Mateo 8
8
Anyɛ Nɛ Bunyadzɛdzã
1Gɛ Yesu ede Butu nɛa bha aba, banɔɛza za yɛe de. 2Anyɛ teli gɛ anya bunyadzɛdzã ebe dzu ekuisie si akɔ yɛ asɛ, “Apalete, onu gɛ ɔbɔ dɛmɛ, tɛ oplu mɛ shu.”
3Yesu ebu yɛ ɔhwɛ klɛ ehunɔ anyɛ. Klɛ aɖɔ asɛ, “Ɛdɛmɛ. Kɔ wɔshu bhui!” Ko klɛ anyɛ nɛ bunya dzɛdzã nɛ beke kɔ yɛ. 4Klɛ Yesu etsre yɛ asɛ, “Di kɛlɛ ɔkɔ sɛ odi tsre anɔnyanɔ. Pɔ vɛ, tɛ ɔdɔ yɛkɔ wɔ ishu nɛ ɔkasɛ kpayanɔ tɛ ɔbhɛtɛ kɛdɔ kukɔ ansɛ gɛ Mosesɛ aɖɔ, tɛ kidzi kibuimɔɖɔ kɔ banɔ.”
Keyutugbani Aka Teli Tɛyɛyɛkɛŋa
5Kibe lɛ gɛ Yesu etsoku Kapenaum nɛɛ, keyutugbani teli atɔnɛ yɛ aba ebe bisi tɛpɛplɛnɔ. 6Asɛ, “Apalete, mɛ axwɛdɛ teli awɔlɛdɔ klɛ agba eli mɛ bupa nɛm klɛ akpasɛ butɔm gɛganɛɛ.”
7Yesu etsre yɛ asɛ, “Ɛba vɛ tɛ ɛda beke yɛ bunya.”
8Keyutugbani nɛ ebu kɛlɛ nu asɛ, “Apalete, ɛdɛ dzyenɔ sɛ tɛ ɔba mɛ ovutɔe si. Pɔ ɖɔ kibui nɛ ko, tɛ mɛ axwɛdɛ nɛ bunya nɛ bubeke. 9Alasɛ mɛnahwɛ inu anɔ gɛ ɛkpasɛ ɔshãe si, gɛ keyutugbani ba lɛ mɛe si. Itsre anɔ sɛ ‘Vɛ,’ ko aavɛ, ‘Ba,’ ko anɔ aaba. Itsre mɛ axwɛdɛ sɛ, ‘Bhɛtɛ kɛdɔɛ’ nɛ ko, klɛ aabhɛtɛ kɛ lɛ.”
10Gɛ Yesu enu ebuia nɛ, le yinɔ yɛ klɛ aɖɔ etsre bagɛ ba lɛ yɛede nɛ asɛ, “Itsre wɔnɔ kɛgba sɛ, ɛka mɔ anyɛnyanyɛ ana di nɛ Izraɛl gɛ tɛyɛyɛkɛŋa gbɛgbla nɛɛ di lɛ yɛ ahwɛ. 11Itsre nɔ sɛ banɔ gelee ebe de owuwu anɛ ozhizhi, klɛ la ba za balɛ ɛzakɔ nɛ kɛdɔŋakɔ nɛ Abraham, Isakɛ anɛ Yakɔb nɛ owũsisɛ bukusi nɛ mɛ. 12Pɔ ba ba yɛkɔ bagɛ ba kpasɛ bukusiɔŋakɔ nɛesi nɛ atɛa kpɛ ɔtɔ, nɛ otumu mɛ, nɛ ɔkɛlɛ gɛ iyuyo nɛ eletɛtã aba za.”
13Klɛ Yesu etsre keyutugbani aka nɛ asɛ, “Vɛ! Kɛ ba bhɛtɛ ansɛ gɛ ɔyɛkɛ klɛa bha ŋa.” Klɛ yɛ axwɛdɛ nɛ bunya nɛ bu beke nɛ ɔɖa ɔɔlɛlɛ nɛm.
Yesu Ebeke Banɔ Gelee Banya
14Gɛ Yesu ebe ku Petro bupa nɛ mɛ, amɔ Petro yandze nɛ gɛ elie si nɛ buwuiunya. 15Yesu ehunɔ yɛ ɔhwɛ nɛ ko klɛ buwui nɛ beke, klɛ evua lɔ klɛ akpa yɛa bha di.
16Gɛ owulago ɔna, ba yɛkɔ banɔ gelee gɛ ɛfufɔɛkpã za balɛa bha nɛ amɛna Yesu, klɛ akɛka ɛfufɔɛ nɛ ebu nɛ kibui tirikpo ko tɛɖuɖɔ klɛ ebeke banɔ nɛ petee banya. 17Kibui kɛ ba kɛlɛ mɛ sɛ tɛ ba yɛkɔ amɔ kɛgɛ baɖɔ aganɔ atɔnu Yezaya bha sɛ:
“Ayɛkɔ bulɔ maza mazamɔ
klɛ etuku bulɔ banya.”
Yesu Kedezɛza Kedziŋɛŋa
18Gɛ Yesu amɔ banɔɛza nɛ yɛ ɔbha, akɔ sɛ ba tsɔkɛ kɛvɔ nɛ avɛ ogbigbe bhla nɛa bha. 19Klɛ ɛshãdɔkasɛ teli aba ebe tsre yɛ asɛ, “Adɔkasɛ, ɛba za wɔe de vɛ ɔkɔnyɔkɔ gɛ ɔɔvɛ.”
20Yesu ebu lɛ nu sɛ, “Ayakpamkudzɔgɛ nɛ mɔ ɛlɛ okukɔ klɛ kɛlɛɛm buzhuɔɛ nɛ tsyɛ mɔ bulɛ evu, pɔ Anɔdzyrame yɛ Eyi nɛ aka mɔ ɔkɛlɛ gɛ ebe lu yɛ tɔkpu.”
21Adɔkpasɛ teli tsyɛ etsre yɛ asɛ, “Apalete, putɔnɔ kɔ mɛ vɛ tɛ ɛda vubɔ maka.”
22Pɔ Yesu etsre yɛ asɛ, “Za mɛe de, tɛ ɔkɔ betsitsi nɛ ba vubɔ balɛ anɔtsitsi.”
Yesu Adzrɔ Kɛlɛgɛganɛ
23Klɛ etsoku opupu nɛ mɛ klɛ yɛ badɔkpasɛ nɛ ba tɔnɔ yɛe de. 24Nɛ mati mati mɛ kɛlɛgbla tili ba kpaa fu gɛganɛɛ nɛ kɛvɔ nɛa bha, gɛ akɔsɛ kɛlɛ nɛ buni nɛ wu ga opupu nɛa bha. Pɔ Yesu yɛ eli azaa dɔ tra. 25Badɔkpasɛ nɛ ba vɛ ada nyɛmɛ yɛ, klɛ la ɖɔ asɛ, “Apalete, bu lɔ! Bu baa dɔe ni!”
26Klɛ etsre alɛ sɛ, “wɔnɔ tɛyɛyɛkɛŋa bhli elete, kide so pɛ noo si kifu ana?” Klɛ evualɔ klɛ akpɛ ɔshã kɔ kɛlɛɛ anɛ buni, klɛ ɔkɔnyɔkɔ dɔ sɛ̃ɛ.
27Kibui nɛ bhɛtɛ banɔ nɛ bi klɛ be bisi asɛ, “Anyɛ ɖuweɖui di naa? Gɛ kɛlɛ anɛ buni tsyɛ ta yɛ batɔ!”
Ɛfufɔɛkpã Banyɛ Tɛabha Banya Tɛbibeke
28Gɛɛ ede ku kedea pɛ nɛ Gadarenisɛ kɛdɔ nɛ mɛ, ɛfufɔɛkpã banyɛ tiabha teli be koeyi denɔ idzre nɛ shi aba tsyanɛ yɛ. Baa nyagba nɛ anɔ nɛ ɔkɛlɛ gɛ kɛkɔ sɛ anɔnyanɔ ataa naa fla nɛ ɔkɛlɛ. 29Ɛfufɔɛkpã elete nɛ ba kpɛ ogugu asɛ, “Kidee wɔ ɔɔpɛ denɔ bulɔ kɔ, Kpaya yɛ Eyi?” “Ɔba ɔkɛ̃ sɛ tɛ ɔbɔ nyama bulɔ flogo tɛ bulɔ ɔɖa nɛ mɛ ɔbɔ na dza?”
30Nɛ balɛ ɔbha nɛɛ be, bahɛha tili dzi zɛ ŋa kɛdɔ. 31Ɛfufɔɛkpã nɛ kɔ Yesu kɛtɔkpu sɛ, “Onu gɛ ɔbɔ kɛka lɔ obu, klɛ tɛ ɔyɛkɔ lɔ ɔkpɛ bahɛ nɛ gɛ beli ɔkɛlɛ nɛ mɛ.”
32Etsre alɛ asɛ, “Nɔ vɛ!” Klɛ lɛ koeyi da tsoku bahɛ nɛ mɛ, klɛ bahɛha nɛ petee si da dɔ ku kɛvɔ nɛ mɛ klɛ be tsi eku buni nɛ mɛ. 33Bagɛ balɛ agbanɛ bahɛha nɛ si ashɛ̃ avɛ ɔma nɛ mɛ ada ɖɔ kana gɛ ebui nɛ aba za kɔ ɛfufɔɛkpã elete. 34Klɛ ɔma mɛ banɔ nɛ petee koeyi avɛ sɛ tɛ ba da tsyanɛ Yesu. Klɛ gɛɛ ba mɔ yɛ, ba kɔ yɛ tɔkpu asɛ ashɛ̃ nɛ balɛ bee.
Tans Gekies:
Mateo 8: tcd
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© Ghana Institute of Linguistics, Literacy and Bible Translation
