Lukas 23
23
At Yesus e’gik herle wusogo ap ’gain Pilatus wogosu wegesa wene
(Matius 27:1-2,11-14; Markus 15:1-5; Yohanes 18:28-38)
1Wene asogo egesarik, aphwami welegesa a’ge ebano enebe ’berlegat inegesarik e, Yesus ano Pilatus e’bek woluk wegesa. 2Wegesarik wene ebam pogulat e, disogo mo’gulegisa,
“Ap yu en aphwami nis a’ge lalenebiselat, uang pemerintah a’ge paget ap ’gain Kaisar ano wogorogup no yo, eselat,
Honue ’gain Nonuk Logo a’ge Kristus ano anat o, eselat, oluk nis nenilem ese laga ai en woluk wege o,” oluk mo’gulegisa. 3Asogo mo’gulegisema, at Pilatus en Yesus ebam hin wokhasulat e, disogo mo’gulesi,
“Ap Yahudi a’ge onue ’gain onuk logo a’ge ano harat de egesa ya?” oluk mo’gulesimu, at Yesus en e,
“Hat e’gen aiat o,” oluk mo’gulesimu, 4at Pilatus en e, ap Allah eiye a’ge onuelak ’gaindek emin, aphwami a’bik odoktak welegesa a’ge ebano emin, mo’gulentasulat e,
“An en, at yu emdema wegi a’ge re, at wiak mesik tegeimu modok ho erlak o,” oluk mo’gulentesimu, 5is ebano pobuk eniak modok ning-nangsogo disogo mo’gulegisa,
“Erlak o. Ap yu wene mo’gulentil denagalat e, aphwami o Yudea a’ge o di owi yu owi ’berlegat enede ’gagalil noso yo. Naduk naduk o Galilea eba en enede ’gagal ’gagal e, o yema waga o,” oluk mo’gulegisa.
At Yesus Herodes e’bek woluk wegesa wene
6Asogo mo’gulegisema, at ’gain Pilatus ano esa’go hwelegeitik e,
“Ap yu o Galilea a’ge a? oluk, aphwami ebano mo’gulentesimu, 7is en e,
“Ap ai, o at ’gain Herodes en tenentarok welagoma ebano a’ge o,” oluk mo’gulegisema esa’go hwelegeitik e, ai erlige, at ap ’gain Herodes ebe o Yerusalem eba ’boluk oruakma no oluk e, e’bek perakpou waga ai o. 8Perakpou wagama re, at Herodes ano Yesus taga laga a’ge nadugat esa’go hwelegeitik, ogola en e,
“Ebe nil hele e. Elalinat tagenebil denago ai, mesik tagoma an nil hele e,” oluk opoluk oruakma no oluk e, at Yesus ebe e’bek woluk wegesema, il holuk ogola agai hesi. 9Ogola agai holuk, di wene yu wene a’bigat Yesus ebam hin wesi a’ge re, at en o’go mesik u erlakma en mo egei. 10O’go u erlakma en mo egeimu re, is ap Allah eiye a’ge onuelak ’gaindek emin, is ap Allah iak pelal wogo eiye a’ge emin, ebano horoksogo hopha ’gwigisarik e, eniak ning-nangsogo wene ebam pogu legesa. 11Pogumu re, at Herodes osi tentara a’ge emin en, Yesus ebe onogola en mi-miarak poluk, eniak esegen a’bik wokhogu legesarik e, sum poksogo ’gaindek ’buktak welagai a’ge mesik ’buktak poluk, togolik Pilatus e’bek perakpesi. 12Naduk e, at Herodes Pilatus e’birek weim ’belak ’gela’ge welegesa a’geat de, asogo perakpesi, ai erlige e’birek op egesa.
At Yesus ebe modok woruagoluk wene
ebam pegesa wene
(Matius 27:15-26; Markus 15:6-15; Yohanes 18:39–19:16)
13Ye, at Yesus woluk legesema re, at Pilatus en, is ap Allah eiye a’ge onuelak ’gaindek emin, is ap Yahudi a’ge ’gaindek ononuk oruak a’ge logon emin, onosi ’berlegat emin,
“Odoktu manis o,” oluk mo’gulentesimu wegesema re, 14wene disogo mo’gulentesi,
“Ap yu en aphwami lalenebil noso yu i o, oluk, an ne’bek woluk wegeptik wene ebam pegepma re, an en his henilemat wene edip ’balegis a’ge re, his en wene ebam pegep ’gela’ge re, hegi erlak o. 15Ye, at ’gain Herodes asogo mesik ho erlakma re, nis nene’bek yema perakpou waga ai o. Wiak togwiam wene enebam poluk en waronobogwi ai ’gela’ge, ap yu en asogo wiak mesik tegeimu hegi modok erlak o. 16Holuk, we, lagal’bisok ’go’bu nak wusogo herle hebelik o,” oluk mo’gulentesi. [ 17Asogo mo’gulentesi ai re, seni onuk Paskah ano a’ge no’gukhwe, at Pilatus en ap ene’gik herle werak a’ge mesigat holuk mesik hebilogo wogentasumu no oluk e, asogo mo’gulentesi ai o.] 18Asogo mo’gulentesi a’geat de, is ap ’berlek ebano en e, eniak lere-’gobo ogulat e,
“Ap Barabas ai nak e’gik herle hebilnontoluk e, ap ai re, werip o,” oluk mo’gulegisa. 19At Barabas ai naduk e, ap logon enemin, aphwami o kota lok ano a’ge homi pebisogo,
“Nonuelak ’gaindek pemerintah a’ge, nenebit,” oluk weim obogulat aphwami pema warenebise lagama e’gik herle wusogo pegesa a’ge oruakma asogo mo’gulegisa. 20Mo’gulegisema, at Pilatus ogola en e,
“Yesus ai e’gik herle hebilogo ukpaik,” asogo epasulat oluk e, iak pobuk lagaksogo mo’gulentesi a’geat de, 21is ogo eniak uarekmasogo ogulat e,
“E pam edikpoluk werip o! E pam edikpoluk werip o!” oluk mo’gulegisema, 22at Pilatus e’gik ’birenam mo’gulentesirik e, pobuk mesik emin mo’gulentasulat e,
“At yu no wiak tegeimu en no. Wiak togwiam waronobogwi ai ’gela’ge, an wene edip palegis a’ge, at yu en wiak mesik tegeimu hegi erlak o. Holuk e, ’go’bu nak woroguptik e, e’gik herle hebilogo ukpaik o,” oluk mo’gulentesi a’geat de, 23e pam edikpoluk woruagoluk eniak lere-’gobo ogulat ’gonu mo’gulegisema re, is eniak anni aga. 24Is eniak anni agama, at Pilatus en is en ’gonu egesa hegitsogoat wene daksogo egeitik, 25at Barabas en homi pebisogo weim ebiselat aphwami warenebise lagama e’gik herle wusogo pegesa a’ge ano,
“Herle hebilogo woknonto yo,” oluk egesa ano wogentasulat, ye, at Yesus ano nak e, is onogola epegesa a’ge hegitsogo tuagoluk osi ene’gikmu pasulat, tegei.
At Yesus e pam edikpoluk werigisa wene
(Matius 27:32-44; Markus 15:21-32; Yohanes 19:17-27)
26Asogo wogentesimu woluk wegesa ’gal e, ap onuk Simon, owi o Kirene a’ge mesik o wema en o kota lokma ’gwigoluk lasumu, ebe tenak pegesarik, e Yesus edikpoluk worua a’ge ano woluk e, Yesus e’berlik wemagoluk eniak ningsogoat mo’gulegisa. 27Yesus ebe woluk wagaihwe aphwami a’bik ene’berlik wagalat e, hwami pema at ebaget nge tugulat, enede ene’gik en dung til wegesa. 28Asogo til wagaimu, at Yesus orogole edenogo ’gwelagentesirik e, disogo mo’gulentesi,
“His hwami o Yerusalem a’ge yema re, an nebaget nge togup no yo. His e, henemalik enemin honu’gwarek henebaget nge tit o. 29Pobuk wiak ema a’ge oruak ani o. Ai erlige re, is aphwami en ogulat,
Hwami abeli a’ge, enemalik dagonobogwi erlak a’ge, enagamu no’gwi erlak a’ge, ai nak e, onogola enagai ho ’gela’ge o, ua o. 30#Hos. 10:8; Wah. 6:16Ai erlige re, aphwami en e,
Nenebe al ’besilnenebin o, oluk, dom lok a’ge mo’gulugulat,
Nenebe hisogo nenebemen, oluk dom wei a’ge mo’gulugulat, ua o.
31Ai ’gela’ge re, yogodak ya e ’get a’ge pam ’gela’ge welat taknobogwi yu re, pobuk e ’buk a’ge pam ’gela’ge lai lasulat, no’gosogo tul epegep,” oluk mo’gulentesi.
32Ye, at woluk wagalat e, is ap enebabut modok wiak togu legesa a’ge enebe ’biren enemin waronobuogoluk wogonoboluk wegesayat. 33Wogonoboluk e, dom a’gul onuk Ena’gul ’Belak duk pam wegesarik, at Yesus ebe e pam edikpogulat e, ap enebe ’biren enebabut modok wiak togu legesa a’ge mesik e’gik ’bekhit akhit, ye, mesik e’gik hware akhit, edigonoboluk emin warenebegisa. 34#Mzm. 22:18Asogo edigenebegesema welat e, at Yesus en Allah disogo mo’gulesi,
“Naik o! Is yu eneperlak welat taknobogwi yu re, wene enebam po erlakma en erlagapsogo ukpemen o,” oluk mo’gulesi. Ye, is aphwami ebano en e, asogo edigonoboluk,
“At Yesus osum no’gorlak ebano sa ’gela’ge eiye ema,” oluk e, helebe’gen hwikhai lagalat, hwikhau wagalat, tigisarik, helebe’gen enebam aga a’ge nak so’busogo hwerlegesa. 35#Mzm. 22:7Is aphwami ebano edik welat enil oruakhwe re, is ap Yahudi a’ge onuelak ’gaindek ebano ene’biang harlik hogulat, Yesus eniak esegen wokhogulat e, disogo egesa,
“At yu Allah en Kristus edikpoluk perakpou weik egei ano ebe arat holuk e, is aphwami pema elirat delenebise laga ano ’gela’ge, u’gwarek en asogo delhorlouwak e,” oluk egesa. 36-37#Mzm. 69:21Ye, is ap tentara a’ge ebano e’bek horoksogo wegesarik e, anggur e’gen a’bosu esik wiak a’ge hek-hek hogulat eniak esegen disogo yagegisa,
“Hat aphwami Yahudi a’ge onue ’gain honuk logo a’ge demat holuk e, hu’gwarek en delhwerlagunmu re,” oluk mo’gulegisa. 38Ye, is en e,
“APHWAMI YAHUDI A’GE ONUE ’GAIN ONUK LOGO A’GE EBE YUAT O,” oluk pelal wokho e Yesus wusogo edikpegesa a’ge ano pam dopnorak pegesa.
39At Yesus asogo wusogo edikpogulat, ap wiak togu legesa a’ge emin wusogo edigenebegesa a’ge eriano, at mesik en Yesus iak esegen yageselat e,
“Hat Kristus at epegi. Holuk e, hu’gwarek en delhwerlasulat, nis ogo delnenebiselat, togunmu re,” oluk mo’gulesi a’geat de, 40at are akhen ano en e, at wene yageselat e,
“Hat yu ogo re, at wusogo pegesa ’gela’geat nenemin hegit-hegit wusogo nenebegesema re, Allah hogorlok erlak a? 41Nis e, wiak togu legema nenebabut pam watnonobu hegitsogoat watnenebigisa a’geat de, at yu nak e, wiak mesik asogo tu erlak o,” oluk mo’gulesirik, 42pobuk, at Yesus disogo mo’gulesi,
“Nue o! Hat ’gain honuk logo a’ge weleigoluk wagalat, an nebam eberip o,” oluk mo’gulesimu, 43at Yesus en e, disogo mo’gulesi,
“O yogodak yayat ne’birek o opma eba lultik wolomul o, oluk demat mo’gulhegis o,” oluk mo’gulesi.
Yesus ebe waraga wene
(Matius 27:45-56; Markus 15:33-41; Yohanes 19:28-30)
44-45 #
Kel. 26:31-33
Asogo enebegesema welegesa, o erlige ede ’burl jam 12 hegit o hik egeimu re, mo yoru erlak oruakhwe o eba ’berlegat hwerli jam 3 o hiktak modok welaga. Jam 3 agama re, Allah owi werikmu sum kain a’ge o ogorli dit akhit o’gwe ’belak welaga a’ge ano ’burl heisogo ’baktil ’bu aga. 46#Mzm. 31:5Asogo tegeimu, at Yesus iak loksogo Allah mo’guleselat e,
“Naik o. An narogun hat en ’gegilogo he’gikmu wa’gun en, mo’gulhegis o,” oluk mo’gulesirik e, arat lebeksogo waraga. 47Asogo tegeimu ap tentara a’ge onue ’gain ano il holuk Allah erliktagalat e,
“Ap yu demat wiak tu erlakma hegi o,” oluk egei. 48Ye, is aphwami a’bik enil houwogoluk wegesa a’ge asogo tisokhwe enil holuk pobuk togolik onowi pam lagalat, enebe ’berlegat enede ene’gik en dung hogulat wetil-wetil legesa. 49#Luk. 8:2,3Ye, Yesus ebe enaluk a’ge ’berlegat, is hwami o Galilea en Yesus e’berlik ’bigisa a’ge emin, is logon emin, enebe walekma edik welat e, asogo tagokhwe enil pusogo yetharok welegesayat.
At Yesus ebe werak owikmu pei legesa wene
(Matius 27:57-61; Markus 15:42-47; Yohanes 19:38-42)
50-51Asogo tigisema re, ap mesik onuk Yusuf, owi aphwami Yahudi a’ge onowi kota mesik onuk Arimatea ai a’ge. Ogola en e,
“Allah en eragam nonobouwa ai re, metnerlige nonobouwa,” oluk yetharok welat, ebabut op welat hegitsogo taga laga a’ge, ebe Yahudi onuelak ’gaindek wene ’belo’guogoluk enemin odoktugu legesa a’ge. Asogo a’geat de, is arilak en, Yesus obok ’balogo werigisa ai, at en,
“I o, woruok,” oluk u erlak welagarik e, 52at Yesus ebe werak Pilatus e’bek ’gonu laga. 53’Gonu lagama, at Pilatus en e,
“I o, op o,” oluk mo’gulesimu, wagarik Yesus werak ano e pam en ’belakpou wagarik e, sum kain lenan a’ge pam e’girlogo re, owik aphwami werak a’ge onobogu lemagoluk helep owik ebale ’gerat hele’gigisarik e, werak owan onobogwi erlakma pei laga. 54Pei laga ai erlige, is aphwami Yahudi a’ge weiyat wolomtik se’ban uogoluk welat, di a’ge yu a’ge odoksogo pogumu hegitsogo hari Jumat pesi.
55Ye, is hwami o Galilea en Yesus e’berlik ’bigisa a’ge ebano Yusuf e’berlik wegesarik e,
“Yesus ebe werak owikmu ai asogo pesi,” oluk enil pobisogo hegesa. 56#Kel. 20:10; Ula. 5:14Enil holuk olema legesarik e, e di agane’gen yu agane’gen e’ben op a’ge emin, a’bosu e’ben op a’ge emin, Yesus werak ano ebetne egeli louwogoluk e, degelogo pegesa. Asogo pegesarik, is aphwami Yahudi a’ge Allah en enesa’go weregei hegitsogo agauwa sabit a’ge pam Allah paget weat welegesa.
Tans Gekies:
Lukas 23: Wul
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
