Jɛ́nɛ́sì 17
17
Sàà-mɛ́-mɛ́ mɔ̀ dèè-wùɖùɔ̀ dyí-tɛ̀mɛ̀ìn-ɖɛ̀
1Ti ɓɛ́ Éébànà ɖǎ ma zɔ̃ kpáɖá-nyɔ hĩinyɛ ɓaɖa-bùè sè mɛ̀nɛ̌ìn-hĩinyɛ nyuɛɛ, Bounɓoɔ̀ wóɖóìn ma ɔ dyí, ké ɔ ɖá, “Mɔ̄ mɔ̀ kpé-séín-ɓéɖé-Gèɖèpɔ́ɔ̀. M̀ mɛ sí ḿ kíɖíí, ɓɛ́ m̀ ké se kɛɛ ɖò ɓéɖé. 2Ní mu dèè-wùɖù nìà ɓó ḿ kè mɔ̀ pṹa kɛɛ kɔ̃in kpɔ̃ùn kóɖó-kóɖó, ké ní muɛ nyuùn ɓɛ́ m̀ ké dúún zaìn mìɔ cá.” 3Ké Éébànà taɓa ma dú hwuɖu ɓó Gèɖèpɔ́ɔ̀ dyúa. Ké Gèɖèpɔ́ɔ̀ cɛ̃ɛ ma ɔ gbo ɖe, ké ɔ ɖá, 4“Dyéɛ, dèè-wùɖù nìà ɓó ḿ kè mɔ̀ pṹa kɛɛ, ɔ kɛà kɛ̀. Nì mu ɓóɖó-dù ɓáún-ɓáún ɓǎ jǔùn. 5Nì nyɛ́nɛ́ɔ̀ se Éébànà jǔɛ mu ɖe. Ɔ muá Ééɓòɖòhɛ̃́ɛ̀#17:5 Ééɓòɖòhɛ̃́ɛ̀-nyɛ̀nɛ̀ɔ̀ xwíníín mɔ̀ ɓóɖó-dù ɓáún-ɓáún ɓǎ. jǔùn, sepóɛɖé ní mu m̀ ɓóɖó-dù ɓáún-ɓáún ɓǎ mú nyuùn. 6Ní muɛ nyuùn ɓɛ́ m̀ ké dúún zaìn mìɔ cá. Ní muɛ nyuùn ɓɛ́ ɓóɖó-dù ɓě ké ɖé m̀ mú sɔ̀ìn, ké ní muɛ nyuùn ɓɛ́ kã́á ɓě ké ɖé m̀ mú sɔ̀ìn ɖekè.
7“Ɓó kɔ̃in ɖeɛɛ, ní mu dèè-wùɖùɔ̀ kɔ̃in kpɔ̃ùn kánáá pū ɓó m̀ kè nì xwíníín-dyù ɓě gbo, ɓɛ́ ḿ ké m̀ kè nì xwíníín-dyù ɓěɛ̀ Gèɖèpɔ́ɔ̀ jǔ kánáá pū. 8Ké ní mu m̀ Kénà-ɓòɖò kɔ̃̀ kɔ̃ ɓɛ́ m̀ mɔ̀à ɖéèɛɛ gànáɔ̀ nyíìn, ɓɛ́ ɔ ké m̀ kè nì xwíníín-dyù ɓěɔ̀ kɔ̃̀ɔ̀-ɖɛ̀ jǔ kánáá pū, ké ní mu ɓěɛ̀ Gèɖèpɔ́ɔ̀ jǔùn.”
9Ké Gèɖèpɔ́ɔ̀ cɛ̃ɛ ma Ééɓòɖòhɛ̃́ɛ̀ gbo ɖe, ké ɔ ɖá, “Ɓó m̀ kè nì xwíníín-dyù deìn dúún ɓěɔ̀ bììɛɛ, ɓě mɔ̀ùn mɛ kpɔ̃ dèè-wùɖùɔ̀ dyi kánáá pū. 10À dèè-wùɖù ɓɛ́ m̀ kè nì xwíníín-dyù deìn dúún ɓěɔ̀ kéà dyi kpɔ̃ɛɛ dyí-tɛ̀mɛ̀ìn-ɖɛ̀ kɛà kɛ̀. Ɓě mɔ̀ gàa-dyù séín ɓěɔ̀ kɛɛ, ɓě ɓéɖé ɓě ké sàà mɛ́. 11Ɓě ɓéɖé ɓɛ́ ɓě ké sàà mɛ́, ɓɛ́ ɔ ké dyí-tɛ̀mɛ̀ìn-ɖɛ̀ jǔ ɓó dèè-wùɖù nìà ɓó ḿ kè ɓě pṹa kɛɛ jè. 12Sɔ̀ìn ɓó zɛ̃̌ɛ̀ gboɛɛ, ɓěɛ̀ gàa-dyù séín ɓɛ́ wa mu wé mɛ̀nɛ̌ìn-tã nyuùn wɛ̃ɛ ɓéɖé ɓɛ́ wa ké sàà mɛ́, hwɛ̀ ḿ po níiń, gǐì-gàà ɓě ɓɛ́ wa wóɖó ɖé ɓěɛ̀ gbǒɔ̀ xwíníín nyɛ kè gǐì-gàà ɓěɔ̀ nyɔ ɓɛ́ ɓě dɔ̃ wíɖí mú sɔ̀ìn ɖé ɖíà ɓě xwaún wɛ̃. 13Gǐì-gàà ɓě wóɖó ɖé ɓěɛ̀ gbǒɔ̀ xwíníín nyɛ kè gǐì-gàà ɓě ɓɛ́ ɓě dɔ̃ wíɖí múɛɛ, wa séín ɓéɖé wa ké sàà mɛ́. À dèè-wùɖù ɓá ɓěɛ̀ fɔ́ɔ̀ jè dyíɛɛ mu sè-ná-sèɛ̀ dèè-wùɖù jǔùn. 14Gàa-dyùɔ̀ nyɔ ɓɛ́ ɔ se sàà mɛ́ɛ muɛɛ, ɓě ɓéɖé ɓɛ́ ɓě ké ɔ woɖo gbo cɛ̃, sepóɛɖé ɔ ɖǎ dèè-wùɖùɔ̀ mú jaɖa.”
15Ké Gèɖèpɔ́ɔ̀ cɛ̃ɛ ma Ééɓòɖòhɛ̃́ɛ̀ gbo ɖe, ké ɔ ɖá, “Ɓá nì gmàà Séwàɖà jè dyíɛɛ, m̀ mɛ ɓɔ́ ɔ Séwàɖà ɖáìn ɖe. Ɔ nyɛ́nɛ́ muá Seɖɔ́#17:15 Seɖɔ́-nyɛ̀nɛ̀ɔ̀ xwíníín mɔ̀ kã́áɛ̀ dyú-màà. jǔùn. 16Ní mu ɔ mana kɔ̃ poùn jǎà, ɓɛ́ ḿ ké m̀ gàa-dyù ɖò nyí dyììn ɖé ɔ mú. Ké ní mu Seɖɔ́ mana kɔ̃ poùn, ɓɛ́ ɔ ké ɓóɖó-dù ɓěɛ̀ ɖe jǔ, ɓɛ́ ɓóɖó-dù ɓěɔ̀ kã́á ɓě ké ɖé ɔ mú sɔ̀.”
17Hwɛ̀ ké Ééɓòɖòhɛ̃́ɛ̀ taɓa ma dú hwuɖu ɓó Bounɓoɔ̀ dyúa. Ké ɔ kéɛ̀ ma, ké ɔ cɛ̃ɛ ma ɖé ɔ hwòɖǒ bũ̌, ké ɔ ɖá, “Gàa ɓɛ́ ɔ ɖǎ zɔ̃ hɔ̃dɛ̀ɖɛ̀ ɖò nyuɛɛ ɓɛ́ìn dyú wóɖóɛ̀n ɖeè? Ké Seɖɔ́ ɓɛ́ ɔ ɖǎà zɔ̃ kpáɖá-nyɔ hĩinyɛ ɓaɖa-bùè nyuɛɛ mɔ̀ùn ɓɛ́ìn dyú wóɖóɛ̀n ɖeè?” 18Ké ɔ cɛ̃ɛ ma Gèɖèpɔ́ɔ̀ gbo, ké ɔ ɖá, “Nyɛ́ ɖá m̀ nyíɔ́ má Ésìméò manaɔ̀ kɛ́?”
19Hwɛ̀ ké Gèɖèpɔ́ɔ̀ ɖá, “Ɔ se ná nì, kɛɛ nì gmàà Seɖɔ́ mɔ̀ nyɔ mu gàa-dyù ɖò wóɖóìn ɓó m̀ bìì. Ké nì mu ɔ Áázè-nyɛ̀nɛ̀#17:19 Áázè-nyɛ̀nɛ̀ɔ̀ xwíníín mɔ̀ dyɔ́-wùɖù. jǔìn. Ḿ kè ɔ mu wuɖu dèìn, ɓɛ́ ɔ ké sè-ná-sèɛ̀ dèè-wùɖù jǔ ɓó ɔ xwíníín-dyù ɓě bìì. 20Ké ɓá Ésìméò jè dyíɛɛ, ḿ ɖǎ nì wuɖuɔ̀ wɔ̃́. Gmɔ̀ nɔ̄, ní mu ɔ mana kɔ̃ poùn, ɓɛ́ ḿ ké ɔ dúún zaìn, ɓɛ́ ɔ ké dyí vò mìɔ cá. Ɔ mu wuɖuí-kɔ̃̀-nyɔ̀ ɓaɖa-bùè sè sɔ̃́ wóɖóìn, ké ní mu ɓóɖó-dù vɛ̀nɛ̀ ɖò nyuùn sɔ̀ìn ɖé ɔ mú. 21Kɛɛ ḿ kè Áázè ɓɛ́ Seɖɔ́ muà m̀ bìì wóɖóìn ɓó zɔ̃ muà dyiìn nyɛɛ, ti dè kà múɛɛ, mu wuɖu dèìn.” 22Ti ɓɛ́ Gèɖèpɔ́ɔ̀ ɖǎ ma Ééɓòɖòhɛ̃́ɛ̀ gbo wùɖùɛ̀ hwɔɛɛ, ɔ mu ma dyɔún ɖe.
23Ɓó wé dyúáɖòɔ̀ xwíníín nyɛɛ, Ééɓòɖòhɛ̃́ɛ̀ ɖú ma gàa-dyù séín ɓě nì ma ɖé ɔ gbǒɔ̀ xwíníín nyɛɛ dyí. Ké ɔ ɖáɓá ma wa sàà kà Gèɖèpɔ́ɔ̀ nyuɛ ma kà ɔ gbo cɛ̃ɛ kɛ. Wa mɔ̀ ɔ dyú-gàà Ésìméò kè gǐì séín ɓɛ́ wa wóɖó ma ɖé ɔ gbǒɔ̀ xwíníín nyɛ kè gǐì séín ɓɛ́ ɔ dɔ̃ ma wíɖí múɛ. 24Ééɓòɖòhɛ̃́ɛ̀ mɔ̀ǎ ma zɔ̃ kpáɖá-nyɔ hĩinyɛ ɓaɖa-bùè sè mɛ̀nɛ̌ìn-hĩinyɛ ti ɓɛ́ ɔ mɛ́ ma sàà kɛ, 25ké ɔ dyú-gàà Ésìméò mɔ̀ǎ ma zɔ̃ ɓaɖa-bùè sè tã. 26-27Ééɓòɖòhɛ̃́ɛ̀ kè ɔ dyú-gàà Ésìméò kè gǐì-gàà séín nì ma ɖé Ééɓòɖòhɛ̃́ɛ̀ gbǒɔ̀ xwíníín nyɛ, kɛbì wa wóɖóìn ma ɖé ɔ gbǒɔ̀ xwíníín, mɔɔ ɔ dɔ̃ ma wa wíɖí mú sɔ̀ìn ɖé ɖíà ɓě xwaún wɛ̃ɛ, wa mɛ́ ma sàà ɓó wé dyúáɖòɔ̀ xwíníín.
Tans Gekies:
Jɛ́nɛ́sì 17: ƁB02
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Bassa Bible © Bible Society Liberia, 2002.
