YOANA 20
20
Kũthayũũka kwa Yesu
(MATHAYO 28.1–10; MALIKO 16.1–8; Luka 24.1–12)
1Na mũthenya wa mbee wa kyumwa Meli Makatelene athi mbũanĩ tene, kwĩ kĩvindũ, na oona ĩvia yĩ ĩvete mbũanĩ. 2#Yoa 13.23.Na kwondũ wa ũu athi asembete vala ve Simoni Vetelo, na mũmanyĩw’a ũngĩ ũla wendetwe nĩ Yesũ, na amea, Nĩmaumisye Mwĩaĩi mbũanĩ mamũtwaa, na tũtyĩsĩ vala mamwĩĩte. 3Na ĩndĩ Vetelo aumaala, e na mũmanyĩw’a ũla ũngĩ, na mathi maelete mbũanĩ. 4Na masemba me elĩ: ĩndĩ mũmanyĩw’a ũla ũngĩ akĩlya Vetelo maũũ, na amba ũvika mbũanĩ: 5na akunĩkĩla, na oona ngũa sya katane ila walingĩlwe syĩ nthĩ; ĩndĩ ndaavota nthĩnĩ. 6Na ĩndĩ Simoni Vetelo nake ooka, amũvikĩlĩte, na avota mbũanĩ nthĩnĩ; nake oona ila ngũa sya katane syĩ nthĩ, 7#Yoa 11.44.na kĩtambaa, kĩla kĩnaĩ mũtwe wake, kĩte na ila ngũa sya katane, ĩndĩ kĩkũnzĩtwe kĩ vandũ vakyo. 8Na ĩndĩ mũmanyĩw’a ũla wambie ũvika mbũanĩ avota, nake oona, na eetĩkĩla. 9#1 Ako 15.4; Meko 2.24–32.Nũndũ maiaĩ manamba ũmanya maandĩko, kana ndatĩa kũthayũũka kuma akw’ũnĩ. 10Na ĩndĩ amanyĩw’a asu menũka.
Yesũ aimumĩlĩla Meli Makatelene
(MATHAYO 28.9–10; MALIKO 16.9–11)
11Ĩndĩ Meli aũngeme mbũanĩ nza akĩĩa: na akĩĩa, akunĩkĩla mbũanĩ nthĩnĩ; 12na oona alaĩka elĩ mekĩe ngũa nzaũ mailyĩ, ũmwe ngalĩ ya mũtwe, na ũmwe ngalĩ ya maũũ, vala mwĩĩ wa Yesũ ũnaiĩtwe. 13Na mamũkũlya, Mũndũ mũka, wĩĩw’a nĩ kyaũ? Amea, Nũndũ nĩmatwaie Mwĩaĩi wakwa, na ndyĩsĩ vala mamwiie. 14Na ĩndĩ aneena ũu, eethyũũa, na oona Yesũ aũngeme, na ndeesĩ kana nĩ Yesũ. 15Yesũ amũkũlya, Mũndũ mũka, wĩĩw’a nĩ kyau? Wĩmantha ũũ? Nake, atalĩlya kana nĩ mũsũvĩi wa mũũnda, na amwĩa, Vwana, ethĩwa nue ũmumisye vaa, ndavya vala ũmwiie, na nĩngũmwosa. 16Yesũ amwĩa, Meli. Nake eethyũũa, na aneena Kĩevelania, Lavoni: ũalyũlo nĩ, Mũmanyĩsya. 17#Aevl 2.11,12; Alo 8.29.Yesũ amwĩa, Manya ũngiita; nũndũ ndinamba kwambata kwa Asa: ĩndĩ thi kwa ana‐a‐asa makwa, noimatavya, Nyie nĩngwambata kwa Asa wakwa, na nĩwe Ĩthe wenyu, na kwa Ngai wakwa, na nĩwe Ngai wenyu. 18Na Meli Makatelene athĩ amatavya amanyĩw’a ũndũ wamwona Mwĩaĩi; na ũndũ wamũtavya maũndũ asu.
Yesũ aimaumĩlĩla amanyĩw’a
(MATHAYO 28.16–20; MALIKO 16.14–18; Luka 24.36–49)
19Na mũthenya o ũsu wa mbee wa kyumwa, kwatuka, na mĩomo ĩvingĩtwe vala amanyĩw’a maĩ, nũndũ wa kũkĩa Ayuti, Yesũ ooka aũngama katĩ woo, na amea, Ĩthĩwai na mũuo. 20#1 Yoa 1.1.Na asya ũu, amon’ya itaa syake na mbaunĩ kwake. Na kwondũ wa ũu amanyĩw’a matana, mamwona Mwĩaĩi. 21#Yoa 17.18.Na ĩndĩ Yesũ amea ĩngĩ, Ĩthĩwai na mũuo: o ũndũ Asa wandũmie, nĩw’o ngũmũtũma. 22#Mwa 2.7.Na asya ũu, amavevea, na amea, Osai Veva Mũtheu: 23#Mt 16.19; 18.18.O ala mũũekea naĩ syoo, namo nĩmekũekewa; na ala mũtekũekea naĩ syoo, matikũekewa.
Yesũ aimumĩlĩla Thoma
24 #
Yoa 11.16; 14.5. Ĩndĩ Thoma, ũmwe wa ala ĩkũmi na elĩ, wetawa Ĩvatha, ndaĩ vamwe na ala angĩ yĩla Yesũ wokie. 25#Yoa 19.34.Ĩndĩ amanyĩw’a ala angĩ mamwĩa, Nĩtwamwona Mwĩaĩi. Ĩndĩ we amea, Ndanona matonya ma mĩsumaa itaanĩ syake, na ngekĩa kyaa kyakwa matonyanĩ ma mĩsumaa, na ngekĩa kw’oko kwakwa mbaunĩ kwake, ndiketĩkĩla nongi.
26 #
Yoa 20.19. Na matukũ nyanya mathela amanyĩw’a make maĩ nyũmbanĩ nthĩnĩ ĩngĩ, na Thoma aĩ vamwe nao. Na Yesũ ooka, mĩomo ĩ mĩvinge, na aũngama katĩ wamo, na asya, Ĩthĩwai na mũuo. 27Na ĩndĩ amwĩa Thoma, Ete kyaa kyaku vaa, noiona itaa syakwa; na ete kw’oko kwaku, wĩkĩe mbaunĩ kwakwa: na ndũkethĩwe ũtetĩkĩlĩte, ĩndĩ wĩthĩwe wĩtĩkĩlĩte. 28#Yoa 1.1.Thoma amũsũngĩa amwĩa, Mwĩaĩi wakwa na Ngai wakwa! 29#1 Vet 1.8.Yesũ amwĩa, Wetĩkĩla nũndũ wambona: nĩ aathime ala matonete na nĩmetĩkĩlĩte.
Kĩtumi kya kũandĩka Ĩvuku yĩĩ
30 #
1 Yoa 5.13; Alo 1.17. Na kwĩ syama ingĩ mbingĩ ila Yesũ wekie amanyĩw’a make me vo, ĩtaandĩkĩtwe ĩvukunĩ yũ: 31ĩndĩ ii niandĩkĩtwe, nĩ kana mwĩtĩkĩle atĩ Yesũ nĩwe Klĩsto, Mwana wa Ngai; na ũndũ wa kwĩtĩkĩla kwenyu mwĩthĩwe na thayũ syĩtwanĩ yake.
Tans Gekies:
YOANA 20: Mbivlia
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
