Peragenebesi 7
7
Wene at Stefanus en o’go mo’gulentesi wene
1At Stefanus wene asogo ebam pegesema, at ap Allah eiye a’ge onue ’gain ano en e,
“Wene ai demat ogwi a? Eniak esei ya,” oluk mo’gulesi. 2#Kej. 12:1Mo’gulesimu, at Stefanus en e, disogo mo’gulentesi,
“Naiklak, nue, nari wa. Wene ik a’ge yu, henesa’go opsogo hwelit o. Nena’bu Abraham ano o Haran deksogo owan wom erlak, o Mesopotamia oruakma, Allah, erliktogwi a’ge ano orogolema inaga. 3Orogolema inagalat e,
O hat welegenma yema emin, hue hari enebe emin, ugonoboluk e, libemen o.
Liborogun holuk e, o an en mo’gulheikmu eba lu o,
oluk mo’gulesi. 4#Kej. 11:31; 12:4Mo’gulesimu re, o aphwami Kasdim a’ge onowi pam ukpoluk, o Haran deksogo waga. Wagarik oruakma, aik waragama re, o eba ukpoluk Allah en o poluk hokhomsogo o his yogodak welegepma yema pou waga ai o. 5#Kej. 12:7; 13:15; 15:18; 17:8Asogo pou waga a’geat de, at en e,
O yema eiye harat o, oluk hwiagum erlagat. Ye, ’gwiang weisogo logon hwiagum erlagat, welat e,
O yema pobuk hat eiye agalat, hat en dogo’gwe a’ge eiye agalat, togup o,
oluk at omlogo dagom erlak oruakhweat wene wusogo obok mo’gulesi ai o. 6#Kej. 15:13-14Obok asogo mo’gulesi a’geat de, disogo mo’gulesiat,
Hat en dogo’gwe a’ge ai aphwami onowi pam loluk ap ’bok ’gela’ge welema o.
Asogo oruakma aphwami eba a’ge en eneragam a’ge ’gela’ge tagonoboluk e,
o mo ligom ’bugom osokhwe 400 tahun mep sisoluksogo tagonobogu lema o.
7 #
Kel. 3:12
A’ge re, is aphwami onowirak a’ge en eneragam a’ge ’gela’ge onoboluk tenentarok welema a’ge ai,
an en wene enebam poluk wiagabenebaik o.
Wiagabenebaikmu re, hat en dogo’gwe a’ge ai o eba en liplau wemarik e,
o yema welat, an erliknobogu lema o,
oluk Allah enat mo’gulesi. 8#Kej. 17:10-14; 21:2-4; 25:26; Kej. 29:31–35:18Asogo mo’gulesirik e,
An wene wusogo wokhenebegis a’ge ai, enagat welemagoluk enagap ene’gerlimu a’ge ’balonobogu lomup o, oluk mo’gulesi. Asogo mo’gulesimu, Abraham en omlogo Ishak deregeitik e, agauwa sabiren welagarik e, agauwa sirak a’ge pam agap e’gerlimu a’ge ano asogoat ’balegei o. Ye, pobuk Ishak en omlogo Yakub dakhwerlesirik e, asogoat agap e’gerlimu a’ge ’balegeiyat. Ye, Yakub en e, is nis nene’balak enebe 12 ebano dagonoboluk e, asogoat enagap ene’gerlimu a’ge ’balonobogu legesa.
9 #
Kej. 37:11,28; 39:2,21 Nene’balak ebano onot Yusuf pam ’bou togu legesarik e, ebe o Mesir woluk legesarik eneragam a’ge welemagoluk, ap logon pam o’go wegesa. A’ge re, aphwami logon en at ebe nin hwedik nan hwedik wiagap pouwogoluk togwiam e, Allah emin welat di wene yu wene ebam lau wagoam deliso modok welaga. 10#Kej. 41:39-41Asogo deliselat oruakma, ap ’gain Firaun o Mesir a’ge onue ’gain onuk logo a’ge ano en e,
Ap yu ebabut op o. Ede modok ’gagalak o, oluk ebe ebam liok egeitik e, disogo mo’gulesi,
O Mesir yema emin, an nowi emin, neiyagai emin, hat en tenentarok welat, an en a’ge di a’ge yu a’ge ’berlegat hat he’gik pam welemak o, oluk ebe gubernur welemagoluk edikpesi. 11#Kej. 42:1,2Edikpesimu, oruakhwe re, o Mesir eba emin, o Kanaan yema emin, so’boru obuk logat agama wiagat welegesa. Wiagat welat e, nene’balak ebano so’boru ’geba heratu ’gela’geat, weat welegesa. 12Weat oruakma re, aphwami logon en,
O Mesir eba nak e, so’boru gandum e’gen oruak o, oluk ogwiam e, at Yakub esa’go hwelegeitik, at eiyagai nis nene’balak ebano en logon wouwagoluk peragenebesi. Naduk asogo peragenebesirik, 13#Kej. 45:1,16pobuk peragenebesimu re, at Yusuf ano en e,
An ano nebe yuat o, oluk uelak ebano hwiagentesi. Hwiagentasuam Firaun ano en e,
Yusuf arilak enemin dogo a’ge yema hegi, oluk alugat aga. 14#Kej. 45:9-10,17-18; 46:27Asogo mo’gulentesirik, at Yusuf en e, aik Yakub emin, aphwami at eiyagai a’ge ’berlek enebe 75 emin, enemin wemagoluk wene wusogo perakpou waga. 15#Kej. 46:1-7; 49:33Wene wusogo perakpou wagama re, is Yakub lak o poluk hokhomsogo o Mesir ’bigisa. Eba ’bigisarik welat e, at ebe emin, nene’balak emin, ebayat waretil legesa. 16#Kej. 23:3-16; 33:19; 50:7-13; Yos. 24:32Waretil legesema re, naduk at Abraham o Sikhem welat, owik aphwami Hemor a’ge enebam o’go ’balegeimu enebe werak a’ge togolik wogonoboluk wegesa. 17#Kel. 1:7,8Pobuk e, Allah en pageat Abraham ebam wene obok mo’gulesi a’ge ano ebe om hegitsogo horogat agokhwe re, aphwami nis a’ge enebe o Mesir eba a’bigat yarluk egesa. 18Asogo a’bik yarluk egesema re, ap mesik mu a’ge en e, Yusuf ebe eperlakma re, o Mesir eba ’gain agarik tenentarok welaga. 19#Kel. 1:10-11; Kel. 1:22Welat e, aphwami nis a’ge nene’balak ebano lalenebiselat, di obotut yu obotut tagenebasulat, taga laga. Asogo tagalat enemalik ’get dogo a’ge enelaluk welema no oluk,
Waremagoluk parema lebigenebemit, oluk iak ningsogoat mo’gulentasu laga. 20#Kel. 2:2Asogo tagenebasu laga eria hegit e, at Musa ebe malik op modok a’ge dagagama re, dugwi henagan aik owi pam tenakho welegesa. 21#Kel. 2:3-10Tenak welegesarik, pobuk lebikpegesema, at ’gain Firaun agalogo en ebe ano wesirik, at u’gwarek emalik ’gela’geat yo’golegei. 22Yo’golegeimu re, is aphwami o Mesir a’ge di wene yu wene enaluk welegesa a’ge ebano, at en modogat mo’gulegei. Mo’gulegeitik, at en iak pam opsogo nak eselat, e’gik pam di a’ge yu a’ge opsogo nak tiselat, tagalat e, ebe ’gainat aga.
23 #
Kel. 2:11-15
’Gainat agarik, at Musa ebe umur mo ligom, ’bugom osokhwe 40 tahun aga. Agama, at en e,
Aphwami Israel an ap ’belak a’ge ebano logon entai laik, oluk ede epesi. 24Ede epesirik ene’bek laga ’gal e, ap Mesir a’ge mesik en ap Israel a’ge mesik ’go’bu werisokhwe il hesi. Il holuk e, at oruak o’gwe ano akhit agarik erlele wokho, ap Mesir a’ge ano ebe ’be’gi weregei. 25Weriselat ogola en e,
Is aphwami an ’belak a’ge onogola en e,
Allah en at yo’go pesimu, at en woknoboluk libema o, oluk pobi nobua o, oluk epesi a’geat de, is en asogo pobitu erlak welegesa. 26Pobitu erlak welat e, loruk o’gwe ap enebe ’biren Israel a’ge e’birek yeik pogumu, il entesirik la’bulik enebaigoluk, disogo mo’gulentesi,
Narilak. His e, hot eminat de, nopaget yeik pogu legep, oluk mo’gulentesi. 27A’ge re, at ot ’go’bu weriselat, at Musa ebe perlikho esa’go akhit pei lasulat e, disogo mo’gulesi,
Hat nis nonue ’gain welat wene enebam pasulat, no’gorliselat, taga lemagoluk,
sa en edikhebesimu.
28Sono ap Mesir a’ge werigen ai ’gela’ge an watnebigoluk taga legen a,
oluk mo’gulesi. 29#Kel. 18:3-4Asogo mo’gulese lagama, wene ai esa’go hwelegeitik e, hweiye libagarik e, o poluk hokhomsogo o Midian eba lagarik welaga. Welat e, eiyagai enebe ’biren dagenebegei.
30 #
Kel. 3:1-10
Eba modok welat, pobuk 40 tahun welaga. Oruakma re, malaikat Allah en yo’go ’belagonobou wago a’ge ebano mesik Musa en il houwagoluk, o leimu aphwami enebe erlakma dom Sinai edipmu eba ’bu agarik e, e hourak a’ge pam en, odouk magale ’gwialisoma orogolema inagama il hesi. 31Hesirik e, erliktagalat, il dokhumsogo ’gwelakhaigoluk ebe horoksogo lasuam e, Nenaik ’gain Onuk Logo a’ge en e, disogo osoma esa’go hwelegei,
32Hat he’balak Abraham emin, Ishak emin, Yakub emin, enaik Allah anat o,
oluk mo’gulesimu, at Musa en ebe il pobisogo hai lo ogorlok aga. 33Ogorlok agama, Nenaik ’gain Onuk Logo a’ge ano en e, mesik disogo mo’gulesi,
’Gwiang hat hebe edik welegenma eria, an nu’gwarek no’gwiang o.
Holuk e, hoyuk sepatu ’buktak a’ge eba no’gorlogo pemen o.
34An neiyagai aphwami o Mesir a’ge en di obotut yu obotut tagenebasukhwe nil entasulat,
enede o’borlogouk ogukhwe nesa’go hweliselat,
tise legirik e, an en delenebigoluk nebe ’bu egi o.
Holuk e, an en hat yogodak o Mesir perakhebaik en suk o,
oluk mo’gulesi. 35#Kel. 2:14Pageat is aphwami Israel a’ge en e,
Hat nis nonue ’gain welat wene enebam pasulat, no’gorliselat, taga lemagoluk,
sa en edikhebesimu.
Nenebit o,
oluk wene yagegisa ano re, at Musa at o. Asogo wene yagegisa a’geat de, malaikat Allah en yo’go ’belagonobou wago a’ge ebano, at Musa il houwagoluk mesik ’belakpou wagama re, e hourakma en selakma agama il hesi a’ge anoat, onue ’gain welat delonobuagoluk yo’go poluk perakpesi ai o. 36#Kel. 7:3; 14:21; Bil. 14:33Yo’go poluk perakpesimu re, aphwami Israel a’ge enebe wogonoboluk liplau waga ai, at Musa enat o. Wogonoboluk liplau wagalat e, o Mesir eba emin, ik ye’gelak a’ge onuk Laut Merah ai emin, o leimu aphwami erlakma eba, o mo ligom ’bugom osokhwe 40 tahun welat emin, is aphwami en wene pobi tuagoluk mesik elalin tu puk a’ge til waga ai, at Musa enat o. 37#Ula. 18:15,18Ye, aphwami Israel a’ge mo’gulentasulat e,
Allah en ap at iak mo’gulhentasu lemagoluk,
ap his a’ge mesik an ediknebesi ai ’gela’ge,
pobuk edikpouwa ani o,
oluk mo’gulentesi ai, at Musa enat o. 38#Kel. 19:1–20:17; Ula. 5:1-33Ye, nene’balak enemin o leimu aphwami erlakma eba odoktak oruakma, dom Sinai ai edipmu malaikat Allah en yo’go ’belagonobou wago a’ge ebano mesik e’bek ’bu agarik e, e’birek weneane egesa ai, at Musa at o. Nene’balak ebano eneminat oruakma, at Allah en, wene nenelaluk wolomul wene ai, nis mo’gulnontouwagoluk mo’gulesi ai, at Musa at o.
39Asogo mo’gulesi a’geat de, nene’balak ebano en, at iak hologo wolom e, enebit welegesa. Asogo welat e, ebe ukpegesarik,
O Mesir eba togolik lo a’ge, oluk enede lagama welegesa. 40#Kel. 32:1Enede asogo lagama welat e, at Harun ano disogo mo’gulegisa,
At Musa o Mesir en woknonoboluk liplau waga ano, no’gosogo agama hwe.
Nis neneperlak o, ai en,
nis togolik woknonoboluk o Mesir louwagoluk,
Allah ebe ’gela’ge ebalema dogwi asua mesik utnentemen o,
oluk mo’gulegisa. 41#Kel. 32:2-6Asogo mo’gulegisarik, o ai erlige wam sapi emalik a’ge ogut walsogo dogwi werigisa. Werik poluk e, en sapi wusogo poluk, is en e,
Nene’gik pam werik pege yu op o, oluk, onogola enagai a’bik hogu legesa. 42#Amo. 5:25-27Asogo togu legesema re, at Allah en o’borl wogentesirik,
’Bogorl pam a’ge mo emin, dugwi emin, hwesagal a’bik eba emin, erliktogu lemak o, oluk enebe ugenebesi. Asogo tegei ai, is ap Allah iak mo’gulontogu legesa a’ge en disogo egesa hegitsogoat tegei,
Allah en e,
His aphwami Israel a’ge yu logwe.
Mo ligom ’bugom osokhwe, 40 tahun
o leimu aphwami erlakma eba welat e,
wam sapi worogulat, odouk narlugulat, togu legep ai re,
an nebaget pogulat, watnugulat, togu legep no? Erlak o.
43O sum owi ano, henaik Molokh owi emin,
hwesagal ’gela’ge ano,
henaik Refan ogosagal emin, da pil ya pil,
woluk denaga legep ai.
Asogo woluk denagalat, his at eragam ’guogoluk ogut walsogo werigep ai en,
henebe o Babel abel akhit perakhenebaik o,
oluk Allah en egeimu, pelal wokho pegesa ai ’gela’ge tegei o.
44 #
Kel. 25:9,40 At Allah en Musa mo’guleselat e,
An nebe nemin welege o, oluk nowi o sum a’ge disogo werip, oluk elit a’ge waltak pesimu, il hesirik e, o ebe asogoat weregei. Weregeimu nene’balak ebano o sum owi a’ge aiat tenak welat o leimu aphwami erlakma denagalat da wetil, ya wetil, wetil denaga legesa. 45#Yos. 3:14-17Asogo wetil denaga legesarik, is en dogo’gwe a’ge Yosua emin en o sum owi werik a’ge ano moluksogo woluk e, aphwami nis nonowi pam yema oruakma Allah en mukho lebigenebesimu ono’gwiang sebelu ’gu otluk, o sum owi ano wosu ’gu egesa. Wosu ’gu egesa ai erlige o sum owi aiat werik, welagarik e, hwerli Daud elaluk welaga ai hwerli werik welaga. 46#2Sam. 7:1-16; 1Taw. 17:1-14Ye, Daud ebabut taga laga ai, Allah ebam lobuk egeimu, at en Allah disogo mo’gulesi,
Yakub aik Allah harat o. Howi mesik wusogo hebaik, oluk mo’gulesi. 47#1Raj. 6:1-38; 2Taw. 3:1-17Asogo mo’gulesi a’geat de, Allah owi ebe omlogo Salomo en werik ebesi ai o.
48-50 #
Yes. 66:1-2
Asogo a’geat de, at ap Allah iak mo’gulentasu laga a’ge mesik en wene disogo egei,
Nenaik Allah ’gain Onuk Logo a’ge en e,
’Gain anat welat e, nebe nalo’gwe ’bogorl pamat hweriogo welegi o,
Ye, noyuk lekho ’gwiang pamat poluk welegi o.
Holuk e, his en o no’gorak a’ge werik nobo yo.
An nebe set hwalogo re, o ’geba wolom epegep. Mia o.
Di a’ge yu a’ge ’berlek eba, an enat walhegi erlak no?
oluk Allah en egeimu, pelal wokho pesi ai en, at Allah modok ’gain Onuk Logo a’ge ai, o aphwami ene’gik en worogwi a’ge pam wolom e, mia o. 51#Yes. 63:10His aphwami yema henebabut modok wiak henesa’go modok holu puk, henagap hene’gerlimu a’ge ’belak welarat de, henede degelak erlak welat henesa’go werak erlak togu legep yema re! Hene’balak en,
Allah Arogun iak ai nenebit, oluk ogu legesa hegitsogoat, his is enebabut wokho togu legep yema re! 52Is ap Allah iak mo’gulontogu legesa a’ge ebano, hene’balak en enebe wiagabonobu erlakma en mesik welegesa no? Wiagabonobogu legesa nak ebano re. Is Allah iak mo’gulontogu legesa a’ge en e,
Allah eragam a’ge ebabut hegitsogo tua a’ge ai pobuk wema o, oluk ebe owan wom erlak oruakhwe, obok naduk ogu legesa a’ge enebe hene’balak enat waronobogu legesa ai o. Pobuk, is en obok naduk egesa a’ge ai ebe wagama re, his enat at ebe woruagoluk yo’go lagalat, ebe worogulat, tigep ani o. 53Ye, is malaikat Allah en yo’go ’belagonobou wago a’ge ebano en wene Allah en nenesa’go weregei wene ai, hisat wokhentigisa a’geat de, henesa’go hologo tu henebirat welegep ai o,” oluk mo’gulentesi.
Stefanus at Saulus ilem helep pam werigisa wene
54At Stefanus en wene asogo mo’gulentasu lagama, is enesa’go hweligisarik e, onolot het otluk, eniak hedin hogulat ebe woruogoluk tigisa. 55Woruogoluk tugukhweat de, at Stefanus Allah Arogun ogola ’beterak welat, il ’bogorl pam likhesi ’gal e, at Yesus Allah ebe erliktogwi a’ge ano e’birek e’gik ’bekhit akhit eragam edik oruakma il ligentesi. 56Il ligontoluk, at en e,
“Yethemit! ’Bogorl hialegeimu re, at abat daklau waga a’ge ano, Allah e’birek e’gik ’bekhit akhit eragam edik oruakma nil yerentegis o,” oluk mo’gulentesi. 57Asogo mo’gulentesimu, is ebano eniak amitmit sup oluk, ene’gik enesa’go dopnosogo, pungtak mesik erligeat e’bek hopha ’gwigisa. 58E’bek hopha ’goluk, o kota en leget o’borloma ha’boksogo lebikpoluk e, helep en werigisa. Ebe woruogoluk e, is at iak osokhwe enesa’go hweligisarik, wene ebam poluk welegesa a’ge ebano onosum o’borl o’gwe a’ge no’gorlogo re, ap souwe a’ge onuk Saulus eragam pegesa. 59Poluk e, ebe helep en worogukhwe, at Stefanus ano Yesus onuk ’baliselat e,
“Yesus nue. Narogun hat en woknebi suk o,” oluk egei. 60Asogo eselat, odogorlu pam yagutsogo huraga. Huragarik, iak loksogo re, disogo egei,
“Nue. Ap an wiagapnebigisa a’ge yema, wene enebam pagun o,” oluk mo’gulesirik ebe arat waraga.
Tans Gekies:
Peragenebesi 7: Wul
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
