Luk 6

Nton a ofo Esiayɔ

(Mat 12:1-8; Mak 2:23-28)

1Ofo esiayɔ bibi Jisɔs ajɔ asing ka ɛgbɛ, asɔgba ɛyɛ abɔng atajɔghɔ mbe bi abɔm ka ɛgbɛ ji, afere ka abɔ a mbɔ anɛ amog. 2Bafarisi bantingi abɔmmɔ, “Nang ka one ejo ejighi ka ofo esiayɔ?”

3Jisɔs akpɛ mbɔ, “War ɛkagha beng ji Debid ane na anɛ ɛbɛ ka ngara yi njan aya mbɔ? 4Anam ka nju Ɔsɔwɔ, aton ejonɛnɛghɛ ja akɛ Ɔsɔwɔ anɛ. Ka atam akɔ bintingi akɛ anɛ ɛbɛ anɛ. Anɛ ejonɛnɛghɛ ji baɛjɔ Ɔsɔwɔ nanting anɛghɛ” 5Ka Jisɔs atɔ mbɔ, “Mmɔ a munnu are Ntaa ofo esiayɔ.”

6Ofo esiayɔ bintingi, amo ka nju a mfa Jus ama jɔ akpene, ka munnu wiwi ajɔ a fa yi ɔbɔ bunu ɛnyaba. 7Bafarisi na bekpena ejighi, ajɔ asɛb ejo ja alaghɛ sa amɔgbɔ ejighi, ajɔ afan ababɛ sa ayɛ arena atabtab nnɛ ɔya ka ofo esiayɔ. 8Ka Jisɔs agbɛrɛgbɛrɛ ji mbɔ ajɔ akana ka atɔ nnɛ yɔ ɔbɔ ɛnyaba, “Tam yimi fa ka nibri anɛ wɔɔ ayia.” Ka atam ayimi fa. 9Jisɔs atɔ Bafarisi na bekpena ejighi, “Nɔngɔ mbɔmmɔ war, jɛ ere ejo ejighi ka ofo esiayɔ: Nene nnɔbɔ fasɛ ebibi, ɛnagha nekpen fasɛ nɔrɔbɔ”?

10Abri mbɔ kpakpa asibi, ka atɔ munnu yɔ, “Tinni ɔbɔ ɛba.” Anena, ɔbɔ ɛbɛ ɛnɔb. 11Ka Bafarisi na bekpena ejighi ɛsag mbɔ ka agɔngɔ naragha na atɛ ja ane Jisɔs.

Nasanga Wobo na Aba

(Mat 10:1-4; Mak 3:13-19)

12Ofo bibi Jisɔs ayar ka bɔsɔ nkonkon ama kag njɔ, akɔ enokon tutu akag njɔ akɛ Ɔsɔwɔ. 13Ngara yi ɛmakpara abeng asɔgba ɛyɛ asang anɛ wobo na aba ka ɛbɔngɔ mbɔ, ba abeng mbɔ si Afɔsil.#6:13 Afɔsil anɛ ba ato 14Anɛsi: Simɔn ya abengɛ si Fita, mmɔannyɛ Andru, Jemsi, Jɔn, Filib, Batolomiu, 15Matiu, Tɔmɔs, Jemsi mmɔannu a Alfaeus, Simɔn ya ajɔ abengɛ si Silɔt, 16Judas mmɔannu a Jemsi, na Judas Iskariot ya agoro Jisɔs ka Kɛkannanjam.

Ɛnara na Esiyiri

(Mat 4:23-25)

17Akɔ mbɔ asɛnɛ ka mfo bi ɛnɔng bag. Ntakpa ɛbɔngɔ Asɔgba ɛyɛ ajɔ fa na ebe anɛ ba aru ka baka Judia wɔɔ na ka Jɛrusalɛm, na akpeghe ya are ka akɔkɔ aya asibi Taya na Sidɔn, 18ba aba sa ama yogɛ bantingi aba sa ayighi mbɔ aya. Jisɔs atab anɛ ba abibi atughu afegheayɔ, 19anɛ wɔɔ alɔg sa akɔmmɛ, atebsi akpe nsam ya atab mbɔ wɔɔ.

20Atab amar asɛngɛ asɔgba ɛyɛ, arag:

“Ɛnara ɛjɔ ɛkɛ akpak,

atebsi oton Ɔsɔwɔ ere nanɛrɛ.

21Ɛnara ɛjɔ ɛkɛ anɛ ba njan munu,

atebsi ɛfɔfɔ.

Ɛnara ɛjɔ ɛkɛ war ba anan ɛnan munu,

atebsi ɛyɔnasɔn.

22Ɛnara ɛjɔ ɛkɛ war ba ɛsagga anɛ

asagga, anyɛ

war arɔbɔ war mbeng,

ateb Mmɔ a Munnu.

23“Yɛbɛ nete, ban ka ofo bifa, atebsi ntoro ɛya afangfang ka etek Ɔsɔwɔ. Nayɔ yi akuansisi a mbɔ ane akɛ abono Ɔsɔwɔ.

24“Ka Esiyiri ɛjɔ ɛkɛ war afang anɛ,

atebsi ɛmɔkɔ nnɔba mbanga ɛyɛrɛ.

25Esiyiri akɛ war ba ɛnɛghɛ eyuruyuru namunu,

ngara kisi ɛjɔ njan.

Esiyiri ɛkɛ anɛ ba ayɔnasɔn munu,

ngara amannasi ɛnan ɛwura amibi.

26Esiyiri ɛkɛ war bi eying arag nnɔbɔ akɛ war,

nayɔ yi akuansisi a mbɔ ane akɛ abono ya adɛ.

Nɔkɔrɔ ɛkɛ Anɛ baujing

(Mat 5:38-48; 7:12)

27“Ka ntɔ war anɛ ba eyoghom, nnɛ ujing ɛwɛrɛ akɔr war, ne nnɔbɔ kɛ anɛ ba ɛsagga mbɔ, 28nara ba asimi akɛ war, kag njɔ kɛ anɛ ba ane war ebibi. 29Nnɛ ata na nsab ka ɛkpɔghɔ kpeghe ɛkpɔghɔ jiga kɛ ata. Nnɛ akɔna ɛkpagha ɛnɛmɛ ɛja, kruɛ kɛ ɛnɛmɛ. 30Nnɛ abɔɔ a na ejo kiɛ, ka nnɛ akɔna ejo ɛja kikpɛ kɔ. 31Ne kɛ anɛ sɔ ɔsɛb sa ane akiɛ.

32“Okpena nɔkɔrɔ ɔkɛ anɛ ba ɔkɔr mbɔ nanting, jɛ ɛjɔ nsing ɛya? Afanggasi ba ane a abibi afɛ akpe nɔkɔrɔ akɛ anɛ ba akpe nɔkɔrɔ akɛ mbɔ. 33Ka onena nnɔbɔ ɔkɛ anɛ ba ane nnɔbɔ akia; yɛ ere nsing ɛya? Afanggasi ba ene a abibi afɛ atam anena. 34Ɔkpɛnnɛ na anɛ akpugha ba ate agana, jɛ ere nsing ɛya? Afanggasi ba ene abibi afɛ, abrisi akɛ mbɔ wɔɔ sa akpɛnnɛ. 35Ka anɛ baujing ɛba akɔra, ne nnɔbɔ kɛ mbɔ, ɔfɛnɛ ɔkpɛnnɛ anɛ ba arighima agana. Ntoro ɛyɛrɛ afangfang, ka war ɛjɔ abɔ Ɔsɔwɔ bi ɛgagaga, atebsi yɛ anɔnɔb ɛkɛ anɛ ba arijɔ akaghɛ na ba abebbeb. 36Fɔ ɛkpɔgisi si nsɔja akpe ɛkpɔgisi.

Nanaa Banaa Anɛ

(Mat 7:1-5)

37“Kinaa banaa anɛ, sɔng akinaa jaja. Kirɔbɔ anɛ abeng, sɔng arighirɔbɔ yaya. Tamsighi mbɔ, sɔng atamtamasigha. 38Kɛ, sɔng atam akia: Nnɔbɔ a nagara, ɔnyɛghɛ ɛsɛnɛ, okpo ɔkpɛnɛ eson ewuru ɛnam, ka ejo ji ɔyana. Sɔ ɔgara ɔkɛ nnɛ na ya atam agara akia.”

39Atam atuu ɛbɛɛ ji atɔ mbɔ: “Nnagga amar aragha atɔngɔ nnagga amar mba? Mbɔ anɛ ababa agbɔghɔm anam ka nebe? 40Mmɔ a nwɛr aramagbɛrɛ aga nkpekpene, ka kpere nnɛ yi akpene nnɔbɔnnɔbɔ ajɔ nasi nnɛ ya akpenɛ.

41“Jɛ ɛsɛrɛ ka ɔyɛ ɛfɛfɛrɛ ka namar mmɔannaja orikana ntakpa eningi ete ya ayɔb ka namar ɛna? 42Nang yɔ yɔtɔ mmɔannaja, ‘Mmɔannajaa, nɔngɔ mmɛ nyighi ɛfɛfɛrɛ ka namar ɛna,’ yi wɔfɔnɔ oriyɛ ntakpa eningi ete ya ayɔb ka namar ɛna? Wɔ nnɛ a njam ɛba, gbɔmba yighi ntakpa eningi ete ya ayɔb ka namar ɛna, sɔng ɔyɛ nnɔbɔnnɔbɔ uyighi ɛfɛfɛrɛ ji ere ka namar mmɔannaja.

Ete na Akab Ɛyɛ

(Mat 7:16-20; 12:33-35)

43“Nnɔbɔ ete yayi arem ya akab ebibi nkab, sɛ ebibi ete ɛkab nnɔbɔ a nkab. 44Kpere ete ɔgbɛrɛ ka nkab ɛyɛ. Anɛ arama sanga akab ekokonadu ka ɛmɛnɛgbɛ ajɔjɔngɔ, sa amuruku ka akpor. 45Nnɔbɔ a nnɛ abagha na anɔbɔ a mbe ya atongo ka nete ɛnɛ, ka ebibi nnɛ abagha na abibi mbe ya atongo ka nete ɛnɛ. Ji eson nnɛ ka nete jɛjɛji ji nnyɔ ɛbɛ aragha.

Nwagha na Ndɛmmɛ Nsii a Nju

(Mat 7:24-27)

46“Erunang ka obengem si ‘Ntaa, Ntaa,’ ka orijɔ one ji ntɔa si one? 47Kpere nnɛ ya aba ka mfo ɛbaa ayog ano ɛyaa, ane si ndagha, ntɔngɔ war tɔngɔ sa are. 48Are nasi nnɛ yi asii nju, ka asam niwinju ɛsɛbɛ akono ka atan. Ngara yi nyɛn aba, nsam alab ama tob arima abo, atebsi ama nisii. 49Ka nnɛ ya ayog ano ɛyaa ka arine si ndagha are nasi nnɛ ya asii nju ka nsisi ya arisam niwinju ka asii. Nsɛrɛsi nyɛn aba, ɛbanɛban nsam alab abo nju yi atob.”

Tans Gekies:

Luk 6: NDD Nta

Kleurmerk

Deel

Kopieer