Luqaas Mishiraachcha 10

Lamarayyee Lam Losaanoo Yesuus Asse'ukkisa

1Ee lasage Moollanni Yesuus mulli keenom lamarayyee lam#10:1 «Lamarayyee lamoo» yamamukkok mat mat kitaabbuwwanne «Lamarayye» yamamaakko. manna doo'llukko. Ixxuwwam lam lam issaa ixxi maroo beyyoo beero'uwwaa hundam ixxeensi higga'a mattona asse'ukko. 2#Mat 9:37 Ixxim ixxuwwina «Murakkam hurbaat lobakata. Ihukkaarem muroo keen hoffane. Ee bikkina hurbaaxxi annichchi baxaano hurbaaxxi muratina asse'oo'isina uunxehe. 3#Mat 10:16 Mallehe; an ki'nnuwwa oro'i lambe'enne gereebbisa issaa asse'oommo. 4#Mat 10:7-14; Mar 6:8-11; Luq 9:3-5 Ki'nnuwwim gonoon ihukko te'im can ihukko te'im caamma'i ihukko amaddakkotte. Ayyem googonne xummaatissakkotte. 5Ayyi minem aaggakkam ammane gaassitakka'a ‹Xummi ka minina ihona› yi'llehe. 6Ee beyyonne xumma iittoo manchi hee'ulas ki'nnuwwi xummi ixxonne usheexxookko. Xumma iittoo manchimdu ee beyyonne bee'ulas oo xummi ki'nnuwwinam daba'llookko. 7#1Qor 9:14; 1Xim 5:18 Baxaanchina diinat hasisoo bikkina ee minenne ki'nnuwwina uwwakko'i luwwa ittakku'uuyyii aggakku'uuyyii afuullehe bagaan miniinsi mine mattakkotte. 8Ayyi beero'om aaggakkam ammane ki'nnuwwa aa'akkolas hincu luwwa ittehe. 9Ee beero'onne yoo jabbaanom fayyiissehe. Ee beero'i manninam ‹Waa'i adillan hincaakko› yi'llehe. 10#Ass 13:51 Ihukkaarem ayyi ammanem mat beero'o aaggakkam ammane ki'nnuwwamdu aa'akkobeelas ee beero'i bobba'anne fittakka'a 11‹Ki'nnuwwi beero'iinsi ni lokkonne amaxxamu dira ki'nnuwwina xuur ihona giggissinaammo. Ihukkaarem Waa'i adillan hincukkisa qoossitakka'a laqqehe› yi'llehe. 12#Qoc 19:24 An ki'nnuwwina kuroommo; Waa'i oogatoo ayyaamo ee beero'iinsi Soddo'm beero'ina sholle'ookko» yukko.

Amma'nnantobee'i Bikkina Acceeqasanto'i Beero'uwwa

(Mat 11:20-24)

13 # Isa 23:1 «Aayye Koraazeena! Aayye Beetasaayda! Ki'nnuwwanne issamu aganni Xiiroosannee Siidoonannee issamaakkoota'n xiddi eddechcha edde'lla'a gii'l buchchanne afuutta'a gaassim baaxiilo biiraa yitam hee'llo'o. 14Ee bikkina Waa'i oogatoo ayyaamo ki'nnuwwiinsi Xiiroosinaa Siidooninaa sholle'ookko. 15#Isa 14:13 Qifirinnaahooma, at iimane affaattoollayyonnihe? Si'oolanne dillitootto» yukko. 16#Mat 10:40; Mar 9:37; Luq 9:48; Yoh 13:20 Odim Yesuus ixxi losaanina «Ki'nnuwwi woshsha macceesookkok iikkam macceesookko. Ki'nnuwwa sabookkok eesem sabaakkoohane. Eese sabookkokim eese asse'ukkoka sabaakkoohane» yukko.

Lamarayyii Lam Losaanii Asse'anto'i Beyyiinsi Waatto'isa

17Lamarayyii lamem losaanim «Moollanna! Habusim ki summinne niina kaa'amaakko» yitu'uuyyi liiranchinne daba'llito'o. 18Yesuusim ixxuwwina dabaraa «Sheexaan iimaniinsi banqisa ubukkuuyyi moo'aammo. 19#Maz 91:13 Oono'o! Hamashshaa ginxa yakkam daquuraa hancaaccakkona malaayye uwwaammo. Odim ki'nnuwwi diina'i hundam kaa'llakkamisina malaayye uwwaammo. Mahim ki'nnuwwa hawwodooyyo. 20Ihona bagaan habus ki'nnuwwina kaa'amu bikkina liirantakkotte. Ihukkaarem ki'nnuwwik summi iimanenne kitaabamu bikkina liirammehe» yukko.

Yesuus Liiramukkisa

(Mat 11:25-27; 13:16-17)

21Ee ammanchom Yesuus Keesammi Ayyaaninne liiramaa «Iimaninaa uullinaa Moollanni Iyyanna! Kaka lachchaammuwwiinsii qoolluwwiinsii daphphaa'llaa ciilluwwina caakkissittaannina keese galaxxoommo. Eeyya Iyyanna, kuk ki doo'lla. 22#Yoh 3:35; Yoh 10:15 Hundi luwwam Iyyanni iina uwwookko. Beet ayyetda'e ihukkisa iinniinsi bagaan ayyim la'ooyyo. Te'im Annam ayyetda'e ihukkisa Beetiinsii Beet la'iseena doo'llukkaanniinsii bagaan la'ookkok ayyim bee'e» yukko. 23Ee lasage Yesuus ixxi losaa'n kollonne daba'llaa xale'i ixxuwwina «Ki'nnuwwi moo'llakkamoka moo'ookkok maasse'amaakkoohane. 24An ki'nnuwwina kuroommo; hiraagaa'nnek dutii adilluwwii ki'nnuwwi moo'llakko'oka moo'lleena mixxo'o; ihukkaarem moo'llo'oyyo. Ki'nnuwwi macceessakkamokam macceesseena mixxo'o; ihukkaarem macceesso'oyyo» yukko.

Qishixxaalli Samaarekkichchi Bikkina

(Mat 22:34-40; Mar 12:28-34)

25 # Mat 22:35-40; Mar 12:28-34 Seera erisa la'oo mat manchi Yesuusa keeneena «Losisaancho, heer heerina hee'oo heechcha siixxeena maha isso?» yaa xa'mmukko. 26Yesuusim ixxena dabaraa «Seeranne kitaabamukkok maruwwa? Qananaa'llaa qoossittodu hinkidette?» yukko. 27#Se'l 6:5; Qes 19:18 Oo manchim dabaraa « ‹Ki Moollanni Waa'a wo'm wodaninne, wo'm foorinne, wo'm malaayyinnee wo'm tiirinnee iitte. Odim ki beshichcho ki gaqqisa iitte› yoohane» yukko. 28#Qes 18:5 Yesuusim dabaraa «Danaamisa dabattaatto; heer heerina hee'lleena eekka isse» yukko.

29Ihukkaarem oo Seera la'oo manchi ixxi gaga eran issaqqeena hasu bikkina «I ollakkichchi ayyette?» yukko. 30Yesuusim dabaraa «Mat ayyaamo mat manchi Yerusaaleemiinsi Iyyaarko'i beero'o dillukkuuyyim fanguwwi ixxo amadda'a bogga'atii aphphissa'atii lehinaa heechchinaa lambe'enne ubbuussa'a matto'o. 31Eehid ihaakkoohaannonne mat qeessichchi ee googinne dillukkuuyyi oo manchi ubukkisa moo'u ammanenne shiininne uraa higukko. 32Ee'isam odim Leewi'i moollik mat manchi ee beyyo waaraa eekka moo'u ammanenne shiininne uraa higukko. 33#2Aga 28:15 Ihukkaarem mat Samaarekkichchi ee googinne marukkuuyyim oo manchi ubu beyyo afaa ixxo moo'u ammanenne qishixxukko. 34Ixxim ee manchi beyyo maraa madanne zaytaa woyi'n diqaasaa issaa karukko. Ee lasage ixxi hallichchonne saa'llisaa koyyi garoo mine massaa jabbisukko. 35Oo Samaarekkichchim la'm balla ee koyyi mi'n annichchina lam diinaara fissaa uwwaa ‹Ka mancho jabbise. At kannonne eddaa ixxena fissitti luwwi hundam daba'llaa waaroommi ammane an kiina miqoommo› yukko. 36Fanguwwi anganne ubu manchina ee sasem manchiinsim ollakkichchi ihukkisa moo'isukkok kiina hinka labookko?» yukko. 37Ixxim dabaraa «Ixxena qishixxato moo'isu mancho» yukko. Yesuusim ixxena «Atim mattaa ee'isa isse» yukko.

Maarta'aa Maaraamee Hee'llam Mine Yesuus Marukkisa

38 # Yoh 11:1-2 Ixxuwwi mattu'uuyyim Yesuus mat gatte aagukko. Ee gattennem Maarta'a yakkam meentichcho is minenne ixxo aa'llo'o. 39Isenam Maaraame yakkam aayya hee'llo'o. Isem Moollanni lokki gadanonne afuutta'a losisoo losishsha macceessam hee'llo'o.

40Ihukkaarem Maarta'a lobakat baxinne matayyitam hee'llo'i bikkina ixxi beyyo matta'a «Moollanna! An mullam hawwona iyyaayya cawwita'a utto'is kiina kichche'isooyyonnihe? Kabadem ise iina hara'mmitona kure» yito'o. 41Ihukkaarem Moollanni isena dabaraa «Maartaa! Maartaa! At lobakat luwwina hawwitoollaa u'nnantoollaa. 42Ihukkaarem hasisookkok mat luchcho#10:42 «Hasisoo mat luchcho» yookkoka mat mat kitaabbuwwi «Hoffi luchcho» yookko.. Maaraame isena e'llookkoka doo'llito'ookko. Oohim iseensi hooramooyyo» yukko.

Tans Gekies:

Luqaas Mishiraachcha 10: KeesKita

Kleurmerk

Deel

Kopieer