Seera Uumamaa 13
13
Abraamii Fi Looxi Gargar Fooyaman
1Abraam haadha manaa ufiitii fi waan qabu maraa qabatee biyya Misiriitii bayee gara Neegeebii dhaqe; Looxillee isa woliin ture. 2Abraam hori'iin, qarshi'ii fi worqi'iinillee guddisee duroome.
3Abraam Neegeebii ka'ee Beeteeliin dhaqee hulee duraan daasee itti ijaarate Beeteelii fi Gaayiin jidduu 4hulee duraan ciincaa Rabbii itti dhiyeesse gaye; achitti maqaa Rabbii waama'aa sagade.
5Looxiin Abraamiin woliin deemellee akkasuma gobbuu hori'ii, gobbuu hoolotaatii fi daasee qaba. 6Abraamii fi Looxi qabeenna guddaa waan qabaniif lafti isaan hanqattee hulee tokko taa'uu hin dandeenne. 7Worra horii Abraamii tissanii fi worra horii Looxii tissan jiddu'utti lolli uumame; bara san worri Kana'aaniitii fi worri Feerizotaa lafa san irra jiraata'aa turan.
8Kanaan maayessa Abraam Looxiin, «Anii fi ati waan obboleewwan taaneef anaa fi si'i jidduu, akkasuma tissee horii kiyyaatii fi tissee horii keetii jidduu wol dhabbiin hin barbaachisu; 9lafti maruu si afoo jirtii mii? akka na irraa fooyamtu si kadhadha; ati yoo cinaa kibbaa fudhatte ani ammo gara cinaa mirgaa deema; ati yoo cinaa mirgaa fudhatte ani gara cinaa kibbaa deema» jedhe.
10Looxi ol jedhee dhooqa naannaya Yoordaanosii jiru maraa biyya bisaan keessa guuteeru akka taate arge; uduu Rabbi Soodoomii fi Gamoraa hin balleessineen dura dhoondhi naannoo Zo'aarii sun akka lafa hulee biqiltuu Rabbii yookaan ta akka biyya Misirii fakkaattu turte. #Ser. Uma. 2:10 11Kanaafuu Looxi lafa naannaya Yoordaanosii jiru maraa filatee gargar bayan; Looxi gara baya biiftu'uu deeme. 12Abraam biyya Kana'aanii keessa taa'e; Looxi ammo qachoota dhooqa biyya sanii keessa taa'ee daasee ufii Soodoomiin laddatti ijaare; 13bara san ammo namoonni Soodoomii hammeeyyi'ii fi worra Rabbiin afo'otti guddisanii cubbuu hojjatan turan.
Abraam Gara Keebroonii Deeme
14Looxi haga isaan gargar bayeen maayii Rabbi Abraamiin, «Ol jedhii gara baya biiftu'uu, gara dhiyaa, gara mirgaatii fi gara bita'aa laali; 15lafa arga'aartu sanniin maraa baraa haga bara baraa si'ii fi hortee keetii waan kennuuf; #Hu. Er. 7:5 16hortee kee akka xidhacha lafaa baay'isa; akkuma namni xidhacha lafaa laakkawuu hin dandeenne, horteen keellee laakkayamuu hin danda'u. 17Lafa tana waan sii kennuuf ka'ii badhinnaa fi dheerinna isi'ii keessa deemi» jedheen.
18Kanaafuu Abraam daasee ufii diigee Keebrooniin hulee lafa qilxuu gugurdaa Maammire'ee bira jiraate; achittillee hulee ciinca'aa Rabbiif hojjate.
Tans Gekies:
Seera Uumamaa 13: KitWoy
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
