں تُہاݙے سِر دے وال وی تُہاݙے اَسمانی باپ دی ڳِݨتری اِچ ہِن۔ 31اِیں کیتے تُساں ترسلّا رکھو کیوں جو تُہاݙی قدر تاں ٻَہُوں سارئیں چِڑیئیں کنُوں وی وَدھ ہے۔“
لوکیں دے سامݨے یِسُوع مسِیح دا اِقرار اَتے اِنکار
(رَلدا مِلدا حوالہ: لُوقا 12:8-9)
32”جیرھا وی لوکیں دے سامݨے ایہ آکھے جو او میݙے اُتے اِیمان رکھیندے تاں مَیں وی اپݨے اَسمانی باپ دے سامݨے اُونکُوں اپݨا آکھساں۔ 33پَر جیرھا وی لوکیں دے سامݨے میݙا اِنکار کریسی مَیں وی اپݨے اَسمانی باپ دے سامݨے اُوندا اِنکار کریساں۔“
صُلح نَئیِں بلکہ تلوار
(رَلدا مِلدا حوالہ: لُوقا 12:51-53؛ لُوقا 14:26-27)
34”تُساں ایہ نہ سمجھو جو مَیں زمین تے امن کراوَݨ آیاں، امن نَئیِں بلکہ تلوار چلواوَݨ آیاں۔ 35خاندان دے سارے لوک میݙی وجہ کنُوں ہِک ٻئے دے خلاف تھی ویسِن جیویں پُتر پیِوُ دے، دِھی ماء دے اَتے نَونہہ سَس دے۔ 36اَتے گھر دے لوک ای ہِک ٻئے دے دُشمن تھی ویسِن۔ 37جیرھا بندہ میݙے کنُوں وَدھ کرائیں اپݨے پیِوُ ماء نال مُحبّت کریندے او میݙی پیروی کرَݨ دے لائق نہ ہوسی۔ اَتے جیرھا بندہ میݙے کنُوں وَدھ کرائیں اپݨے پُتر یا دِھی نال مُحبّت کریسی، او وی میݙی پیروی کرَݨ دے لائق نہ ہوسی۔ 38اَتے تُساں اپݨے ݙُکھیں دی سُولی چا کرائیں میݙے پِچھُوں آوَݨ کنُوں اِنکاری تھی وَنڄو تاں تُساں میݙے شاگِرد ہووَن دے لائق کَینی۔ 39جیرھا کُوئی اپݨی جان کُوں بچاوَݨ دی کوشش کریسی او اُونکُوں چَٹ کریسی پَر جیرھا میݙے کیتے اپݨی جان چَٹ کریسی اُونکُوں ہمیشاں دی حیاتی مِلسی۔“
اجر
(رَلدا مِلدا حوالہ: مرقس 9:41)
40”جیرھا تُہاکُوں قبول کریندے او مَیکُوں قبول کریندے اَتے جیرھا مَیکُوں قبول کریندے او میݙے بھیڄݨ آلے کُوں قبول کریندے۔ 41اَتے جیرھا کُوئی نبی کُوں نبی سمجھ کرائیں قبول کریندے اُونکُوں نبی جِتنا اجر مِلسی اَتے جیرھا کُوئی میݙے نیک بندے کُوں نیک سمجھ کرائیں قبول کریندے اُونکُوں میݙے نیک بندے جتنا اجر مِلسی۔ 42اَتے جیرھا وی میݙے پیروکاریں اِچوں کہیں ہِک نِکے پیروکار کُوں وی ٹَھڈے پاݨی دا ہِک پیالہ پِلیندے، تاں مَیں تُہاکُوں سچّ اَہداں جو اُونکُوں اُوندا اجر ضرور مِلسی۔“
Tans Gekies:
متّی 10: سرائیکی
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
متّی دی راہِیں اِنجِیل
سرائیکی بولی اِچ
Gospel of Matthew in Common Saraiki (Test edition for limited distribution)
Copyright © 2023 The Pakistan Bible Society
All rights reserved Gospel of Matthew, in Common Saraiki (Test edition for limited distribution) Copyright © 2023 by The Pakistan Bible Society
Typesetting: CAP Department, Pakistan Bible Society
PUBLISHER: THE PAKISTAN BIBLE SOCIETY
