Jɛ́nɛ́sì 33
33
Jékɔ̀ kè Íìsɔ́ɔ̀ gmɔ̌ìn-gmɔ̌ìnɔ̀
1Ti Jékɔ̀ nì ma nàǔn wɛ̃ɛ, ɔ gmɔ̀ ma ɖé dyúa, ké ɔ dyé ma Íìsɔ́ɔ̀ kè ɔ gàa-kpò hɔ̃dɛ̀ɖɛ̀ hĩinyɛ ɓěɔ̀, ké wa nì ma ɔ wɔ̃ dyiɛń. Ɔ jèɛɛ, ɔ geìn ma dyú ɓěɔ̀ Ɖéà kè Wéɖécà kè gbo-nì-màà sɔ̃́ ɓěɔ̀ múin. 2Ké ɔ zĩ̀ìn ma gbo-nì-màà ɓěɔ̀ kè waà dyú ɓěɔ̀ ɖé dyúa. Ké Ɖéà kè ɔ nììn dyú ɓěɔ̀ kɔ ɓó dyí, ké Wéɖécà kè Jòsé sè ma ɖe. 3Kɛɛ ɔ mìɔùn nì ma wa dyúa, ké ɔ nyu ma dú-hwuɖu-taɓa-kpà mɛ̀nɛ̌ìn-sɔ̃́, ti ɔ nì ma ɔ ɖíí-gààɔ̀ wɔ̃ muɛń nyɛ. 4Kɛɛ Íìsɔ́ɔ̀ kpa ma peɖeɛ, ké ɔ gbèɖèìn ma ɔ, ké ɔ po ma ɔ kpàǎ ɖɔ, ké ɔ nyá ma ɔ wɔ̃, ké wa sɔ̃́ɔ̀ po ma kpé. 5Ti ɓɛ́ Íìsɔ́ɔ̀ ɖú ma dyéɖé dyií, ké ɔ dyé ma màa ɓěɔ̀ kè dyú ɓěɔ̀ kɛɛ, ɔ diè ma Jékɔ̀ dyi, ké ɔ ɖá, “Nyɛ́ kɔ̃̀ nyɔ ɓě nìà m̀ ɖeín nyɛɛ kɛ́?”
Ké Jékɔ̀ ɖá, “Wa mɔ̀ dyú ɓě ɓɛ́ Gèɖèpɔ́ɔ̀ ɖǎ mɔ̄ mɔ̀à nì gbo-nì-dyùɔ̀ kɛɛ nyí ɖé ɔ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ múɛ.” 6Hwɛ̀ ké gbo-nì-màà ɓěɔ̀ kè waà dyú ɓěɔ̀ xwɛ̃́ìn ma Íìsɔ́ɔ̀ bũ̌in, ké wa taɓa ma dú hwuɖu. 7Ké Ɖéà kè ɔ nììn dyú ɓěɔ̀ xwɛ̃́ìn ma ɔ bũ̌in, ké wa taɓa ma dú hwuɖu. Hwɛ̀ ké Jòsé kè Wéɖécà xwɛ̃́ìn ma ɔ bũ̌in, ké wa taɓa ma dú hwuɖu ɖekè.
8Ké Íìsɔ́ɔ̀ diè ma Jékɔ̀ dyi, ké ɔ ɖá, “Ɖɛ́ mɔ̀ nyúà-ɖɛ̀-dù jĩ̀ kà ɓɛ́ ḿ kè wa gmɔ̌ìn kà kɛɛ xwíníín nyɛ́?”
Ké Jékɔ̀ ɖá, “Ɓɔ̌ɔ̀, ɔ mɔ̀, ní mɔ́ ɓɛ́ nì hwòɖǒ ké dyi dè jèe.”
9Kɛɛ Íìsɔ́ɔ̀ ɖá, “Ḿ ɖíí, ḿ ɓéɖé ɓáún-ɓáún. M̀ nììnɔ̀ mɛ nì ɓó.”
10Ké Jékɔ̀ ɖá, “Gbào, ɓɔ̌ɔ̀. Ɔ jǔ ké nì hwòɖǒ dyi ḿ múin dèìn ní, ní ɓaà m̀ ní, kpɔ̃ nyíí-ɖɛ̀ɔ̀ ḿ xwaún, sepóɛɖé ḿ dyé m̀ kà nyɔ kéɔ́ kà Gèɖèpɔ́ɔ̀ dyéɛ. M̀ ɖǎ ní jè dyi kpɔ̃ nɔ̀mɔ̀ dyíin. 11Kpɔ̃ nyíí-ɖɛ̀ ɓɛ́ ḿ dyàà m̀ wɛ̃ɛ dyi, ní ɓaà m̀ ní, sepóɛɖé Gèɖèpɔ́ɔ̀ ɖǎ ḿ nɔ̀mɔ̀ dyíin dyí nyu, ké ḿ ɖǎ ɖɛ ɓáún-ɓáún ɓéɖé.” Ɔ ɓaà ma Íìsɔ́ɔ̀ mìɔ jèɛɛ, Íìsɔ́ɔ̀ wɔ̃́, ké ɔ kpɔ̃ɔ ma dyi.
12Hwɛ̀ ké Íìsɔ́ɔ̀ ɖá, “À mɛ kpá hwìè xwíníín, ɓɛ́ à kéá mu, ké ní mu m̀ dyúa nììn.”
13Kɛɛ Jékɔ̀ cɛ̃ɛ ma ɔ gbo, ké ɔ ɖá, “Ɓɔ̌ɔ̀, m̀ dyuòɛ̀ kà dyú ɓěɔ̀ se nàà ɓɛ́ìn wàɖà-wàɖà kɛ, ké kà ḿ ɓéɖé ḿ ké mú ma ɓó nyúà-ɖɛ̀ nì dyú gbo ɓěɔ̀ jèɛ. Ɔ jǔ ké nà-nàɔ̀ dyi kɔ̃ zi mìɔ ɓó nyúà-ɖɛ̀ ɓěɔ̀ bìì ní, nìí, wa mu mɛ́ìn. 14Ɓɔ̌ɔ̀, mu dyúa. Ḿ kè dyú ɓěɔ̀ kè nyúà-ɖɛ̀ ɓěɔ̀ mu nà-ɓò ɓɛ́ à ɓɛ́ìn xwa kɛɛ dyàùn. À mu mú maùn, ɓɛ́ à ké dyi tee, ɓɛ́ à ké ɖé m̀ gbo nyini ɖé Séì-ɓòɖòɔ̀ kɔ̃.”
15Hwɛ̀ ké Íìsɔ́ɔ̀ ɖá, “Wɔ̃́ ɓɛ́ ḿ ké ní gàa ɓěɛ̀ ɖíɛ́ ɓě m̀ gbo sè.”
Kɛɛ Jékɔ̀ ɖá, “Ɔ mɛ ɓɔ́ ná nìɛ̀. Ɓɔ̌ɔ̀, ɖɛ ní mɔ́ nyɛ̀nɛ̀ɛ̀ kɛɛ mɔ̀, ɓɛ́ nì hwòɖǒ ké ḿ múin dèìn.” 16Ɔ jèɛɛ, Íìsɔ́ɔ̀ kɔ́ìn ma ɖe, ké ɔ mu ma ɖé Séì-ɓòɖòɔ̀ kɔ̃ ɖe ɓó wéa ɓaɖa. 17Kɛɛ Jékɔ̀ mu ma ɖé Súkò-pàɔ̀ mú, ké ɔ po ma ɖé gbǒ ɖò ɓó ɔ mìɔùn bìì, ké ɔ po ma ɔ nyúà-ɖɛ̀ ɓěɔ̀ bìì gbáá ɓě. Ɔ jèɛɛ, wa jǔìn ma kà páɔ̀ Súkò-nyɛ̀nɛ̀ kɔ̃̀ xwíníín mɔ̀à gbáá kɛ.
18Hwɛ̀ ké Jékɔ̀ nyini ma ɖé Sɛ́kɛ̃̀ìn-hwɔ̀ɖɔ̀ nìà ɖé Kénà-ɓòɖòɔ̀ kɔ̃ɛɛ mú ɖé gìɖìǐ mú, ké ɔ nyànàìn ma ɔ jàɖàìn-gbò ɓěɔ̀ ɖé hwɔɖɔɔ̀ wáún dyi. Kǎà ɔ hwìè-kpà sɔ̀à ɖé Páɖàùn-Áwàɖàùn-ɓòɖòɔ̀ kɔ̃, muà ɖé Kénà-ɓòɖòɔ̀ kɔ̃ɛɛ nyu ma mánáín hwɛ̀ɛ̀. 19Ké ɔ dɔ̃ ma pá kɔ̃̀ kɔ̃ ɔ nyànàìn ma kà ɔ jàɖàìn-gbò ɓěɔ̀ dyiɛɛ Hámɔ̀ɛ̀ dyú ɓě gbo. Hámɔ̀ mɔ̀ ma Sɛ́kɛ̃̀ìn ɓǎ. Ɔ dɔ̃̀ìn páɔ̀ wíɖí-pĩ̀à hɔ̃dɛ̀ɖɛ̀ ɖò mú. 20Ɓóɛ̀ ɔ po ma sáa-kɔ̃-zàìn-gbàà ɖò, ké ɔ jǔìn ma gbààɔ̀ Ɛ̀-Ɛ́ɖòhè-Éézùɖùɛ̀-nyɛ̀nɛ̀.#33:20 Ɛ̀-Ɛ́ɖòhè-Éézùɖùɛ̀-nyɛ̀nɛ̀ɔ̀ xwíníín mɔ̀ Éézùɖùɛ̀ɛ̀ Gèɖèpɔ́ɔ̀ mɔ̀ nyɔ ɓéɖé kpé séín.
Tans Gekies:
Jɛ́nɛ́sì 33: ƁB02
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Bassa Bible © Bible Society Liberia, 2002.
