Peragenebesi 9
9
At Saulus ebabut heberlaga wene
1Asogo togukhwe re, at Saulus ano olot het agarik e, aphwami nonue ’gain Onuk Logo a’ge iak wegesa a’ge ebano warenebiogoluk ogola en onobok ’baliselat e, is ap Allah eiye a’ge onue ’gain a’ge e’bek ’goluk e, disogo mo’gulesi,
2“Nue. An o Damsyik laiktik e, is aphwami logon Yesus iak wogulat e’berlik no’gwi a’ge logon oruak holuk, ap et, hwami et, hwiagonoboluk e, ene’gik herle wusogo wogonoboluk o Yerusalem yema onobou weik en e, is aphwami Yahudi a’ge o kota Damsyik eba o se’ban ogwi’gwe lo’bok odoktogwi a’ge enebaget surat mesik wokho woknemin o,” oluk mo’gulesi. 3Asogo mo’gulosoam, wogesimu re, waga lagarik e, o kota Damsyik eba horoksogo ’gwik ’galma re, ’bogorl pam en mesik erligeat, at eragam o’gwe amulit yebektak a’ge atiasogo yoso ’bu aga. 4Yoso ’bu aga ’gal e, at Saulus ano ’gwiangma erle’galogo ’bulak ti laga. Lagama re, at mesik en mo’guleselat e,
“Saulus. Saulus. Anat di obotut yu obotut taknebaigoluk muknoboluk denaga legen ai nopaget,” oluk mo’gulesi. 5Asogo mo’gulesimu, at Saulus en e,
“Nue. Hat hebe sa,” oluk mo’gulesimu, at en e,
“An nebe Yesus o. Hat en di obotut yu obotut taknebanogoluk muknoboluk denaga legen a’ge anoat o. 6Hebe inotluk e, o kota ai laguntik e, ’gwin o. ’Gwisoam, ap mesik en,
Hat disogo tip, oluk mo’gulhema a’ge oruak o,” oluk mo’gulosoam, 7is ap at emin wegesa a’ge ebano enesa’go hweligisarik e,
“Ap ebe ’ge en iak egei,” oluk enil orlok tigisa a’ge re, ebe erlak en yuk egesarik e, eniak u mia agama mo egesa. 8Asogo oruakhwe re, at Saulus ano inagarik, il dek egei a’geat de, di a’ge yu a’ge il yetho mia aga. Asogo mia agama re, e’gik tenakho o Damsyik woluk ’gwigisa. 9Woluk ’gwigisema, agauwa henagan welat e, di a’ge yu a’ge il hasu erlagat, so’boru emin, ik emin, no erlakma en modok welaga.
10Oruakhwe, o Damsyik eba ap mesik nonue ’gain Onuk Logo a’ge Yesus iak wesi a’ge onuk e, Ananias welaga. Oruakma, nonue ’gain Onuk Logo a’ge en e, abi ’gela’ge pam disogo mo’gulesi,
“Ananias,” oluk iak pakhasuam, at en e,
“Wo? Nue. Nebe yu welegi o,” oluk egei. 11Egeimu re, nonue ’gain Onuk Logo a’ge en e, disogo mo’gulesi,
“Hebe siaksogo inoroguntik e, ebela onuk ’Bekhiro’gwe ogwi ’gwe ai lak o. Laguntik e, o ap Yudas oruakma ’gwi laguntik, hat en e,
Ap onuk Saulus, owi Tarsus a’ge ano, yema oruak a? oluk hin wogontomup o. At ebe se’ban oso ani o. 12Se’ban asogo osoma, at abi ’gela’ge pam disogo hesimu o. Hat Ananias hebe re, at e’bek ’goluk en, il dek uagoluk he’gik ebam sebelak pasumu abi ’gela’ge hesi o,” oluk mo’gulesi. 13Asogo mo’gulesimu, at Ananias en e,
“Nue. Aphwami en e,
Ap ai en, hat heiyagai o Yerusalem a’ge di obotut yu obotut tagenebasu, oluk enebe esan enat ogukhwe obok nesa’go hwelegismu re, 14yogodak e, o yema wotluk, aphwami hat honuk ’balogo yo’go hobogwi a’ge ’berlegat, ene’gik herle woruagoluk e, is ap Allah eiye a’ge onuelak ’gaindek ebano en mo’gulegisema wagarik oruak ai o,” oluk mo’gulesi. 15Asogo mo’gulesi a’geat de, nonue ’gain Onuk Logo a’ge en e,
“Lak o. At en e, aphwami o’borl o’gwe a’ge emin, onuelak ononuk logo a’ge emin, aphwami Israel a’ge emin, an nonuk mo’gulentil denaga lemagoluk, an en ap ai ebe pulogo yo’go pegimu ani o. 16Asogo yo’go pegimu re, at en nonuk asogo mo’gulentil nosokhwe, at di obotut yu obotut hasulommayat hasu lema a’ge, an en mo’guleik a’ge oruak o,” oluk mo’gulesi. 17Asogo mo’gulesimu, at Ananias ano lagarik e, olema ’gwegeitik e, e’gik Saulus ebam sebelak welat e, disogo mo’gulesi,
“Saulus, nare o. Nonue ’gain Onuk Logo a’ge Yesus, hat o yema weigoluk ebela pam wagoma, horogolema inagama, hil hegen a’ge ano en, hat hil dek eselat, Allah Arogun hogola ’betesogo ’gwiselat, tuagoluk peraknobou wagama wegi o,” 18oluk mo’gulosoam erianoat, at il solum laga a’ge ano no’gorlogo ’begeitik e, il op aga. Il op agarik e, ebe inagama re, ik olomu ’belakpesi. 19Ik olomu ’belakpesimu re, so’boru noluk anni aga.
At Saulus en wene aphwami o Damsyik a’ge mo’gulentasu laga wene
At Saulus ano o Damsyik welat e, aphwami nonue ’gain Onuk Logo a’ge Yesus iak wegesa a’ge enemin agauwa weiyat welegesa. 20Asogo welegesa eria erlige re, o is aphwami Yahudi a’ge se’ban ogu legesema ebano ’goluk, wene Yesus paget mo’gulentasulat e,
“At Yesus ai, ebe Allah omlogoat o,” oluk mo’gulentasu laga. 21Mo’gulentasuam e, is aphwami enesa’go hologu legesa a’ge ebano, enebe ’berlegat onogorlok agarik e,
“Ap yu o Yerusalem welat, aphwami ’berlegat at Yesus ai onuk ’balogo yo’go pogwi a’ge enebe modok wollo’gen dagalogo erlagap paigoluk taga laga a’ge ano ebe yu erlak no? Ebe yuat ani o. At yema wotluk e, is Yesus onuk ’balogwi a’ge ebano, ene’gik herle wusogo, is ap Allah eiye a’ge onuelak ’gaindek a’ge ene’bek wogonoboluk laigoluk waga erlak no? Nogorlok o,” oluk erliktogu legesa. 22Erliktogukhwe re, at Saulus en, iak annisogoat onogola ’gagaliselat, disogo mo’gulentasu laga,
“Allah en e,
Ap mesik delhonobuagoluk perakpou weik, oluk wene obok mo’gulnentesi a’ge ano ebe re, Yesus aiat o,” oluk ’baksogoat mo’gulentasuam, hegit agama re, is aphwami Yahudi a’ge o Damsyik welegesa a’ge eba en o’go no u ’gela’geat wongsogo mo ogu legesa.
23 #
2Kor. 11:32,33 Asogo welat, agauwa a’bigat welegesarik e, Saulus ebe woruogoluk obok hisakho ’baligisa. 24Asogo ’baligisa a’geat de, is aphwami pema en Saulus hoso’bi mo’gulegisema at aluk aga. Asogo aluk oruakhwe, ap ebano en at ebe ebela’gwe de, leget pakleget emde ’belakma libagoma woruogoluk hup erlige ’gagalak modok welegesa. 25’Gagalak oruakhwe, is aphwami Saulus iak wogu legesa a’ge en e, o huba’go mesik erlige, at ebe mul egeik a’ge ogola yagarak poluk e, leget pakleget yat werik a’ge ano pam ele mesik likho’gwe delak oruakma re, lebikpoluk e, ’go’bi erlilogo leget edip o’borl akhit ’belebak pegesa.
At Saulus o Yerusalem ’bi lagarikmu tigisa wene
26Asogo ’belakpegesema, at Saulus o eba en o kota Yerusalem ’boluk e, is aphwami logon Yesus iak wogu legesa a’ge enemin mesikmu la’bulogo wolomogoluk walhesi a’geat de, is ’berlek en,
“At demat Yesus iak wesirik oso yo,” oluk pobitu erlakma en, at ebe onogorlok welegesa. 27Asogo oruakhwe, at Barnabas en Saulus ebe wesirik woluk e, is ap Yesus en enebe yo’go onoboluk peragenebesi a’ge ebano logon ene’bek laga. Woluk lagarik e, disogo mo’gulentesi,
“Ap yu re, ebela lok o’gwe lasulat, nonue ’gain Onuk Logo a’ge il hesimu, at en wene disogo mo’gulesimu en, at ebe o Damsyik welat, ogorlok erlagat Yesus onuk ’balogo wene ’baksogo mo’gulentasu laga a’ge woluk wegi o,” oluk ’beli’gogo mo’gulentesi. 28Asogo mo’gulentesimu, at is enemin op nak welat, o Yerusalem da ’gwil ya ’gwil neselat e, ogorlok erlaksogoat nonue ’gain Onuk Logo a’ge Yesus onuk ’balholuk wene ’baksogoat mo’gulentasu laga. 29Mo’gulentasulat e, is logon enebe Yahudi a’geat de, eniak Yunani a’ge eniak ogu legesa a’ge wene mo’gulentasuam, is en hin wogwiam e, o’go mo’gulentasulat tagokhwe re, ebe woruogoluk walhogu legesa. 30Woruogoluk walhogukhwe re, is Allah eiyagai is-is enarilak onorokhwi enemin mesigat a’ge logon en, Saulus ebe o Kaisarea woluk wegesarik e, eba en o Tarsus orlumagoluk perakpou wegesa.
31Asogo tigisema, pobuk en e, is aphwami Allah eiyagai o propinsi Yudea a’ge emin, Galilea a’ge emin, Samaria a’ge emin, wiagabonobu erlakma en lioksogoat op nak welegesa. Oruakma, Allah Arogun en lerentasuam e, enede hurle agalat, nonue ’gain Onuk Logo a’ge onogorloksogo welat, togulat e, enebe logetil laga legesa.
At Petrus en ap Eneas ou obaptagalat, hwe Dorkas waraga a’ge elalugaptagalat, tegei wene
32Ye, at Petrus en Allah eiyagai a’ge o da ya il ’gogolentil lasu laga. Asogo lasu lagarik e, agauwa mesik erlige re, is Allah eiyagai o Lida welegesa a’ge il entil ’bi laga. 33’Bi lagarik e, ap mesik onuk Eneas. O page enat oyuk soborak modok welat e, mo ligom ’bugom osokhwe 8 tahun ’bourak modok welaga a’ge, asogoat oruakma, il hesi. 34Il holuk e, disogo mo’gulesi,
“Eneas nare. Yesus Kristus en obaphebegei yo. Holuk e, inotluk hegerlis demogo nogo ese legen a’ge eba o’gulogo pemen o,” oluk mo’gulosokhwe, erianoat siaksogo inaga. 35Inagama re, is aphwami o Lida a’ge emin, Saron a’ge emin, welegesa a’ge ’berlegat enil holuk e,
“Demat o,” oluk enebabut heberlegesarik onolukhwe nonue ’gain Onuk Logo a’ge wogegisa.
36O Yope eba, hwe mesik onuk rusa onuk a’ge aphwami Yunani a’ge eniak pam Dorkas u ’gela’ge, is eniak pam Tabita oluk ogu legesa a’ge welaga. At hwe ai, nonue ’gain Onuk Logo a’ge Yesus iak wesirik, di a’ge yu a’ge op nak tiselat e, aphwami ene’gikmu erlak welat enerlagaik a’ge lerentasu modok welaga. 37Asogo tiso oruakma, eria hegirat ou wesirik en ebe waragama, ebetne emesogo o holi’bo pei ligegesa. 38Asogo pei ligegesarik oruakhwe, o Yope eba en, o Lida ai horogatma re, is aphwami logon en,
“Petrus ebe o Lida wagarik oruak o,” oluk ogwiam, is aphwami Yesus iak wegesa a’ge ebano enesa’go hweligisarik e, is ap enebe ’biren Petrus yo’go louwagoluk, disogo mo’gulegisa,
“His laguptik e, Petrus disogo mo’gulomup,
Halo’gwe ebisogo wolom erlakma en nenemin perleneat louwok o, oluk mo’gulomup o,” oluk peragono’borlu egesema orlu egesarik, mo’gulegisema, at Petrus en e,
39“I o. Holuk e, ’buok o,” oluk enemin ’bigisa. ’Bigisarik e, Petrus ebe woluk holi’bo emin ligegesa. Holi’bo ligegesarik oruakma, is hwami sugwe a’ge at e’bek horoksogo odoktu egesarik, lo’gu marogulat e, sum ogola’gwe a’ge emin, o’borl o’gwe yat a’ge emin, hwe Dorkas elalukhwe enemin welat, igentesi a’ge onukhegesa. 40Onukhegesema re, at Petrus en enebe ’berlegat lebigenebesirik e, odogorlu pam hurotluk se’ban egeitik e, orogole edenogo hwe werak a’ge ano wogotluk e,
“Tabita. Inemen o,” oluk mo’gulesi. Mo’gulosoam, erianoat il degegeitik e, Petrus ebe il holuk inagarik alo’gwe yamuksogo huraga. 41Huragama, at Petrus en e’gik tenakho edikpoluk en, is Allah eiyagai logon emin, hwami sugwe a’ge ebano emin, worlentesimu ’gwigisema re,
“At ebe elaluk aga yu o,” oluk wogentesi. 42Wogentesimu re, wene aga a’ge ai, is aphwami o Yope eba a’ge enebe ’berlegat enaluk egesarik e, enebe esanat enede nonue ’gain Onuk Logo a’ge Yesus ebam he’berik pegesa.
43Asogo he’berik pegesema, at Petrus ano o Yope eba welat e, ap Simon wam sapi agap emin, wam domba agap emin, no’gorlak a’ge ere’gise laga a’ge ai owi pam e’birek agauwa esanat welegesa.
Tans Gekies:
Peragenebesi 9: Wul
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
