Лука 23
23
Исус ко Пилат
1Алаи ущинэ тай гелдэ э Исусес ко Пилат. 2Отхэ он лилэ тэ керэн дошалэс Лэс:
— Амэ галилям, кай Адава Мануш гелэл катар чячё дром амарэ дюняс. Ов на мукел тэ покинэн налогя э императорески тай пхэнэл, кай си Ов о Христос, Патишаи.
3О Пилат пхучляс ко Исус:
— Ту о Патишаи э иудеенго?
— Ту сам аякха пхэнэс, — пхэнляс о Исус.
4Дэчи о Пилат пхэнляс э барэ попазенги тай э дюняски:
— Мэ на гинав, кай адава Мануш си дошало.
5Ай он екхараи пхэнэнас пумаро:
— Ов Пэ сикляримаса ваздэл э дюняс алаи ки Иудея, ханик ки Галилея, акана ало атхэ.
О Исус ко Ирод
6О Пилат шунляс адава тай пхучляс:
— Адава Мануш — галилеяни?
7Кана ов галило, кай о Исус сас андар пху, сави сас тал барипэ ки Иродески, саво сас адава вахыти андэ Иерусалими, ов бичялдяс э Исусес лэстэ. 8Кана о Ирод дикхляс э Исусес, бут лошасаило, вай чёктан мангелас Лэс тэ дикхел. Ов бут шунляс катар Исус тай ишандиелас, кай Одова кан сикавэл лэски саво-то сикаипэ. 9Ов пхучелас Лэстар бут, ай о Исус ништо на пхэнэлас. 10Тэрдэ отхэ о барэ попазя тай о сикляримаря э Тхэдимаски, бут лачес керэнас дошалэс э Исусес. 11О Ирод тай лэски салдатя прасанас тай марэнас э Исусес, ай дэчи урявдэ опэр Лэстэ шукара савутя тай бичялдэ палэ ко Пилат. 12Адава дес о Ирод тай о Пилат улэ амала, ай буруни сас душманя.
О Пилат пхэнэл тэ марэн э Исусес опэр хачи
13О Пилат кидиняс э барэ попазен, э барэ манушэн тай дюняс, 14пхэнляс лэнги:
— Тумэ андянус мандэ Адалэ Манушэс тай пхэнлянус, кай Ов ваздэл э дюняс. Мэ пхучлём Лэс ангал тумэндэ тай на аракхлём Лэс дошалэс андэ одолэстэ, андэ состэ тумэ Лэс керэн дошалэс. 15Ли о Ирод на аракхляс андэ Лэстэ нисави дош тай бичялдяс Лэс палэ амэндэ. Сар дикхен, Ов на кердяс ништо, кай камэл тэ мударэн. 16-17Оничин мэ кан пхэнав тэ марэн Лэс, ай дэчи тэ мукен.#23.16-17 Андэ сарсавэ гречески лилэндэ аякхажэ си адала зборэс: «Андэ байрями ов камэлас тэ мукел екхес андар пханлимаря».
18Дэчи алаи екхе сэсеса динэ бэбэря:
— Мэрипэ Лэски! Мук амэнги э Вараввес!
19О Варавва сас бэшло андэ пханли, кай ваздиняс андэ диз чингар тай андар мударипэ. 20О Пилат мангелас тэ мукел э Исусес тай генэ екхвар лиляс тэ зборизэл лэнца. 21Ай он генэ дэнас бэбэря:
— Опэр хачи Лэс, опэр хачи!
22О Пилат трито рази пхучляс лэн:
— Со джюнгалипэ Ов кердяс? Мэ на аракхлём пал Лэстэ нисави дош, андар савятэ Ов камэл тэ мэрэл. Мэ кан пхэнав тэ марэн Лэс, тай дэчи кан мукав!
23Ай он май лачес дэнас бэбэря тай мангенас, о Исус тэ овэл мардо опэр хачи. Пумарэ бэбэряса он тхэдэ лэс тэ керэл, со манглэ. 24О Пилат пхэнляс, кай кан керэл аякха, сар он манглэ. 25Ов мукляс, сар он манглэ, одолэс, кон сас андэ пханли андар чингар тай андар мударипэ, ай э Исусес диняс андэ лэнги вастэндэ.
Опэр дром ки Галгофа
26Кана э Исусес гелэнас, о салдатя астардэ э Симонэс андар Кирени, кай авэлас катар ливади, тхэдэ опэр лэстэ о хачи тай пхэнлэ тэ гелэл лэс пал Исус. 27Машкарэ бутэ дюнястэ, кай джянас пал Исус, сас ли джювля, савэ марэнас пэс андэ колин тай ровэнас пал Лэстэ. 28О Исус болдиняспэс лэндэ тай пхэнляс:
— Чяя Иерусалимески, ма ровэн Манги, ровэн зиядэ пал тумэндэ тай пал тумарэ пуендэ. 29Авэл асавко вахыти, кана кан пхэнэн: «Бахталэ э бипуенги, савэндэ на аракхлилэ пуя, тай савэ на хавдярдэ колиндэса!» 30Дэчи о мануша кан пхэнэн э горадэнги: «Пэрэн опэр амэндэ!» тай э бугоренги: «Учярэн амэн!»
31Вай э тэрнэ тай зэлэнэ тэрэкеса тэ керэн асавко, ами дэчи со кан овэл э шукеса?
О Исус опэр хачи
32Э Исусеса гелэнас тэ мударэн до прахарен. 33Кана он алэ ко тхан, кай бучёлас Черэпи, отхэ мардэ опэр хачи ли Лэс, ли э прахарен, э екхес ки екх риг, аврэс ки авэр риг Лэстар.
34О Исус пхэнэлас:
— Дадэ, апувикер лэн, вай он на джянэн, со керэн.
О салдатя читэ жреби тай паляштылар машкарэ пэстэ о савутя э Исусески.
35О дюняс сас тэрдо кай дикхен. О барэ мануша асанас Лэстар:
— Кутардиелас аврэн! Мэ кутардиел акана Ов Пэс, тэ си Ов э Дэвлэса тхэдо о Христос!
36Ли о салдатя асанас катар Исус. Он дэнас Лэс шутло винас 37тай пхэнэнас:
— Кутардие Тут, Ту тэ сан о Патишаи э иудеенго!
38Ай опэр Исус сас яздимэ: «Адава о патишаи э иудеенго».
39О екх андар мардо опэр хачи о прахари кушэлас Лэс, пхэнэлас:
— Та со, Ту на сан о Христос? Кутардие Тут тай амэн!
40Авэр тэрдярэлас лэс тай пхэнэлас:
— Ту катар Дэл на трашас? Вай ли туки кердэ цындос тэ овэс опэр хачи. 41Амэ мардэ андар амарэ дилэндэ, диндилям андар джюнгалимастэ, саво кердям. Ай Адава Мануш на кердяс ништо джюнгало.
42Тай ов пхэнляс:
— Исус, ма бристэр ман, кана кан авэс андэ Тэ Патишайлыкестэ!
43— Пхэнав туки чячипэ: авдес ту кан овэс Манца андэ раи, — пхэнляс лэски о Исус.
О Исус мэрэл опэр хачи
44Сас десе паш ко дэшудуй сагатя, тай опэр алаи ки пху уло тэмина джи ко трин сагатя, 45вай о кхам тэминисаило. Э штора#23.45 Э штора андэ храми сас машкарэ ко Шужо Тхан тай ко Май Шужо Тхан, катэ о Дэл зборизэлас э попазенца. андэ храми пхаравдили ко машкар. 46О Исус лачес диняс бэбэря:
— Дадэ, андэ Тэ вастэндэ дав Мо духос!
Ов пхэнляс адава, диняс По тынышы тай муло. 47Кана о баро, саво сас опэр шэлэндэ, алаи адава дикхляс, ов махтады э Дэвлэс тай пхэнляс:
— Адава Мануш чячес сас чячё!
48Тай алаи о дюняс, кай кидиняспэс тэ дикхел о мэрипэ, дикхляс, со уло, гело кхерэ тай марэлас пэс андэ колин. 49Тай алаи, кон джянэлас э Исусес, ли о джювля, савэ джянас пал Лэстэ андар Галилея, тэрдэ дурал тай алаи дикхенас.
О парома э Исусеско
50Отхэ сас лачё тай чячё мануш, савэско нав Иосиф. Ов сас екх андар синедриони, 51ай ов на дэхэлас одова, со он пхэнэнас тай керэнас. О Иосиф сас андар Аримафея андэ Иудея тай ишандиелас э Дэвлэско Патишайлыки. 52Адава мануш гело ко Пилат тай мангляс о тэни э Исусеско. 53Ов лиляс о тэни опрал хачи, пакярдяс лэс андэ лёнески басмадэс тай тхэдяс андэ склепи, кердо андэ горас, катэ дага никхас ангал атхэ на пароскердэ. 54Адава сас о дес э гортяримаско ки суббота, саво авэлас. 55Пал ко Иосиф гелэ джювля, савэ алэ э Исусеса андар Галилея. Он дикхлэ о склепи тай одова, кай о тэни э Исусеско сас тхэдо андэ. 56Он алэ палэ, гортярдэ духыдэс тай олия, кай кхандэл шукар. Субботако он сас андэ рагати, сар пхэнэл о Тхэдипэ.
Tans Gekies:
Лука 23: КРБ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2021 Bible Translators of Ukraine
© 2021 Pioneer Bible Translators
This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/
