Mata 9

Zonna ge ndu ge looɗeya ne

Mrk 2.1-12; Luk 5.17-26

1Guwa̰ ge àa tele Zeso go, a ge na nda ge ame hateya ma ndee faa ga̰a̰l go, àa gwan-na haaya mbo suwal ga̰a̰l ge ne sḛ kaa ne diŋ swag go. 2Sok ge àa dee ya diŋ, nda a̰me ma in ndu ge looɗeya a̰me ya fiiya saŋal go ge ne ta. Sok ge Zeso kuwa hoɗ fareba ge num way, jan ndu ge looɗeya mbe go: Ee mo dul wa se, mbi van! Mbi pore mo sone ma ya go. 3Ge fare mbe no pe, nda ge hate eeya ge Moyiz ne a̰me ma ɗege jan ta ta buwal zì go, ndu mbe jan fare ge sone kakatag ya ge Dok pagal ba! 4Ajo̰o̰ Zeso ka kuwa num dwaɗɗa ma kuwa, jan num go: Ge dape, ḛ wa kaɗ ge dwaɗɗa ge sone ma ge ḛ dul wa ma zì go de? 5Jan ndu ge looɗeya mbe go: Mbi pore mo sone ma go me no, ɗege digi mḛḛya mo ko ma pagal me ɗe, a ge diige dṵṵl gḛḛ ne zoo de? 6Ge sego, mbi kee ḛ kuwaya go, Van ge Ndu ne ge pool ge suwa pagal ge pore nda duwana ma num sone ma. Guwa̰, jan ndu ge looɗeya mbe go: Ɗege digi, he mo daŋ, mbo mo yà. 7Ne sḛ ɗege digi, dol tene mbo na yà. 8Sok ge ɓase ma kuwa kaŋ mbe ge ke, voo wan num, àa ɗege sale Dok ge ne ho̰ nda duwana ma pool ge go mbe no pe.

Tolla ge Zeso too Mata

Mrk 2.13-22; Luk 5.27-39

9Guwa̰ ge Zeso ɗege ge sok mbe ya, ge sok mboya go, kuwa ndu a̰me ɗu ge àa tol ne Mata kàɗɗa ge na sok tèmel ge chal siyal ne go. Zeso jan ne go: Mbo ya mbi pe go. Ne sḛ ɗege ge na sok mbe go, mbo ge ne pe yà.

10Deɗ-ɗa dwam a̰me go go, Zeso mage na nda ge ame hateya ma ka zam kaŋ zam ge Mata diŋ. Nda ge chal siyal ma gḛḛ, ge nda ge kee sone ma me, àa mbo ya zam kaŋ zam ge num ge na nda ge ame hateya ma ge sok mbe go. 11Sok ge Farisi ma kuwa ano mbe go, àa jan ne nda ge ame hateya ma go: Kee pe gyana ḛ Ba ge hate nda wa ka zam kaŋ zam ge nda ge chal siyal mage nda ge kee sone ma me de? 12Sok ge num fare janna mbe ma dee ya Zeso tɔgwa zì, jan num go: A be nda ge duul pool ma ɓyare Ba ge zon nda pe ne to, ɗaŋɗe, àa num ge tuguɗi ma. Mbi be mbo ya ge nda ge temel ma pe to, ge num ge ke sone ma pe. 13Ke kwaɗa go, ḛ mbo hale fare ge Dok jin̰a num ge Maktub ge na ne zì ma pe go: «Mbi ɓyareya go nda duwana ma kuwa ta a̰se, be tuwaleya ge àa kee num hon mbi ma to. Kaɗɗa ge mbi, mbi be mbo ya ge nda ge temel ma pe to, ɗaŋɗe, ge num ge kee sone ma pe.»#Oze 6.6.

Fare hateya ge Zeso ne ɓan ge Yahuɗ ma way ge wal to

14Ge sok mbe go, nda ge ame hateya ge Yohana ba ge kee nda baptem ne a̰me ma gwan ta ya Zeso ta zì, àa ele ne go: I sḛ ma ɓanna ge Farisi ma, i wan mam njuwal go ɗaɗag me, mo nda ge ame hateya ma daa wan mam njuwal to ge ma̰ fare pe de? 15Zeso gwan ge num janna go: Gwale jin̰al obe kondore ma ge pool kee kiimi, teg ge num kondore gale no go ge num de? Sok ge gwale jin̰al obe mbo kaɗ-ɗa to, sok mbe go, àa wa ɗege wan mam njuwal go. 16Ndu a̰me ge hee ba̰a̰ wa ge jin̰al dyan ba̰a̰ ge kamal ge ne go de? Kee ne ya mbe go ɗe, ba̰a̰ wa ge jin̰al mbe mbo taabe ba̰a̰ ge kamal ya ge na ta mɔɗwag, ne ndwal mbe mbo gwan a̰a̰le se waɗeya. 17Koo ndu a̰me ge kan on̰or jìn̰al ge jin̰al ge ɗutulu ge kamal zì go de? Kaɗɗa na kan ne ya mbe go, ago on̰or jìn̰al ge jin̰al fol ɗutulu mbe gezi. On̰or jìn̰al mage ɗutulu mbe vḛḛne gezi jwàg. Ɗaŋɗe, ɓyare go àa ka̰a̰ on̰or jìn̰al ge jin̰al ge ɗutulu ge jin̰al zì. Go mbe no, àa wa kaɗ koyya kwaɗa go.#9.17 Zeso ngay go na fare hateya ma jin̰al, go mbe no, ɓyare go Yahuɗ ma eya maa kaŋ keeya ge wal ma ɓiya, kaɗɗa go to, àa ɓan dagre to.

Tanna ge van gwale mage zonnage gwale ge swàm ka kan ne ta ne

Mrk 5.22-43; Luk 8.40-56

18Sok ge Zeso ka jan num fare mbe ma go, ga̰a̰l a̰me ɗu zuɗ-ɗa, mbo ya guu na ko ne ndwa se, jan ne go: Mbi van ge gwale suu kee ya swag, mo mà mbo ja ee mo tok ge ne ta, mà tan. 19Zeso ɗege digi, a ge na nda ge ame hateya ma ɓan mboya dagre ge ne.

20Sok mboya go, gwale a̰me ɗu ge swàm kan ge ne ta, ge kee ya del wol pɔgwa zi ge ne, seŋe tene ge Zeso guwa̰ ya, mbo ya taɗ ne ba̰a̰ wa. 21Ke ano mbe ge dape, kaa ge hoɗ fareba go, na mà dabe ya ne ba̰a̰ wa guwa puy, na mà seɗ zonna. 22Zeso seŋe tene se, sok ge kuwa ne, jan ne go: Ee mo dul wa se, mbi van, hoɗ fareba ge mo zon mo ya go. Ge sok mbe go gaw, gwale mbe seɗ zonna.

23Sok ge Zeso dee ya ge ga̰a̰l mbe diŋ, kuwa nda ge sun gal ge swày ne ma, ge ɓase ge ka kirgi ta ge fiyaso ma me, 24jan num go: Ḛ wa̰a̰ ta gezi, ago van kale mbe be suu suu to, fii dwam. Àa ɗege man ne. 25Sok ge yin̰a ɓase ma ya zum, waɗ van kale pagal zì yà, wan ne tok, van kale mbe tan. 26Kṵwa̰ ge fare mbe ne dasare ge sok ma go peɗ.

Zonna ge ɓaal ge zi ma way

27Guwa̰ ge Zeso ɗege ge sok mbe ya, ɓaal ma zi ka kàre ne pe, àa ka oyya go: Gan ga̰a̰l Daviɗ Baŋ, kuwa i a̰se nde no de! 28Sok ge dee ya zok diŋ, ɓaal mbe ma waɗ-ɗa ne pe diŋ. Zeso ele num go: Ḛ hoɗ fareba ya go go mbi ge pool kee kaŋ mbe ge ḛ ele mbi ne no de? Àa gwan ne vinna go: O̰o̰ Bagezok! 29Sok mbe go, ee na tok ge num ndwa ma go, jan num go: Ge fareba hoɗɗa ge ḛ ḛ ma pagal, ḛ see zonna. 30Num ndwa ma tyan gezi gaw. Guwa̰, Zeso mḛḛre num ol kekeŋ go, num koy ta kwaɗa, ne kaa ge ndu a̰me za̰a̰ fare mbe to. 31Ɗaŋɗe, sok ge àa wuwa ya zum gaw, àa ɗege dasare kaŋ ge Zeso kê mbe ge sok ma go peɗ.

Zonna ge ndu ge ɗel taɗɗa ne

32Ge sok waɗ zum ge ɓaal mbe ma way go, àa ka gene ndu ge no ge on̰om ge sone na zì ge ɗel taɗɗa se ya ge Zeso ta. 33Sok ge yin̰a on̰om mbe ge sone ge ne zì, ndu ge ɗel taɗɗa mbe ɗege faa wa. Ɓase ma mbo ya kee ajab, àa ka janna go: Kaŋ ge go mbe pe be kee ge Izrayel van ma buwal zì dwam ɗu to. 34Ɗaŋɗe, Farisi ma ka janna go: A ga̰a̰l ge on̰om ge sone ma way hon ne pool ge yan on̰om ge sone mbe ma ne.

Zeso laa hoɗ ge ɓase ma fare pe

Mrk 3.6-19; Luk 6.12-16; 10.2

35Zeso ka zwagre tene mboya ge suwal ga̰a̰l mage suwal jiyale ma diŋ peɗ, ka hate nda ge zok kee kaɗeya ge Yahuɗ ma way ma zì, ka oy Fare ge Kwaɗa ge muluk ge Dok ne pe, ka zon tuguɗi mage sulugu ge diige ma pe peɗ. 36Sok ge kuwa ɓase ma mbwaɗɗa lulum na pe go, àa kaɗ taneya kakatag, ndwa suuya se leɗeɗ dinna ge tame ge be ba ge koy maa ma go, kuwa num a̰se. 37Ge sok mbe go, jan na nda ge ame hateya ma go: Ɓase mbe ma dinna ge gaaso ge danjan̰ ge zo̰o̰ zon go, ɗaŋɗe, nda ge kee ne tèmel ma hoɗege. 38Ago ḛ kaɗe Bagezok, ne teme nda ge kee tèmel ma ya ge na gaaso zì.

Tans Gekies:

Mata 9: kiaGRB

Kleurmerk

Deel

Kopieer