Lukas 11
11
At Yesus en, “Se’ban disogo ogulom o,”
oluk osi mo’gulentesi wene
(Matius 6:9-13; 7:7-11)
1Agauwa mesik pam, at Yesus o akhenma welat, se’ban ese laga. Se’ban arat egeimu re, at osi iak wogu legesa a’ge mesik en e, disogo mo’gulesi,
“Nue. At Yohanes en, at osi iak wogu legesa a’ge se’ban ogu lemagoluk mo’gulentasu laga ai ’gela’ge re, nis ogo asogoat se’ban ogu lemagoluk mesik mo’gulnentemen o,” oluk mo’gulesimu, 2at Yesus en e,
“His se’ban uogoluk holuk e, disogo ogu lomup o,
Nenaik o.
Hat hu’gwarek honuk logo pogu lemagoluk taknenebi suk o.
Nis nenebe hat heragam welemagoluk nenebi suk o.
3Nis nonso’boru nin hwedik nan hwedik no’gulom a’ge, elitsogo woknentasu lomup o.
4Is aphwami en nis wiagapnonobogwi a’ge enebe lo’bok nis en erlagapsogo ukpege ai en,
nis en wiak togu lege a’ge
2 hat en erlagapsogo ukpemen o.
Wiak tuagoluk nenede ’gagalu ago holuk, eba enat uknonobo pukmu en ’bekhirat woknonoboluk lasu lemen o,
oluk se’ban ogu lomup o,” oluk mo’gulentesi.
5-6Asogo mo’gulentesirik e, osi iak wogu legesa a’ge ebano disogo mo’gulentesi,
“Ap his a’ge mesik hup ede ’burl are e’bek loluk mo’guleselat e,
Nare o! An nare mesik walekma laigoluk en e, ne’bek til-til laiogoluk wagarik oruak a’ge re, so’boru wogoum a’ge erlak en, hat en so’boru roti worogo a’ge henagan holuk logon woknemin da, oluk, mo’gulosoam e, 7at are ano olema en iak lebikpasulat e,
An neiyagai enemin ’goduk lerakpoluk nogo arat egerikmu re, erlelnenebiso puk o. Nebit e. Nis nogogumu an nelaluk eiktik wokhoum e, mia o, oluk asogo mo’gulom epegep? 8Erlak o. At ai ogola en e,
Nare a’ge en de, ’gonu oso, oluk inom erlakma en mo u a’geat de, at en ’gonu eselat at e’gerli om erlakma en iak ningsogo mo’gulosolomma re, at inotluk e, at en ’gonu u a’ge hegitsogoat wogemayat epegi o. 9-10Ai ’gela’ge, an wene mesik mo’gulhentaik. Is aphwami enebe lo’bok en Allah ’gonu mo’gulogwiam e, at en enebe lo’bok wogentasu nak o. Ye, is logon enebe lo’bok en di a’ge yu a’ge at ebam horotogwiam enebe lo’bok e, hwiakhorlogwi nak o. Ye, is nin logon enebe lo’bok en ’goduk puk-puk hogwiam e, at en enebe lo’bok ’goduk hurentasu nagat o. Ai en e, his en Allah ’gonu mo’gulogu lomup o. Mo’gulummu re, wokhontouwayat o. Op a’ge at ebam horotogu lomup o. Horotugulomma re, hwiakhwerlagubat o. ’Goduk puk-puk hogu lomup o. Puk-puk hogulomma re, at en ’goduk huthontouwayat o. 11His pema heneiyagai en,
Hiane nele, ogwi holuk e, enaiklak en hianeat wogonto pukmu en ebalema ’gosu a’ge wogontogu legep no? 12Ye, at e,
Sue’gen nele, ogwi holuk e, erlelim ’gela’ge wogontogu legep no? Erlak o. 13His henebabut wiak togu legep a’geat de, enemalik ai op a’ge wogontogwi henalukmu re, op a’ge wogontogu legep aiat o. Ai ’gela’ge, henaik Allah ’bogorl pam a’ge mo’gulogulat,
Harogun ai woknentemen o, oluk, ’gonu mo’gulorogup holuk e, wokhontouwa erlak no? Wokhontouwayat o,” oluk mo’gulentesi.
“At Yesus ano Beelzebul ebam louktak oruakma til denago yo,” oluk egesa wene
(Matius 12:22-30; Markus 3:20-27)
14Agauwa mesik pam, at Yesus en ap mesik ogola mu’gat ebabut wiak a’ge ’gwegeimu iak modok erlak agarik welaga a’ge ap ano ogola en henokho lebikpesimu re, iak ’baksogo ese laga. Asogo egeimu aphwami a’bik ebano en e,
“Eige! Nogorlok e,” oluk erliktigisa. 15#Mat. 9:34; 10:25Asogo erliktigisa a’geat de, is nin pema en e, disogo egesa,
“At Yesus ai mu’gat enebabut wiak a’ge onue ’gain onuk Beelzebul ano anni pam mu’gat at osi ’gela’ge enebabut wiak a’ge aphwami onogola ’goluk oruakma henokho lebikpasu o,” oluk ogwiam, 16#Mat. 12:38; 16:1; Mrk. 8:11is nin pema en e, at Yesus ebabut ’baluogoluk, disogo mo’gulegisa,
“Hat hebe Allah en perakhobou wagama wegen holuk e, nis en pobirak hobul en, hat en elalin a’ge mesik togunmu re,” oluk mo’gulegisa. 17Asogo ogu legesema, at Yesus is onogola epegesa a’ge enak a’ge pobirak onoboluk e, disogo mo’gulentesi,
“’Gain ononuk logo a’ge onosi eneragam pegentarok welagai o’gwe lo’bok, is-is enemin me’gisogo hwerlirak poluk, enemin il ’belak welema holuk e, modok mia ema o. Ye, ap enebe lo’bok eneiyagai enemin hwerlirak poluk enemin il ’belak welema holuk e, asogo wiak emayat o. 18A’ge re, his en an mo’gulnogulat e,
Mu’gat enebabut wiak a’ge onue onuk Beelzebul ai hebam louktak oruakma re, at anni pam mu’gat ebabut wiak a’ge logon aphwami onogola ’goluk oruakma henokho lebikpasu legen, oluk mo’gulnogu legep ai, at Iblis ai u’gwarek osi enemin hwerlirak poluk enemin wiak elepma re, at osi tenentarok welago a’ge no’gosogo annirak wellep. Mia o. 19Ai ’gela’ge, an en mu’gat enebabut wiak a’ge onue onuk Beelzebul ai anni pam mu’gat enebabut wiak a’ge logon aphwami logon onogola ’goluk oruakma henokho lebikpasu legi holuk e, his honosilak en e, sa anni pam mu’gat henokho lebikpogwi epegep. Honosilak en asogo togwi ai pam, is en e,
Wene at Yesus paget egep ai re, dagansogo egep ai o, oluk wene henebam po ’gela’ge togwi. 20A’geat de, an en Allah anni ai pam mu’gat ebabut wiak a’ge ai henokho lebikpasu legi holuk e, Allah eragam onobouwa ai arat henebam horok lau waga o. 21Ap mesik anni a’bik a’ge en esegen emin, ua’gun emin, nemil-nomolsogo tenakho owi pam ’gagalak welema holuk e, a’ge di a’ge yu a’ge ’berlegat op degelak welema ani o. 22A’geat de, ap muon at anni ’gela’ge re, erlak. At e, anni modok a’bik a’ge ap ano owi pam ’gu lotluk, ap ano ebe anni erlik-erlak takpoluk, esegen ua’gun pam he’berik welema a’ge ebano deliselat e, a’ge di a’ge yu a’ge ebano modok wik-wok is muon so’busogo wogontouwa o.
23 #
Mrk. 9:40
Ye, ap sa en ebe an oruak o’gwe ano erlak holuk e, at ap ai an ne’birek hwerlirak a’geat o. Ye, ap sa en an ne’bek odogonobogu lege erlak a’ge holuk e, at ai enat ’bulogo lebigenebasu o,” oluk mo’gulentesi.
“Mu’gat ebabut wiak a’ge togolik wago ani o,” oluk mo’gulentesi wene
(Matius 12:43-45)
24Asogo mo’gulentesirik e, wene mesik disogo mo’gulentesi,
“Mu’gat ebabut wiak a’ge ai aphwami onogola en libagalat e,
An nowi ’geba ’gela’ge weleik en ’bok laik e, oluk, set hwalogo wolomma ebale heratil, lei asu ’belak o’gwe ik modok erlakma noso-noso re, hwiariso modok erlak welat e, disogo oso,
An nowi naduk welegimu ano togolik laiktik ’gwik o, oluk wago. 25Wagalat ’gwiso ’gal e, o ano ollong hosogo lebikpoluk modok degelakma hau wagalat e, 26pobuk togolik libotluk lasulat e, mu’gat logon at ebabut ’gela’ge puk. At e, enebabut modok wiak a’ge enebe sabiren eriano yo’go loluk wogonoboluk wagalat e, ap ai ogola ’goluk welagai o. Asogo ’goluk oruakma re, ap ai naduk e, ebabut op ’gela’ge welaga a’geat de, pobuk ebabut modok wiagat ago yo,” oluk mo’gulentesi.
“Sa ogola agai hasu,” oluk mo’gulentesi wene
27Wene asogo arat mo’gulentesimu re, is aphwami a’bik ebano a’ge, hwe mesik en iak loksogoat Yesus disogo mo’gulesi,
“Hat hia hebe dakhebegeitik agamu wokhesi a’ge ano ogola agai hasu lemak o,” oluk asogo mo’gulesimu, 28at Yesus en e, disogo mo’gulesi,
“At ai nak erlak o. Is logon Allah iak ai enesa’go hwelak poluk hegitsogo togu lema holuk e, onogola enagai a’bik hogu lemagat o,” oluk mo’gulesi.
“Nis pobi hobul en, elalin a’ge mesik tin da,” oluk mo’gulegisema, Yesus en o’go mo’gulentesi wene
(Matius 12:38-42)
29 #
Mat. 16:4; Mrk. 8:12 Asogo mo’gulesimu, aphwami modok a’bigat Yesus e’bek odoktu egesema, at en wene disogo mo’gulentesi,
“His aphwami o yogodak welegep a’ge yema henebabut wiak nak togu legep o. His en e,
Nis pobi hobul en, hat en elalin a’ge mesik tin da, oluk, mo’gulnogu legep a’geat de, an nebe pobi nobuagoluk, an en elalin mu a’ge mesik tik modok erlak o. We, at Yunus en aphwami pobi tuagoluk elalin tegei ai ’gela’ge nak an en pobuk mesik tisokhwe henil niagup ani o. 30#Yun. 3:4At Yunus ai aphwami o Niniwe a’ge eba wene pobi tuagoluk ebe welaga ai ’gela’ge, an abat daklau wegi ano re, his aphwami o yogodak welegep a’ge yema en nebe pobi nobuagoluk welegi o. 31#1Raj. 10:1-10; 2Taw. 9:1-12Page re, at hwe ’gain a’ge owi o ik obut hegit ’bogorl edipmu walek eba en at ap Salomo ai ede modok ’gagalak welat taga laga a’ge esa’go holigoluk waga. A’ge re, at Salomo ai mia ’gela’ge. A’geat de, an yema welegi yu nak e, logoatma oluk e, o ologun pam Allah en aphwami wene enebam pasulat, no’gorliselat, tua ai erlige, at hwe ’gain ai inotluk e, his aphwami o yogodak welegep a’ge yema disogo mo’gulhontouwa o,
His wiak, hene’gerli o, oluk mo’gulhontouwa o. 32#Yun. 3:5Ye, at Yunus ai en is aphwami o Niniwe a’ge eba Allah iak mo’gulentasu lagama re, enebabut heberlegesarik e, di wiak yu wiak togu legesa a’ge ukpegesa o. A’ge re, at Yunus ai onuk erlak ’gela’ge o. We, an yema welegi a’ge yu nak e, logoatma oluk e, o ologun pam Allah en aphwami wene enebam pasulat, no’gorliselat, tua ai erlige re, aphwami o Niniwe a’ge eba enebe inotluk, his aphwami o yogodak welegep a’ge yema disogo mo’gulhontouwa o,
His wiak, hene’gerli, oluk mo’gulhontouwayat o,” oluk mo’gulentesi.
“Henebe o atia ’gela’ge welegep ai re, edip e, henil ai enat o,” oluk mo’gulentesi wene
(Matius 5:15; 6:22-23)
33 #
Mat. 5:15; Mrk. 4:21; Luk. 8:16 Asogo mo’gulentesirik e,
“Aphwami logon e, esaga ’gwialogo re, abel akhit hisakho pogulat, sogoluak en lekho pogulat, togwi modok erlak o. At e, ’gwialogo re, aphwami olema ’gugulat o atia oruakma enil enak a’ge houwagoluk e, e delak a’ge pam pogwi o. 34Nenebe paget e, esaga ’gwielak ’gela’ge, nenil ogo asogoat atia oruak o. Henil ai op holuk e, henebe ebesik modok atiayat wolorogup ani o. A’geat de, henil ai wiak holuk e, henebe ai ogo o hiktakma welagai ’gela’geat wolorogup ani o. 35Ai holuk e, honogola o atiarak ’gela’ge oruak ai hik uano oluk, henebabut heberlogo wolomup. 36Ye, his henebe ebesik e, o hiktak ’gela’ge mesik e, erlak, we, modok atia nak welegep holuk e, esaga ’gwialogo welat henebam atiarak enebasu ’gela’ge, henebe ebesigat atiarak wolorogup ani o,” oluk mo’gulentesi.
Ap Farisi a’ge emin, Allah iak pelal wogo
mo’gulontogu legesa a’ge emin, Yesus en
ene’gerli weregei wene
(Matius 23:1-36; Markus 12:38-40)
37Yesus en wene ai mo’gulentasu oruakma, at ap Farisi a’ge mesik en Yesus disogo mo’gulesi,
“An ne’bek so’boru ne’birek nai lul en suk o,” oluk yo’go pesi. Yo’go pesimu, lagarik owi pam ’gwi lotluk e, so’boru nouwogoluk huregesa. 38At Yesus e’gik petne horak erlak a’ge so’boru naigoluk huragama en e, ap Farisi a’ge ano en il holuk e,
“Eige! Nogorlok e!” oluk ogola en wene ’balegei. 39Asogo tegeimu re, at nonue ’gain Onuk Logo a’ge Yesus en disogo mo’gulesi,
“His ap Farisi a’ge henegeik e’be ai emin, piring ai emin, we, o’borl o’gwe nak e, opsogo emerogu legep a’geat de, ogola’gwe aphwami ena’ge yogorlia wogu legep a’ge ai emin, di wiak yu wiak togu legep a’ge ai emin, honogola modok a’bik ’beterak oruak ai en, dagan togu legep o! 40Eige! His ai henebe uo ’gela’geat togu legep. Nenagap o’borl o’gwe heli’gogo nenebesi a’ge enat, nonogola heli’gogo nenebesi erlak no? At Allah enat heli’gogo nenebesi epegi. 41Holuk e, his en a’ge di a’ge yu a’ge piring ogola pogu legep a’ge ai, aphwami ena’ge erlak a’ge so’busogo wogentagup holuk e, his henebaget di a’ge yu a’ge ’berlegat ebetne emerak wolom ’gela’ge re, obat welema o.
42 #
Ima. 27:30
A’ge re, his ap Farisi a’ge Allah en wiagaphonobua o. His en e, Allah ebe henede hwedik welagai a’ge ai emin, aphwami akhen enebaget hegitsogo togwi a’ge emin, tugulom a’ge oruakhweat de, asogo on e, togwi erlak welat, ’be’ga ’gela’ge emin, hedit ’gela’ge emin, serei ’gela’ge emin, hene’gik wenakho 10 lai wago holuk, mesik ’gegilogo Allah akhit pogu legep ai, wene ebe abel pam a’ge ai obat togu legep a’geat de, wene logo a’ge togwi erlakma re, ukpogu legep ai wiak o!
43His ap Farisi a’ge Allah en wiagaphonobua o. O aphwami Yahudi a’ge se’ban ogumu ap ’gain a’ge enebalema his naduk-naduk ogola hutla ’gugulat, ye, o pasar tugumu di a’ge yu a’ge o’go wogumu eba aphwami en hau do’goksogo watnonobuagoluk ’gugulat, tugulom ai nak henagai en welegep o. 44His henebe re, yu ’gela’ge welegep. Aphwami waragaiam ’gwiang ’baksogo salonobogulomtik, enede we’gerlogo hwerli pogwi erlak ugonobogwiam, aphwami eneperlak welat onoyuk en sebit holuk lagai ’gela’ge, his asogo wiak oruakhweat de, aphwami eneperlak welat enemin welegep ai re, Allah en wiagaphonobua o,” oluk mo’gulentesi.
45Asogo mo’gulentesimu re, ap Allah iak mo’gulentasu laga a’ge mesik en e, Yesus disogo mo’gulesi,
“Nue. Hat e’gen ai nis neneminat nene’gerli werigen hegi!” oluk egeimu, 46at Yesus en e,
“His ap Allah iak pelal wogo mo’gulontogu legep a’ge yu ogo re, Allah en wiagaphonobuayat o. His en e, wene e’gin a’bik ai opogwi erlakma en, aphwami enebam pogulat nak, e’gin a’ge ai hene’gik dum mesik akhit leronto pukmu en welat, enebam pogu legep yema re! 47Ap Allah iak mo’gulontogu legesa a’ge warenebegisa ai his hene’balak enat warenebegisa o. Ye, his henebe is en dogo’gwe a’ge welat, is ai onuak o’gwe enede we’gerlak welat hele’ga wokho, o wusogo pogu legep ai re, Allah en wiagaphonobua o. 48Hene’balak en ap Allah iak mo’gulontogu legesa a’ge warenebegisa ano, his en onuak o’gwe enede we’gerlak welat hebil wokho o wusogo pogu legep ai re,
Nene’balak tigisa ai hegitsogoat tigisa o, oluk u ’gela’geat togu legep ai o. 49Asogo togu legep ai en, at Allah ogola ’gagalak modok ano en eselat,
An en e, is ap an niak mo’gulontogwi a’ge emin, yo’go onoboluk peragonobou wegi a’ge emin, is aphwami logon ene’bek peragonobou wagoam e, is en e, enebe pema akhit waronobogulat, pema akhit di obotut yu obotut tagonobogulat, tua o, oluk egei hegitsogoat, 50-51#Kej. 4:8; 2Taw. 24:2-21’bogorl ’gwiang walhesi hwerli en edamat Habel ue en emep namogo weregei hwerli en ’bekhit is ap Allah iak mo’gulontogu legesa a’ge warenebil-enebil, hwerli ap Zakharia Allah owi werik ho’gorlakma, at uam wusogo odouk narlik pogu legesema ebano ho’gorlakma, ’burlmu emep namogo werigisa ai hwerli en, enemep ’begei ai ’berlegat his aphwami yogodak welegep a’ge yu henebam pouwa o. 52Holuk e, his ap Allah iak pelal wogo mo’gulontogu legep a’ge yu, o ’goduk husogo ’guogoluk walhogwi ’gela’ge, is aphwami pema di wene yu wene enaluk emagoluk walhogwiam, his en kunci dil-del tenakho welat honu’gwarek henaluk emagoluk mo’gulik erlak welat, is muon mo’guluagoluk nak togwiam, his en e,
Mo’gulogup no yo, oluk wene yagontogu legep ai en e, Allah en wiagaphonobua o,” oluk asogo mo’gulontoluk e, 53-54o ano ukpoluk o’borl akhit libaga. Libagama re, is ap Allah iak pelal wogo eiye a’ge emin, ap Farisi a’ge emin, onolot het at ebam pogulat e,
“At Yesus ai iak ua pam en de, wene e’gen ebam poluk ebe woruok,” oluk e, emdema loksogo wogulat, weisogo wogulat, tugulat e, enil en wogu legesa.
Tans Gekies:
Lukas 11: Wul
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
