Yohana 11
11
1Wavagiho umo mulwile, Lazaro muna Betania, mwenumo vikalage Maria na Marta mukuluye. 2Alisi Maria wavagi uyo homwene wamuvilaga Guku na maguta na wagapyagulilizaja magulu gakwe na nzwili zyakwe; 3ilumbuye Lazaro walwalaga muno. Valumbuye vatumizaja kuwakwe, vuhaya, Guku, mwenuyo ulimutogwa ali mulwile. 4Aho Yesu wayigagwa, uhaya, Vulwile wenuvu vukavile wa lufu sumbwa ha lukumo lwa Mulungu, kigele Mwana wa Mulungu akumukiwe navo. 5Alisi Yesu wamutogagwa Marta na muzunaye na Lazaro. 6Aho wigagwa ati ali mulwile, wadilaga nsiku ivili henaho wavagiho. 7Hanuma na genaya alivawila vahemba vakwe, Tuje hangi ku Uyahudi. 8Vahemba valimuwila, Rabi, itungo lili Vayahudi vakovaga kukutulagula mawe, naʼho ulikova kujako hangi? 9Yesu witavukaga, Kinahe, lusiku lukavile na saa ikumi nʼivili? Ulu umo alisimiza halimi uyu kukumpa 10ngʼo, kunguno aliluvona lumole lwa liwelelo, alisi ulu umo alisimiza ha vuziku ukumpa, kunguno lumole luli muduhu muwakwe. 11Genaya wayombaga na haho alivawila, Lazaro, munwani wiswe, wakindagwa na tulo; 12alisi ndija kukamumisya. Kunguno yeniyi vahemba vamuwilaga, Guku, ulu alilala tulo akupila. 13Alisi Yesu wayombaga kunguno ya lufu lwakwe, navo viganikaga ati aliyomba kunguno ya kulala tulo. 14Haho Yesu wavawilaga vuliko, 15Lazaro wafwaga. Na ndideha kunguno yinwe ati navagi nkavile kwenuko, 16kigele inwe musanizye; alisi tuje kuwakwe. Haho Toma, homwene alitanwa Mavasa, wavawilaga vahemba viye, Niswe vene tuje, kigele tufwe hamohene nawe.
17Aho Yesu wafikagako wamusangaga adilile nsiku inne mu kivimbi. 18Na Betania yavagi bihi na Yerusalema, katanalo ka stadio ikumi nʼitano. 19Na vingi va Vayahudi vizile kumwa Marta na Maria, kigele vavahuliche kunguno yamwa ilumbu lyavo. 20Aho Marta wigagwa ati Yesu izile wajaga kumusanganila, alisi Maria wikalaga mu numba. 21Na Marta wamuwilaga Yesu, Guku, ulu mbe veve wavagiho henaha mbe ilumbu lyane akafwile. 22Alisi ninga lelo ndimanicha ati gose genayo ukumulomba Mulungu, Mulungu akukupa veve. 23Yesu wamuwilaga, Ilumbuyo akuhembuka. 24Marta wamuwilaga, Ndimanicha ati akuhembuka mu vuhembuke wa lusiku lwa mhelo. 25Yesu wamuwilaga, Nene ndi vuhembuke na vuzuvuku, homwene alinsanizya nene, mwenuyu akuzuvuka nulu 26wafwa, na homwene alizuvuka na alinsanizya nene, mwenuyu kufwa ngʼo kusika hanahana. 27Veve uliyisanizya yeniyi? Nawe alimuwila, Ahene Guku, nene nasanizizye ati veve uli Kristo, Mwana wa Mulungu, homwene alizaho mu liwelelo. 28Aho wamalaga kuyomba genaya wajaga na wamwitanaga Maria muzunaye 29kumhelo, uhaya, Muhembeki aliho na alikwitana. Aho mwenuyu wayigagwa, wavukaga wanguwangu na wajaga kuwakwe, 30kwisi Yesu wavagi atali kufika mu kaya, sumbwa wavagi atali aliho henaho Marta wamusangaga. 31Aho Vayahudi, hovene vavagiho hamohene nawe mu numba valimuhulicha, vamuvonaga Maria kitisi alivuka wanguwangu na alifuma, vamulondaga, kwisi viganikaga ati alija ku kivimbi kigele akalilile kwenuko. 32Haho Maria, aho wafikaga henaho Yesu wavagiho, wamuvonaga na wagwaga ha magulu gakwe na wayombaga, Guku, ulu mbe veve wavagiho henaha mbe ilumbu lyane akafwile. 33Aho Yesu wamuvonaga alilila na Vayahudi hovene vizaga nawe valilila, wasambaga mu moyo na witinginaja, uhaya, Mwamulalikizaja kuhe? 34Vamuwilaga, Guku, nzugu, uvone! Yesu walilaga. 35Haho Vayahudi vayombaga, Lolagi 36isi wavagi amutogilwe! Alisi vamo mugati navo 37vayombaga, Kinahe, mwenuyu homwene wagatunuzaja minso ga muhofu wavagi akakovolile kuvezya uyu 38aleke kufwa? Haho Yesu wasambaga hangi mu moyo na alifika ha kivimbi, nacho chavagi ipilinga na iwe lyakindikilwe ha muzigo gwalyo. 39Yesu wayombaga, Mulingaje iwe! Marta, ilumbuye lya mufu, wamuwilaga, Guku, wavukizaja kunungʼha, kwisi nsiku inne zyavitile. 40Yesu wamuwilaga, Kinahe, nkakuwilile ati ulu wasanizya ukuluvona lukumo lwa Mulungu? Haho valingaja iwe. 41Alisi Yesu walangamila, uhaya, Vava, ndikulumbila veve kunguno veve wanigagwa nene. 42Na namanikaja ati ulinigwa hanahana, alisi kunguno ya mbuto ya vanhu hovene vimile henaha ndiyomba, kigele vasanizye ati veve wantumizaja nene. 43Na aho wayombaga genaya, wahamukaga na muzwi 44muhanya, Lazaro, fumaga! Na mufu wafumaga atungilwe mu sanda ha magulu na ha makono na mikwato na vusu wakwe vutungilwe na kitambala. Na Yesu wavawilaga, Mumutungule na mumuleke asimize!
45Vingi va Vayahudi hovene vizaga kumwa Maria na 46vavonaga genaya wavezaja, vamusanizaja. Alisi vamo mugati navo vajaga ku Vafarisayo na vavawilaga genaya Yesu wavezaja.
47Haho vahozya vahanya na Vafarisayo vavezaja ivanza na vayombaga, Twiteki, kwisi munhu mwenuyu 48alivezya migaka mingi? Ulu tulimuleka sisyo vose vakumusanizya, na Varoma vakwiza na vakutupuzya chalo kiswe na vanhu viswe. 49Alisi mbati mugati navo, Kayafa, homwene wavagi muhozya muhanya 50mwaka gwenugo, wavawilaga, Inwe mukamanikizye kinhu kimo ninga mukiganikile ati yilimuvelela inwe munhu umo avafwile vanhu vose kukila va chalo chose vazimile. 51Alisi yeniyi akayombile kufuma kuwakwe mwenekili, sumbwa kunguno wavagi muhozya muhanya mwaka gwenugo, na wafumbulaga ati Yesu alavafwile va chalo icho, 52alisi ngʼo va chalo icho duhu, sumbwa kigele avakuminge hamohene vana va Mulungu hovene vasambalile. 53Vukumbu na lusiku lwenulo valomaga ndaka ya kumuvulaga.
54Kunguno yeniyi akasimizile hangi hape mugati na Vayahudi, sumbwa wakufumaga kwenuko na wajaga ku chalo bihi nʼibalangu, ku kaya iyo yitanilwe Efraimu, na kwenuko wikalaga hamohene na vahemba vakwe. 55Alisi Pasaka ya Vayahudi yavagi bihi, na vingi va muchalo valinaga hambele na Pasaka ku Yerusalema, kigele visondohye. 56Haho vamukovaga Yesu na vayombaga hamohene aho vimaga mwisengelo, Muliganikaki, mwenuyu akuleka kwiza ha sikukulu yeniyi? 57Alisi vahozya vahanya na Vafarisayo vamalaga kugufumya mukumo ati, ulu umo alimanicha uko aliko apozye, kigele vamudime.
Tans Gekies:
Yohana 11: Nym51
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Nyamwezi New Testament © Bible Society of Tanzania, 1951.
