Luqaas Mishiraachcha 16

Qoor Gassaanchi Bikkina

1Odim Yesuus ixxi losaanina «Mat goddaanchi manchina ixxi mi'n amaxxa egeroo gassaanchi hee'ukko. Manni ‹Ku gassaanchi ki amaxxa binnaa'oolla› yaa ixxi moollannina kurukko. 2Ixxi moollannim ixxo weeshaa ‹Ku ki bikkina macceesummi luwwi maruwwa? Ka lasage at i luwwa egeraanchi ikkeena xantoobee'i bikkina egeraanchi ikkaa hee'llitti ammane issitti luwwa kure› yukko. 3Oo gassaanchim ixxi wodanonne ‹I moollanni eese baxiinsi fissoo bikkina maha isso? Uulla abuulleena xanoommi malaaybee'e; uunxeenam tuuroommo. 4Ee bikkina i moollanni eese baxiinsi fissoohaare manni ixxuwwi minenne eese aa'oo'isina an issoommi luwwa la'oommo› yukko.

5«Ixxim moollanniinsi diinate liqaayye aa'llo'i manna annannichchom weeshaa luxxi manchina ‹I moollanniinsi liqaayye aa'llitti diinat hinkaa'nna?› yaa xa'mmukko. 6Oo manchim dabaraa ‹mat xibbi jaalo'i#16:6Giriik kitaab «Mat xibbi batosa», «Ontayyi batosa» yookko. Oohim mat batos sadee soor leetiroqaxaa ihookko yimma. zayta› yukko. Ixxim dabaraa ‹Qaqqisonne afuuttaa ki badanchi kitaabamu woraqatanne «Ontayyi jaalo'o» yitaa kitaabe› yukko. 7Ee lasage mullaannina ‹Keesenne yoo badanchi hinkaa'nna?› yaa xa'mmukko. Oo manchim dabaraa ‹sor kum kiilogiraam#16:7Giriik kitaab «Xibbi korosa», «Sadeentayyi korosa» yookko. Oohim mat koros soor xibbi kiilo'i giraa'mqaxa ihookko yimma. arasa› yukko. Ixxim dabaraa ‹Ki badanchi kitaabamu woraqatanne «Sadee lam kum kiilogiraama» yitaa kitaabe› yukko. 8Oo amma'nnamubee'i gassaanchi ixxi gagina issu qooroomina ixxi moollanni galaxxukko. Ka uulli manni ixxuwwina'i ixxuwwi issaqqantam luwwina Waa'i oosiinsi lophphita'a qoolluwwa.

9«An ki'nnuwwina kuroommo; ki'nnuwwik diinat beeddoohaare heer heerinam hee'llakkam beyyonne Waa'i ki'nnuwwa aa'oo'isina ka bi'oo diinatinne ka uullanne ki'nnuwwi gagina koba amaddehe. 10Hoffi luwwanne amma'nnamukkok lob luwwannem amma'nnamaakkoohane. Hoffi luwwanne amma'nnamubee'ek lob luwwannem amma'nnamooyyo. 11Ka uulli diinatenne amma'nnantakkobeelas hanqo'i diinatina ki'nnuwwa ayyi amma'nnookko? 12Mulli manni diinatenne ki'nnuwwi amma'nnantakkobeelas ki'nnuwwi luwwa ki'nnuwwina ayyi uwwookko.

13 # Mat 6:24 «Mat agishshi lam moollannina ijaajameena xanooyyo. Mato sabaa mato iittookko. Te'im mato lonsaa mato gadookko. Ki'nnuwwim diinatinaa Waa'inaa laminam ijaajantakkeena xantakkamoyyo» yukko.

14Farisaawe'uwwi diinate iittitam bikkina ee hundam macceessa'a Yesuusanne naacco'o. 15Ihukkaarem Yesuus ee Farisaawe'uwwina «Ki'nnuwwi manni illagenne ki'nnuwwi gaga xummaan issitakkam keeno. Ihukkaarem ki'nnuwwi woda'nneka Waa'i la'ookko. Manni illagenne danaamo labookkok Waa'i illagenne sabamaakkoohane.

See'l Bikkinaa Meento Hollimmi Bikkinaa

(Mat 11:12-13; 5:31-32; Mar 10:11-12)

16 # Mat 11:12 Odim Yesuus «Seerii hiraagaa'n losishshii Xammaqaanchi Yohaannisanne afeebe'e kuramaakko. Yohaannisiinsi kid Waa'i adilla'nnek mishiraachchi sagar kuramoolla. Manni hundim ee Waa'i adillanonne aageena yakoolla. 17#Mat 5:18 Ihukkaarem Seeriinsi matichchim bi'ukkaanniinsi iimanii uullii higuta'n sholle'ookko. 18#Mat 5:32; 1Qor 7:10 Ixxi are hollaa mulleta eebookkok hundim saa'aancho. Is aro'iinsi fitto'ota eebookkokim saa'aancho.

Goddaanchi Manchii Buxichchi Ali'aazaree

19Odim Yesuus «Mat goddaanchi manchi hee'ukko. Ixxim lobakata bito xee'aalli eddechcha edde'ukkuuyyi balli hundam makki heechcha hee'am hee'ukko. 20Odim orachchi hundim omaraakkoo Ali'aazara yakkam buxichchim ee goddaanchi manchi u'llummanne ubaa hee'ukko. 21Ixxim oo goddaanchi manchi itukkuuyyi leemaatiinsi ubu giggira iteena mixam hee'ukko. Wishim waaraa ixxeka omara aallam hee'ukko. 22Oo buxichchim lehukkaare Waa'i asse'amaan Abrihaaminne maqirem iimanenne afuussito'o. Odim oo goddaanchim lehaa waammamukko. 23Ixxim Si'oolanne hawwonne ihaa qee'llonne yoo Abrihaaminne maqire afuuru Ali'aazara daaphphaa moo'ukko. 24Ixxim Abrihaama weeshaa ‹Iyyanni Abrihaama, iina qishixxe! An gii'l laba'n woronne hawwummuuyyi yoommi bikkina Ali'aazar ixxi maxxaara wo'onne cefaa i allabo siggisona asse'e› yukko.

25«Ihukkaarem Abrihaam dabaraa ‹I beeto, at leteena illageen danaam luwwa siixxittisa sawwihe. Ali'aazar odim jor heechchanne hee'ukko. Ihukkaarem kaba ixxi danaam heechchannette; at hee'lloottok kee'mmaalli hawwonnette. 26Eehanniinsi hundiinsim higaa ni beyyiinsi ki'nnuwwi beyyo ki'nnuwwi beyyiinsim ayyim ni beyyo higoobee'isina ni lambe'ennee ki'nnuwwi lambe'ennee malaayyaam baalli yookko› yukko.

27-28«Oo manchim dabaraa ‹Eehaara'i iyyanna, iina onti abbaayyuwwi yo'o. Ixxuwwim waatta'a ka beyyonne hawwonne aaggambee'isa Ali'aazar maraa ixxuwwina qoxxisaa kurona iyyanni mine asse'lloo'isina an keese uunxoommuulla› yukko.

29Ihukkaarem Abrihaam ixxena dabaraa ‹Ixxuwwina Muse'e kitaabu kitaabii hiraagaan kitaabbo'i kitaabii yookko. Eehanniinsi macceessona› yukko. 30Oo manchim dabaraa ‹Iyyanni Abrihaama, ee'isayyo; mat manchi lehiinsi ki'aa maruta'n baaxiiliinsi daba'llitamo› yukko. 31Abrihaamim ‹Muse'ekaa hiraagaa'nnekaa kitaaba macceessobee'aa'lleensi mat manchi lehiinsi ki'aa maruta'nnim amma'nnitamoyyo› yaa dabarukko» yukko.

Tans Gekies:

Luqaas Mishiraachcha 16: KeesKita

Kleurmerk

Deel

Kopieer