Matìyò 2
2
Aghê à liy bù bwìy kòʼ Yesù
1Ghu byi tsə Yesù anə inaʼ i Betlèhêm a bwòʼò Dzùdiyà, a sòŋə fə Helòd kə də nəniy dòŋkìy. Aghù yə̀ ghu kə kwu nəniy utwab wiy ani koʼ kəli yə̀ àyiə yə nsǐbə̂d mìy dzîy nəniy, ghu kə ŋwô bə̂ nəniy a bə̀d kə̀ tsə̀ fyiə kwoʼo bə̂ nəniy ate, ghu bù a Yèlusalèm. 2Ghu bəb tsə nə̀, “Wa nə ghu byi nəniy nə̀ ù bù dòʼò dòŋ kə aghě Dzû, ù də̀ yiə? Ghè kôʼ kəli tsə sǐbələ̀ fə we a bə̀d kə̀ tsə̀ fyiə kwoʼo bə̂ ate. Ghè fə̂ bù ani bù fwùlì we.”
3Abù Helòd zuw tsə nəniy ayiə yə ghii, ayiə ghè yə̀ ə ŋge fyimi we nə̀ àghě Yèlusalèm àdzə̀m. 4Helòd ə twoŋə na bə̀ ŋgəd tə aghè àlwaʼa yiy nə̀ àghè tyi dee ulàŋ wìy, u bəb tsə a ghu nə̀, “Ghu kî byikə yiə Kə̀litò ə?”
5Ghu mee a we nə, “À də̀ a Betlèhêm a mbwòʼ ə̀ Dzùdiyà, anə yiə yə wè ntwùm ə̀ Kə̀zə̀ kə twâ na nəniy nə̀,
6‘Abû wò a Betlèhêm a mbwòʼ ə̀ Dzùdiyà,
wò də̀ inaʼ ìsoŋə̀ yìy
ani nyə̀ fyi bə̀ dòŋ kə̀ kə kî yemə̀ nəniy
azoŋə̀ àghù yam, Islàel.’ ”
7Helòd ə twoŋə tsə aghû yə ghu kə kwu nəniy utwab wiy ani kòʼ kəli ayiə yə nsǐbə̂d mìy dzîy nəniy, ani tsoŋ bəb zuw tsə babâ soŋə fə ghu kə kôʼ nəniy sǐbə̂d fə̀ ate. 8U twum nyi yə̀ ghu a Betlèhêm, dzày yə̀ a ghu nə, “Ghà zû toʼò kaw fyi kə loʼo kə wà ù ghè wə̀ də nəniy ate. Abu ghà kaw kəli fyi kə, ghà ki bû dzây bə̂ â mìə̀ tə̀ mə ki mboŋ zû fwulì soʼò we.”
9Aghê àtwabə yə zuw mà tsə ayiə yə Helòd dzày nəniy, dyaŋi ŋwò tsə awote. Ghu kàm kòʼ fəli yə̀ sǐbələ̀ fə̀ ghu kə kôʼ nəniy a bə̀d kə̀ tsə̀ fyiə kwoʼo bə̂ nəniy ate, fə zè isə anə sə kə ghu zù dòʼò yə̀ idoŋ anə fòʼò ndaw yə wà ùghè wə̀ kə də nəniy ate. 10Abù ghu kôʼ yə̂ nəniy sǐbə̂d fə̀, ghu kàm ŋge dwiʼi này yə̀ ghii. 11Abù ghu tsîy nyi kwoʼ yə̂ awote a ndaw, ghu kòʼ yə̀ wà ù ghè wə̀ anə awo ə Mə̀li, tyoŋə zə̂ we. Ghu nyaʼa yə̀ ambvə̀d ani fwulì we. Ghu tsàʼì tsə ùmbè u ghu, nìy fyi kə ufyiə ùtsəə ù soŋə̀ wə̀ ghu tyoŋə nə̀ à də̀ Gôl, nə̀ ùfyiə ùlyimə ù liy wiy ivən i kə taw nəniy, nə̀ fyiə kə̀ liy kiy ghu kə tyoŋə nə̀ à də̀ mayà,#2.11 Gôl nə̀ mayà kə də̀ tsə̀ ufyiə ghu kə fyiè nəniy anə ivən ì taw yiy. Ghu kə nyə̀ awò Yesù a sòŋə fə ghu kə byi nəniy we ate nyə̀ yə̀ â we.
12Zə̀kìy kə ke na yə̀ ghu anə udzɛ̀mə̀ nə̀ ghu kə kâm dzwoŋi zù kwùm dzə̀ akə̀lə̀ Helòd, ghu zù tsìy yə̀ anə dzə̀d ìŋwò yìy ani zù dzwoŋi anə inaʼ i ghu.
Ghu kə tu zù nə Yesù anə inaʼ i Idzìp
13Abù ghu ŋwô yə̂ nəniy, tsə̀ndii ə̀ Kə̀zə̀ ə bù dè bə̀ ùwe â Yùsə̂f anə udzɛ̀mə̀ dzày yə̀ a we nə, “Ŋwǒ kə, wò nîy kə wa nə, nə̀ zə̂ we, ghà tu zû anə inaʼ i Idzìp. Ghà kwu ani dòʼò awote zù kwùm soŋə fə mə kî dzìy bə̂ nə̀ ghà ŋwô, aŋwòə Helòd kì khu kyabə tsə̀ ŋwòə wa nə ani wiy màʼà we.”
14Yùsə̂f ə ŋwò kə nə̀ ntsukə tə ghè tə̀, nìy kə wa nə, nə̀ zə̂ ŋwò zù anə inaʼ i Idzìp, 15Helòd ə bù pfə tsə nə̀ ghu də kə awote. I bù fyi kə kə anə ayiə yə wè ntwùm ə̀ Kə̀zə̀ kə dzây na nəniy nə̀, “Mə mə toŋə ŋwò fyi bə̌ wa nam anə inaʼ i Idzìp.”
Sǔgôʼ tə Helòd tǐy wiy màʼà ànìsə̂ a Betlèhêm
16Abù Helòd kòʼ tsə nəniy nə̀ aghê twabə yə̀ mə we nɛb, fòŋ ə ŋə̀m này yə̀ we ate. U tsày tsə kəlâŋ nə̀ ghu wiy maʼà àwa iŋə̀mə̀ yə̀ ghu də nəniy ŋəmə̀ tìy ìbè tswi kwùm tsə a nə̀ à yuu ghu nam də nəniy anə awo anə inaʼ i Betlèhêm nə̀ nàʼà tə̀ tə kə kwulì də nəniy a kə̀lə̀ Betlèhêm. Ù kə ghî tsə̀lì tsə soŋə fə aghê twabə yə̀ kə dzây tsə â we.
17I bvami bù fyi kpe kə anə dzə̀ yə̀ wè ntwùm ə̀ Kə̀zə̀ Dzèlèmayà kə dzây na nəniy nə̀,
18“A zuw kə̀bòŋ kə foŋə a Lamà,
imwe nə̀ mbòŋ mə̀ dîy mìy,
Làshêl wìy dìy nəniy awa ə we yiy,
twe nə̀ wù kə we gwuŋì dzə̀,
aŋwòə ghu mə pfə mà.”
Mə̀li nə̀ Yùsə̂f, nə̀ Yesù ə ŋwò tsə a Idzìp zù dzwoŋi a Islàel
19Abù Helòd pfə tsə nəniy, tsə̀ndii ə̀ Mwe ə̀ mbyi ə bù dè bə̀ ùwe â Yùsə̂f anə udzɛ̀mə̀ anə inaʼ i Idzìp. 20Tsə̀ndii yə dzày yə̀ a we nə, “Ŋwǒ kə nyiə, wò nîy kə wa nə, nə̀ zə̂, ghà zû dzwoŋi anə inaʼ i Islàel, aŋwòə aghû yə̀ ghu kə̀ khu tsə̂ nəniy dzəd ani wiy màʼà we, ghu mə pfə.” 21Yùsə̂f ə ŋwò kə nìy kə wa nə nə̀ zə̂, zù dzwoŋi anə inaʼ i Islàel.
22Abù Yùsə̂f sì zuw tsə nəniy nə̀ Àkelùs mə dòʼò ùwuŋ u təli wiy anə ndàŋə̀ kə̀dòŋ, tyoŋə Helòd, a mbwòʼ ə̀ Dzùdiyà, u tsəŋ ghaʼ tsə ani dzwoŋi zù awo. Abù ghu kâm tswù bə̂ we anə udzɛ̀mə̀, u ba zù dòʼò yə̀ a bwoʼò Galìlî. 23U zù mùə̀ yə̀ anə inaʼ ìliy yiy ghu tyoŋə nəniy nə̀ à də̀ Nazalèt. I bvami bù fyi kpe kə sòʼò anə yiə yə aghee ntwùm ə̀ Kə̀zə̀ kə dzây na nəniy nə̀, “Ghu ni tyoŋə we nə̀ à də̌ wè ìnaʼ i Nazalèt.”
Tans Gekies:
Matìyò 2: isu
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© CABTAL 2023
