Yosua 1
1
Napangparentan Puang Allataala lako Yosua narampai to tana Kanaan
1Ia tonna matemo Nabi Musa, tompangjaman PUANG Allataala, mangkada-Mi PUANG Allataala lako Yosua anakkana Nun, wakkele'na Nabi Musa, Nakua, 2“Matemi Nabi Musa, tompangjaman-Na'. Iamo joo la sadiako mujoloananni to to-Israel llambanni Sa'dan Yordan, mitamaii to tana la Kuben kamu'. 3Mangkami Kupau lako Nabi Musa kumua sininna tana to la miolai, iamo la Kuben kamu',#Ulangan 11:24-25 4mangpamula llo' mai padang pallawangan ratu re' buntu Libanon, nnola randan Sa'dan Efrat jio kadellekan, na sininna tanana to-Het, angge randan Tasik Tangnga llan kalambunan, ia ngasanmo joo to tana la Kuben kamu' mipupadang. 5Moi mesa' tau te'da ngkullei ntaloko angge tuomu, nasaba' Aku' tatta' ssolanko, susi Nabi Musa tonna tee tatta' Kusolan. La Kuampai tarruhko, te'da Kulassalaiko.”#Ulangan 31:6, 8; Ibrani 13:5
6Mpatarruhhi kadan-Na Puang Allataala lako Yosua Nakua, “Mangka Kubasse mpake sapah lako tojolomi kumua la Kubenni tee tana Kanaan. Baraniko mumasumanga', nasaba' ikomo la njoloananni tee bangsa la rrampai to tana mangka Kubasse lako tojolomi.#Ulangan 31:6, 7, 2 7Iara ia, la matappa' tonganko mubarani. La mupugauk tongan to sininna atoran to nabenko Nabi Musa tompangjaman-Na', danggi' lalo na den tangmuingaran, dikua na sininna to apa mupugauk la melo assele'na. 8Ia joo atoran to diuki' llan bo' Taurat, la tatta' mubacan umma'-Ku'. La da'tan mupelajahhi issinna, ammutatta' mpugauk ngasanni to apa diuki' llan. Ia ke mupugaukki susi joo, ia to katuoanmu la manyaman na ia to mupugaukkuna la melo assele'na. 9Ingaranni, Kupauanmoko dikua mumasumanga', mubarani. Danggi' mumalaja', na danggi' too namoro' penawammu, nasaba' Aku' PUANG Allataala to musompa, ssolanko umbo-umbo munii male.”
Yosua mben parenta sola pangpatuju lako to-Israel
10Napangparentanmi Yosua lako to tomatua-tua to-Israel nakua, 11“Male kamu' llelei ngasanni to tendana to-Israel mikuanni kumua, ‘Pasadiai to kinallomi, nasaba' tallung allomora tamale llambanni Sa'dan Yordan la ntamai tana to Nabenki' PUANG Allataala, la tapupadang.’ ”
12Nakuamo Yosua lako suku Ruben sola suku Gad sola sitangngana suku Manasye, kumua,#Bilangan 32:28-32; Ulangan 3:18-20; Yosua 22:1-6 13“Ingaranni to mangka napauan kamu' Nabi Musa, tompangjaman PUANG Allataala kumua, ia tee tana inde' kadellekanna Sa'dan Yordan Nabenmo kamu' PUANG Allataala to misompa la mipupadang. 14Ake' natorro bangmo inde' to sininna repokkomi sola patuoanmi, apa ia to kamu' pangbarani la sadia kamu' male parari mbalii suku to-Israel laenna, na kamu' la njoloanni llambanni Sa'dan Yordan. 15Mitulungngi narampai to tana la Nabenni PUANG Allataala llan kalambunanna Sa'dan Yordan, tana Kanaan to la napupadang. Ianna torro manyamanmo llan joo tana to Nabenni PUANG Allataala to misompa, mane'ra kamu' wa'ding pole pole' ntee tanami to miniimo torro manyaman inde' kadellekan Sa'dan Yordan to mangkamo naben kamu' Nabi Musa tompangjaman PUANG Allataala.”
16Pada nakuamo mebali, “Apamo to tasuankan, iamo kipugauk, na moi umbo tanii ssuakan male, iamo la kinii male. 17Nang la kituru' to parentata', susi Nabi Musa tatta' kituru' to parentana. Dennaa upa' Nada'tan PUANG Allataala to tasompa ntulungki', susi Nabi Musa da'tan Natulung Puang Allataala! 18Inda-inda to cia' nturu' parentata', ba'tu te'da namadoang mpesa'dingngiki', la dipatei. Baraniki', tamasumanga'!”
Tans Gekies:
Yosua 1: mvpAD
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© Wycliffe Bible Translators, Inc. All rights reserved.