Mâ-khó 14

Sat-hoi Yâ-sû ke Yîm-mèu

(Mâ-thai 26:1-5; Lu-kâ 22:1-2; Yok-hon 11:45-53)

1Phàn-ko-chiet lâu Chhù-kau-chiet ke chhièn lióng-ngit, chi-sṳ̂-chóng lâu kîn-ho̍k kau-sṳ̂ yîm-mèu oi pi-me̍t chok Yâ-sû, chiông kì chhṳ̀-sí. 2Kì-têu kóng: “Ngài-têu m̀-hó chhai chiet-khì-chûng ha-sú, miên-tet ngiâ-hí mìn-chung ke phau-thung.”

Fu-ngìn-kâ Yung Hiông-yù Kò Yâ-sû

(Mâ-thai 26:6-13; Yok-hon 12:1-8)

3Yâ-sû chhai Pak-thai-nì pot thái-kô ke Sî-mùn vuk-hâ; sṳ̍t-fan ke sṳ̀, yû yit-ke fu-ngìn-kâ tai yit-chak ngiu̍k-kon-é lòi, tî-poi chông chhin chṳ̂n-kui ke sùn nâ-tha̍t hiông-yù. Kì tá-pho ngiu̍k-kon, chiông hiông-yù tó chhai Yâ-sû ke thèu-nà-táng. 4Yèn-si̍t chûng ke ngìn yû-têu chhin mò fôn-hí, pí-chhṳ́ ngi-lun kóng: “Ngióng-pân án tá-sóng nè? 5Liá hiông-yù cho-tet mai sâm-pak-làng-chak ngiùn-chhièn#14:5 Yit-chak “ngiùn-chhièn” he tông-sṳ̀ kûng-ngìn yit-ngit ke kûng-chhièn., nâ-lòi kiu-chi khiùng-khú-ngìn â!” Kì-têu chhiu chit-phi ke fu-ngìn-kâ.

6Chúng-he Yâ-sû kóng: “Yù-chhai kì! Cho-má-ke vì-nàn kì nò? Kì vi ngài cho ke he yit-khien chhin-chiâng ke sṳ. 7Yîn-vi sòng-sòng yû khiùng-khú-ngìn thùng ngì-têu khiung-ha, na-he oi, ngì-têu sùi-sṳ̀ cho-tet kiu-chi kì-têu; chúng-he ngài m̀-he sòng-sòng thùng ngì-têu khiung-ha. 8Kì yí-kîn chhin só-nèn ke cho lé; kì chiông liá hiông-yù tó chhai ngài ke sṳ̂n-song he vi ngài ke mài-chong siên cho chún-phi. 9Ngài sṳ̍t-chhai lâu ngì-têu kóng, phû-thiên-ha, mò-lun fuk-yîm chhòn-to má-ke só-chhai, tak-sà tû oi kóng-hí kì só-cho ke sṳ, lòi ki-ngiam kì.”

Yù-thai Chhut-mai Yâ-sû

(Mâ-thai 26:14-16; Lu-kâ 22:3-6)

10Yâ-sû sṳ̍p-ngi-ke ho̍k-sâng tông-chûng, yû yit-ke Kâ-lio̍k-ngìn Yù-thai; kì hi kien chi-sṳ̂-chóng, oi chiông Yâ-sû kâu-pûn kì-têu. 11Kì-têu thâng-tó Yù-thai só-kóng ke, chhiu fî-sòng fôn-hí, yu tap-yin nâ chhièn pûn kì. Tui ke-sṳ̀ hí, Yù-thai chhiu chhìm kî-fi oi chhut-mai Yâ-sû.

Yâ-sû Thùng Ho̍k-sâng Khiung-ha Sṳ̍t Phàn-ko-chiet ke Vân-chhôn

(Mâ-thai 26:17-25; Lu-kâ 22:7-14,21-23; Yok-hon 13:21-30)

12Chhù-kau-chiet ke thi-yit-ngit, chhiu-he chhṳ̀ Phàn-ko-chiet kâu-yòng ke-ngit, ho̍k-sâng lòi mun Yâ-sû kóng: “Ngì oi ngài-têu hi nai-vi vi ngì chún-phi Phàn-ko-chiet ke vân-chhôn nè?”

13Yâ-sû chhiu phai lióng-ke ho̍k-sâng, fûn-fu kì-têu kóng: “Ngì-têu ngi̍p-sàng hi, voi tù-tó yit-ke ngìn tai-tén yit-kon súi, ngì-têu chhiu thèn-tén kì; 14kì hi-to nai kâ, ngì-têu chhiu mun ke kâ ke chú-ngìn kóng: ‘Sîn-sâng kóng: Ngài lâu ngài ke ho̍k-sâng sṳ̍t Phàn-ko-chiet vân-chhôn ke hak-thâng chhai nai-vi?’ 15Kì voi tai ngì-têu hi khon lèu-táng yit-kiên pu-chṳ-hó ke thai fòng-kiên; ngì-têu chhiu chhai ke-vi thoi ngài-têu chún-phi.”

16Lióng-ke ho̍k-sâng chhut-hi, ngi̍p-hi sàng-tú; só tù-tó ke chhiòn-phu lâu Yâ-sû tui kì-têu kóng ke khiung-yong; kì-têu chhiu chhai ke-vi chún-phi Phàn-ko-chiet ke vân-chhôn.

17Lìm-am-é, Yâ-sû lâu sṳ̍p-ngi-ke ho̍k-sâng chhiòn-phu to-chhè. 18Kì-têu chhô-hâ-lòi sṳ̍t ke sṳ̀-chiet, Yâ-sû kóng: “Ngài sṳ̍t-chhai lâu ngì-têu kóng, ngì-têu tông-chûng thùng ngài khiung-ha sṳ̍t ke, yû yit-ke ngìn oi chhut-mai ngài.”

19Ho̍k-sâng chhiu chhin yù-sèu, yit-ke yit-ke mun kì kóng: “Kám he ngài?”

20Yâ-sû en-kóng: “He ngì-têu sṳ̍p-ngi-sà tông-chûng ke yit-sà; lâu ngài yung khiung-chak phàn-è vun-piáng ke, kì chhiu-he. 21Cheu Sṳn-kîn só kóng, Ngìn-chṳ́ voi su-hoi; chúng-he chhut-mai Ngìn-chṳ́ ke ngìn yû châi-fo lé! Kì mo̍k chhut-se hàn-kha hó!”

Chú ke Vân-chhôn

(Mâ-thai 26:26-30; Lu-kâ 22:15-20; Kô-lìm-tô Chhièn-sû 11:23-25)

22Kì-têu sṳ̍t ke sṳ̀-chiet, Yâ-sû nâ-hí piáng-è, kám-chhia Song-ti heu, chhiu pak-khôi, pûn-pûn kì-têu, kóng: “Nâ-lòi sṳ̍t; liá he ngài ke sṳ̂n-thí.”

23Kì yu nâ-hí pî-é, kám-chhia Song-ti heu, kâu-pûn kì-têu; kì-têu chhiòn-phu chhiu lîm. 24Yâ-sû kóng: “Liá he ngài ke hiet, he chṳn-mìn Song-ti lâu ngìn li̍p-yok ke hiet, vi chhin-tô ngìn lòi liù-chhut ke. 25Ngài sṳ̍t-chhai lâu ngì-têu kóng, ngài chhie̍t-tui m̀-voi chai lîm liá phù-thò-chiú, chhṳ̍t-to chhai Song-ti ke koet lîm sîn-chiú ke-ngit.”

26Kì-têu chhong yit-sú sṳ̂, chhiu chhut-lòi, to Kám-lám-sân hi.

Yâ-sû Yi-ngièn Pí-tet M̀ Ngin Kì

(Mâ-thai 26:31-35; Lu-kâ 22:31-34; Yok-hon 13:36-38)

27Yâ-sû tui kì-têu kóng: “Ngì-têu lûng-chúng voi lì-khôi ngài, yîn-vi Sṳn-kîn ki-chai:

Song-ti kóng:

‘Ngài oi kûng-kit mu̍k-ngìn,

yòng-khiùn chhiu fûn-san thet-hi.’

28Chúng-he ngài fu̍k-fa̍t yî-heu, oi pí ngì-têu siên hi Kâ-li-li.”

29Pí-tet kóng: “Chhiu-son phe̍t-ngìn chhiòn-phu lì-khôi ngì, ngài chhie̍t-tui m̀-voi lì-khôi ngì!”

30Yâ-sû tui kì kóng: “Ngài sṳ̍t-chhai lâu ngì kóng, kîm-am-pû, kiê-é thài thi-ngi-pái#14:30 Yû-têu kú-kién mò “thi-ngi-pái”. yî-chhièn, ngì voi sâm-pái m̀ ngin ngài.”

31Pí-tet yung hàn-kha kiên-thin ke khiéu-hi kóng: “Chhiu-son ngài yit-thin oi thùng ngì khiung-ha sí, ngài ya chhie̍t-tui m̀-voi m̀ ngin ngì!”

Khì-thâ ke ho̍k-sâng ya chhiòn-phu án-ngiòng kóng.

Chhai Khiet-sî-mâ-nì-yèn Khì-tó

(Mâ-thai 26:36-46; Lu-kâ 22:39-46)

32Kì-têu lòi-to yit-ke só-chhai, miàng ôn-to Khiet-sî-mâ-nì; Yâ-sû lâu ho̍k-sâng kóng: “Ngì-têu chhai liá-vi chhô, tén ngài hi khì-tó.”

33Yèn-heu kì tai Pí-tet, Ngâ-kok lâu Yok-hon khiung-ha hi. Kì khôi-sṳ́ kám-kok chhin yù-sông thung-khú, 34tui kì-têu kóng: “Ngài ke sîm kân-khú to voi sí. Ngì-têu liù chhai liá-vi, oi kín-siáng ô!” 35Kì hàng-chhièn têu-é, chhiu phu̍k chhai thi-song, khién-khiù Song-ti, na-he cho-tet, m̀-sṳ́ pûn kì kîn-li̍t liá-ke thung-khú. 36Kì kóng: “Â-pâ, ngài ke Yà â, chhai Ngì fàm-sṳ tû nèn. Khiù Ngì chiông liá-ke khú-pî sái-chéu; chúng-he, m̀-hó cheu ngài ke yi-sṳ, oi cheu Ngì ke chṳ́-yi.”

37Kì to-chón-lòi ke sṳ̀, fat-hien sâm-ke ho̍k-sâng soi-thet, chhiu lâu Pí-tet kóng: “Sî-mùn, ngì chhai liá soi-muk he-mò? Mò fap-thu kín-siáng yit-tiám-chûng kiú mâ? 38Ngì-têu oi kín-siáng khì-tó, miên-tet ham-lo̍k mì-fe̍t. Ngì-têu khok-sṳ̍t sîm-lìn kâm-ngien, chúng-he ngiuk-thí ngiôn-ngio̍k.”

39Kì yu hàng-ko-hi, hàn-he yung khiung-yong ke fa khì-tó. 40Yèn-heu kì yu to-chón ho̍k-sâng ke-vi, khon-tó kì-têu yu soi-thet, yîn-vi kì-têu ke muk-chû pak-m̀-khôi; kì-têu ya m̀-tî oi lâu kì kóng má-ke chang hó.

41Yâ-sû thi-sâm-pái to-chón-lòi, lâu kì-têu kóng: “Ngì-têu hàn soi-muk, hàn chhai ke-vi hiû-sit mâ? La-pái lé, sṳ̀-kiên to lé, khon â, Ngìn-chṳ́ yí-kîn pûn-ngìn chhut-mai to chhui-ngìn sú-chûng lô. 42Hong-hí-lòi, ngài-têu lòi-hi! Khon â, chhut-mai ngài ke ngìn to lé!”

Yâ-sû Pûn-ngìn Chok-hi

(Mâ-thai 26:47-56; Lu-kâ 22:47-53; Yok-hon 18:2-12)

43Yâ-sû hàn kóng-tén fa ke sṳ̀, sṳ̍p-ngi-ke ho̍k-sâng chûng ke Yù-thai lòi-to. Yû yit thai-khiùn ngìn tai-tén tô-é, kun-é thùng kì khiung-ha lòi; kì-têu he chi-sṳ̂-chóng, kîn-ho̍k kau-sṳ̂, lâu chóng-ló phai-lòi ke. 44Chhut-mai Yâ-sû ke ngìn sṳ-chhièn pûn kì-têu yit-chak am-ho, kóng: “Ngài chîm má-ngìn, kì chhiu-he ngì-têu só sióng-oi ke ngìn. Ngì-têu oi chok-tó kì, ngiàm-ngiàm khon-sú, chiông kì tai-chéu.”

45Yù-thai yit to, chit-sṳ̀ hàng-to Yâ-sû mien-chhièn, ham kóng: “Sîn-sâng!” yu chîm kì. 46Só-yî kì-têu chhiu ha-sú chok Yâ-sû. 47Khî chhai sùn-thèu ke ngìn tông-chûng, yû yit-sà pâng-chhut tô-é, tui thai-chi-sṳ̂ ke phu̍k-ngìn phiak-ko-hi, chiông kì ke ngí-kûng siok-thet yit-chak. 48Yâ-sû tui kì-têu kóng: “Ngì-têu tai-tén tô-é lâu kun-é chhut-lòi chok ngài, khon ngài cho khiòng-tho he-mò? 49Ngài tak-ngit chhai sṳn-thien-tú kâu ngìn, sòng-sòng thùng ngì-têu khiung-ha, ngì-têu pin mò chok ngài. Chúng-he, liá-ke sṳ he oi yin-ngiam Sṳn-kîn só-kóng ke fa.”

50Liá-sṳ̀, só-yû ke ho̍k-sâng chhiòn-phu lì-khôi kì thò-chéu.

51Yû yit-ke heu-sâng-ngìn, sṳ̂n-song tân-chhiang phî-tén yit-te mà-pu, thèn chhai Yâ-sû ke heu-poi; kì-têu chhiu sióng-oi chok kì, 52chúng-he kì fit-thet ke-te pu-é, tá-chhak-pok chéu-thet.

Yâ-sû Chhai Ngi-fi Su Sṳ́m-phan

(Mâ-thai 26:57-68; Lu-kâ 22:54-55,63-71; Yok-hon 18:13-14,19-24)

53Kì-têu chiông Yâ-sû tai-to thai-chi-sṳ̂ ke-vi hi; só-yû ke chi-sṳ̂-chóng, chóng-ló, lâu kîn-ho̍k kau-sṳ̂ chhiòn-phu chhi-si̍p chhai ke-vi. 54Pí-tet yén-yén thèn-tén Yâ-sû, chhṳ̍t-to thai-chi-sṳ̂ ke thìn-yen-tú, chhô chhai kín-ví ke tông-chûng phoi-fó. 55Chi-sṳ̂-chóng lâu chhiòn ngi-fi sióng-chhin phan-fap chhìm chṳn-kí ko Yâ-sû, lòi thin kì sí-hìn, chúng-he chhìm m̀-tó má-ke chṳn-kí. 56Hó-tô ngìn chhut-mien cho ká kien-chṳn ko kì, chúng-he kì-têu só-kóng ke teu-m̀-tó.

57Heu-lòi yû kí-ke ngìn khî-hí-lòi, cho ká kien-chṳn ko Yâ-sû kóng: 58“Ngài-têu thâng-tó kì kóng-ko: ‘Ngài oi chiông liá-chho ngìn-sú só hí ke sṳn-thien chhak-thet, sâm-ngit-nui hí yit-chho m̀-he ngìn-sú só-cho ke sṳn-thien.’ ” 59Lièn liá-ke khúng-ko, kì-têu só-kóng ke ya teu-m̀-tó.

60Só-yî thai-chi-sṳ̂ chhai thai-kâ mien-chhièn khî-hí-lòi, mun Yâ-sû kóng: “Liá-têu ngìn ko ngì ke, ngì mò má-ke fa hó en he-mò?”

61Yâ-sû tiâm-tiâm, yit-ki fa ya m̀ kóng. Thai-chi-sṳ̂ yu mun kì: “Ngì he m̀-he Kî-tuk, he ke yin-tông su chhṳ̂n-siung ke Song-ti ke Lai-é mò?”

62Yâ-sû en-kóng: “Ngài he! Ngì-têu voi khon-tó Ngìn-chṳ́ chhô chhai Chhiòn-nèn-chá ke yu-phién, chhô-tén thiên-táng ke yùn kong-lìm!”

63Thai-chi-sṳ̂ chhiu chhá-lie̍t chhṳ-kâ ke sâm, kóng: “Ngài-têu m̀-sṳ́ phe̍t ke chṳn-ngìn lé! 64Ngì-têu yû thâng-tó kì vú-yu̍k Song-ti ke fa. Ngì-têu kóng oi ngióng-pân phan kì?”

Kì-têu chhiòn-phu phan kì yû-chhui, yin-tông chhú sí-hìn.

65Yû-têu ngìn chhiu tui kì phi héu-lân, yu êm-tén kì ke muk-chû, yung khièn-thèu-mà tá kì, mun kì kóng: “Siên-tî â, chhṳ-thòn-khon, he má-ngìn tá ngì?” Ke-têu kín-ví ya lâi-tén kì, yung pâ-chóng-mà sân kì.

Pí-tet M̀ Ngin Yâ-sû

(Mâ-thai 26:69-75; Lu-kâ 22:56-62; Yok-hon 18:15-18,25-27)

66Ke-sṳ̀, Pí-tet hàn liù chhai hâ-poi ke thìn-yen-tú. Yû thai-chi-sṳ̂ ke yit-ke sṳ́-ńg hàng ko-lòi, 67khon-tó Pí-tet chhai ke-vi phoi-fó, chhiu khon-tén kì, kóng: “Ngì me he thùng Nâ-sat-le̍t ke Yâ-sû khiung-ha ke.”

68Pí-tet féu-ngin kóng: “Ngài m̀-tî, ya mò liáu-kié ngì kóng má-ke.” Yèn-heu, kì chhut-hi chhièn-yen. Liá-sṳ̀, kiê-é chhiu thài#14:68 Yû-têu kú-kién mò “Liá-sṳ̀, kiê-é chhiu thài”..

69Ko yit-ha-é, ke sṳ́-ńg yu khon-tó kì, chhiu lâu khî chhai sùn-thèu ke ngìn kóng: “Liá-sà he kì-têu tông-chûng ke yit-ke!” 70Pí-tet yu féu-ngin yit-pái.

Yu ko yit-ha-é, sùn-thèu khî-tén ke ngìn chai yit-pái tui Pí-tet kóng: “Ngì khok-sṳ̍t he kì-têu tông-chûng ke yit-ke, yîn-vi ngì ya he Kâ-li-li-ngìn!”

71Pí-tet chhiu fat-sṳ chu-chú kóng: “Ngài m̀-sṳt ngì-têu só-kóng ke ngìn!”

72Chit-sṳ̀, kiê-é chhiu thài thi-ngi-pái#14:72 Yû-têu kú-kién mò “thi-ngi-pái”.; Pí-tet chang sióng-hí Yâ-sû tui kì kóng-ko ke fa: “Kiê-é thài lióng-pái#14:72 Yû-têu kú-kién mò “lióng-pái”. yî-chhièn, ngì voi sâm-pái m̀ ngin ngài.” Pí-tet chhiu ngiûn-m̀-he̍t, kieu chhut-lòi.

Tans Gekies:

Mâ-khó 14: THV12Rdb

Kleurmerk

Deel

Kopieer

Wil jy jou kleurmerke oor al jou toestelle gestoor hê? Teken in of teken aan

Vind meer uit oor HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)

Gewilde Bybelverse vanaf
Mâ-khó 14

Video's vir Mâ-khó 14

Markus 12:41-14:11

Lumo Project

Markus 14:12-52

Lumo Project

Markus 14:53-15:32

Lumo Project

Mâ-khó 14

Gewilde Bybelverse vanaf
Mâ-khó 14

Video's vir Mâ-khó 14

Markus 12:41-14:11

Markus 14:12-52

Markus 14:53-15:32

Bybel:

Hakkafa (Roman script)

Weergawe: HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán) - THV12Rdb

Mâ-khó 14

Mâ-khó 14

Gewilde Bybelverse vanaf Mâ-khó 14

Video's vir Mâ-khó 14

Markus 12:41-14:11

Markus 14:12-52

Markus 14:53-15:32

Bybel:

Hakkafa (Roman script)

Weergawe: HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán) - THV12Rdb

Mâ-khó 14

Gewilde Bybelverse vanaf
Mâ-khó 14