Yohanes 5
5
At Yesus en, ap mesik ebam obotut a’ge
ik Betesda omugwema en obaptegei wene
1Asogo toluk e, is Yahudi a’ge seni mesik sorogu legesa hegitsogo sorugukhwe Yesus pobuk o Yerusalem ’begei. 2O Yerusalem eba re, leget pakleget ’goduk emde ’belak mesik onuk Domba E’gebela ogwi a’ge eragam ik omugwe mesik is aphwami Ibrani a’ge eniak pam onuk Betesda ogwi a’ge ye’gelak welaga. Ik omugwe ai eragam o’gwe wali’gogo re, orabo lengak owi huaben opsogo werik oruakma, 3-4aphwami esanat enebam ou a’ge emin, enil hopnik a’ge emin, ondogorlu wiak a’ge emin, onoyuk soborak a’ge emin, eba ’bourak welat, [ik omugwe ano li a’gesogo o’borlogouk ua ya? erlak a, oluk ’gwelakharok welegesa. Asogo ’gwelakharok oruakma, malaikat Allah en yo’go ’belakpou wago a’ge ’bu otluk, ik ano o’borlogouk hasuam e, is aphwami enebam ou a’ge ebano mesik naduk-naduk ik omugwema ano ’bisoam e, di ou yu ou enebam e’gin a’ge se a’ge ’berlegat op aga legesa ai en e, ’gwelakharok welegesa o.] 5-6Asogo ’gwelakharok welegesa a’ge ap mesik e, ou werak oruakhwe 38 tahun aga a’ge emin enebe eba ’bourak oruakma, Yesus il hesirik e,
“Ap yu page enat disogo welagama hegi,” oluk il enak a’ge pobi tegeitik e, disogo mo’gulesi,
“Nare. Hat obaphobu hagai ya? Hebit a,” oluk mo’gulesimu, 7ap ano en e, disogo mo’gulesi,
“Nare o. Ik omugwe yu o’borlogouk osoma, an nebe ha’boksogo ik olomu ’belapnobu a’ge, an nosi yema erlakma no oluk e, nomuat orok-orok ’bigoluk walhasukhweat de, is nari pema nak naduk ’bogwi o,” oluk mo’gulesimu, 8at Yesus en e, disogo mo’gulesi,
“Nare. Hebe inotluk, hegerlis demak a’ge ai horloluk lak o,” oluk, 9mo’gulosokhwe erianoat ap ano ou op agarik e, egerlis demak a’ge ano horloluk laga.
At Yesus en ap ou a’ge obaptegei ai re, is aphwami Yahudi a’ge agauwa sabit a’ge pam Allah paget weat welagai ano pam obaptegei yo. 10#Neh. 13:19; Yer. 17:21Asogo weat oruakhwe obaptisoam lasumu re, is ap ’gain Yahudi a’ge en enil hegesarik e, ap ou ’gerat op aga a’ge ano disogo mo’gulegisa,
“Nare o. O yogodak e, agauwa sabit a’ge pam Allah paget weat welat, hat hegerlis woluk lo puk a’ge woluk lasu legen yema re,” oluk, mo’gulegisema, 11at ap ano en e, disogo mo’gulentesi,
“Erlak o. An ap ou obapnebegei a’ge ai en,
Hegerlis horloluk lak, oluk mo’gulnesimu en horloluk waga legi o,” oluk, mo’gulentesimu, 12is en hin ebam wogulat e,
“Ap ai, sa en,
Hegerlis horloluk lak, oluk mo’gulhesi,” oluk ebam hin wegesa a’geat de, 13at Yesus aphwami enebe a’bik welegesa a’ge ebano ene’gerlakma nalagama re, ap ebam ou obaptegei a’ge ano en e,
“Sa en ou obapnebegeitik mo’gulnesi no,” oluk ede nalagama welaga.
14Asogo tolukmu en, pobuk, at Yesus Allah owi werikmu ap ano e’birek sarlok tigisarik e, disogo mo’gulesi,
“Naik o. Yogodak hat hebe op e’gen ai re, pobuk wiak lok a’ge mesik hebam ema no oluk e, mesik wiak togun o,” oluk mo’gulesi. 15Asogo mo’gulesimu, at ap ano is ap ’gaindek Yahudi a’ge ene’bek lagarik e, disogo mo’gulentesi,
“Ap an ou obapnebegei egi ano re, Yesus enat obapnebegeimu o,” oluk mo’gulentesi. 16Asogo mo’gulentesimu re, is aphwami Yahudi a’ge agauwa sabit a’ge pam Allah paget weat oruakhwe, Yesus en ap ano ou obaptegei ano en e, at Yesus ebe wiagap pouwogoluk egesa. 17Asogo egesa a’geat de, at Yesus en disogo mo’gulentesi,
“An naik agauwa mesik mo u erlakma en, o yogodak ya eminat tagenebasu modok welago ai ’gela’ge, an asogoat tagenebasu modok welegi o,” oluk mo’gulentesimu, 18is ap ’gaindek Yahudi a’ge ebano en agauwa sabit a’ge pam Allah paget weat welat, Yesus en ou tu pukmuat tegei ai pam nak ebe woruogoluk tigisa puk. A’geat de, at en,
“An nebe Allah ne’birek hegirat o,” oluk u ’gela’ge re,
“An naik ebe Allah at o,” oluk, egei ai en, ebe woruogoluk ebenagaikmu obok ’baligisa.
At Allah en e, omlogo Yesus en aphwami uak lologo onobuagoluk e’gikmu pesi wene
19Obok asogo ’baligisema re, at Yesus en e, ap ebano wene disogo mo’gulentesi,
“Di a’ge yu a’ge an naik en tisokhwe nil ho erlakmayat de, we, an nede opoluk tu mia ai en e, an naik tiso a’geat hegitsogo taga legi o, oluk demat mo’gulhentegis. 20An naik en e, omlogo at ede hwedik modok welat, at ebe enat di a’ge yu a’ge tago a’ge ’berlegat mo’gulnosoam yogodak tisokhwe henil niegep ano re, weiyat ’gela’ge a’geat de, pobuk his erliktuagoluk mo’gulnosoam lok a’ge tisokhwe his henil niagup a’ge oruagat o. 21Ye, an naik en aphwami werak a’ge enelalugabenebiso ai ’gela’ge, omlogo an en aphwami werak a’ge asogoat enelalugabenebik o, oluk nede epasu a’ge enebe lo’bok enelalugabenebiso. 22-23Aphwami ’berlek en an naik erliktogwi ai ’gela’ge, an omlogo asogoat erliknobogu lemagoluk, at en aphwami uak lologo wene enebam pasulat, no’gorliselat, tago erlak. We, omlogo an enat uak lologo wene enebam pasulat, no’gorliselat, tuagoluk, ne’gikmu pesi o. Holuk e, is aphwami pema en an erliknobogwi erlak holuk e, an naik peraknobou waga a’ge ai, erliktogwi erlagat o,” oluk, mo’gulentesirik wene pobuk mesik disogo mo’gulentesi,
24“Is aphwami pema en, an niak wogulat, enede an peraknobou waga a’ge ano pam he’berik pouwa holuk e, aphwami warotluk lagai edip ukpoluk enelaluk modok welema a’ge edip pam arat wegesarik oruak o. Enelaluk modok welema a’ge eiye egesarik oruak en e, pobuk wene enebam pouwa erlagat o, oluk demat mo’gulhentegis. 25Ye, aphwami werak a’ge en, an Allah omlogo niak enesa’go holua erlige owan oruakhweat de, arat lau wagarik oruak o. Is niak enesa’go holua a’ge holuk e, enelaluk emarik enelaluk modok welema o, oluk demat mo’gulhentegis. 26Enelaluk modok welagai a’ge edip an naik u’gwarek eiye welago ai ’gela’ge, omlogo an ne’gik pam pesimu eiye welegi o. 27An nebe abat daklau wegi ai en, aphwami uak lologo wene enebam pasulat, no’gorliselat, tuagoluk, naik en anat ne’gik pam pesi o. 28-29#Dan. 12:2Ye, pobuk e, aphwami ’berlegat onuak o’gwe lo’bok en, an niak enesa’go holholuk, enelaluk ema erlige oruak o. Is ai, logon enebabut op togu legesa a’ge holuk, enelaluk modok welemagoluk edigenebasulat, ye, is logon enebabut wiak togu legesa a’ge holuk, wene enebam paigoluk edigenebasulat, tua oluk mo’gulhentegis ai en,
Wene ai nogorlok e, oluk, alik worogup o,” oluk mo’gulentesi. 30Asogo mo’gulentesirik e, wene mesik disogo mo’gulentesi,
“An nemategat nede opoluk di a’ge yu a’ge tu mia ai en e, an en nede opoluk taga legi erlak o. We, at an peraknobou waga a’ge ede epasu a’ge hegitsogo tigoluk taga legi ai en, naik iak e’berligat, aphwami uak lologo wene enebam pasulat, no’gorliselat, taga legi ai, hegitsogoat eselegi o,” oluk mo’gulentesi.
At Yesus obok ’beli’gogo mo’gulontogwi wene
31Asogo mo’gulentesirik mesik mo’gulentasulat e,
“An nebe pobi nobuagoluk nu’gwarek nobok ’beli’gogo mo’gulhentelema re, demat oluk henede ebetlip erlak o. 32Asogo a’geat de, an nebe pobi nobuagoluk, naik en nobok ’beli’gogo mo’gulhentasu ai, demat mo’gulhentasu oluk, an nalugat o. 33#Yoh. 1:19-27; 3:27-30His en Yohanes ebam an nebaget hin wouwagoluk honosi yo’go peragenebegepma re, at en e, dem wene paget nobok ’baksogo mo’gulhentesi ani o. 34An nebe pobi nobuagoluk aphwami en nobok ’beli’gogo mo’gulontogwi ai nagai en mo’gulhentasu legi puk. We, Allah en his delhonobuagoluk mo’gulhentasu legi o. 35At Yohanes ai ebe re, esaga ’gwialogo pogwiam yogo pasu ’gela’ge oruakma, his en,
Esaga ’gela’ge nenebam yogo pasu lemak, oluk, lodu pagerat honogola henagai hogu legep ai, 36an nebe pobi nobuagoluk, at en nobok ’beli’gogo mo’gulentasu laga a’geat de, mia ’gela’ge o. At e, an naik en,
Niabuk ado ologun po erlakma en ’berleksogoat tip o, oluk, yo’go nebesimu taga legi ai pam nak e, aphwami en,
At ebe aik en perakpou wagama, oluk nobok osoma enesa’go holugulat nebe pobi nobu ’gela’geat pobi nobu o. 37#Mat. 3:17; Mrk. 1:11; Luk. 3:22An nebe pobi nobuagoluk, naik en peraknobou waga a’ge ai en, nobok ’baksogoat mo’gulhentesi a’geat de, his en naik iak henesa’go hwelak erlagat, orogole henil hogwi erlagat welat e, 38at en yo’go noboluk peraknobou waga a’geat de, henede nebam he’berik pogu legep erlak ai en, at iak honogola oruak modok erlak o. 39His en opogulat e,
Nenelaluk modok wolomul e, Allah iak pelal wogo a’ge tenakho welege yu pamat wolomul o, oluk, pelal wogo ai opsogo ’gwelakhogu legep a’geat de, pelal wogo ai, an nebe pobi nobuagoluk wegesema oruakhweat de, 40henebe henelalugaphonobuagoluk an ne’bek wom e, henebit o.
41Asogo togu legep a’geat de, an nak e, aphwami en erliknobuagoluk taga legi erlak. 42His nak e, Allah henedesogo welegep modok erlak ai re, an henebabut naluk o. 43An naik en peraknobou wagama wegi a’geat de, his en an nebe woknobogu legep erlak o. Asogo a’geat de, at ap mesik u’gwarek ede opoluk wago holuk nak e, ebe wo a’ge henebabut hentasu legi o. 44Allah ematek otok modok welago ai en erlikhonobuagoluk togwi erlak welat e, his-hisat hat mesik en erliktagalat, hat mesik en erliktagalat, erliktogu legep ai en, henede an nebam no’gosogo he’berik po epegep. Mia o. 45A’ge re, an en Allah ilem wene henebam pouwa oluk henede epagup o. At e, Musa iak ai pamat obapnonobua oluk henede henagai hogu legep a’geat de, at enat wene henebam pouwa o. 46An nobok henaluk emagoluk, at Musa en pelal wokho pesi ai en e, at en pelal wesi a’ge ai demat oluk pobi tugullepma re,
Yesus demat, oluk pobi nebelibat o. 47A’ge re, wene Musa en pelal wokho pesi a’ge ai, his en demat oluk pobitu erlakma en welegep holuk, an niak ai no’gosogo pobirak poluk demat oluk epagup no. Mia o,” oluk mo’gulentesi.
Tans Gekies:
Yohanes 5: Wul
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
