Yohana 6
6
1Hanuma na genaya Yesu wajaga ku mwambu yingi ya nyanza ya Galilaya, nyanza ya Tiberia. 2Alisi mbuto nhanya ya vanhu yamulondaga, kunguno vayivonaga migaka hoyene wavitilaga vasatu. 3Na Yesu walinaga ku lugulu na wikalaga kwenuko na vahemba vakwe. 4Alisi Pasaka, sikukulu ya Vayahudi, yavagi bihi. 5Aho Yesu wasanukaga wavonaga ati mbuto nhanya ya vanhu yiliza kuwakwe, wamuwilaga Filipo, 6Tugule kuhe mikate, kigele venava valye? Alisi wayombaga yeniyi kunguno ya kumugema, kwisi mwenekili wamanikaja cheniki wakovaga kwita. 7Filipo wamwitavukaga, Mikate ya denari magana avili kukwila ngʼo kuwavo kigele kila umo apiwe tudotudo. 8Umo wa vahemba vakwe, Andrea, muduguye wamwa 9Simoni Petro, wamuwilaga, Henaha aliho muyanda homwene ali na mikate itano ya vusiga na masomba avili, alisi genaya ki ku venava vingi? 10Yesu wayombaga, Muvikazye vanhu hasi. Na maswa mingi gavagiko kwenuko. Na vagosya vikalaga hasi, luvalo lwavo lwavagi kitisi fihumbi fitano. 11Haho Yesu wayisolaga mikate, walumbilaga na wavagavulilaga avo vikalile hasi, na sisyo savasava ku masomba kitisi vakovaga. 12Alisi aho vigutaga wavawilaga vahemba vakwe, Musolelage matonge gasigalile, kwigela ngʼo kinhu kimo kizimile. 13Haho vagasolelaga na vagokazaja matala ikumi na avili ga matonge ku mikate izyo itano zya vusiga, hogene gasigalaga ku venavo valyaga.
14Aho vanhu vaguvonaga mugaka hogwene witaga, vayombaga, Mwenuyu ali loleyene mufumbuzi homwene akwiza mu liwelelo. 15Na aho Yesu wamanikaja ati vakovaga kwiza kumudima kigele vamutemye, wajaga hangi inene ku lugulu.
16Na aho limi lyalokaga vahemba vatelemukaga ku nyanza, vingilaga mu wato na vambukaga ku Kapernaumu. 17Na hilavulaga na Yesu wavagi atali 18kufika kuwavo; na nyanza yatinginivagwa, kwisi muyaga muhanya gwapepelaga. 19Na aho vamalaga kuvuga stadio makumi avili nʼitano ninga makumi adatu, vamuvonaga Yesu alisimiza ku nyanza, na aliwegela wato; 20na vogohaga. Alisi uyu alivawila, Ndi nene, 21mukogohe ngʼo! Haho vakovaga kumwanukula mu wato, na itungo lili wato wafikaga ku nguka uko vajile.
22Hawangaluke mbuto ya vanhu, hovene vimaga ku mwambu ya nyanza, vavonaga ati haduhu wato vungi sumbwa wenuvo duhu, na vawine ati Yesu akingilile hamohene na vahemba vakwe mu wato, sumbwa vahemba vakwe vinene vavukaga. 23Alisi mawato gangi gafikaga kufuma Tiberia bihi na henaho valyaga mikate aho Yesu walumbilaga. 24Na aho mbuto ya vanhu vavonaga ati Yesu ali haduhu, ninga ngʼo vahemba vakwe, vingilaga mu mawato na vafikaga ku Kapernaumu valimukova Yesu. 25Na aho vamuvonaga ku mwambu ya nyanza vamuwilaga, Rabi, veve wafikaga henaha nanali? 26Yesu wavitavukaga, uhaya, Yalole, yalole ndimuwila inwe, mukankovile kunguno mwaguvonaga mugaka, sumbwa kunguno mwalyaga mikate na mwigutaga. 27Mukagangadike ngʼo kunguno ya chakulya hochene kilizimanguka, sumbwa chakulya hochene kilidila kusika ku vuzuvuku wa hanahana, hochene Mwana wa Munhu alimupa inwe, kwisi Vava, Mulungu, watulaga lumanyilo kwigulya na mwenuyu. 28Haho vamuwilaga, Tuvezyeki 29kigele tuyitumame milimo ya Mulungu? Yesu witavukaga, uvawila, Gwenugu guli mulimo gwa Mulungu 30ati, mumusanizye mwenuyo wamutumizaja. Haho vamuwilaga, Ulivezya mugaka ki kigele tuvone na 31tukusanizye? Ulivezya mulimo ki? Vahenga viswe valyaga mana mwibalangu kitisi yatonilwe, Wavapile ava kulya mukate kufuma kwilunde. 32Na Yesu wavawilaga, Yalole, yalole ndimuwila inwe ati, akavile Mose homwene wamupaga inwe mukate kufuma kwilunde, sumbwa Vava wane alimupa inwe mukate gwa lole kufuma kwilunde. 33Kwisi mukate gwa Mulungu guli gwenugo gulifuma kwilunde na gulilipa liwelelo vuzuvuku. 34Haho vamuwilaga, Guku, utupage hanahana mukate gwenugu. 35Yesu wavawilaga, Nene ndi mukate gwa vuzuvuku, homwene alizaho hawane kutama ngʼo nzala, na homwene alinsanizya kukolwa ngʼo hangi nota. 36Alisi namuwilaga inwe ati mwambwine na mukansanizizye. 37Gose genaya Vava alimpa nene gakwiza kuwane, na homwene aliza kuwane nene 38kumupezya ngʼo na hado ngʼo. Kwisi nikile kufuma kwilunde, ngʼo kigele nakimazye kikowa chane, sumbwa cha mwenuyo wantumizaja. 39Na cheniki kili kikowa cha mwenuyo wantumizaja ati, mugati na fyose hofyene wampaga nakakizimizye ngʼo kinhu kimo, sumbwa nakihembuche ha lusiku lwa mhelo. 40Kwisi cheniki kili kikowa chamwa Vava ati, homwene alimuvona Mwana na alimusanizya ave na vuzuvuku wa hanahana, na nene nkumuhembucha ha lusiku lwa mhelo.
41Haho Vayahudi vamwingʼungʼulilaga kunguno wayombaga, Nene ndi mukate hogwene gwafumile kwilunde, na vayombaga, 42Mwenuyu akavile Yesu, mwana wamwa Yosefu, na tulivamanicha ise na nina? Lumehoki mwenuyu aliyomba, Nene nafumaga kwilunde? 43Yesu witavukaga, uvawila, Mukingʼungʼule ngʼo hamohene. 44Kuduhu umo alikovola kwiza kuwane ulu akadutilwe na Vava, nane nkumuhembucha ha lusiku lwa mhelo. 45Yatonilwe na vafumbuzi, Na vose vakuvi vahembekilwe na Mulungu. Homwene wigagwa kumwa Vava na wahembekagwa nawe aliza kuwane. 46Kuduhu umo wamuwine Vava sumbwa uyo wafumile kumwa 47Mulungu, mwenuyu, ahene, wamuwine Vava. Yalole, yalole ndimuwila inwe, Homwene alinsanizya ali na vuzuvuku wa hanahana. 48Nene ndi mukate muzuvuku, 49Vahenga vinwe valyaga mana mwibalangu, alisi vafwaga. 50Gwenugu guli mukate hogwene gulika kufuma kwilunde, kigele munhu agulye aleke kufwa. 51Nene ndi mukate muzuvuku hogwene gwikile kufuma kwilunde; munhu homwene aligulya mukate gwenugu akuzuvuka myaka de; na mukate hogwene nkugupana guli muvili gwane, hogwene nkugupana ku vuzuvuku wa liwelelo.
52Haho Vayahudi viyanilizaja muwavo, vuhaya, Lumehoki mwenuyu alikovola kutupa iswe muvili gwakwe 53tugulye? Yesu wavawilaga, Yalole, yalole ndimuwila inwe ati, ulu inwe mukavile kulya muvili gwa Mwana wa Munhu na kunwa magazi gakwe mukavile navo vuzuvuku mugati ninwe. 54Homwene alilya muvili gwane na kunwa magazi gane ali navo vuzuvuku wa hanahana, nane nkumuhembucha ha lusiku lwa mhelo. 55Kwisi muvili gwane guli kiliwa loleyene na magazi gane gali kinwiwa loleyene. 56Homwene alilya muvili gwane na kunwa magazi gane alidilamo muwane, nane muwakwe. 57Kitisi Vava muzuvuku wantumizaja, na nene ndizuvuka kunguno ya Vava, sisyo sisyene homwene alindya nene akuzuvuka kunguno yane. 58Gwenugu guli mukate hogwene gwikile kufuma kwilunde, ngoʼ kitisi ugo vahenga valyaga, alisi vafwile. 59Homwene alilya mukate gwenugu akuzuvuka myaka de. Genaya wayombaga mu sinagogo aho wahembekaga mu Kapernaumu.
60Haho vingi va vahemba hovene vayigagwa vayombaga, Muhayo ugu mulambu; nani alikovola kwigwa? 61Alisi aho Yesu wamanikaja muwakwe ati vahemba vakwe vagwingʼungʼulilaga muhayo gwenugu, wavawilaga, Muhayo ugu muligukilwa inwe? 62Haho kinahe ulu mukumuvona Mwana wa Munhu kulina kwenuko wavagiko hambele? 63Yili Roho hoyene yilileta vuzuvuku, muvili gukakovolile kinhu; mihayo hoyene namuwilile inwe yili Roho na vuzuvuku. 64Alisi valimo vamo mugati ninwe hovene vakavile kusanizya. Kwisi kufuma mbuki Yesu wavamanikaja venavo hovene vakasanizizye na mwenuyo akumugamba. 65Na wayo mbaga, Kunguno yeniyi namuwilaga inwe ati, kuduhu umo alikovola kwiza kuwane ulu yikapanilwe kuwakwe na Vava.
66Vukumbu na lusiku lwenulo vingi va vahemba vasyokaga numa, na vakasimizile hangi hamohene nawe. 67Haho Yesu wavawilaga ava ikumi na vavili, 68Imba ninwe vene mulikova kwingaho? Simoni Petro 69wamwitavukaga, Guku tuje kumwa nani? Veve uli nayo mihayo ya vuzuvuku wa hanahana, na iswe twasanizizye na twamanikizye ati veve uli Musondo wa Mulungu. 70Yesu wamwitavukaga, Kinahe, nkamusogolile inwe ikumi na vavili, na umo mugati ninwe ali 71Shetani? Alisi wamuyombaga Yudasi mwana Simoni Iskariote, kwisi homwenuyu alamugambe, nawe wavagi umo wa venava ikumi na vavili.
Tans Gekies:
Yohana 6: Nym51
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Nyamwezi New Testament © Bible Society of Tanzania, 1951.
