Pinongurugan 39
39
Si Yusup om Sawo ni Putipar
1Indadi si Yusup-o po sono inowit nu ongo lobuw ni Ismail so Masir om niwoli dii si Putipar, soujar nu raja om wowaidon nu moongipat so waloi nu raja. 2Nga tinabang-a si Yusup nu TUHAN, om ourug onu yo po gogoma'on niyo. Molak-polak-a iyo so tuan niyo, lobuw Masir-i.#P'rapan 7:9 3Osiou nu tuan niyo ri nu tobangon iyo nu TUHAN, om onu yo po gogoma'on niyo nga ourug. 4Sobana ko oondayan si Putipar so si Yusup sampai inurug niyo si Yusup nu moomugogoma'on, moomogkoilo nu waloi om gonggamon niyo. 5Binorokatan sono nu TUHAN sompinunguan nu lobuw Masir iiri, kiat-o so asuw nu waloi kumoo yo so umo, nu si Yusup su kinopongoborokatan. 6Kiawi' songapan ni Putipar niarap-o so si Yusup. Indadi d'ado yo sono ilo-ilo niyo suat so waloi, onu ko po suat so ingkookan niyo.
Si Yusup-o po opapag om oparu', 7om dai olaid kiat nu iri, sumorong sono sawo ni Putipar so iyo, om ingoli yo iyo mokimuondot.
8Nga dai minoingin si Yusup om tongaro yo iyo nu, “Aku yo su pinongoorapan ni tuan Putipar nu kiawi' songapan niyo. Dai yo muru' iyo maagut momikir nu onu-onu so waloi tu. 9Kopogboya'an ku so waloi iitu muinong nu kopogboya'an niyo, ono yo ko' kiawi' gonggamon so waloi tu niarap niyo so aku, nga ikau po su dai niarap niyo. Dai su moingin momaal nu oraai oono so tiningkuangon nu Kinoringan,” koo.
10Pudi pona runat-runat mongolimuuk sawo ni Putipar so si Yusup, nga dai ya iyo moingin mondot.
11Ido runat, minasuw si Yusup so waloi oono mugogoma'on, om sawo po ni Putipar su otoron. 12Dai noilaan, pudiko yo sono nu sawo ni Putipar sabung ni Yusup om mutongaro yo nu, “Kayo muondot kito,” koo, nga moginuodo yo si Yusup om nokowiliw-a iyo, om mundako yo lumabus, nga noogol-a sabung niyo ri so woinoi-i. 13Pagka nokolaiw-a si Yusup om noogol-a sabung niyo ri, 14paawo yo sono nu sawo ni Putipar moomugogoma'on niyo ri om mutongaro yo nu, “Siowi muyu! Iri lobuw Ibrani inowit nu sawo ku no so waloi tu, mongoiyu' so toko. Minasuw iyo so bilik ku no padu mongingol so aku muondot, nga gumiako aku yo po, 15mundako ya sono iyo lumabus, om noogol-a sabung niyo tu,” koo.
16Toui yo sono nu woinoi iiri sabung ni Yusup, niposiou ong kouli' sawo niyo ri. 17Nokouli' yo po sawo niyo ri, obari yo sono niyo nu, “Iri yo po lobuw Ibrani inowit mu so waloi tu ri, minasuw so bilik-o padu mongasau so aku. 18Nga pagka ginumiak aku, mundako ya sono iyo lumabus, om noogol-a sabung niyo tu,” koo.
19Sobana ko minungot si Putipar. 20Suuo yo sono niyo paakom si Yusup om jiniil so iri poongojiilan nu lobuw kikosola'an so raja ri. 21Nga tinabang-a nu Kinoringan si Yusup, om owarong sono wowaidon nu moongipat nu jiil-i so iyo.#P'rapan 7:9 22Urugo yo sono niyo si Yusup nu wowaidon nu ongo lobuw nojiil-i, om iyo yo su mogkoilo nu onu yo po gogoma'on so jiil-i. 23D'ado yo sono ilo-ilo nu wowaidon iiri, onu yo po nipongaarap-o niyo so si Yusup, so' tinabang-a iyo nu Kinoringan om ourug onu yo po gogoma'on niyo.
Tans Gekies:
Pinongurugan 39: TomPWPgLgPn
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2023 (Active), Wycliffe Bible Translators, Inc. All rights reserved.
