ሉቃስት ወንጌል 21
21
ፈወነ 21
ድኻ ልጀጊርድ ኣልስረው ሚቨድ
(ማር. 12፡41-44)
1እየሱስም ጭቅ የው ቓላንድ፣ ኻፍታማን እቅ ጝታሚቨድ መቅደሲዙ ሚቨ ማለነ ሳፁኒል ድውጛንድ ቓሉ። 2ላይ ድኻ ልጀጊርድም ሊጘ ሳንቲማን ሳፁኒል ድውራንድ ቓሉ። 3ኣይንድም፦ «እማንዝ የኵን፤ እጝቂስቅ እኝቸን ድኻ ልጀጊርድሸን ኒቒስር ይውች። 4እንዛይቅ ይውጘውድ ጝታኻፍቲስ ቲርፈውድየንት የጝ፤ ጚ ግን ድኻ ኣቕር ፅብራ ውርቅ እዳዚጝቀ ጝርፃይረውድ እጝቅትቅ ይውርኵች» የው ዊግቱ።
እን ኣልሚዝ ፋፅምሸነይዙ ምልክትድ
(ማቲ. 24፡1-2፤ ማር. 13፡1-2)
5ጝክንደጢስም ላው ላውድ፦ «እን መቅደስ ጝንድ ኣወሽ ዲስ ሸኵፈ! ሸግጥ ቕርጝዝመ እቅ እደረስ ይውጘቍ ገይፅዝ ገይፅኩ» ይጛ ዊግሽጛ ዊን። 6እየሱስ ግን፦ «እን ቓልድርነውድቅ ፋይሪጝቀ ቕርጘይዝ ዲጊል ቕርጘ ኲንሸጘ እዳቓው ግርየ ተርጡ» ዩ። 7ጛይም፦ «ክንሰተወ! እንቅ ኣቐው ግርየድ ኣውን የጝ? እንቅ ኣቐው ግርየድ ጣቅረጘ ኣርቕሰው ምልክትድስ ወረጘ የጝ?» ይጝ ዋቕር።
8እየሱስም እንት የው ዊሱ፦ «ቀትርነቅ ጣጝቅቅጭጥን፤ ንቕፀቍ እቅ፦ ‹ያን ክርስቶስ የጝ፤ እንወ! ዚምንድ ችጝኩ› ይጛ ይሽዝ ተርጥቍ፤ ክትን ግን ጛት ቲክንትርነ። 9ኣጭነዝመ ዅውክትዝ ወሽርናንድ ዳጝግፅትርነ፤ በውግዝ እንቅ ኣጠ ጥውሸው የጝ፤ ኣነጚ ኻትሸነድ በውዝም ኣቓው።»
10ቈሽም እንት ዩ፦ «ኽዝቭ ኽዝቭል፣ ምጝግስትም ምጝግስትል ጕጡ። 11ዝቨትልም ኽየው ንውፅንውፅተ፣ እጝቅ ስፍረይልም ግድርዝመ ሽወዝ ኣጡ፤ ሚንትርነ ጐውሰውዝመ ሲመይስም ኽየው ምልክትዝ እትልጡ። 12ዊገድ ግን እኒንቅ ኣቐነዊስ በውገ እቅ ክታት ፃይጥቍ፤ ሲድስጥቍ፤ ምኵራቪልቅ፣ ወኽኒ ጝኒልቅ፣ ዲቍስጝ ይውጥቍ፤ ይሽዝቍዝም ንጕሳኒል፣ ቅመቊልም ፊስጥቍ። 13እንም ይሽዝ ሚዝርድትርነ ማጥን ቀሰው ኣጋል ኣጡ። 14ኣቓንስቅም፦ ‹ወረጘ ይን ዊስንቅ ኣጢ?› ይርን ጨጝቅሻይርነጘ እኒንት ልብ ይጥን።#ሉቃ. 12፡11-12። 15ክታፃለታኒስ ኣውማውቅ ተቃውምሸነውም ኣነ ተቋቍምሸነውቅ ቸላይጘው ቃልዝመ ጥቨቭዝ ነቅጭር። 16ክታኣቅልድ፣ ክታዚምዳንድ፣ ክታፃምጥድቅ እኳ እዳቒጝቀ ክታት ዲቍስጝ ይውጥቍ፤ ክታጊስም ላው ላውድ ቁጥቍ። 17ይሽዝ ማጥንም እጅርዝቅ ሽክሽርነቅ ኣትርንቅ። 18ዊገድ ግን ክታኣውር ፅቭቀይስ ላይሸን እኳ ድዛይም። 19ፀናቕን ችብረነውዝም ክታኒፍስየንት ቓዝትርንቅ።
20«እየሩሳልየም ጠውርሰራዊትዝ ኪብሽረጘ ቓልድርናንድ ጝርድዘነ ግርየድ ጣቅረጘ ኣርቕጥን። 21ኣይንድ ይዅዳ ኻግሪል ፅበቍድ ኣብቒዝጐ ሰይጝነ፤ ኻትመየንትል ፅበቍድም ጝርጊስ ፍጝነ፤ ገጠሪዝቍድም ኻትመየንትል ጥዊጝነ። 22ምላሰንድም እንዝ ማጥን ፃፍሸውድቅ ፋፅምሽጠ ማጥን እኒን ቢቅልደነው ቕፃርዙ ግርየ የጝ።#ዀስ. 9፡7። 23ኣይንትቍ ግርቂዝ ጊዙረቍዝመ ኒቭሰቍ መሉጅንጥዝ ወየው! ዝቨትል ኽየው ሚከረ ኣጡ፤ እን ኽዝቪልም ቍጠ ተርጡ። 24ጛጊስም ሰይፍዙ ስለትዝ ክርጥቍ፤ ላው ላውድ ቈሽ ኣኽዛቫኒል መራሽጝ ፊርጥቍ፤ ኣኽዛቫኒዝ ዚምንድ ኻትሽጢስቅ እየሩሳልየም ኣኽዛቫንዝ ደድሽረይ ኣቲ።»
ክርስቶስት ሊጘት ተረነድ
(ማቲ. 24፡29-31፤ ማር. 13፡24-27)
25«እንዝ ግረ ኰረይስ፣ ኣርቨይስ፣ ፅግልውጢቅም ምልክታን እትልጥቍ፤ ባኽሪዝመ መጐዲዙ ድመይዝቍዝም፣ ዝቨትል ፅበው ኽዝቭድቅ ጨጝቅሻ ኻውክሽጡ።#እሳ. 13፡10፤ ኽዝ. 32፡7፤ እዩ. 2፡31፤ እት. 6፡12-13። 26እቅም እን ኣልሚል ተረው ኣቕንድየንት ሊሚደነውዝ ዝላጥቍ፤ ምላሰንድም ሲመይት ኻይላንድቅ ናውፅውፅሽትጥቍ። 27ኣይንድም እጅር ዅርት ኽየው ኻይልዝመ ክቭርዝ ኣቕ ድምነዝ ተራንድ ቓልጥቍ።#ዳን. 7፡13፤ እት. 1፡7። 28ክትንም እንቅ ኣቐነው ኪርማንድ ክታቓደነ ግርየድ ጣቅራንስቅ ጭቅ ይርን ንየ ቓልጥን።»
29ቈሽም ተከ እንት የው ዊግቱ፦ «በለስስመ ላየ ዘፍድቅ ኣስክስርን ቓልጥን። 30ጝታኻፀድ ጭጭቫንድ፣ እየድ ችጘጘ ክታቕም ኣርቕትርንቅ። 31እኒዝጘ ቈሽ ክትንም እንዛይቅ ኣቐነው ኪርምጛንድ፣ እደረት ምጝግስትት ተረነ ግርየድ ችጘጘ ኣርቕጥን። 32እማንዝ የኵን፤ እንቅ ኣጢስቅ እን ዅለድ ዲቋውም። 33ሲመይስመ ዝቨስ ዲቍጥቍ፤ ይቃልድ ግን ፍፅም ዲቋም።»
ጣጝቅቅሽን ሊሚደነው ጥውሽጠጘ
34«ጭቕጘ ዝየና እራቐነውዝመ ጨነዝ ማጥን ጨጝቅሸነውዝ ክታኣይምረውድ ዲንዝዛየጘ ጣጝቅቅጭጥን። ኣለዝየ እድ ግርየድ ፅውረይዝጘ ድጝግት ችጝጡ። 35እድ ግርየድም ዝቨትል ፅበቍ እቅድቅ ድጝግትዝ ፃውርጡ። 36ነስየ እን ተረው ጭቓ ዊገይስቅ ጭልቕትርነ ማጥን፣ ቈሽም እጅር ዅርት በዊል ኣይቭቲጝቀ ችብርትርነ ማጥን፣ ዊትርቅ ፃልይርና ነቃጥን» ዩ።
37እየሱስም ግሪ ጨቨቅ መቅደሲል ክንሳ ዊኑ፤ ኻር ግን ደቭረ ዘይት ኣበይል ፍ ጫ ዊኑ።#ሉቃ. 19፡47። 38ኽዝቭድቅ ጝት ወሽጠ ግረቨዝ ጕ መቅደሲል ጝጐ ተራ ዊኑ።
Tans Gekies:
ሉቃስት ወንጌል 21: ኽምጣኣኪ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
