Matta 9
9
Yesu a gwadə ama ka ootɨ ndongtə
(Markus 2.1-12; Luka 5.17-26)
1Yesu a pɨrə koombotə a nggɨrə ɓayatə a muɗə vɨrasən. 2Imi a shikan ka ama a ka ootɨ ndongtə, mangɨn nee bə kɨze. Ite Yesu ɓe naa mwadiyale darən, nda sa nzə-ootɨngɨn atɨ, “Nze de, nggik nzɨmsa, mye nggurugə səhase dəw.”
3Də imi dɨ vor ji-lee kəndə ɓashita Musa 'ye a hangɨn ɓe kɨl la Yesu a boyo, tən ta boyəsə atɨ, “Ma nee dɨ kɨɗa kwakɨ Həmɨnpwa.”
4A hangɨn Yesu a kɨlə sɨsən a lee mbali ləməgyee təna dɨ boyə hubosərən, nda ɓə sarən, “Ɓə ya hwuna ɓə dɨ ɗyenglə hase a hubosəwna? 5Ɓə ndoɗi pɨri, mya sa atɨ, ‘Mye nggurugə səhase dəw,’ naasə mgban mya san atɨ, ‘Maɗi woyi muɗi’? 6Gə hwuna leyə atɨ hɨn Nze da Ɓwaara hɨne ka gətə na nggurgə səhase ganə a vor vɨratə.” Nda ɓə sa ma ka ootɨ ndongtɨngɨn atɨ, “Maɗi nggur sɨbətɨ dəw muɗə hwoɗye.” 7Mangɨn a maɗə a woyo a muɗə hwodan. 8Ite mbiɗitɨ ɓwaaree a hangɨn kat ɓe naa ləngɨn, kala a gərən, təna ndukodə Həmɨnpwa ndi ma vədə wule gəte.
Yesu wa Matta
(Markus 2.13-17; Luka 5.27-32)
9Ite Yesu nee pɨri, nda naa ma mya wa atɨ Matta#9.9 Matta: Kpeyə kwakɨngɨn nə Levi. sɨne nza kwakra da ji-luu taa shemtə, nda san atɨ, “Maɗa kwaɗe.” Matta a maɗə mgban a koɗən.
10Ite Yesu a nza haa zɨmshe a hwoda Matta, ji-luu taa shemtə hananang ka i tataryi ɓwaare a shi a nza, a ɓɨdɨmə a zɨmshe mgban ka Yesu ka lagbe dan. 11Farise 'ye naa ləngɨn a ɗiyə lagbe da Yesu atɨ, “Gəkɨlə mɨnə həmɨ-hwodəwnə a peyə a dɨ zɨmshe ka ji-luu taa shemtə ka i tataryi ɓwaare?”
12Yesu ɓe kɨlə tee, nda sarən atɨ, “Myee dwat aa dɨ zə haka nzə-ɓwatə, ji-ootə nə ɓəmbə dɨ zə mgba nggume. 13Ɓa wula hwuna wudə a ɗyegən naarə lanə atɨ, ‘Puruti na dɨ mwo, aa hamati.’#9.13 Naasə: Hosaya 6.6. Hɨn taa shi vɨratə gə na waga myee dɨ nggur nəngrən ɓətɨ tən ji-ɗa səfemə, na shi gə na wa ji-ɗa səhase.”
Mye ɗiyə Yesu le a nə nggur gone
(Markus 1.18-22; Luka 5.33-39)
14Beetɨ angɨn, lagbe da Yohana a shi haka Yesu a ɗiyən atɨ, “Ya hin, kat ka Farise a dɨ gonə, tən lagbe dəw aawa gona?”
15Yesu a luwa a sarən, “Ɓə ya omyee shi hwoɗi ləke ɓa mɨna gona? Tənaa dɨ gonə anda ngaja nee nza ɓwaa kaarən. Di fəre ɓa shi mye ɓa kɨr ngajangɨn, a fərəngɨn tən ɓa gonə.
16“Taa ndəng ama ɓa nggur sɨ baasə hwele a mbaka a nə rukutə iire. Kwaamɨ baasə hwele ɓa nggəl rukutə iirəngɨn a sɨran nda tawo, sɨrtɨngɨn ɓa mɨna hasə. 17Sə mgban, myaa dɨ nggur mbul-mbulə vwa dɨ huba a pukə vor səgi 'yerye, mye kana ɗaasə, vwe ɓa huba a fala səgye, vwe a kəji. Mya dɨ puk vwe a vor səgi hwelye.”
Njite mbɨri ka i nzə-ooti
(Markus 5.21-43; Luka 8.40-56)
18Sɨne a vor byele tee, a murə dɨ vor mi kpan-kpani vəni kəndəshe da Yawude asɨ gyerə humwasən a san, “Njishi nə mbɨri ɓəgəng, zə parə ka tɨfanga nggi ɓa maɗə.” 19Yesu ka lagbe dan a maɗə a koɗən.
20Təne a tɨfe dɨ muɗi, itɨ meti ite ka ootɨ dɨmtɨ zaambe kyawatə bəw a mbiɗi-kpe, a kwaɗa dɨ beetɨ Yesu a pa baapa ɓarawtɨ dan. 21Ngga sa a hubosə atɨ, “Nagi nda baapa ɓarawtɨ dan nə na parə, ootɨnə ɓa dɨmgi.” 22Yesu a ɓiya a naarə, nda sarə atɨ, “Metə, nggik nzɨmsa, mwadiyale dəw vu piyatə.” Gbyel a hangɨn dɨmtɨ zaambe darə a kangə.
23Ite Yesu a pɨrə hwoda makpanəngɨn, nda naa bɨle fɨrɨmye nee dɨ lyebshe, ɓwaare hananang nee dɨ təwi kehee a vor hwoɗye. 24Yesu a sarən atɨ, “Dɨməmə haa bwange, njitɨngɨn aa mbɨrə, shinə ngga dɨ shinə.” Ɓwaare a pukgən ka kyeɗəke gɨw. 25Ite mya dɨmdə ɓwaare kat a haa bwange, nda pɨrə a kɨt tɨfə njitɨngɨn, ngga maɗə. 26Ləngɨn a ngguro a mbəgə hee kat a vor njiyangɨn.
Yesu a gwadə i weli kpe ka ma ka muutɨ kwaame
27Yesu ɓe ɗaka hangɨn dɨmə dɨ muɗi, i weli kpe a koɗən ta wagaarən atɨ, “Nze da Dawuda, zə ɗa purusenə!”
28Ndi ɓe pɨrə vor hwoɗingɨn, welingɨn a pɨrə a pan. Nda ɗiyərən atɨ, “Hwun mwa atɨ hɨn ɓa mba gwatə a gwadəwna?”
Təna luwa a san atɨ, “A, hin mwa kwe Həmɨmiye.”
29Də nda pa diingrən a sarən atɨ, “Ɓətɨya hwuna mwadiyale, naa angɨn a nzasə.” 30Dii welingɨn a wonə, təna naa haa. Yesu a fyel-kwakingrən kɨr-kɨr atɨ, “Ɓe hwunaa mwa ama a lee lanə.” 31Dɨmsərən nə ka le, təna fɨla ləngɨn a mbəgə njiya hangɨn kat.
32Ite Yesu ka lagbe dan a dɨmə a dɨ muɗə, mya shikan ka ma pɨle ji-dwatə a gə sɨsən, ndaawa byelə. 33Ite Yesu a dɨmdə pɨle ji-dwatə gə sɨtɨ mangɨn, nda tiya byele. Ɓwaare kat a ɗa ndəle ka ləngɨn, tən ta sa atɨ, “Myaa ndaga naa wule sa a vor Israila.”
34Hɨnggərən tən Farise, tən ta sa atɨ, “Ka gəta həme da pɨle ji-dwatə nda dɨ dɨmdə pɨle ji-dwatə.”
Ji-lyentə aa furo
35Yesu a muɗə ta woyə vor vɨre kpan-kpanye kat ka i kur-kurye. Ndi ta kənərən shee a vor vəni kəndəshe da Yawude ta hiwarən ka ləmə feme a nə həmnə pwa. Ndi ta dɨmdə zərgi ootə som-som. 36Ndi ɓe naa furo ɓwaare hananang, nda ɗa purusərən gəkɨlə təne dɨ tənə taa ma kaarən, təne ɓətɨ mbagee taa majinə kaarən. 37Nda sa lagbe dan atɨ, “Lyentɨ ngguragə shi hawtə gə kaake nə kpan, gələ shi hawtə naa kən nggurati mya ngguragərən gə kaake, shezə ji-lyentə aa furo. 38Zə nyisəmə Həmɨmiye, ndi həmɨ gaashe, gə nda lyanashe ka ji-lyentə a vor gaashe dan.”
Tans Gekies:
Matta 9: bcy
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
