Apocalipsis 4
4
Mlu yiba lo Juan
1Ngulo myun re kwaane lo na, mwii na naz yiba nu mlu tub pwert kwaan nzexal lo na; nu leeka bos kwaan mbin na yilo, kwaan mbezh kwenta tub trompet, nguné lo na:
—Guxoob nee, zee luu na re kwaan gak gwluzh lo re kwaane.
2Nu gorzeetlaka lee Mbi Naban mbe na, nu myun Dios lo na, nzob naz pa nabeyy xaa. 3Nu lee Dios na mod tub ke kwaan le jaspe o kornalina kwaan nla xni naxne, nu lee pa nzob xaa, nzo tub bayiit kwaan nzaa xni naye mod na ke kwaan le esmeralda. 4Nu xkwes xaa myun lo na stub pa nzob galbtap xaa gol, xaa nabeyy. Xaa nak duzna ler rus nu nzob koron or yek xaa. 5Lee pa nzob Xaa Nabeyy, nroo balngwzi nu nzhech balngwzi. Nu paro nzob Xaa Nabeyy, nkee gazh bruj kwaan nzaa xni, kwaan nak gazh mbi naban cheen Dios. 6Nu noka paro nzob Xaa Nabeyy, nzho tub nistoo kwaan nlu kwenta bidr.
Lee xsaww paro nzob Xaa Nabeyy, nu naz xkwes xaa nzo tap xaa mban, xaa kwaan nzob zaalo dubse cho, naz delant nu naz tich. 7Lee tub xaa nzhak kwenta tub mbezh, lee stub xaa nzhak kwenta tub la ngoon, lee stub xaa nzhak kwenta tub myet, lee stub xaa nzhak kwenta tub msi ma nzhazebi. 8Nu kad tub xaa ne nzob xop xiil, nu dubse cho xaa nzob zaalo xaa. Nu zhe nu yaal nanyizhat xaa mbezh xaa:
¡Nali, nali, nali nak Xaa Nabeyy,
Dios, xaa non lo rese xaa nu lo rese kwaan,
xaa ngok, nu xaa nak, nu xaa bare yaad!
9Nu gorna lee dap xaa ne nzholl lo xaa nzob pa nzob Xaa Nabeyy, nu nii xaa non doo nak xaa nu nzaa dixkix xaa lo xaa, xaa kwaan tira mban, 10zee lee galbtap xaa gol nkichyek axta lo yo lo Xaa Nabeyy, zee nzholl xaa lo xaa, nu nzaa xaa xkoron xaa lo Xaa Nabeyy. Nu mbezh re xaa:
11Dios, lu nak Xaa Nabeyy nu.
Non doo lu, nu lu nzhaal kayaa re kwaan chul,
zee nzhaal wii re xaa respet lo lu, nu tira nabeyy lu,
nel lu mdexkwaa rese kwaan;
nu mod nzhekla lu mri reya nu ngoka.
Tans Gekies:
Apocalipsis 4: zpo
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2002, Wycliffe Bible Translators, Inc. All rights reserved.
