ሃዋ̈ 23

1ጳውሎ̈ሲ ፊርዳ ኣ̈ሎ ኣሳን ኮት̇ ዎቲ ቤቃ̇ሪ “ቴ ኢሺንታ̇ን! ታ̈ኒ ዓኖ̇̈ ዬላ̇ራ ዎይ ጋላስ ጾ̈ሳ̇̈ ቲ̈ን ዎንዳ ኮሻ ቆፊባራ” ጌይዴ። 2ቄ̈ሳ̈ ኣላቃንቦ ኣላቃ ሃና̈ኖ ጳውሎ̈ሳ ኖ̈ኒን ባቃ̇ምፔ̈ን ኢ ላፍ ዎ ኣሳን ኪ̈ቲ̇ዴ። 3ዪኒ̇ባራ ጳውሎ̈ሲ ሃና̈ናኮ “ኔ̈ኒ ቦቃባር ሜ̈ሺንቲ̇ኖ ጎፓ ማይጺዛ̈ዲ! ጾ̈ሲ̈ ኔ̈ና ቡኪ̇̈ሬ! ሂጊ̇ን ጋ̈ዚንዲፌ̈ን ታ ጋልዳ ፊርዳንዳብ ዶኣራ ማ ኔ ቆሚ̇ን ሂጊ̇ን ኣሻ̇ራ ታ̈ና ቡካ̇ምፔ̈ን ኪ̈ታ̇̈ራ? ዪዚ ኔ ኔ ቆሚ̇ን ሂጊ̇ን ና̈ጋካ̇ዬ” ጌይዴ።

4ጳውሎ̈ሳ ላፍ ኤቃ̇ር ዎን ኢ̈ኮ “ኣን ኔ̈ኒ ጾ̈ሳ̇ ቄ̈ሳ̇ንቦ ኣላቃ̈ ቆራ?” ጌይዴ

5ኢያር ኢንታ̇ኮ “ቴ ኢሺንታ̇ን! ኢ ቄ̈ሳ̈ንቦ ኣላቃ ማ̈ቂ̇ኖን ቴ ኤራካ̇ዬ፤ ኣባጌዪን ‘ኔ ዎርዣ̈ቦ ኣላቃ ጋልዳ ኢ̈ት ባዝ ሶ̈ላፔ’ ጋ̈ር ጻ̈ፊንቲ̇ኔ” ጌይዴ።

6ጳውሎ̈ሲ ኢና ዎ ኣሳን ጋርታፖ ባጋ̇ን ሳዱቃ ባጋ̇ን ፋራሳ̈ዋ ማ̈ቂ̇ኖን ኤራሪ “ቴ ኢሺንታን! ታ̈ኒ ፋራሳዋን ጋርታፖ ዬሊንቲ̇ኖ ፋራሳ̈ዋ፤ ቤቂ̇ብቴ ዓይቂ̇ኖ ኣሲ ዲንዲ̈ሬ ጌያ ታ ኣማ̇ናዚንኮታ̇ቦ ታ̈ና ፊርዳ ኣ̈ል ሺ̈ሺ̇ኔ” ጋ̈ሪ ፌ ቆ̈ን ሾክ̇ ዎታር ኣይሁድ ፊርዳ ኣ̈ሎ ኣሳን ቲ̈ን ሶ̈ሊዴ።

7ጳውሎ̈ሲ ዪኖ̇ ሶ̈ሊን ፋራሳ̈ዋን ጊዳ̇ኬ ሳዱቃን ጊዳ̇ ዋቺ̇ ዲንዲን ኣይሁዳን ፊርዳ ኣሊን ናምኢ ፋጊንታ̇ዴ። 8ሳዱቃን “ዓይቂ̇ኖ ኣሳቦ ዲንዳ ባዬ̇፤ ኪ̈ታንቻ̇ር ባዬ̇፤ ኣያ̇ናር ባዬ̇” ጌይን ፋራሳዋን “ዪን ዎይ ዎ” ጋሪ ኣማ̇ኒ̈ሬ። 9ዪኒ̇ባራ ኢንታ ጊዳ̇ ጴች ዋቺ̇ ኬስኪ̇ን ፋራሳዊ ማ̈ቂ̇ኖ ፔቲ̇ ፔቲ̇ ሙ̈ሳ ሂጋ̇ ኣስታማ̈ራን ዲንዳ̇ሪ “ኑ̈ኒ ና̈ሳ ዓ ጋልዳ̇ ኣባካር ኢታ ባዝ ዲጛካዬ፤ ኣያ̇ና ዎይ ኪታንቻ ኢ̈ብ ሶ̈ሊኖ ማ̈ቃ̇ንዳብ ዳንዳኢ̈ሬ፤ ኑ ኣብዝ ኤሪ̈ራ?” ጋ̈ሪ ዎልዎልኣ ዋጪዴ።

10ኢንታ ጊዶ̇ ዋቺ̇ን ሚ̈ጛሙታ ሉኪ̇ኖኮታ̇ቦ ኣሳን ጳውሎ̈ሳ ኤ̈ር ሾይላካዮ̈ዲፌ̈ን ዎታ̇ዳራን ኣላቃ̈ዲ ኢ̈ጫ̇ሪ ዎታ̈̇ዳራንኮ “ዪንቲ ሶ̈ባሪ ጳውሎ̈ሳ ኣሳን ጊዳ̇ፖ ዎልቃባር ኬሲ̇ ኤካ̇ር ዓይ ዬ̈ሪ ዎታ̇̈ዳራን ዶኣዝ ቤሲ̇ን ኤ̈ጚብቴ!” ጋ̈ሪ ኢንታ̇ ኪ̈ቲ̇ዴ።

11ኢዝ ዎንን ቃም̇ ጎዳ̈ዲ ጳውሎ̈ሳ ላፍ ኤቃ̇ሪ ኢ̈ኮ “ኢ̈ጫፔ ዬሩሳ̈ላም ጋርታ̇ ኔ ታ̈ብ ማርኪቲኖንዲፌ̈ኒ ማ ሮ̈ማ ጋዳር̇ ማርኪታንዳ̇ብ ኮሻ̇̈ሬ” ጌይዴ።

ኣሳን ዉጫባር ጳውሎ̈ሳ ዎንዳብ ዞሪንቲዴ

12ሳ̈ዚን ዎንቲ̇ን ኣይሁዳን ሺ̈ቃሪ “ኑ̈ኒ ጳውሎ̈ሳ ዎካይዶሪ ፊ̈ሻር ሞ̈ብዳ፤ ዋ̈ር ኡሽኪባ̈ዳ” ጋ̈ሪ ዎል ዎልኣ ጫ̈ቂ̇ዴ። 13ዪኖ ዎል ዎልኣ ዞሪንቲ̇ኖን ኦይዲ ታጳ ኣሳፖ ሺ̈ሬ። 14ኢንቲ ቄ̈ሳ ኣላቃንኬኬ ጋዳ ጪጛሻንኮ ሉካ̇ሪ “ኑ̈ኒ ጳውሎ̈ሳ ዎካ̇ይዶሪ ካ ሞ̈ንዳባዬ ጋ̈ሪ ዎልዎልኣ ሚን ጫ̈ቂ̇ኔ፤ 15ዪ̈ኮታ̇ቦ ዪንቲ ኣይሁድ ፊርዳ ኣሎ ኣሳንባር ዎልኣ ማ̈ቃ̇ሪ ኮሺንቺ ኢያ ኦይጪ̇ዝ ባዚ ዎዲፌን ማይጺሳሪ ጳውሎ̈ሳ ዪንታ̇ብ ኤሄይሳምፔ̈ን ዎታ̇̈ዳራን ኣላቃ ኦይጪ̇ብቴ፤ ኑ̈ናሬ ኢ ዓንዳ ዬላ̇ካ̇ይዶን ኑ ኢያ ዎንዳብ ጊ̈ጊንቲ̇ኔ” ጋ̈ሪ ኢንታ̇ብ ሶ̈ሊዴ።

16ዎቲናካር ጳውሎ̈ሳ ሚሺ ናኣ̈ዲ ኢንቲ ዞሪንታዚን ሲስኪ̇ኖኮታ̇ቦ ዎታ̇ዳራን ዶኣዝ ቤሲ̇ን ጋርታ ሉኪ̈ ጌላሪ ጳውሎ̈ሳብ ሶ̈ሊዴ። 17ጳውሎ̈ሳሬ ማታላቃን ጋርታፖ ፔታ̇ና ጼ̈ይጋሪ “ዓ ና̈ራ̈ዲ ዎታ̇̈ዳራን ኣላቃ̈ቦ ሶ̈ሊዝ ባዚ ዎኮታ̇ቦ ኢያ ኢ̈ክ ዬልቤ” ጌይዴ። 18ማታላቃ̈ዲ ና̈ራ ዎታ̇̈ዳራን ኣላቃ̈ኮ ኤኪ̇ ጌላሪ “ቃ̈ሺ ኣ̈ል ዎ ጳውሎ̈ሲ ታ̈ና ጼይጋሪ ዓ ና̈ራ ኔ̈ብ ሶ̈ሊዝ ባዚ ዎኮታ̇ቦ ኔ̈ክ ኤካር ዬምፔ̈ን ታ̈ና ጌሺኔ” ጌይዴ።

19ዎታ̇̈ዳራን ኣላቃ̈ዲ ናኣ ኩሺን ኤ̈ር ጌዳ ዱማ ኣ̈ሪ ኢ̈ኮ “ኔ ታ̈ብ ሶ̈ላንዳ̇ብ ኮዪኖ ባዚን ኣብዛ?” ጋ̈ሪ ኢያ ሙታ̇ ኦይጪ̇ዴ።

20ና̈ራ̈ዳር ኢ̈ኮ “ኣይሁዳን ጳውሎ̈ሳ ኮሺንቺ ኦይጪ̇ዛ̈ዲፌ̈ን ማይጺሳሪ ጊያ̈ባቦ ኣይሁዳን ፊርዳ̈ሎ ኣሳን ቲ̈ን ሺ̈ሻ̇ምፔ̈ን ኔ̈ና ኦይጫ̇ንዳብ ዎልዎልኣ ዞሪንቲ̇ኔ። 21ዎቲናካሬ ኔ ኢንታ̇ኮን ሲስካፔ̇ ‘ኑ ኢያ ዎካይዶር ካ ሞ̈ንዳባዬ፤̇ ዋ̈ ኡሽካ̇ንዳባዬ̇’ ጋ̈ሪ ዎልኣ ዞሪንቲ̇ኖ ኦይዲ ታጳፓ ሺዝ ኣሲ ኢያ ዎንዳብ ባያር ና̈ጊ ዎ፤ ዪ̈ኮታ̇ቦ ኢንቲ ዓት ኔ ጋ̈ዝ ባዚን ሙታ̇ ሲስካ̇ንዳብ ና̈ጊ̈ኔ” ጌይዴ። 22ዎታ̇̈ዳራን ኣላቃ̈ዲ ና̈ራ̈ኮ “ዪና̇ ኔ ታ̈ብ ሶ̈ሊኖን ኦ̈ባካር ሶ̈ላፔ” ጋ̈ሪ ኢያ ሚሺዴ።

ጳውሎ̈ሲ ጋዲን ኣቂሲዛ ፊልኪሳ ቲ̈ን ሺ̈ቂዴ

23ዪኒፖ ዎሃ ዎታ̇̈ዳራን ኣላቃ̈ዲ ማታላቃን ጋርታፖ ናምኣን ጼይጋሪ ኢንታ̇ኮ “ሳ̈ዚ ቃማ̇ር ዓይዚ̇ ሳኣ̈ታ ማ̈ቄ̇ጌይን ቂሳ̈ራ ሉኪ̇ዝ ናምኢ ጼታ ዎታ̇̈ዳራ፤ ፋራ ጋልዳ ቶጋ̇ር ኦሊዝ ኣስ ታብዛ ታጳኬ ቶ̈ራባር ኦሊዛ ናምኢ ጼ̈ታ ኣሲ ጊ̈ጊሲብቴ̇፤ 24ጳውሎ̈ሳባር ፋራ ጊ̈ጊሳሪ ጋዲን ኣቂሲዛ ፊልኪሳክ ኮሽ̇ባር ዬላ̇ምፔ̈ን ዎቲብቴ” ጌይዴ። 25ማ ዳብዳ̈ባ̇ር ዪዝ ጌይዛ ጻፊዴ፤ 26“ቄላውዶዎሳ ሉሲዮሳፖ፤ ጋዲን ኣቂሲዛ ቦንቺንቲ̇ኖ ፊልካሳቦ! ሳሪቲ ኔ̈ብ ማ̈ቆ̇። 27ኣይሁዳን ና̈ሳ ዓ ኤ̈ሪ ዎንዳብ ዎቲ̈ርዶን፤ ታ̈ኒ ዎቲናካር ኢ ሮ̈ማ ጋዶ̇ ኣስ ማ̈ቂ̇ኖን ኤሪኖኮታ̇ቦ ዎታ̇̈ዳራንባር ዎልኣ ማ̈ቃ̇ር ዬላ̇ር ኢያ ቡ̈ቲሳዴ። 28ኢንቲ ኢያ ኣባብ ሞ̈ቲኖኮ ታ̈ኒ ኤራንዳብ ኮያራ ኢንታ ፊርዳ ኣ̈ል ኢያ ሺ̈ሻ̇ዴ። 29ኢንቲ ኢያ ሞ̈ቲኖንዳ ፌ ሂጊ̇ን ጊሻ̇ብዶኬ ኢያ ዓይቃቦ ዎይ ቃሺብ ዬ̈ልዝ ባዚ ባዮ̇ን ቴ ኤራዴ። 30ኣይሁዳን ና̈ሳ ዓ ዎንዳብ ዎልኣ ዞሪንቲ̇ኖን ቴ ሲስካ̇ራ ኤሊር ኔ̈ክ ሚሻዴ፤ ኢያ ሞ̈ቲዝ ኣሳንር ኢ ኢ̈ሲ̇ኔ ጌይዝ ባዛን ኔ ቲ̈ን ሶ̈ላምፔ̈ን ቴ ኢንታ ኪ̈ታ̇ዴ።

31ዪ̈ኮታ̇ቦ ዎታ̇̈ዳራን ኢንታ̇ ኪ̈ቲ̇ኖንዲፌ̈ን ጳውሎ̈ሳ ቃም̇̇ ኤ̈ጛር ኣንቲጳጥሪሳ ዬሊዴ። 32ኢዝ ዎንን ፋራ ጋልዳ ቶጋ̇ር ኦሊዛን ጳውሎ̈ሳባር ዎልኣ ሉካምፔ̈ን ዎታሪ ኢንቲ ዎታ̇̈ዳራን ዶኣዝ ቤሲ̇ን ማ̈ቂ̇ዴ። 33ፋራ ጋልዳ ቶጋ̇ር ኦሊዛን ቂሳ̈ራ ዬላ̇ሪ ዳብዳ̈ቢን ጋዲን ኣቂሲዛ̈ቦ ኢማ̇ሪ ጳውሎ̈ሳ ኢ ቲ̈ን ሺ̈ሺ̇ዴ። 34ጋዲን ኣቂሲዛ̈ዲ ዳብዳቢ̇ን ናባ̇ቢኖፖ ዓኒ ጳውሎ̈ሳኮ “ኔ ዎይዲ ጋዶ̇ ኣሳ?” ጋ̈ሪ ኢያ ኦይጪ̇ዴ፤ ኢ ኪልቃ ጋዶ̇ ኣስ ማ̈ቂ̇ኖን ኤራሪ፤ 35ኢኮ “ኔ̈ና ሞ̈ቲዝ ኣሳን ዬ̈ዬጌይንዶ ኔ ሶ̈ሊን ሲስካ̇ንዳ” ጋ̈ሪ ዎታ̇̈ዳራን ካ̈ታ ሄሮ̈ዲሳ ኬ̈ን ጋርታ ኢያ ና̈ጋምፔ̈ን ኪ̈ቲ̇ዴ።

Tans Gekies:

ሃዋ̈ 23: ኦጫ̈ቃማ

Kleurmerk

Deel

Kopieer