Qooccanchi Kitaaba 25
25
Abrihaam Mulli Shumo'i Bikkina
(1Aga 1:32-33)
1Abrihaam Qaxuura yakkam mulli meentichcho eebukko. 2Isem Ziimiraana, Yooqishaana, Madaana, Miidiyaama, Yuushibaaqaa Shuuhaa qatto'o. 3Yooqishaanim Saabaanaa Daadaanaa qarukko. Daadaan oosim Ashuu'l manna, Leexuush mannaa Lee'uu'm mannaa hee'llo'o. 4Miidiyaamim Eefa, Eefara, Haanooka, Abiidaa'aa Eelda'aa qarukko. Oo keen hundim Qaxuur shumo'i hee'llo'o.
5Abrihaam ixxena hee'u luwwi hundam Yisaaqina uwwukko. 6Ihukkaarem mulli meentonne qaru oosina mat mat luwwa uwwaa ixxi foorinne hee'ukkuuyyim ixxi beet Yisaaq gadanonne hee'llambee'isa annanni issaa eelliinchi firoo kollonne qeessukko.
Abrihaam Lehukkisaa Waammamukkisaa
7-8Abrihaamik umur hundoomim mat xibbee lamarayyee onti hiinchoo ihaa lobakat doolle hee'aa er lommannaninne lehukko. 9-10#Qoc 23:3-16Ixxi oosim Yisaaqii Ismaa'eelii luxxeka Hiitekkichchi Xoo'aar beet Efroonina hee'u abuulla Abrihaam bitaa'aa ixxi are Saara'a waammaa hee'u beyyonne Maammire'i gadanonne eelliinchi firoo kollonne yoo Maakfee'l daawwa'anne waammito'o. 11Abrihaam lehaa lasage ixxi beet Yisaaqa Waa'i maasse'ukko; Yisaaqim «Bi'eer laahay roo'ii te'im eese moo'oo hee'oo Waa'a moo'ummo» yakkam wo'i bu'i gadanonne hee'am hee'ukko.
Ismaa'eel Shumo'i Bikkina
12Saara'ana agishshotte hee'llo'i Gibxi uulli Aggaare Abrihaamina qatto'i Masoophphoxaame'e shumo'ik summi 13kanniinsi woroon yoo'isanne ixxuwwi umu'llisinne kitaabamaakko. Ixxuwwim Nabaayotte, Qeedaaratte, Adibi'eelatte, Miibisaamatte, 14Miishimaa'atte, Duumatte, Maasa'atte, 15Hadaadatte, Teema'atte, Yixuuratte, Naafiishattee Qeediimattee hee'llo'o. 16Ku tommii lamem oosim Ismaa'eel tomminaa lamem sullinam maalda'uwwi hee'llo'o. Ixxuwwi afuutto'i beyyii ixxuwwi olla'ii ixxuwwi summinne weeshamukko. 17Ismaa'eel mat xibbee sadee lamar hiinchoo hee'aa lasage lehukko. 18Isma'eel shumo'i hee'ukkok Gibxiinsi eelliinchi firinne Asoo'luulla massoo googonnetti ihaa Hawwiiliinsi ki'isaa Shuura higakkam googonne afeebe'e hee'ukko. Ixxuwwim Abrihaamina qaramu mulli oosiinsi annanni ikka'a hee'llo'o.
Eesa'aa Yaaqoobii Qaranto'isa
19Kuk Abrihaam beet Yisaaq aganna; 20Yisaaqik umur sor hiincho ihaa lasage Irbiqa eebukko. Isem Masphexoome'enne hee'am hee'u Sooriy uulli manchi hee'u Baatu'eel landichchotte hee'llo'o. Isem ee uullanne hee'u Laaba'ana aayyatte hee'llo'o. 21Yisaaq Irbiqa ooso qattobee'i bikkina Moollanni Waa'a uunxukko. Moollannim ixxi uunxato macceesu bikkina Irbiqa lamfoorette ikko'o. 22Isem qaf ooso lamfoorette ikka'a hee'llo'i ammane is godabonne hee'llo'i lamem oosim gafe'antam hee'llo'i bikkina «Kido'i luwwi eesenne mahina ihukko?» yita'a Waa'a uunxiteena matto'o.
23 #
Oro 9:12
Moollannim isena «Lam minaadab ki godabonne yookko. Atim gereero'llam lam minaadaba qattootto; ixxuwwikim mat matiinsi qoxarookko; lobokim hoffaannina ijaajamookko» yukko.
24Isem qattam amman afu ammanenne lam goo'n ooso qafa qatto'o. 25Ixxuwwiinsim gaassaa qaramukkok qadaalli hee'ukko; ixxi orachchim oddaam hee'ukko. Ee bikkina ixxi summi Eesa#25:25 Ibro'isinne Eesa yimmi qadaalla yimma. yamamukko. 26La'mmek qaramu ammane Eesa'aka sinxichcho amadaa hee'ukko; ee bikkina ixxi Yaaqooba yamamukko. Irbiqa ixxuwwa qatto'i ammane Yisaaq umur lohayyi hiincho ihaa hee'ukko.
Eesa'a Wonooma Biteesukkisa
27Lamem oosim li'llo'o; Eesa'a biiranne hee'imma iittoo qoxar hochchaanchi ihukko. Ihukkaarem Yaaqoob minenne hosoo cawween manchi hee'ukko. 28Yisaaqim Eesa'a hochchaa eebam hee'u maara itam hee'u bikkina ixxo lonsaa iittam hee'ukko. Ihukkaarem Irbiqa Yaaqooba Eesa'aansi lonsita'a iittitam hee'llo'o.
29Mat ayyaamo Yaaqoob woxa sarukkuuyyi Eesa'a hochchiinsi waarukko; ee ammanenne Eesa'a lobakata sibaaraa hee'ukko. 30Ee bikkina Eesa'a Yaaqoobina «An lobakata sibaaraa hoogaammo ee kashar woxika duuqise» yukko. Ee bikkina Eesa'ak summi Eedooma yamamukko.
31Yaaqoobim Eesa'ana «At gaasitaa ki wonoo'm lomba iina biteessittaare anim ka woxika uwwoommo» yukko.
32Eesa'am «An leheenatte; ku i wonoom iina maha awwaadookko?» yukko.
33 #
Ibr 12:16
Yaaqoobim «Ki wonooma ‹Eeyya uwwoommo› yitlas gaassitaa hide'e» yukko. Eesa'am ixxi wonooma Yaaqoobina hide'aa biteesukko. 34Ee lasage Yaaqoob Eesa'ana hoffi daabbo'o mishi'l woxinne uwwukko. Eesa'am itaatii agaatii lasage uraa marukko. Ixxim ixxi wonooma gadaa kora'i luwwanne xigukko.
Tans Gekies:
Qooccanchi Kitaaba 25: KeesKita
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
