KALAQAMA 9
9
MAGANU NOHI LEDO GONDOORO EI
1Maganu Nohinna oososi, «Ille ilamme, baatto wo'me; 2saada, cea, godowunni ha'ranno kalaqaminna qulxu'mu baalu waajjanno'ne; duuchunku ki'ne anga galanno. 3Kunni albaanni oommo'nente gede, lubbo noosihu milli yaanno kalaqami baalu, ittinanni sagale ikkanno'ne; 4ikkollana, mundeete giddo lubbo noo daafira, mundee giddo noo maala ittinoonte. 5Manna shaannohu baalu xa'mamanno; manna shiinoha qorichinshanni; manna shitino saadano shinanni.
6«Mannu kalaqaminohu Maganu akatinniiti; kunni daafira, afanni hee're manna shaannohu baalu mannu anga reyanno.
7«Ki'ne ille ilamme; sirchi'ne baatto wo'mo» yee maassi'rinsa.
8Hakkunni gedensaanni Maganu Nohiranna oososira, 9«Kuneeti ki'nenna sirchi'ne, 10lubbo afi'rino kalaqami baalu, markaawete giddonni fultino cea, saadanna dubbu moyichi baalu ledo gondooro e"eemmo. 11Ledo'ne eummo gondoori garinni, kunni ka'a lubbo afi'rino kalaqami baalanku baote wayinni horonta diba"anno; baattono layinkimeeshsho baote wayinni dihuneemmo. 12Ki'nenna lubbo afi'rino kalaqami baalu ledo e"eemmohu kuni hegere gondoori malaate ikkanno gede, 13magani-seemo'ya gomichu aana woroommo; tini magani-seemo kalqete ledo eoommo gondoorira malaate ikkite heedhanno. 14Gordo gomichunni diweemmo yannaranna magani-seemo gomichu aana leeltanno yanna baalantera, 15‹Kunni ka'a baote wayinni, lubbo afi'rino kalaqama baala horonta dihuneemmo› yee ki'nenna wolootu lubbo afi'rino kalaqami baalu ledo eoommo gondooro qaageemmo. 16Magani-seemo gomichu aana laeemmo yanna baalantera, anenna baattote aana noori lubbo afi'rino kalaqami mereero nooha hegere gondooro qaageemmo. 17Tini magani-seemo lubbo afi'rino kalaqami baalaho eoommoha gondooro qaagiissitanno malaateeti» yii.
NOHINNA OOSOSI
18Markaawetenni fulturi Nohi ooso Seemi, Kaamiitinna Yaafeetiiti; Kaami Kana"aani annaati. 19Xa baatto wo'me noo manni baalu ilaminohu kuri sasu Nohi oosonniiti.
20Nohi baatto loosi'rannoha ikkinohura woyinete haqqe kaasi'ri; 21mitto barra Nohi woyinete xajje age dimbe, mullichu dukkanu giddo goxi. 22Kana"aani anna ikkinohu Kaami annisi Nohi mullichu noota afi yannara, gobbara fule, lamunku roduuwisira kuli. 23Seeminna Yaafeeti darbata qotinsara wodhite, dukkanunniwa higge badhillitte marte, anninsa mullimma la"a saalfattino daafira shawwu yite heedhe teedasi dibbu. 24Nohi dimbu higisihu gedensaanni, maa'nu beettisi assinosita afe,
25«Kana"aani rumaminoha ikko!
Roduuwisira borojjicho,
borojjinsarano woriidi borojjicho ikko!
26«Qoleno,
Seemi Magani Kaaliiqi galataminoha ikko;
Kana"aani Seemi borojjicho ikko.
27Maganu Yaafeeti baatto halashsho;
Yaafeeti sirchi Seemi sirchi ledo mitteenni hee'ro;
Kana"aani Yaafeeti borojjicho ikko» yii.
28Baote wayi gedensaanni, Nohi 350 diro hee'ri. 29950 diro ikkisita reyi.
Tans Gekies:
KALAQAMA 9: QulMax
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© The Bible Society of Ethiopia; Sidama Holy Bible BSE-UBS 262 P 2014
