Neto'te Ju z'a ntùm bwe là
Ju z'a ntùm bwe là
Bo ke tsiaṅ mbwe ṅwa'ni Bu' Ṅwa'ni Nsi à Neto'te, nummbe tshô nenabte njù, mènntùn mba tshô ba Israél b'a ntùm bwe.
Nelo num mbwe kam i nèn nkum num nkam ntshob ntshù' gham num ngù be lèn mba njù ze be be njôg ntùm bwe na' nto'te là.
Nzwit mènntùn fe à yà? ze dù' b'a zit ntùm njù à? Ke bèn ngù kà netswe kebwô njàm netèt benntùn ntùm njù neshu à? Be bo bate men ntswe kebwô là ké?
A bwô neke njé'te num tshen nebètte li kà nku'ni nebùnte mba neke nze ju ze mbwe kam ṅwa'ni Neto'te num tswite be, ndù mba ndonni benntùn ke' tum bwe là: Fe mba Nsi nabte njù là, mènntùn, mandum ke mènnzwi lo b'a be nga gha ntshu Nsi, nganabt'é (3); Kaïn bo Abél (4); Noa ngelaṅ dibambaṅ (6—9); nesà ba' Babél (11).
Njoṅ tshen tshô li fa ts'a be nsoṅ mba ngùninu mènntùn be yi là, bo ke' ku'ni neyab nka i kà tsin.
Nelo num nkam ntshob bàa gham nèn nkum num nka ṅam ntàn ke nsoṅ à mba Nsi na' fà yôg nzwit mènntùn, ntsiaṅ mbwe benntùn ntùm tunndà Israél num fa' se là: Abraham (12.1—25.18), yi Abraham ze ze bamntù bo ze neju' ntshu Nsi b'a fi' mebwô njoṅ ghabam Nsi fa là. Mén i Isak, mekal i Yakob (25.19—31.1) ze Nsi na' fà lén Israél yi là, Yosèf (37.2—50.26); mo' mén Yakob, z'a be tà ntùm ngô bàa là lo lo' Yakob, tsemo' bon tse mba yub tunndà fa nèn yi mà Egipto. Ze tshô Yosèf là sag neshu.
Ṅwa'ni Neto'te num ntswite tshu yàme, tse Nsi na' ngù là. A num mbwôgmbwe nsoṅ mba Nsi na' nabte njù là, ngù be lèn mba njù ghu' là, njoṅ i fa b'a be mfa' Nsi. Neto'te be miagte ke nsoṅ mba Nsi bam nka'ni neke mfa' num ben tse là. Neto'te kà nèn miagte, Nsi bèn mbe mbwe Mèn; a num ngù bo lèn i, nke nsa' njù, nke njwimte mbèn nke tshagte ben tse, a yi nke nabte nu benntùn.
Num ndùlala, Nsi num bètte mbe be ke mbam i, njab ntù num nka'ni mi mbèn nke nju' ntshu i mb'a num ndiag be ke ngù là, mba num ntshù' tse.
Njoṅ mat njwèn nu ba Israél fa be ntùm yen ṅwa'ni li là, num neghù bo lèn mba yen nzwit mèn nà na' nke njôg, mba mba ze bamntù na' mbe yi là, ndù yen tshô li tswe matmat.
Tans Gekies:
Neto'te Ju z'a ntùm bwe là: BMa
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
La Sainte Bible en Bamiléké-Medùmba © Alliance Biblique du Cameroun, 1993. All rights reserved.