ወንጌል ዘሉቃስ 16

ምዕራፍ 16

በእንተ መጋቤ ዐመፃ

1 # 15፥13። ወይቤሎሙ እግዚእ ኢየሱስ ለአርዳኢሁ አሐዱ ብእሲ ባዕል ቦቱ መጋቢ ወአስተዋደይዎ ኀቤሁ ከመ ዘይዘሩ ሎቱ ንዋዮ። 2ወጸውዖ እግዚኡ ወይቤሎ ምንትኑዝ ዘእሰምዕ በእንቲኣከ እንከሰ አግብእ ሐሳበ ምግብናከ እስመ ኢትከውነኒ እንከ መጋቤ ሊተ። 3ወኀለየ ውእቱ መጋቢ ወይቤ ምንተ እሬሲ ናሁ ይስዕረኒ እግዚእየ እምግብናየ ሐሪሰሂ ኢይክል ወስኢለሂ አኀፍር። 4አአምር እንከሰ ዘእገብር እምከመ ሰዐረኒ እግዚእየ እምግብናየ ከመ ይትወከፉኒ ውስተ አብያቲሆሙ። 5ወጸውዖሙ ለእለ ይፈድይዎ ዕዳ ለእግዚኡ ወይቤሎ ለቀዳማዊ ሚመጠን ዕዳ ዘትፈድዮ ለእግዚእየ ወይቤሎ ምእተ በመስፈርተ ባዶስ ቅብዐ። 6ወይቤሎ ናሁኬ መጽሐፍከ ንበር ወጸሐፍ ፍጡነ ኀምሳ ላዕሌከ። 7ወይቤሎ ለካልኡሂ አንተሰ ሚመጠነ ትፈድዮ ለእግዚእየ ወይቤሎ ምእተ በመስፈርተ ቆሮስ ሥርናየ ወይቤሎ ናሁኬ መጽሐፍከ ንበር ወጸሐፍ ፍጡነ ሰማንያ ላዕሌከ። 8#ኤፌ. 5፥9፤ 1ተሰ. 5፥5። ወንእዶ እግዚኡ ለመጋቤ ዐመፃ እስመ ከመ ጠቢብ ገብረ እስመ ውሉደ ዝ ዓለም ይጠበቡ እምውሉደ ብርሃን በዓለሞሙ። 9#ኢሳ. 32፥17-18፤ ማቴ. 6፥20-24፤ 10፥40፤ 19፥21። ወአነሂ እብለክሙ ግበሩ ለክሙ አዕርክተ እምንዋየ ዓመፃ ከመ አመ የኀልቅ ንዋይክሙ ይትወከፉክሙ እሙንቱሂ ውስተ አብያቲሆሙ ዘለዓለም። 10#19፥17። ወዘሰ በውኁድ ምእመን በብዙኅኒ ምእመን ውእቱ ወዘሰ በኅዳጥ ዐማፂ በብዙኅኒ ዐመፂ ውእቱ። 11ወሶበ በንዋየ ዐመፃ ሃይማኖት አልብክሙ በንዋየ ጽድቅ መኑ የአምነክሙ። 12ወሶበ በንዋየ ባዕድ ሃይማኖት አልብክሙ ዘዚኣሁ መኑ እንከ ይሁበክሙ። 13#ማቴ. 6፥24። አልቦ ገብር ዘይክል ተቀንዮ ለክልኤቱ አጋእዝት ወእመአኮ አሐደ ያፈቅር ወካልኦ ይጸልእ ወእመአኮ ለአሐዱ ይትኤዘዝ ወለካልኡ የአቢ ኢትክሉኬ ለእግዚአብሔር ተቀንዮ እንዘ ንወየ ታፈቅሩ። 14ወሰሚዖሙ ዘንተ ኵሎሙ ፈሪሳውያን ተቃጸብዎ እስመ መፍቀርያነ ንዋይ እሙንቱ። 15#18፥9፤ መዝ. 6፥10፤ ምሳ. 6፥16-17። ወይቤሎሙ፤ አንትሙሰ ትጼደቁ ለዐይነ ሰብእ ወእግዚአብሔር የአምረክሙ ልበክሙ እስመ ዘበኀበ ሰብእ ዐቢይ በኀበ እግዚአብሔር ትሑት ወምኑን#ቦ ዘይቤ «ወርኩስ» ውእቱ።

በእንተ ኦሪት ወነቢያት

16 # ማቴ. 11፥12-13፤ ማር. 10፥11-12። ኦሪትኒ ወነቢያትኒ እስከ ዮሐንስ እምትካት ሰበኩ በእንተ መንግሥተ እግዚአብሔር ወኵሉ ይትገፋዕ#ቦ ዘኢይጽሕፍ «ይትገፋዕ» በእንቲኣሃ። 17#ማቴ. 5፥18። ወባሕቱ ይቀልል ሰማይ ወምድር ይኅልፍ እምትደቅ አሐቲ ቃል እምኦሪት ወእምነቢያት።#ቦ ዘኢይጽሕፍ «ወእምነቢያት» 18#ማቴ. 5፥32፤ 19፥8-9፤ 1ቆሮ. 7፥10-11። ወኵሉ ዘይድኅር ብእሲቶ ወያወስብ ካልእተ ዘመወ ወዘኒ ያወስብ ኅድግተ ዘማዊ ውእቱ ወእንተሂ ደኀራ ምታ ለእመ ቀርበት ካልአ ዘመወት።#ቦ ዘኢይጽሕፍ «ወእንተኒ ደኀራ ምታ ለእመ ቀርበት ካልአ ዘመወት»

በእንተ ባዕል ወአልዓዛር

19ወሀሎ አሐዱ ብእሲ ባዕል ወይለብስ ሜላተ ወለየ ወልብሰ ቢሶስ ወቀጠንተ አልባስ ወይትፌሣሕ ወይትፌጋዕ ኵሎ አሚረ። 20ወሀሎ አሐዱ ነዳይ ዘስሙ አልዓዛር ግዱፍ ውስተ ዴዴሁ ለባዕል ወይሰክብ እንዘ ይደዊ በሕማመ ቍስል። 21ወይፈቱ ይጽገብ እምፍርፋራት ዘይወድቅ እማእዱ ለባዕል ወከለባትሂ ይመጽኡ ወይልሕሱ ቍሰሊሁ። 22ወእምዝ ሞተ ዝኩ ነዳይ ወወሰድዎ መላእክት ውስተ ሕፅነ አብርሃም ወሞተ ባዕልኒ ወተቀብረ። 23ወበሲኦል አንሥአ አዕይንቲሁ እንዘ ሀሎ ውስተ ደይን ወርእዮ ለአብርሃም እምርኁቅ ወለአልዓዛር ውስተ ሕፅኑ። 24ወጸውዐ ወይቤ አባ አብርሃም ተሣሀለኒ ወፈንዎ ለአልዓዛር ከመ ይጥማዕ ጽንፈ አጽባዕቱ ማየ ወያቍርረኒ ልሳንየ እስመ ሐመምኩ በዛቲ እሳት። 25#መዝ. 48፥12-20። ወይቤሎ አብርሃም ተዘከር ወልድየ ዘከመ ፈጋዕከ ወተፈሣሕከ በሕይወትከ ወአልዓዛርሰ ከማሁ ክመ በተጽናስ ወይእዜሰ ከማሁ ክመ ውእቱ ይትፌሣሕ በዝየ ወአንተሰ ተሐምም። 26ወምስለ ዝንቱ ኵሉ ጸድፍ ዐቢይ ይከልአነ ማእከሌነ ወማእከሌክሙ ከመ እለሂ ይፈቅዱ እምለፌ ይኅልፉ ኢይክሀሉ መጺአ ኀቤክሙ ወእለሂ መንገሌክሙ ኢይዕድዉ ኀቤነ። 27ወይቤሎ እስእለከ አባ አብርሃም ትፈንዎ ለአልዓዛር ቤተ አቡየ። 28እስመ ሀለዉ ኀምስቱ አኀውየ ይንግሮሙ ወይስምዑ ወኢይምጽኡ እሙንቱሂ ውስተ ዛቲ ብሔረ ሕማም። 29#ኢሳ. 8፥20፤ ዮሐ. 5፥39-47፤ 2ጢሞ. 3፥16-17። ወይቤሎ አብርሃም ቦሙ ሙሴ ወነቢያት ኪያሆሙ ለይስምዑ። 30ወይቤሎ አልቦ አባ አብርሃም አሐዱ እምነ ምዉታን ለእመ ኢሖረ ኀቤሆሙ ወለእመ ኢነገሮሙ ኢየአምኑ ወኢይኔስሑ። 31#ዮሐ. 12፥9-11። ወይቤሎ አብርሃም ለእመሰኬ ሙሴሃ ወነቢያተ ኢይሰምዑ እመሂቦ ዘተንሥአ እምዉታን ኢይሰምዕዎ ወኢየአምንዎ።

Tans Gekies:

ወንጌል ዘሉቃስ 16: ሐኪግ

Kleurmerk

Deel

Kopieer